Exode 18

Jéthro a dè a sam Moise

1Jéthro, ndo ncèsl skwai te Madian, mèsh Moise, a ntsena skwi man Zhiklè a ngau a sam Moise, a sam ndohi Israel, ndohi Zhiklè, ara man Ndo nzi pèc pècèk a helka ta ndohi Israel auda te kokwar Egypte. 2A Jéthro, mèsh Moise, a nco Séphora, ngwoz Moise, man Moise a ndaʼa a gi bab na, 3a wudahi nengaʼa cèw. Staɗ, nzlembaɗ na Guershom, te man a gada: I mbrok te kokwar man a ga ka bai. 4Ngiɗè Eliézer, te man a gada: Zhiklè bab ga a takahayè, a mbelyè te ri tsakwal Pharaon. 5Jéthro, mèsh Moise, a mshkè a sam Moise a hèshèkèɗ, a nda wudahai, a nda ngwoz Moise, a sam man Moise a nza a pa, a der za Zhiklè. 6A ngaɗa na Moise: Iyè, Jéthro, mèsh ngaya, i shkè a sam ngaya, a nda ngwoz ngaya a wudahi nengaʼa cèw. 7A Moise a mdo a ta zli gèɗ a mèsh na, a ngurɓahai, a nʼnga na mbalai. Aman ta ga mbali a va ma, to do a gai. 8A Moise a nʼngra na mèsh na skwi tèlèba man Ndo nzi pèc pècèk a ga na Pharaon a ndohi Egypte, a géɗ Israel, matakwan tèlèba man a ga ta a civèɗ, ara man Ndo nzi pèc pècèk a pra ta auda te vaʼa. 9Jéthro a wuffè a géɗ skwi man amba tèlèba, man Ndo nzi pèc pècèk a ngu a sam ndohi Israel, aman a mpre ta auda te ri ndohi Egypte. 10A Jéthro a ngaɗa: I shid gèɗ a Ndo nzi pèc pècèk, man a mbel kinè auda te ri ndohi Egypte, te ri Pharaon. 11Anai i suna, Ndo nzi pèc pècèk mbiaʼa, a fena zhiklèhi ngiɗè tèlèba. A géɗ man ndohi Egypte ta gra gèɗ ta aranta, a mpre ta ndohi auda te ri ta. 12A Jéthro, mèsh Moise, a nʼndara na skwi a Zhiklè, a nzla na skwi a Zhiklè, a Aaron a ndohi Israel nhalaʼa tèlèba ta shkè, aman ta ndi skwi a nda mèsh Moise, a sam di Zhiklè.

Ta pi ndohi kita

13Te mangoslèmaʼa, Moise a nʼnzahai, aman a bèzlè kita a ndohai. Ndohi ta zlatsa a sam Moise daga prèk, ha dakwaɗ. 14Aman mèsh Moise a nrka mizlinè nengaʼa tèlèba a sam ndohai, a ngaɗa: Ka gi a sam ndohi haha mè? Ka nzi a ka gi mizlinè a géɗ ngaya, a ndohi ta shkè daga prèk ha dakwaɗ, èhèmè? 15Moise a mʼmbeɗa na a ma a mèsh na: Ndohi ta shkè a sam ga, aman ta jhèɗè Zhiklè. 16Aman ma ta a zhè, ta shkè a sam ga, i ngela ta maʼa, a i ngra ta ma man Zhiklè a ngra nga. 17A mèsh nengaʼa a ngaɗa na: Ambaɓai aman ka gi ar haha. 18Ka kéɗ va ngaya, a ka ngez ta ndohi haha man ta zhè a sam ngaya holholaʼa. Skwi haha a fena wuɗi ngaya, ka slaha ka gi a géɗ ngaya azbai. 19Tsun ma man i ngra ka; Zhiklè da zhè a sam ngaya! Ga a ndo nʼnza ta deɓa a ndohai, a ka menda na ma ndohi a Zhiklè. 20Ngra ta ma kita a ma nkwèr tèlèba, a ka ngra ta civèɗ man ta dè a pa, a skwi man a woy ta giaʼa. 21Por ndohi man maya ta zhè, a ta gi zlau Zhiklè, ndohi nzuraʼa, man ta ngwèdè ri azbai, pe ta a tsuvom ndohai a géɗ go-zhèm, a géɗ 100, a géɗ 50, a géɗ 10, 22a ta cèmma a nda ndohai ko a ngèmè ngèmè. Ma mbiaʼa sèi ta da ckoɗa sam ngaya. 23Aman ka gi ara haha, Zhiklè ba a gada ka arsa, ka slaha ka dè a ma ma, a ndohi ngaya tèlè ta wuffè. 24A Moise a nfu gèɗ a ma mèsh na, a ngu tèlèba man a gada na. 25Moise a mpar ta ndohi te va ndohi Israel, man maya ta zhè, a mpe ta a ndohi tsuvoma a géɗ gozhèm, a géɗ 100, a géɗ 50, a géɗ 10, 26a ta cèmma a sam ndohai ko a ngèmè ngèmè. Ma mwuɗitpa ta da ckoɗa sam Moise, a ma man wuɗi a te pa bai, ta da ndeva skwi ta, a ri ta. 27A Moise a mèsh na ta kezla gèɗ, a Jéthro a ndo a deɓa a kokwar na.

Currently Selected:

Exode 18: MOF89

Highlight

Copy