Exode 3

Vogwa te va vatak

1Moise a wèr tambakhi Jéthro, mèsh na, ndo ncèsl skwai te kokwar Madian. A pats ngiɗè, a lè tambakhi a hèshèkèɗ, a mdo a sam Horeb, za Zhiklè. 2A gol Zhiklè a ngudoko na va a dai te nèʼèn vogwa te va vatak. Moise a nrkaʼa, na haha, vogwa te vaʼa, aman vogwa a ndi vatak ɓai. 3A Moise a nhur te ndav: I woya man i dè a i rka nrkedi mbiaʼa sa, vogwa a ndi vatak azɓai èhèmè. 4A Ndo nzi pèc pècèk a nrka, Moise a dè aman a wèrèʼa. A Zhiklè a mbaha na te va vatak, a ngaɗa: Moise! Moise! A nengaʼa a mʼmbeɗa na a ma: Iyè anai! 5A ngaɗa: Ka hurdko va ɓai! Suɗko kotokoroh auda te sak ngaya, sam man ka zlatsa a pa, sam man Zhiklè a nkezlaʼa. 6A ngaɗa: I Zhiklè bab ngaya, Zhiklè Abraham, Zhiklè Isaac, Zhiklè Jacob. A Moise a nʼngheda di na, a ngu zlau man a pi di a Zhiklè.

Zhiklè a mbaha na Moise

7Ndo nzi pèc pècèk a ngaɗa: I rka matakwan ndohi ga te kokwar Egypte, a i tsena lalau tengaʼa a géɗ ndohi man ta ndzaraha ta a wuɗai. Na haha i sun matakwan tengaʼa. 8A i shkèhai, aman i mbel ta te ri wuɗi ndohi Egypte, a i de ta auda te kokwar haha, a ta dè a kokwar mbiaʼa, man amba, man wa a vongwom a hi te pa, a kokwar ndohi Canaan, Heth, Amor, Phérez, Hévi a Jébus. 9I tsena kuɗ ndohi Israel, a i rka, ara man ndohi Egypte ta zumda ta gèɗ. 10Antanta do, i woya man i zlinde ka a sam Pharaon, aman ka helka ta ndohi ga, ndohi Israel, auda te kokwar Egypte. 11A Moise a ngaɗa na Zhiklè: I wa, man i dè a sam Pharaon, a i helka ta ndohi Israel auda te kokwar Egypte? 12A nengaʼa a ngaɗa: I zhè a sam ngaya. Na haha skwi man i ngreda ka, a ka shinè te pa, iyè nzlinde ka: Aman ka da helka ta ndohi ga auda te kokwar Egypte ma, kin da slébèrdè Zhiklè a der za haha.

13A Moise a ngaɗa na Zhiklè: Na haha, aman i do do a a sam ndohi Israel, a i gada ta: Zhiklè bababhi kinè a nzlindekayè a sam kinè, a ta da dzhaɗyè: Nzlembaɗ na wa? i da mbeɗa ta a ma kè? 14A Zhiklè a ngaɗa na Moise: I nengaʼa man i zhè. A ngaɗa na á vaʼa: Ka da gada ta ndohi Israel ar haha: Nengaʼa man nzlembaɗ na ‘i zhè’, a nzlindekayè a sam kinè. 15A Zhiklè a ngaɗa na Moise a vaʼa: Ka da gada ta ndohi Israel ar haha: Ndo nzi pèc pècèk, Zhiklè bababhi kinè, Zhiklè Abraham, Zhiklè Isaac, Zhiklè Jacob, a nzlindekayè a sam kinè. Nasa nzlembaɗ ga a mèdèp, a i woy a ta bahayè a nzlembaɗaʼa te verzi verzi ndohi tè-lèba.

16Do, a ka ɓic ta ndohi nhalaʼa te Israel, a ka gada ta: Ndo nzi pèc pècèk, Zhiklè bababhi kinè, Zhiklè Abraham, Isaac a Jacob, a ngudokoy va a dai, a ngaɗayè: I pu di a kinè, a i rka skwi man a ga kinè te kokwar Egypte. 17A i hur te gèɗ ga, i woy a i helka kinè auda te matakwan, te kokwar Egypte, a i de kinè a kokwar Canaan, ndohi Héth, Amor, Phérez, Hévi a Jébus, a kokwar man wa a vongwom ta hi te pa. 18A ta da cinè ma ngaya. Aman kinè a ndohi nhalaʼa sèi kin dè a sam bi Egypte, a kin da gaɗa na: Ndo nzi pèc pècèk, Zhiklè ndohi Hébreu, a ngudoko nga va a dai. Va nga civèɗ, a nga dè hèshèkèɗ, nga mènè a civèɗ makar, a nga zli skwi a Ndo nzi pèc pècèk, Zhiklè nga. 19Aman i suna, bi kokwar Egypte a da va kinè civèɗ azɓai, sèi a wuɗai. 20Gar haha i woy a i tèr ri ga, a i tsi kokwar Egypte a nrkedi tsaɗ tsaɗ man i da gia te pa. Te deɓaʼa a da va kinè civèɗ.

21A i gi aman ndohi Israel ta ngècè pombai a sam ndohi Egypte, a kin da dè auda te kokwar Egypte adi genè ka bai. 22Aman ngwozhi kinè staɗ staɗ tèlèba sèi da dzhoɗo skwi wi verzhègenè a guro, a maslaka, nte ri ngwoz man a ntamagi na, a nslamagi na, a kin va ta a va wudahi a dalahi kinè, a kin helama ta skwi auda te ri ndohi Egypte arsa.

Currently Selected:

Exode 3: MOF89

Highlight

Copy