Exode 19

Israel a sam za Sinai

1Te ki mamakaraʼa, te deb man ndohi Israel ta jèkeda kokwar Egypte, a pats nasa, a ta shkè a hèshèkèɗ Sinai. 2Ta slambaɗa te Rephidim, a ta shkè a hèshèkèɗ Sinai, a ta nza a hèshè-kèɗ. A ndohi Israel ta nza zuraʼa a ma za. 3A Moise a ndo a géɗ za Zhiklè. A Ndo nzi pèc pècèk a mbaha na te za, a ngaɗa: Ka da gada ta ndohi gi Jacob, a ka da ngreda ta wudahi Israel aranta: 4Kin rka a di kinè, skwi man i gau a sam ndohi Egypte, ara man i helka kinè a géɗ kelpasl ara mangayak, a i helka kinè a sam ga. 5Anai aman kin woy a kin tsena ma ga, a kin nzi te nderzlè-ma ga, te va ndohi a géɗ herkeda tèlèba, kinè ndohi ga, aman herkeda tèlè a ga. 6Kinè ndohi mvi skwi a Zhiklè, Bai, a sam ga, ndohi ga nkezlaʼa. Na haha ma ga man ka da gada ta ndohi Israel.

7A Moise a mdo, a mbaha ta ndohi nhalaʼa te va ndohai, a ngreda ta ma tèlèba, man Ndo nzi pèc pècèk a njè na. 8A ndohi tèlèba ta goɗ a ma staɗ: Skwi tèlèba man Ndo nzi pèc pècèk a njè nga, nga woy a nga giaʼa. A Moise a mʼmenda na ma ndohi Israel a Ndo nzi pèc pècèk. 9A Ndo nzi pèc pècèk a ngaɗa na Moise: Na haha i da shkè a sam ngaya te va vanai ngalngalaʼa, a ndohi ta da tsena, aman nga gèɗè a ka, a ta da fi gèɗ a ka a mèdèp. A Moise a mʼmenda ta ma Ndo nzi pèc pècèk a ndohi Israel. 10A Ndo nzi pèc pècèk a ngaɗa na Moise: Do a sam ndohai, a ta til ndav a patsna, angoslèm, a ta pana maslaka ta. 11Anvakastaɗ ta tila ma. Aman anvakastaɗ, Ndo nzi pèc pècèk a di a shkè a géɗ za Sinai a sam di ndohi tèlèba. 12Pa kuma a der za tèlèba, a ka gada ta ndohai: Va-gu maya, kin teva za bai, kin da lama na der za bai! Ndo man a da lama na za, a metsi na. 13Ko ri staɗ da lama na bai! Ta kèlè a kwa, ta ɓèrè a sulom, ko skwi ndzham, ko ndo, ta da jèka na nshèffè azbai. Aman ta tsi tolom a ndèle azɓai, sèi ta tivè za.

14Te deɓaʼa Moise a nshkèhi te za a sam ndohai, a njè ta ma a gèɗ, aman ta til ndav ta, a ta pènè maslaka. 15A ngaɗa ta ndohai: Angoslèm a woy kin tila! Ndo da mana a ngwoz bai! 16Te mʼmèn mamakaraʼa a prèk, iyam a tsai, a iyam a ndi dai, a vani ngalngalaʼa a zhè a géɗ za, a tolom a ntsau, a ndèlè azbai, a ndohi a samaʼa ta gudzai. 17A Moise a nhel ta ndohi a samaʼa, a ta zli gèɗ a Bi Zhiklè, a ta zlatsahi a verzi za. 18Za Sinai te va vodzok, a géɗ man Ndo nzi pèc pècèk a mshkè te va vogwa. A vodzok a ndo a géɗèʼa, ara vodzok gezla. Za tèlèba a gidè va, a vata. 19Tolom a slhè, a ndèlè azbai, holholaʼa. A Moise a gèdè, a Ndo nzi pèc pècèk a mbeɗka na a ma te ntsi iyam. 20A Ndo nzi pèc pècèk a nshkèhi a géɗ za aranta, te za a gédèʼa, a mbaha na Moise a géɗ za, a Moise a ndo a pa.

21Ndo nzi pèc pècèk a ngaɗa na Moise: Sulomahai, gaɗa ta ndohai, da gu maya, da herde va bai, da rka Ndo nzi pèc pècèk bai. Man bai ta da bèzl ta kumba. 22A ndohi mvi skwi a Zhiklè ba, man ta slaha ta herda na va a Ndo nzi pèc pècèk, sèi ndav ta a ntila, a géɗ man Ndo nzi pèc pècèk a da bazl ta. 23A Moise a ngaɗa na Ndo nzi pèc pècèk: Ndohi ta slaha ta tivè a géɗ za Sinai azbai. Ka a ri ngaya ka gaɗa: Va-gu maya, va-pa kuma a der za, ka sla na nkezlaʼa. 24A Ndo nzi pèc pècèk a ngaɗa na: Do a hai, a ka da shkè a géɗ za zaʼa, kinè a Aaron. Aman ndohi mvi skwi a Zhiklè, a ndohai, sèi da herde va bai, ta dè a géɗ za a sam Ndo nzi pèc pècèk azbai, a géɗ man ta da bèzl ta. 25A Moise a ndo a hi a sam ndohai, a ngra ta ar haha.

Currently Selected:

Exode 19: MOF89

Highlight

Copy