यहून्ना 12
12
ईसु के पाँऐ मै मैहंगो ईत्तर लगानो
(मत्ती 26:6–13; मरकुस 14:3–9)
1फिर फसै तौहार के छै दिन पैले ईसु बैतनिया मै आओ जहाँ लाजर हो, जिसकै ईसु नै मरे भएऔं मै सै फिर जिन्दो करो हो। 2बहाँ उनौनै बाके ताँई रोटी बनाई, और मारथा सेवा कर रई ही। बाके संग जो रोटी खानै के ताँई बैठे हे, उनमै सै एक लाजर बी हो। 3#लूका 7:37,38तब मरियम नै जटामाँसी पौधा सै बनाओ भओ, पाऔ भर कीमती मैहंगो ईत्तर लेकै ईसु के पाँऐऔं मै डारो, और अपने बारौ सै बाके पाँऐ पछौने, और ईत्तर सै घर मै खसबोई फैल गई।
4पर बाके चेलौ मै सै यहूदा इसकरोती नै, जो बाकै धोके सै पकड़बानै बारो हो, कैई, 5“जा मैहंगे ईत्तर कै तीन सौ चाँदी के सिक्कौ मै बेचकै गरीबौ कै काए ना दे दओ जाऐ?” 6बानै जौ इसताँई ना कैई कै बाकै गरीबौ की फिकर ही, पर इसताँई कै बौ चोर हो, और बाके धौंरे रुपियौ की थैलिया रैहबै ही, और बामै सै चुरा लेबै हो।
7इसताँई ईसु नै कैई, “बाकै छोड़ दो रोको मत। बानै मेरे गाड़े जानै की तईयारी मै जौ सब करो है। 8कैसेकै कंगाल तौ तुमरे संग हमेसा रैहंगे पर मैं तुमरे संग हमेसा ना रैहंगो।”
9जब यहूदी लोगौ की बड़ी भीड़ नै जानो कै ईसु बैतनिया मै है, तौ बे ईसु के कारन सैई ना, पर जा ताँई बी आए कै लाजर कै देखैं जिसकै बानै मरे भएऔं मै सै जिन्दो करो हो। 10पर मुक्ख पुजारिऔं नै लाजर कै बी मारनै की सला बनाई, 11कैसेकै बाके कारन भौत से यहूदी लोग उनसै अगल होकै, ईसु मै बिसवास करल लगे हे।
ईसु को धूम धाम सै ऐरूसलेम मै जानो
(मत्ती 21:1–11; मरकुस 11:1–11; लूका 19:28–40)
12दूसरे दिन फसै के तौहार मै आई भई बड़ी भीड़ नै जब जौ सुनी कै ईसु ऐरूसलेम मै आ रओ है, 13तब आदमी खजूर की डुग्गी लेकै बासै मिलनै चल पड़े और चिल्लाल लगे, “होसन्ना#12:13 होसन्ना को मतलब परभु की महिमा हो, जै जैकार हो, बड़ाई हो। ! धन्न है बौ जो परभु के नाम सै आवै है, बौ जो ईसराइल को राजा है।” 14तब ईसु कै एक गधा को बच्चा मिलो और बौ बामै बैठ गओ। जैसो लिखो है।
15“सिओन की बेटी मत डर देख,
तेरो राजा,
गधा के बच्चा मै बैठो भओ चलो आ रओ है।”
16बाके चेला पैले तौ जौ बात ना समजे, पर जब ईसु की महिमा परकट भई तौ उनकै याद आई, कै पबित्तर सास्तर मै जो बात बाके बारे मै लिखी भई ही और आदमिऔ नै बाके संग ऐंसोई करो हो। 17लाजर कै कबर सै बुलाकै बाहार लानै और मरे भएऔं मै सै फिर जिन्दो कन्नै के टैम जो भीड़ ईसु के संग ही, बौ उस बात की गभाई दे रई ही। 18इस बजै सै भीड़ बासै मिलनै के ताँई लिकर आई कैसेकै आदमिऔ नै सुनो कै बानै जौ चमत्कार को चिन्न दिखाओ हो। 19तब फरीसिऔं नै आपस मै कैई, “सोचौ तौ सई हम कुछ ना कर पा रए हैं, देखौ दुनिया बाके पीछे चल पड़ी है।”
ईसु कै अपने मरनै के बारे मै बतानो
20जो आदमी फसै तौहार के ताँई ऐरूसलेम मै मत्था टेकनै जा रए हे, उनमै कुछ यूनानी हे। 21उन आदमिऔ नै गलील के बैतसैदा सैहर के रैहनै बारे फिलिप्पुस के धौंरे आकै बिनती करकै कैई, “साब, हम ईसु सै मिलनो चाँहै हैं।” 22फिलिप्पुस नै अन्दरयास सै कैई, तब अन्दरयास और फिलिप्पुस नै जाकै ईसु कै बताई।
23और ईसु नै जबाब देते भए उनसै कैई, “टैम आ गओ है, कै आदमी के लौंड़ा की बड़ाई हो। 24मैं तुमसै सच-सच कैबौ हौं कै जब तक गैहूं को दानो जमीन मै गिरकै मर ना जावै है, तब तक बौ एकई रैहबै है, पर जब बौ मर जावै है तौ भौत अनाज देवै है। 25#मत्ती 10:39; 16:25; मरकु 8:35; लूका 9:24; 17:33जिसकै अपनी जिन्दगी पियारी है बौ बाकै खो देगो पर बौ, जिसकै इस दुनिया मै अपनी जिन्दगी सै पियार ना है, बाकै हमेसा की जिन्दगी के ताँई रखैगो। 26अगर कोई मेरी सेवा करै है तौ बौ मेरे पीछे हो ले, और जहाँ मैं हौं बहाँ मेरो सेवक बी होगो। अगर कोई मेरी सेवा करै तौ अब्बा बाकी इज्जत करैगो। 27अब मेरो जी घबरा रओ है, का मैं जौ कैंऔ, ‘हे अब्बा, मैंकै जा दुख की घड़ी सै बचा’ पर जा घड़ी के ताँई तौ मैं आओ हौं। 28हे अब्बा, अपने नाम की महिमा कर, तब जौ आकासवानी भई, मैंनै अपने नाम की महिमा करी है, और फिर करंगो।”
29तब भीड़ के आदमी जो बहाँ खड़े भए सुन रए हे, कैललगे कै बादर गरजो है। औरौं नै कैई, “सुरगदूत नै बासै बात करी है।”
30ईसु नै जबाब देते भए कैई, “जौ आकासवानी मेरे ताँई ना पर तुमरे ताँई भई है। 31अब इस दुनिया को नियाय को टैम आ गओ है। अब इस दुनिया को सासक लिकार दओ जागो। 32और जब मैंकै धरती मै सै ऊँचे मै चढ़ाओ जागो, तौ सब आदमिऔ कै अपने धौंरे खैंचंगो।” 33पर ऐंसो कैह कै बौ जौ बतानो चाँहै हो, कै बौ कैसी मौत सै मरैगो।
34इसताँई भीड़ नै बाकै जबाब दओ, “हमनै नियम मै पढ़ो है कै मसी हमेसा रैहगो, फिर तू कैसे कैह सकै है, आदमी के लौंड़ा कै ऊँचे मै चढ़ाओ जानो जरूरी है? जौ आदमी को लौंड़ा कौन है?”
35इसताँई ईसु नै उनसै कैई, “जोती तुमरे धौंरे और थोड़ी देर के ताँई है। जब तक जोती तुमरे संग है, तब तक चलते चलौ, ऐंसो ना होए कै इन्धेरो तुमकै आ घेरै, कैसेकै जो इन्धेरे मै चलै है बौ ना जानै है कै बौ कितै जा रओ है। 36जब तक जोती तुमरे संग है, जोती मै बिसवास करौ, जिस्सै कै तुम जोती की औलाद बन सकौ।” इन बातौं कै ईसु कैह कै बहाँ सै चलो गओ और उनसै लुको रैहओ।
यहूदिऔं को ईसु मै बिसवास ना कन्नो
37ईसु नै उनके सामने भौत से चमत्कार के चिन्न दिखाए हे, फिर बी बे बाके ऊपर बिसवास ना कर रए हे, 38जिस्सै कै यसाया नबी को बचन पूरो हो जो बानै कैई ही, “हे परभु, किसनै हमरी बात मै बिसवास करो है? और परभु की तागत किस मै परकट भई है?”
39इस कारन बे बिसवास ना कर सके, कैसेकै यसाया नै फिर जौ कैई,
40“बानै उनकी आँख अन्धी कर दंई,
और बानै उनको मन जिद्दी कर दओ,
कहीं ऐंसो ना हो कै बे आँखौ सै देखैं
और बुद्धि सै समजै और मन फिराऐ और मैं उनकै ठीक करौं।”
41यसाया नै जे बात इसताँई कैंई कैसेकै बानै बाकी महिमा देखी और बानै बाके बारे मै कैई।
42फिर बी अधकारिऔं मै सै भौतौं नै बाके ऊपर बिसवास करो, पर फरीसिऔं के कारन बे बाकै खुले रूप सै ना मानै हे, कहीं ऐंसो ना हो कै बे पिराथना घर सै लिकार दए जाँय। 43कैसेकै आदमिऔ के दुआरा देई गई इज्जत परमेसर के दुआरा देई गई इज्जत सै जादा पियारी लगै है।
ईसु के बचन सैई आदमी को नियाय
44फिर ईसु नै जोर सै कैई, “जो मेरे ऊपर बिसवास करै है, बौ मेरे ऊपर ना पर मैंकै भेजनै बारे मै बिसवास करै है। 45और जो मैंकै देखै है, बौ बाकै देखै है जिसनै मैं भेजो हौं। 46मैं दुनिया मै जोती के रूप मै आओ हौं कै जो कोई मेरे ऊपर बिसवास करै है, बौ इन्धेरे मै ना रैहगो। 47अगर कोई मेरी बात सुनकै बाकै ना मानै तौ मैं बाकै दोसी ना ठैराबौ हौं, कैसेकै मैं दुनिया कै दोसी ठैरानै ना, पर दुनिया कै मुक्ति दैनै आओ हौं। 48जो मैंकै नकारै है और मेरे बचनौ कै ना मानै है, बाकै दोसी ठैरानै बारो तौ एक है, मैंनै जो बचन कैओ है, बौई आखरी दिन मै बाकै दोसी ठैरागो। 49मैंनै अपने आप कुछ ना कैई, पर अब्बा जिसनै मैं भेजो हौं बाई नै आगियाँ दई है कै मैंकै का कैनो और का बोलनो है। 50और मैं जानौ हौं कै बाकी आगियाँ हमेसा की जिन्दगी है। इसताँई मैं जो कुछ बोलौ हौं ठीक बैसोई बोलौ हौं जैसो अब्बा नै मैंसै कैई है।”
Currently Selected:
यहून्ना 12: TKB
Highlight
Share
Copy
Want to have your highlights saved across all your devices? Sign up or sign in
New Life Compute Institute [NLCI] - CC BY-NC-ND 4.0
