Exode 4

1A Moise a mʼmbeɗa na a ma: Aman ta da cè ma ga azbai, a ta fi zlembaɗ a ma ga azbai, a ta gada: Zhiklè a ngudoko ka va a di bai, – kè? 2A Ndo nzi pèc pècèk a ngaɗa na: Nte ri ngaya haha mè? A mʼmbeɗa na a ma: Gada. 3A ngaɗa na: Kalda a herkeda! A nkalda a herkeda, a nʼnde na a zhüzhok, a Moise a nhu na auda a samaʼa. 4A Ndo nzi pèc pècèk a ngaɗa na Moise: Tor ri ngaya a ka gso hutoraʼa! A ntor rai, a ngso, a nʼnde na gada te ri na. 5Aranta ta da cè a ndav, Ndo nzi pèc pècèk a ngudoko ka va a dai, Zhiklè bababhi kinè, Zhiklè Abraham, Zhiklè Isaac, Zhiklè Jacob. 6A Ndo nzi pèc pècèk a ngaɗa na a vaʼa: Tarda ri a gozhèm ngaya! A nengaʼa a ntarda ri a gozhèm na. Nckaʼd na auda, hutsoɗ a va, nslekaɗa kuftorhoʼa. 7A ngaɗa: Feda ri a gozhèm zaʼa! A mfeda ri a gozhèm na, nckaɗ na auda, na haha, nʼngwoda na ara ri ngiɗè zaʼa. 8Aman ta da cè ma ngaya azɓai, a ta cinè azɓai a sam skwi man ka ngra ta nshèlèkuraʼa, ta da cè a sam skwi man ka ngra ta macecèwaʼa. 9Aman ta da cè ma ngaya azɓai a géɗ skwi cèw man ka ngra ta a haha, a ta woy a ta cinè ma ngaya azɓai, gudzko iyam te woyam Nil, badahi a herkeda. A iyam man ka gudzko te woyam Nil, a da ndi na a Pombaz tʼherkeda.

10A Moise a ngaɗa na Ndo nzi pèc pècèk: Ndo nzi pèc pècèk ga, daga man i kra, i nukom-ndo, ko antanta ba, man ka gaɗka na ɓèl ngaya a haha, ma ga a nèʼèn ga amba a ngèd bai. 11A Ndo nzi pèc pècèk a ngaɗa na: Mva na ma a ndo wa? Nʼndèma na zlembaɗ a ndo wa? Mpa na di a ndo wa? Nʼnga ndo a mandazli wa? I Ndo nzi pèc pècèk ka bi dè? 12Gar haha, do i woya man i zhè te ma ngaya, a i ngra ka skwi man ka gèɗèʼa. 13A Moise a ngaɗa: Ndo nzi pèc pècèk ga, zlündo ndo ngiɗè, ko wawa man ka woyaʼa, aman i ka bai! 14A Ndo nzi pèc pècèk a ngu ndav a géɗ Moise, a ngaɗa: Aaron, kramam ngaya, ndo Lévi, azɓi dè? I suna, nengaʼa a gèɗè amba. Na haha na zhè a civèɗ, kin da zli gèɗ a vna. Aman a da rka ka, a da wuffè kumba. 15Menda na ma ngaya, da goɗ ma ngaya! I woy a i zhè te ma ngaya, te ma nengaʼa, a i woy a i slebda kinè skwi man kin da giaʼa. 16Nengaʼa a da gèdè a sam ndohai te di man a ngaya, nengaʼa ma ngaya, ka a sam na ara Zhiklè. 17Ceda gada haha a rai, a ka da gi nrkedihi haha a vna.

Moise a de a deɓa a kokwar Egypte

18A Moise a mʼmen na a deɓa a sam Jéthro, mèsh na, a ngaɗa na: I woy a i dè a deɓa a sam kramamhi ga a kokwar Egypte, a i da rka, ta nza genè dè? A Jéth-ro a ngaɗa na: Do a gumai! 19A Ndo nzi pèc pècèk a ngaɗa na Moise te Madian: Do, men ngay a deɓa a kokwar Egypte. Ndohi man ta woy a ta keɗe ka te va nasa, ta bazl ta ma. 20A Moise a nco ngwoz na, a wudahi na, a mpe ta a deɓ kɗèh, a to do a deɓa a kokwar Egypte. A Moise a nceda gada Zhiklè a rai. 21Ndo nzi pèc pècèk a ngaɗa na Moise: Aman ka da dè a deɓa a kokwar Egypte, suna, nrkedihi haha man i va ka a ri tèlèba, da gu a sam di Pharaon! Aman i da sassaya ndav na, a da va ta civèɗ a ndohi azɓai. 22Te deɓaʼa ka da gada na Pharaon: Ndo nzi pèc pècèk a goɗ ar haha: Israel kra ga, tsuvom ga. 23I fa ka ma a gèɗ: Va na civèɗ a kra ga, da gu mizlinè ga! Aman ka da woya bai, na haha i da keɗa kra ngaya, tsuvom ngaya.

Ta ngela na ngwon a kra Moise

24A civèɗ, a sam man ta mana a pa, Ndo nzi pèc pècèk a mshkè a sam na, a woya a nkeɗaʼa. 25A Séphora a nco kwa man tsagi na mbazla heɓheɓaʼa, a nʼngela mbèbèc ngwon kra na, a nkalda mbèbècèʼa a va Moise, a ngaɗa: Ka baki man ka gi pombaz a va ndo. 26Te deɓaʼa Ndo nzi pèc pècèk a njèkeda. A mbaha na baki mpombaz a va, a gèɗ nʼngél ngwon.

Ta zli gèɗ a Aaron

27A Ndo nzi pèc pècèk a ngaɗa na Aaron: Do a kin dè zli gèɗ a Moise tʼhèshè-kèd! A nengaʼa a mdo, a ta zlü gèɗ a der za Zhiklè, a nkelawa na ri a daʼai a Moise. 28A Moise a nʼngra na ma tèlèba man Ndo nzi pèc pècèk a gada na, a skwi nrkedihi tèlèba, man Zhiklè a ngra na, a Aaron. 29A Moise a Aaron to do a ta ɓic ta ndohi nhalaʼa te Israel tèlèba. 30Aaron a njè ta ma tèlèba, man Ndo nzi pèc pècèk a gada na Moise. A nengaʼa a ngu nrkedi a sam di ndohai. 31A ndohi ta co a ndav. Aman ta tsenaʼa, a ta si Ndo nzi pèc pècèk te va, a nrka matakwan tengaʼa, ta gurɓa-hai a ta kalahi a deɓ sak Zhiklè.

Currently Selected:

Exode 4: MOF89

Highlight

Copy