यहून्ना 16
16
1 “जे बात मैंनै तुमसै इसताँई कैंई हैं, कहीं तुम बिसवास सै ना हट जाँय। 2बे तुमकै पिराथना घर सै बाहार कर दंगे, पर बौ टैम आ रओ है कै जो कोई तुमकै मार डारैगो, बौ जौ समजैगो कै परमेसर की सेवा कर रओ हौं। 3और बे ऐंसो इसताँई करंगे कैसेकै उनौनै ना तौ अब्बा जानो और ना मैं। 4और जे बात मैंनै इसताँई कैंई हैं कै जब टैम आगो तौ तुमकै याद रैहए कै मैंनै तुमकै उनके बारे मै बता दओ हो, और जे बात मैंनै तुमसै सुरू मै इसताँई ना कैंई कैसेकै मैं तुमरे संग हो।
पबित्तर आत्मा के काम
5 “पर अब मैं अपने भेजनै बारे के धौंरे जा रओ हौं, और तुम्मै सै कोई मैंसै ना पूँछतो, ‘तू कहाँ जा रओ है?’ 6पर मैंनै जो बात तुमसै कैंई हैं, उनकै सुनकै तुमरो दिल दुख सै भर गओ है। 7पर मैं तुमसै सच कैबौ हौं कै मेरो जानो तुमरे ताँई अच्छी बात है, कैसेकै अगर मैं ना जांऔ तौ बौ सायता कन्नै बारो तुमरे धौंरे ना आगो, पर अगर मैं जांऔ तौ बाकै तुमरे धौंरे भेज दंगो। 8और जब बौ आगो तौ पाप, धरम के काम और परमेसर के नियाय के बारे मै दुनिया को सक दूर करैगो। 9बे मेरे ऊपर बिसवास ना करते, इसताँई कै बे पाप के बारे मै गलत हैं। 10कैसेकै मैं अब्बा के धौंरे जाबौ हौं, और तुम मैंकै फिर ना देख पाऔगे इसताँई कै धरम के काम के बारे मै तुम लोग गलत हौ। 11इसताँई कै दुनिया को अधकारी दोसी मानो गओ है, कैसेकै बे परमेसर के नियाय के बारे मै गलत हैं।
12 “मैंकै तुमसै और बी भौत सी बात कैनी हैं, पर तुम अबी उनकै सैह ना सकौ हौ। 13पर जब बौ यानी सच्चाई को आत्मा आगो तौ बौ तुमकै सब सच्चाई के रस्ता बतागो, कैसेकै बौ अपनी ओर सै कुछ ना कैगो, पर जो कुछ सुनैगो, बौई कैगो और आनै बारी बातौं कै तुमकै बतागो। 14बौ मेरी बड़ाई करैगो, कैसेकै बौ मेरी बातौं कै सुनकै तुमकै बतागो। 15जो कुछ अब्बा को है बौ सब मेरो है, इसताँई मैंनै कैई, बौ मेरी बातौं कै सुनकै तुमकै बतागो।
दुख, खुसी मै बदल जागो
16 “थोड़ी देर मै तुम मैंकै ना देखौगे, और फिर थोड़ी देर मै तुम मैंकै देखौगे।”
17तब बाके कुछ चेलौ नै आपस मै कैई, “जौ का बात है जो बौ हम सै कैरओ है कै, ‘थोड़ी देर मै तुम मैंकै ना देखौगे, और फिर थोड़ी देर मै तुम मैंकै देखौगे, कैसेकै मैं अब्बा के धौंरे जा रओ हौं?’” 18और बे कैललगे, “जौ ‘थोड़ी देर बाद’ का है? हमरी समज मै ना आ रओ है जिसके बारे मै बौ बता रओ है।”
19ईसु नै जौ जानकै कै बे मैंसै सबाल कन्नो चाँहबै हैं, उनसै कैई, “का तुम जा बात के बारे मै आपस मै सोच-बिचार कर रए हौ, जो मैंनै कैई, ‘थोड़ी देर मै तुम मैंकै ना देखौगे, और फिर थोड़ी देर मै तुम मैंकै देखौगे?’ 20मैं तुमसै सच-सच कैबौ हौं कै तुम रोओगे और बिलाप करौगे, पर दुनिया खुस होगी। तुमकै दुख होगो, पर तुमरो दुख खुसी मै बदल जागो। 21जब कोई बईयर बालक जननै लगै है, तब बाकै दरद होवै है कैसेकै बाको टैम आ चुको है। मगर जब बौ बालक कै जलम दे चुकी होवै है, तौ इस खुसी सै कै एक बालक जा दुनिया मै पैदा भओ है बौ खुस होवै है और अपने दरद कै भूल जावै है। 22और तुमकै बी अब तौ दुख है, पर मैं तुमसै फिर मिलंगो और तुमरो दिल खुस होगो, और तुमरी खुसी कै कोई तुमसै छीन ना सकैगो। 23बा दिन तुम मैंसै कोई सबाल ना पूँछौगे। मैं तुमसै सच-सच कैबौ हौं, अगर तुम अब्बा सै मेरे नाम सै जो कुछ बी माँगौगे, तौ बौ तुमकै देगो। 24अब तक तुमनै मेरे नाम सै कुछ ना माँगो; माँगौ और तुमकै मिलैगो जिस्सै तुमकै पूरी खुसी मिलै।
दुनिया के ऊपर जीत
25 “जे बात मैंनै तुमसै दासतान मै कैई हैं, पर बौ टैम आ रओ है जब मैं फिर तुमसै दासतान मै ना कैंगो, पर तुमकै अब्बा के बारे मै साप-साप बताँगो। 26बा दिन तुम मेरे नाम सै माँगौगे, मैं तुमसै जौ ना कैंगो, कै मैं तुमरे ताँई अब्बा सै बिनती करंगो। 27कैसेकै अब्बा खुद तुमसै पियार करै है, इसताँई कै तुमनै मैंसै पियार करो है और जौ बिसवास करो है, कै मैं अब्बा मै सै लिकरकै आओ हौं। 28मैं अब्बा सै लिकरकै दुनिया मै आओ हौं, मैं फिर दुनिया कै छोड़कै अब्बा के धौंरे जा रओ हौं।”
29बाके चेलौ नै कैई, “देख अब तू बिना किसी दासतान के साप-साप बता रओ है। 30अब हम जानै हैं कै तू सब कुछ जानै है, और इसकी जरूरत ना है कै कोई तेसै सबाल पूँछै। जासै हम बिसवास करै हैं कै तू परमेसर सै लिकरो है।”
31ईसु नै जबाब दओ, “का तुम अब बिसवास करौ हौ? 32देखौ, बौ टैम आ रओ है, बलकन आई गओ है कै तुम तितर बितर होकै अपने अपने घर कै चले जाऔगे और मैंकै इकलो छोड़ दोगे, फिर बी मैं इकलो ना हौं, कैसेकै अब्बा मेरे संग है। 33मैंनै जे बात तुमसै इसताँई कैंई कै मेरे दुआरा तुमकै सान्ति मिलै। दुनिया मै तुमकै दुख मिलो है मगर हौसला रक्खौ, मैंनै दुनिया जीत लई है।”
Currently Selected:
यहून्ना 16: TKB
Highlight
Share
Copy
Want to have your highlights saved across all your devices? Sign up or sign in
New Life Compute Institute [NLCI] - CC BY-NC-ND 4.0
