चेलौ के काम 13
13
बरनबास और साऊल को भेजो जानो
1अन्ताकिया के बिसवासिऔ की मंडली मै कुछ नबी और कुछ सिकानै बारे हे, जैसे बरनबास, और समौन जिसकै नीगर बी कैबै हे, लूकियुस कुरैनी, और मनाहेन जो राजा हेरोदेस के संग-संग बड़ो भओ हो, और साऊल। 2जब बे बरत रैहकै परभु के भजन किरतन कर रए हे, तबई पबित्तर आत्मा नै उनसै कैई कै, “मेरे जा काम के ताँई बरनबास और साऊल कै अगल करौ जिसके ताँई मैंनै उनकै बुलार खाओ है।”
3तबई उनौनै बरत और पिराथना कन्नै के बाद बरनबास और साऊल के ऊपर हात रक्खे और उनकै सेवा के ताँई भेज दओ।
बरनबास और साऊल की कुपरूस की यातरा
4पबित्तर आत्मा नै बरनबास और साऊल कै सिलुकिया नाम की जघै मै भेजो और बे बहाँ सै पानी के जिहाज मै बैठकै कुपरूस नाम के टापू मै पौंचे। 5और सलमीस सैहर मै पौंच कै परमेसर को बचन बहाँ के यहूदी लोगौ के पिराथना घरौं मै सुनाओ और यहून्ना बी उनकी सायता कन्नै के ताँई संग हो।
6जब बे सारे नाम के टापू मै सै घूम कै पाफुस सैहर पौंचे तौ उनकै बहाँ एक जादू कन्नै बारो झूँटो यहूदी नबी मिलो जिसको नाम बरयेसु हो। 7बा टापू को राजपाल सेरगियुस पौलुस एक अकलमन्द आदमी हो और बौ बरयेसु को दोस्त हो। राजपाल नै परमेसर को बचन सुन्नै के ताँई बरनबास और साऊल कै अपने धौंरे बुलाओ। 8पर बरयेसु जिसको नाम इलीमास जादूगर बी हो बानै उनको बिरोद करो। बौ चाँहबै हो कै बा सैहर को राजपाल परमेसर के बचन मै बिसवास ना करै। 9तब साऊल जो खुद कै पौलुस बी कैबै है, बानै पबित्तर आत्मा सै भरकै इलीमास की ओर देखते भए कैई कै,
10“ओ धोको, कपट कन्नै बारे सैतान की औलाद, तू सिगरे अच्छे काम को दुसमन है। का तू परभु के सच्चाई के कामौ कै बिगाड़नो ना छौड़ैगो? 11देख परभु तेरे बिरोद मै है और अब तू थोड़े बखत के ताँई अन्धो रैहगो और तू सूरज के उज्जेरे कै बी ना देख सकैगो।”
तबई बाकी आँख मै धुंदरोपन और इन्धेरो छा गओ और बौ इतै-उतै ढूंड़ल लगो कै कोई बाको हात पकड़कै बाकै ले जाऐ। 12जो कुछ बहाँ भओ हो बाकै देक्कै राजपाल नै परभु मै बिसवास करो और बचन सुनकै ताजुब करो।
पौलुस और बरनबास पिसिदिया के अन्ताकिया मै
13तबई पौलुस और बाके संग के साती पाफुस सैहर सै पानी के जिहाज सै पंफूलिया जिला के पिरगा सैहर मै पौंचे और यहून्ना उनकै छोड़कै ऐरूसलेम गओ। 14उतै बे पिरगा सैहर सै अग्गे बढ़ते भए पिसिदिया जिला के अन्ताकिया सैहर मै पौंचे, और बे आराम कन्नै बारे दिन यहूदी लोगौ के पिराथना घर मै बैठे। 15मूसा के नियम और नबिऔ की किताब पढ़नै के बाद पिराथना घर के सिआने लोगौ नै उनसै जौ कैई कै, “हे भईयौ, तुमरे धौंरे कुछ सिकानै के ताँई कोई बचन है तौ तुम सुनाऔ।” 16तबई पौलुस खड़ो भओ और बानै हात हलाकै कैई कै,
“हे ईसराइली लोगौ और परमेसर सै डरनै बारे गैर यहूदी लोगौ, मेरी बात सुनौ। 17ईसराइली लोगौ के परमेसर नै हमरे बापदादौं कै चुनो हो, और जब जे मिसर देस मै गुलाम बनकै रैह रए हे। तौ बानै उनकै बढ़ाऔ और अपनी बड़ी सकति सै उनकै बा देस सै बाहार लिकारकै लाओ। 18और करीब चालीस साल तक बियाबान मै परमेसर उनके संग रैहओ। 19और कनान देस के सात मुलक के लोगौ कै नास करकै बानै उस जमीन कै ईसराइली लोगौ कै दे दओ। 20जा बात कै पूरी होनै के ताँई कम सै कम चार सौ पचास साल लगे।
“जाके बाद परमेसर नै उनके ताँई नियाय कन्नै बारे सिआने आदमी ठैराए और जौ पिरथा सामुएल नबी के आनै तक चलती रैहई। 21तबई उन्नै राजा की माँग करी और परमेसर नै बिन्यामीन के खानदान मै सै कीस के लौंड़ा साऊल कै उनको राजा बना दओ और बाको राज चालीस साल तक रैहओ। 22तब साऊल की जघै दाऊद राजा बनो जिसके बारे मै परमेसर नै ऐंसो कैई ही कै, ‘यिसै को लौंड़ा दाऊद मेरी दिल की बात जानै है और बौई मेरी सिगरी बातौं कै पूरी करैगो।’ 23परमेसर नै अपनो बादो पूरो कन्नै के ताँई ईसराइल मै मुक्ति दैनै बारे ईसु कै जाई दाऊद के खानदान मै पैदा करो। 24#मरकु 1:4; लूका 3:3ईसु के आनै सै पैलेई यहून्ना नै ईसराइली लोगौ के बीच मै उनके गलत काम सै मन फिरानै के ताँई जल संस्कार के बारे मै परचार करो। 25#यहून 1:20; मत्ती 3:11; मरकु 1:7; लूका 3:16; यहून 1:27यहून्ना जब अपनो काम पूरो कन्नै बारो हो तौ तबई बानै कैई ही कै, ‘तुम मैंकै का समजौ हौ? मैं बौ ना हौं। पर जो मेरे बाद आनै बारो है। मैं तौ बाके जूता के फीता खोलनै के लायक बी ना हौं।’
26“हे इब्राहिम के खानदान के भईयौ, और परमेसर सै डरनै बारे गैर यहूदी लोगौ, मुक्ति पानै के ताँई जौ बचन तुमरे धौंरे भेजो गओ है। 27ऐरूसलेम मै रैहनै बारौ और नेताऔं नै ईसु कै ना पैंचानो और उन्नै उन नबिऔ की बातौं कै गलत ठैराओ जो आराम कन्नै बारे दिन पढ़ी जावै हीं। 28#मत्ती 27:22,23; मरकु 15:13,14; लूका 23:21–23; यहून 19:15बाकै मारनै के ताँई उनकै बामै कोई बी दोस ना मिलो, तब्बी उन्नै पीलातुस सै बिनती करी कै बाकै मार डारो जाय। 29#मत्ती 27:57–61; मरकु 15:42–47; लूका 23:50–56; यहून 19:38–42जो कुछ बात बाके बारे मै लिखी हीं जब बे उन बातौं कै पूरो कर चुके, तबई बाकै कुरूस सै उतारकै कबर मै रक्खो। 30पर परमेसर नै बाकै मरे भएऔं मैसै फिर जिन्दो कर दओ। 31#चेलौ 1:3और ईसु उन लोगौ के संग जो गलील सै ऐरूसलेम मै आए हे, भौत दिनौ तक दिखाई देतो रैहओ, और लोगौ के सामने अब बेई ईसु के गभा हैं। 32हम तुमरे सामने बौ अच्छी खबर सुनावै हैं जिसको बादो परमेसर नै हमरे बापदादौं सै करर खाओ हो। 33ईसु के मरनै के बाद परमेसर नै बाकै फिर सै जिन्दो करो और बौ बादो हमरी औलाद के ताँई पूरो करो, जैसो भजन किरतन की किताब मै लिखो है,
“‘तू मेरो लौंड़ा है,
और मैंनै आज सबकै दिखा दओ है कै मैं तेरो अब्बा हौं।’
34परमेसर नै ईसु कै कबी ना सड़नै के ताँई मरे भएऔं मै सै जिन्दो करो। बानै ऐंसो कैई कै,
‘मैं तुमकै पबित्तर और कबी ना खतम होनै बारी आसीस दंगो,
जिसको पक्को बादो मैंनै दाऊद संग करर खाओ है।’
35इसताँई बानै भजन किरतन की किताब मै एक और बात लिखी है,
‘तू अपने बा पबित्तर आदमी कै कबी सड़न ना देगो।’
36दाऊद नै तौ अपनी जिन्दगी मै परमेसर के हिसाब सै काम करो और मर कै अपने बापदादौं की जघै मै दफना दओ गओ और बौ सड़ बी गओ। 37पर जिसकै परमेसर नै जिन्दो करो बौ सड़ो ना।
38-39“इसताँई, हे भईयौ, तुम जौ बात जान लेईओ कै ईसु के दुआराई पाप की माफी की अच्छी खबर मिली है। मूसा के नियम के हिसाब सै कोई पाप सै छुटकारो ना पा सकै है, पर ईसु मसी मै बिसवास कन्नै बारे अपने पाप सै छुटकारो पा सकै हैं। 40इसताँई चौकस रौह कै जो कुछ नबिऔ नै कैई है, बौ तुमरे ऊपर ना आ पड़ै,
41“‘ओ परमेसर की मजाक बनानै बारे लोगौ चौकस रौह,
कैसेकै मैं तुमरे दिनौ मै ऐंसो एक काम कन्नै जा रओ हौं,
जिनकी जो कोई बी तुमरे बीच मै बाकी बात करैगो,
तब्बी तुम कबी बिसवास ना करौगे।’”
42जब पौलुस और बरनबास पिराथना घर सै बाहार आए तबई बे लोग उनसै बिनती करकै कैललगे कै, अगले आनै बारे आराम कन्नै बारे दिन मै जे बात हमकै फिर सै सुनईओ। 43और जब संगत की बैठक खतम हो गई तबई भौस्से यहूदी और यहूदी धरम माननै बारे बड़े लोग पौलुस और बरनबास के पिच्छे आए, और तबई उन्नै उनके संग बात करकै समजाओ कै परमेसर के किरपा मै बने रौह।
गैर यहूदिऔं मै पौलुस और बरनबास को परचार
44अगले आराम कन्नै बारे दिन मै सिगरे सैहर के लोग परभु के बचन कै सुन्नै के ताँई इखट्टे भए। 45पर भीड़ कै देक्कै यहूदी लोग जरल लगे और पौलुस की बात को बिरोद करल लगे और बाके खिलाप गलत बोलल लगे।
46तबई पौलुस और बरनबास नै बेधड़क होकै कैई कै, “जौ जरूरी हो, कै सबसै पैले तुमरे बीच मै परमेसर को बचन सुनाओ जाऐ, पर तुमनै तौ बाकै मानो ना और खुद कै हमेसा की जिन्दगी के ताँई लायक ना समजो, इसताँई हम गैर यहूदी लोगौ की ओर गए। 47कैसेकै परभु नै हमकै जौ हुकम देर खाओ है कै, ‘मैंनै तुमकै गैर यहूदी लोगौ के ताँई जोती ठैराओ है, जिस्सै कै मुक्ति की अच्छी खबर धरती के कौने कौने मै फैलै।’”
48जौ बात सुनकै गैर यहूदी लोग खुस भए और परभु के बचन की बड़ाई करल लगे, पर जितनेऔ कै हमेसा की जिन्दगी के ताँई छाँटकै रखर खाओ हो उन्नै बिसवास करो।
49तबई परभु को बचन बा सिगरे देस मै फैल गओ। 50और यहूदी नेता लोगौ नै सैहर के कुछ ईमानदार लोगौ कै और बड़ी अच्छी भक्ति कन्नै बारी बईयरौं कै भड़काओ और उन्नै पौलुस और बरनबास के संग बुरो करबाकै दबाब बनबाकै उनकै बा इलाके सै बाहार लिकरबा दओ। 51#मत्ती 10:14; मरकु 6:11; लूका 9:5; 10:11तबई पौलुस और बरनबास नै उनकै चितौनी देते भए अपने पाँऐ की धूदर झाँड़ी और इकुनिया सैहर की ओर चले गए। 52पर अन्ताकिया के चेला खुसी सै और पबित्तर आत्मा सै भरते रैहए।
Currently Selected:
चेलौ के काम 13: TKB
Highlight
Share
Copy
Want to have your highlights saved across all your devices? Sign up or sign in
New Life Compute Institute [NLCI] - CC BY-NC-ND 4.0
