Exode 12
12
Pâque
1Te deɓaʼa Ndo nzi pèc pècèk a ngaɗa ta nda Moise a Aaron te kokwar Egypte: 2A ki haha, a gi a nshèlè-kur ki kinè. A hinè te nengaʼa, a kin ngrè ki kinè a mvi a mvai. 3Va-gaɗa ta mpi ndohi Israel tèlèba: Te mʼmèn makulaʼa, a ki haha, staɗ staɗ tèlèba da co kra tambak; kra tambak staɗ staɗ te gi te gai, ara ndohi gi na. 4Aman te gi staɗ ndo te pa kumba ɓai, ta mbi a pa a nslamagi na, man ta a nslamagi a vna, ta ara man ta mba gai, kra tambak staɗ, ara man kin da ndaʼa. 5Skwi slavslav kata, man mvi stadgenè, ko kra tambak, ko kra ɓok. 6A kin fedahi ha mʼmèn 14 te ki haha. Te deɓaʼa mpi ndohi Israel ta da zlèhaʼa, a dakwaɗ. 7Pombazaʼa ta faɗda a ntamagai, a tsagiaʼa cèw, a ntatak ntamagai, te gi man ta ndi skwi te pa. 8Zluèɗ sèi ta ndi a vad sa. Ta pinèʼa a ta ndiaʼa, a movar man skwi nshégèrèʼa a te di ɓai, a lak ndertiktikaʼa. 9Kin ndau adi bai, kin tau te iyam ɓai, sèi kin pinè mpinè. A gèdè ba, a fihiaʼa ba, a skwi hwaɗaʼa ba. 10A kin da jèkahahi a mangoslèm ɓai; aman njèkèdiaʼa a zhè, kin wusheda vogwa, a vogwa a nʼndedama.
11Va-ndau arsa: Va kinè ndzawaʼa, kotokoroh te sak kinè, gada te rai. Va-ndau a géɗ mhai, da nda a Pâque Ndo nzi pèc pècèk. 12A vaɗ sa i dè a i bizhè a ndev kokwar Egypte tèlèba, a i bazl ta tsuvomhi tèlèba te kokwar Egypte, tsuvom ndohai, a tusvom skwi ndzham, a i ga ta kita a zhiklèhi ndohi Egypte tèlèba. Iyè Ndo nzi pèc pècèk. 13A Pombaz man a ntamagai a ngrayè gi man kinè te pa, a gi a skwi man a ɓer kinè. Aman i da rka Pombaz, i dè ga auda a samaʼa, a i da lama kinè azbai, a pats man i da gédèshè kokwar Egypte.
14A pats nasa da ga a pats man kin hérèʼa pèc pècèk, a kin fu a ngolalaʼa a Ndo nzi pèc pècèk, a ndè a ma te verzi kinè, a ma nkwèr kinè a mèdèp, a kin gu ngolalaʼa. 15Mʼmèn 7, va-ndau movar man skwi nshégèrè a te di bai. A pats nshèlèkuraʼa kin wusheda skwi nshégèr movar te gi kinè aussa. Ko wawa man a ndi movar man skwi nshégèrè te dai, ta da zeda nshèffè nengaʼa te va ndohi Israel. A gi arsa, a hinè a pats nshèlèkuraʼa, a ndè a pats matsaraɗaʼa. 16A pats nshèlèkuraʼa ndohi nkezlaʼa ta bicè va, lèmèlèmè a pats matsaraɗaʼa. Kin gu mzilinè bai, sèi mizlinè skwi nʼndai, a pats nasa. 17Va-gau ngolala movar man skwi nshégèrèʼa a te di ɓai. Aman a pats nasa i de ta nhèyè ndohi Israel auda te kokwar Egypte. A géɗ nengaʼa sèi kin hér pats sa a ndè a ma ma te verzi kinè tèlèba a ma nkwèr kinè a mèdèp.
18A pats makula a géɗè faɗaʼa, te ki nshèlèkuraʼa, a dakwaɗ, va-ndau movar man skwi nshégèrèʼa a te di ɓai, ha dakwaɗ te pats makulkulcèw a géɗèʼa staɗaʼa te ki sa. 19Mʼmèn 7 a woy skwi nshégèr movar te gi kinè asaɓai. Ko wawa man a ndi movar man skwi nshégèrèʼa te dai, ta da zedekona nshèffè nengaʼa auda te va mpi ndohi Israel, ko ndo mbrok, ko kra ngwai. 20Kin ndau movar man skwi nshégèrè te di ɓai! Te gi tèlèba, va-ndau sèi movar man skwi nshégèrè a te di ɓai!
21Moise a mbaha ta ndohi nhalaʼa te Israel tèlèba, a ngaɗa ta: Va-hul tambakihi tsam-tsam, te gi staɗ staɗ tambak staɗ staɗ tèlèba, vo-zlohö skwi Pâque! 22Te deɓaʼa vo-co sopor dau, va-neceda Pombaz te gandaf, va-faɗda pombaz te gandaf a ntatak ntamagai, a tsagi ntamagi cèw. Ha ndè ma a prèk, te va kinè do do auda te gi ɓai! 23Ndo nzi pèc pècèk a da bizhè a ndev kokwar, aman a bazl ta ndohi Egypte. Aman Ndo nzi pèc pècèk a rka Pombaz a ntatak ntamagai, a tsagi ntamagi cèw, a dè na auda a ntamagi kinè, a gol Zhiklè man a mberɗama ta daʼai a bazl ta a dè a gi kinè aman a bazl kinè, azbai. 24Ma nkwèr haha kin jèjèrèʼa, kinè a wudahi kinè, ara ma nkwèr ntilaʼa a mèdèp. 25Aman kin do a kokwar man Zhiklè a woya a va kinè, ara man a mpasla kinè rai, kin gi arsa pèc pècèk, skwi haha da ga a tsuf kinè nkezlaʼa. 26Aman wudahi kinè ta da jhèɗè te ri kinè: Di skwi man nga gia a haha, verzi nengaʼa a shkè tema? 27Kin da gada ta: Nengaʼa Pâque, man ta zloho a sam Ndo nzi pèc pècèk, a géɗ man a mbeza na auda a sam gi ndohi Israel te kokwar Egypte, aman a mbazl ta ndohi Egypte; aman gi nga, a nlama na bai. A ndohi tèlèba ta gurɓahai a ta kalahi a deb sak tengaʼa. 28A ndohi Israel to do a gai, a ta gu ara man Ndo nzi pèc pècèk a njè ta a nda Moise a Aaron; a ta gu arsa.
Mʼmetsi tsuvomhi
29A géɗ vad, Ndo nzi pèc pècèk a mbazl ta tsuvomhi te kokwar Egypte tèlèba, a hinè a sam tsuvom Pharaon man a nza a géɗ sam nʼnzi bai, a ndè a ma a tsuvom bèlè te dangai, a tsuvom skwi ndzham. 30A Pharaon a nslambaɗa a vad sa, nengaʼa a golahi nengaʼa tèlèba, a ndohi Egypte tèlèba, a lalau mbiaʼa a ngu te kokwar Egypte. Gi ko staɗ azɓai, man ndo mʼmetsa a pa ɓai. 31A vaɗ sa a mbaha na Moise a Aaron, a ngaɗa: Va-slambaɗa, va-gu mizlinè Zhiklè kinè, ara man kin goɗa. 32Va-helda tambakihi a zlèhi a rai, ara man kin goɗa, vo-do, va-gu aman i ba i ngècè mpshè ma. 33A ndohi Egypte ta vas ta ndohai, aman ta jèke kokwar Egypte tsam-tsam, aman ta gada: Man bai nga da bèzl nga tèlèba. 34A ndohi ta hul mɓelaslasla tengaʼa, ga a shégèr na, ta manda gandaf a maslaka ta, a ta feda a daʼai. 35A ndohi Israel ta gau, ara man Moise a gada ta. Ta dzhoɗo skwi wai te ri ndohi Egypte, verzhègenè a guro a maslaka. 36A Ndo nzi pèc pècèk a mva ta pombai a ndohai a sam ndohi Egypte, a ta va ta skwi man ta dzhoɗo. Aranta ta helama ta skwi a ndohi Egypte.
Ndohi Israel te jèkede kokwar Egypte
37A ndohi Israel ta slambaɗa te Ramses, a ta de Succoth. Ndohi a gi 600.000 ta de a sak, wudahi ta nger ta a va bai. 38Ndohi dala kumba to do a nda tengaʼa, a tambakihai, a zlèhai, skwi ndzham rèdèdèa. 39A ta tu mɓelaslasla man ta ckoɗa ri te kokwar Egypte, a ta ndau te di movar man skwi nshégèrèʼa a te di ɓai, a géɗ man ta dzamka ta auda te kokwar Egypte, ta ga ndodoh asaɓai, ta tila skwi nʼndi a hi man ta ndi a civèɗ bai. 40Ndohi Israel ta nza a kokwar Egypte, mvi 430. 41Te deb mvi 430, a pats sa, nhèyè ndohi Ndo nzi pèc pècèk ta jèkeda kokwar Egypte. 42Nasa vad man ta mana a dai, nkezlaʼa a sam Ndo nzi pèk pècèk, aman a nde ta auda te kokwar Egypte. Nasa vad nkezlaʼa a sam Ndo nzi pèc pècèk a nde a ma ma te verzi ndohi Israel.
43A Ndo nzi pèc pècèk a ngaɗa ta nda Moise a Aaron: Na haha ma Pâque: Ndo dala da ndau nengaʼa bai! 44Ɓèl staɗ staɗ tèlèba man ta suma a sulai, da ndau, aman sèi ngwon nʼngela. 45Ndo dala, a ndo man a gi mizlinè sulai a sam ta, da ndau nengaʼa bai. 46Ta ndiaʼa te gi staɗ. Kin hul zluèɗ auda te gi bai, kin pasla vatasl a va ɓai. 47Mpi ndohi Israel tèlèba da gau ngolalaʼa. 48Aman ndo man a shkè te verzi ngiɗè a zhè a sam ngaya, a woya a ngi ngolala a sam Ndo nzi pèc pècèk, ngolala Pâque, sèi ta ngela na ngwon a wudahi nengaʼa tèlèba man nguraʼa, nguraʼa. Te deɓaʼa da shkè, da gau ngolala, ara wud ngwihai. Aman ndo man ngwon nʼngel bai, da ndau te nengaʼa ɓai. 49Ma kita haha lèmèlèmè, a sam wud ngwihai, a ndohi mbrokihai, man ta nzi a sam kinè.
50A ndohi Israel tèlèba ta gau, ara man Ndo nzi pèc pècèk a njè ta nda Moise a Aaron: a ta gu arsa. 51A pats nasa, Ndo nzi pèc pècèk a nde ta ndohi Israel auda te kokwar Egypte, ara mbicè va ta, ara nhèyè va ta.
Currently Selected:
Exode 12: MOF89
Highlight
Share
Copy
Want to have your highlights saved across all your devices? Sign up or sign in
Alliance Biblique du Cameroun 1989
