यहून्ना 13
13
ईसु कै अपने चेलौ के पाँऐऔं कै धोनो
1अब फसै को तौहार धौंरेई हो। ईसु कै जौ पतो हो कै मेरी घड़ी आ गई है कै मैं दुनिया छोड़कै अब्बा के धौंरे जांऔ। जिन लोगौ कै बौ इस दुनिया मै पियार करतो आओ हो उनसै आखरी तक बैसेई पियार करो। 2और खानै के टैम मै जब सैतान पैलेई सै समौन के लौंड़ा यहूदा इसकरोती के मन मै जौ बात डार चुको हो कै बौ बाकै धोके सै पकड़बागो, 3ईसु जानै हौ कै अब्बा नै सब कुछ मेरे हातौ मै दे दओ है, और मैं परमेसर के धौंरे सै आओ हौं और परमेसर के धौंरे बापस जा रओ हौं। 4इसताँई बौ खानो छोड़कै खड़ो हो गओ। बानै अपने ऊपर के लत्ता लिकारकै एक लंग रख दए और गमछा लेकै अपनी कमर मै बांधो। 5उसके बाद बानै एक तसला मै पानी भरो और चेलौ के पाँऐ धोए और जो गमछा बानै अपनी कमर मै बांधो हो बासै उनके पाँऐ पछौनल लगो।
6और बैसेई बौ समौन पतरस के धौंरे आओ। पतरस नै बासै कैई, “हे परभु, का तू मेरे पाँऐ धो रओ है?” 7ईसु नै जबाब देते भए बासै कैई, “मैं जो करौ हौं, तू बाकै अबी ना समज सकै है, पर तू इसके बाद समजैगो।” 8पतरस नै बासै कैई, “तू मेरे पाँऐ कबी ना धोनै पागो।” ईसु नै बाकै जबाब दओ, “अगर मैं तेकै ना धोऔं तौ मेरे संग तेरो कुछ बी रिस्ता ना है।” 9समौन पतरस नै बासै कैई, “परभु, पाँऐई ना पर मेरे हात और खोपड़ी बी धो दे।”
10ईसु नै बासै कैई, “जो नहालओ है बाकै तौ बस अपने पाँऐ कैई धोनै की जरूरत है, कैसेकै बौ बाहार सै सुद्द है और तुम सुद्द हौ, पर तुम्मै सबके सब ना।” 11बौ तौ बाकै जानै हो जो बाकै धोके सै पकड़बानै बारो हो, और जाई बजै सै बानै कैई, “तुम सबके सब सुद्द ना हौ।”
12 #
लूका 22:27
और जब बौ उनके पाँऐ धो चुको और अपने लत्ता पैहरकै अपनी जघै मै बैठ गओ, तौ उनसै कैई, “का तुम समजे कै मैंनै तुमरे संग का करो है? 13तुम मैंकै गुरू और परभु कैबौ हौ। तुम ठीकई कैबौ हौ, कैसेकै मैं बौई हौं। 14अगर मैंनै परभु और गुरू होकै बी तुमरे पाँऐ धोए, तौ तुमकै बी एक दूसरे के पाँऐऔं कै धोनो चँईऐ। 15कैसेकै मैंनै तुमरे सामने एक उदाहरन रखो है कै तुम बी बैसोई करौ जैसो मैंनै तुमरे संग करो। 16#मत्ती 10:24; लूका 6:40; यहून 15:20मैं तुमसै सच-सच कैबौ हौं कै नौकर अपने मालिक सै बड़ो ना है, और नाई भेजो भओ अपने भेजनै बारे सै बड़ो होवै है। 17तुम इन बातौं कै जानौ हौ, अगर बामै चलौगे तौ परमेसर की बरकत तुमरे ऊपर रैहगी।
18 “मैं तुम सबई के बारे मै ना कैबौ हौं। मैं उनकै जानौ हौं जो मैंनै चुन लए हैं, पर जौ इसताँई है, कै पबित्तर सास्तर को जौ बचन पूरो भओ कै ‘बौ जो मेरी रोटी खावै है, बौई मेरे बिरोद मै हो गओ।’ 19जाके होनै सै पैलेई मैं तुमकै अबी बता रओ हौं, जिस्सै कै जब जौ पूरो हो जाऐ तौ तुम बिसवास करौ कै मैं बौई हौं। 20#मत्ती 10:40; मरकु 9:37; लूका 9:48; 10:16मैं तुमसै सच-सच कैबौ हौं कै जो मेरे भेजे भए को सुआगत करै है, बौ मेरो सुआगत करै है, और जो मेरो सुआगत करै है बौ मेरे भेजनै बारे को सुआगत करै है।”
बिसवासघात कन्नै बारे की ओर इसारो
(मत्ती 26:20–25; मरकुस 14:17–21; लूका 22:21–23)
21जौ कैनै के बाद ईसु भौत उदास भओ और जौ गभाई दई, “मैं तुमसै सच-सच कैबौ हौं, तुम्मै सै एक मैंकै धोको देकै पकड़बागो।”
22तब बाके चेला एक दूसरे की ओर देखल लगे। बे समज ना सके कै बौ किसके बारे मै कैरओ है। 23बाके चेलौ मै सै एक चेला ईसु की छाती की ओर झुक्कै बैठो भओ हो। जिस्सै ईसु पियार करै हो। 24तब समौन पतरस नै बाकै इसारो करो कै ईसु सै पूँछ, “बौ कौन हो सकै है जिसके बारे मै ईसु बता रओ हो।”
25ईसु के पियारे चेला नै धौंरे सै बाके छाती की ओर झुक्कै बासै पूँछी, “हे परभु, बौ कौन है?”
26तब ईसु नै जबाब दओ, “जिसकै मैं रोटी को टुकड़ा कटोरा मै डूबैकै दंगो, बौई है।” तब बानै रोटी को टुकड़ा कटोरा मै डूबैकै समौन के लौंड़ा यहूदा इसकरोती कै दओ। 27और टुकड़ा लेतेई सैतान बामै बर गओ। इसताँई ईसु नै बासै कैई, “तेकै जो कन्नो है, जल्दी कर।” 28पर जो मेज मै रोटी खानै बैठे हैं उनमै सै कोई ना जान पाओ कै बानै जौ बात बासै किस ताँई कैई। 29कुछ नै सोची कै रुपियौ की थैलिया यहूदा के धौंरे रैहबै है इसताँई ईसु बासै कैरओ हो कै तौहार के ताँई जरूरी सामान मोल ले आय या कैरओ है कै गरीबौ कै बौ कुछ दे दैए। 30इसताँई यहूदा नै रोटी को टुकड़ा लेओ और तुरन्त बाहार चले गओ, और बौ रात को टैम हो।
परभु की नई आगियाँ
31बाके चले जानै के बाद ईसु नै कैई, “आदमी के लौंड़ा की अब महिमा भई और बाके दुआरा परमेसर की बड़ाई भई है। 32अगर बाके दुआरा परमेसर की बड़ाई भई है तौ परमेसर अपने दुआरा बाकी महिमा करैगो और बौ महिमा जल्दी देगो।
33 #
यहून 7:34
“बालकौ, मैं और थोड़ी देर तक तुमरे संग हौं। तुम मैंकै ढूंड़ौगे और जैसो कै मैंनै यहूदिऔं सै कैई तुमसै बी बैसोई कैबौ हौं कै जहाँ मैं जानै बारो हौं बहाँ तुम ना आ सकौ हौ।
34 #
यहून 15:12,17; 1 यहून 3:23; 2 यहून 1:5 “मैं तुमकै एक नई आगियाँ देवौ हौं कै तुम एक दूसरे सै पियार करौ। जैसो मैंनै तुमसै पियार करो है बैसेई तुम बी एक दूसरे सै पियार करौ। 35अगर तुम आपस मै पियार करौगे तौ जाई सै सब जानंगे कै तुम सब मेरे चेला हौ।”
पतरस के इनकार कन्नै के बारे मै ईसु को कैनो
(मत्ती 26:31–35; मरकुस 14:27–31; लूका 22:31–34)
36समौन पतरस नै बासै कैई, “परभु तू कहाँ जा रओ है?” ईसु नै जबाब दओ कै, “जहाँ मैं जा रओ हौं, तू अबी बहाँ मेरे पीछे ना आ सकै है, पर जाके बाद तू आगो।”
37पतरस नै बासै कैई, “परभु मैं अबी तेरे पीछे काए ना आ सकौं हौं? मैं तौ तेरे ताँई अपनी जान बी दे दंगो।”
38ईसु नै जबाब दओ, “का तू मेरे ताँई अपनी जान देगो? मैं तेसै सच-सच कैबौ हौं कै मुरगा के बोलनै सै पैले तू तीन दफै मैंकै पैचान्नै सै इनकार करैगो।”
Currently Selected:
यहून्ना 13: TKB
Highlight
Share
Copy
Want to have your highlights saved across all your devices? Sign up or sign in
New Life Compute Institute [NLCI] - CC BY-NC-ND 4.0
