Genèse 20

Abraham a Abimélec

1Te pa Abraham a ndo a herkeda Négeb, a nʼnza a ndev Kadés a Shur. Aman a nza te Guérar, 2a ngaɗa a géɗ Sara, ngwoz na: demam ga. Bi Abimélec, bi Guérar, a nzlündo ndo, da cko Sara a sam na. 3Aman a vad, Bi Zhiklè a ngaɗa na bi Abimélec te nshunè: A vava ka da metsi ngaya, a géɗ ngwoz man ka co; nengaʼa ngwoz ndo. 4Aman Abimélec a mʼmana a vna di bai, a ngaɗa: Ndo nzi pèc pècèk, ka da keɗa ndo man mali na azɓi ɗè? 5Nengaʼa a ngaɗayè a ri na ka bi dè – nengaʼa demam ga! Ngwoz ba a ngaɗa: kramam ga. Skwi man i gau, i hur ara mali ka bai, ri ga nlizh ɓai. 6Bi Zhiklè a mʼmbeɗa na a ma te nshunè: I ba i suna, ka gu ar haha a ka hur ara mali ka bai, a i ba i ɓer ka, aman ka gi mali a sam ga azɓai. A géɗ nengaʼa i va ka civèɗ aman ka lama na bai. 7Gar haha va na ngwoz a deɓa a baki na, nengaʼa ndo nhadka ma. Nengaʼa a da tsi ri a géɗ ngaya, a ka nzi a nshèffè. Aman ka da va na a deɓa azbai, ka da metsi ngaya, a ndohi gi ngaya tèlèba.

8Te mangoslèmaʼa a prèk, Abimélec a nslambaɗa, a mbaha ta golahi nengaʼa, a ngra ta tèlèba, a ndohi nengaʼa ta gi zlau a vata. 9A Abimélec a mbaha na Abraham, a ngaɗa na: I ga ka mè, aman ka fay mali a géɗ, a géɗ kokwar-bi ga ar haha? Ka gu skwi man ambaɓai a sam ga! 10A Abimélec a ngaɗa na Abraham a vaʼa: Aman ka gu ar haha, ka woy a ka ngècè te pa mè? 11A Abraham a mʼmbeɗa na a ma: I hur te ndav ga, ndohi kokwar haha ta gi zlau Zhiklè azbai, ta da keɗyè a géɗ ngwoz ga. 12Nengaʼa demam ga a vava, dem bab ga, nga mba a mama ka bai, a i slaha i cè a ngwoz. 13Aman Bi Zhiklè a ngadayè: jèkeda gi bab ngaya a ko do dra, i gada na ngwoz ga: Aman ka woyè, ka da gèdè a sam tèlèba man nga dè a pa: kramam ga.

14Abimélec a nhul tambakihi a zlèhi a ɓèlèlihi, ngurhi a ngwozi, a mpa na Abraham, ambalai. A mva na Sara, ngwoz nengaʼa, a deɓa. 15Abimélec a ngaɗa: I va ka civèɗ te kokwar man i kworaʼa haha tèlèba. Nza a sam man ka woyaʼa. 16A ngaɗa na Sara: Na haha i va na gurso 1.000 a kramam ngaya, a cèma ka hori auda a dai a sam di ndohi gi ngaya tèlèba; da gu a skwi mpil gèɗ mali ngaya, a sam di ndohi tèlèba. 17A Abraham a ntsu ri a Bi Zhiklè, a Bi Zhiklè a mʼmbel Abimélec, a ngwoz na, a ɓèlhi na, ta ngwozhai, te matakwan, a ta ngots kra. 18Te ndev nasa, Bi Zhiklè a nge ta ngwozi te gi Abimélec a delihai, a géɗ Sara, ngwoz Abraham.

Currently Selected:

Genèse 20: MOF89

Highlight

Copy