चेलौ के काम 12
12
चेलौ के ऊपर हेरोदेस को जुलम
1बाई बखत मै राजा हेरोदेस नै बिसवासिऔ की मंडली के लोगौ कै परेसान कन्नो सुरू कर दओ। 2बानै यहून्ना के भईया याकूब कै तरवार सै मरवा दओ। 3जब बानै जौ देखो कै ऐंसो कन्नै सै यहूदी लोग खुस होवै हैं, तौ तबई बानै पतरस कै बी पकड़ लओ। बे दिन बिना खट्टे चून की रोटी के तौहार के चल रए हे। 4हेरोदेस नै पतरस कै बी पकड़कै जेल मै डार दओ और चार चार सिपाईऔं कै चौकीदारी कन्नै के ताँई चार टोली लगबा दंई। जिस्सै कै बौ फसै के तौहार के बाद बाके ऊपर मुकदमा चलाऐ। 5जब पतरस कै जेल मै रक्खो गओ, तबई बिसवासिऔ की मंडली के लोगौ नै बाके ताँई एक मन होकै परमेसर सै पिराथना कन्नी सुरू करी।
जेल सै पतरस को छुटनो
6जब हेरोदेस पतरस कै सबई के सामने लानै बारो हो, तौ बाई रात बाकै साँकरौ सै बांधर खाओ हो और बौ दो सिपाईऔं के बीच मै सोओ हो और चौकीदार जेल को पैहरो दे रए हे। 7तबई परभु को एक सुरगदूत पतरस के धौंरे आओ और जेल की कोठरी मै बेसानी उज्जेरोई उज्जेरो हो गओ। बानै पतरस कै हलाकै जगाओ और कैई कै, “जल्दी फटा फट उठ” और बाके हात सै साँकर खुल कै गिर गंई।
8तबई सुरगदूत नै बासै कैई कै, “तईयार हो और जूता पैहरले” और पतरस नै बैसोई करो। तबई सुरगदूत नै फिर कैई कै, “अपने लत्ता पैहरले और मेरे पिच्छे आ।” 9तबई पतरस बाके पिच्छे चल दओ और बानै सोचो कै, “जो कुछ सुरगदूत मेरे ताँई कर रओ है बौ एक सपनो है,” सच्ची बात ना है। 10तबई बे पैले और दूसरे चौकीदार की टोली के पैहरे सै लिकरे और बा गेट तक पौंचे जो सैहर की ओर ले जावै है और बौ गेट उनके ताँई अपने आप खुल गई और बे लिकरकै एकई गली सै होकै गए, तबई सुरगदूत बाकै छोड़कै गायब हो गओ।
11पतरस कै जैसेई जे बात समज मै आँई तबई बानै कैई, “अब मेरी समज मै आ गओ है कै परभु नै अपने सुरगदूत कै भेजकै हेरोदेस के हातौ सै छुटा दओ और यहूदी लोगौ के काम मै पानी फिरा दओ।”
12जब बौ बा घटना की सच्चाई कै जान गओ तौ बौ यहून्ना जिसकै मरकुस बी कैबै हैं बाकी अईया मरियम के घर गओ। बहाँ भौस्से लोग इखट्टे होकै पिराथना कर रए हे। 13जब पतरस नै बाहार को मौहड़ो खटखटाओ तौ तबई रूदे नाम की एक नौकरानी देखनै आई कै कौन है। 14बानै पतरस की अबाज सुनी और खुसी के मारे किबाड़ खोले बिनाई बापस भीतर जाकै बताई कै, “पतरस बाहार मौहड़े मै खड़ो है।”
15तबई उनौनै बासै कैई कै, “तू का पागल हो गई है?”
पर बौ जोर सै बोली कै, “जौ बात सच्ची है।”
तबई उनौनै कैई कै, “बाको सुरगदूत होगो।”
16पर पतरस किबाड़ खटखटातो रैहओ और जब उनौनै किबाड़ खोली और बाकै देखो तौ उनकी आँख फटी की फटी रैह गंई। 17तबई बानै उनकै चुप रैहनै के ताँई हात हलाकै इसारो करो और उनसै कैई कै, “परभु मैंकै जेल मै सै कैसे बाहार लिकारकै लाओ है।” फिर बानै कैई कै, “जा बात कै याकूब और दूसरे भईयौ सै कैह देईओ।” और तबई पतरस बहाँ सै किसी दूसरी जघै चलो गओ।
18सकारे पड़े सिपाईऔं मै खलबली मच गई कै पतरस कहाँ गओ। 19जब हेरोदेस नै पतरस की छानबीन करी तौ तब्बी बौ बाकै ना मिलो। तबई बानै चौकीदारौं सै पूँछताँछ करी और जौ हुकम दओ कै उन चौकीदारौं कै मार डारो जाऐ।
हेरोदेस की मौत
जाके बाद राजा हेरोदेस यहूदिया छोड़कै केसरिया मै रैहल लगो।
20हेरोदेस सूर और सैदा के लोगौ सै भौत नाराज हो। इसताँई बे लोग इखट्टे होकै बाके धौंरे आए और राजा को सेवक जिसको नाम बलास्तुस हो बाकै मना कै हेरोदेस सै मेल कन्नै के ताँई बिनती करी। कैसेकै उन लोगौ कै खानै पीनै की चीजौ कै बाई देस सै लेजानो होवै हो।
21राजा नै जो दिन ठैरार खाओ हो बाई दिन राजा हेरोदेस अपने राज लत्ता पैहरकै राज गद्दी मै बैठो और लोगौ कै भासन देल लगो। 22तबई लोग चिल्लाकै कैललगे कै, “जौ अबाज आदमी की ना पर देबता की है।” 23तबई परभु के एक सुरगदूत नै बाकै बेमार कर दओ और बामै कीड़ा पड़ गए और बौ मर गओ। कैसेकै जौ इसताँई भओ कै जो महिमा परमेसर कै मिलनी चँईऐ ही बौ हेरोदेस खुद ले रओ हो। 24पर परमेसर को बचन लोगौ मै फैलतो गओ और बिसवासी बढ़ते गए।
25जब बरनबास और साऊल अपने सेवा को काम पूरो करकै ऐरूसलेम लौहट रए हे तौ उन्नै अपने संग यहून्ना कै बी ले लओ जिसकै मरकुस बी कैबै हैं।
Currently Selected:
चेलौ के काम 12: TKB
Highlight
Share
Copy
Want to have your highlights saved across all your devices? Sign up or sign in
New Life Compute Institute [NLCI] - CC BY-NC-ND 4.0
