प्रेरित 5

हनन्याह ए सफीरा

1हनन्याह मिदंङ इच्च़ा मीह ए दोऊ मेच़ा सफीरा ज़ि एनोह ज़मीनो दोरच़ी थोड़े अरे हिस्सा लंङे च़रतिर। 2दोई गुप्त रूपा रिंङ खोकसी लसो थोड़े अरे ढबाह एनोह थल्जी तहरि। दंङ दोऊ मेच़ा ला दि गप्पा ञेंहच़ाते, दंङ दुह हिस्सा हंजे प्रेरिता तिंङ रें च़रतिर। ताकि दोबि फाए च़रपोर। 3पर पतरसे कुंई, हे हनन्याह! अंऊ शेताने कांह सेहम रिंङ पवित्र आत्मा रंङ साते हप्सी कुट्रिमी बिचार केहतो दंङ केई केनोह लंङसी ज़मीनो लसो इच्च़ा हिस्सा केनोह थल्जी तओ। 4छि लंङसी बे तुहई दुह ज़मीन कांह माह तोहई? दंङ अपेहल लंङसा इलज़ा दंङ दुह लसो टोहकठे कांह अधिकार माह तोहई? कांह सेहमा रिंङ दिह मदम कमो बिचार छना अति? केई मीहतंङ साते मशत, पर परमेश्वरारंङ साते हप्सी कुट्रातन। 5दिह गप्पा रेड्रिमी रंङ साते हनन्याह षोड़िंङ दह्चे इलि, दंङ दुह सिए इलि; दंङ हनन्याह रंङ साते छि शुह्ते दि गप्पा रेड्रा भत्ते मीहरे महसे बेवा इलिर। 6दोहथल छ़ोकरा ज़ि अंज़े दोऊ फुक कफनो बिचंङ ज़िलदिर दंङ धह्तेका शिलज़ी पथेकी च़रतिर#5:6 यहुदी रिवाज़ो हिसाबे इच्च़ा मीहू सिमी थल 24 घंटा रिंङ दोबि फथेकी चरच़ी। दंङ दोबि यरूशलेम शहरो धकते कुंणी रिंङ या कब्रा रिंङ फथेकी चरच़ी।। 7दिह भत्ते गप्पातु दोरच़ी अंजान दोऊ मेच़ा लगभग षुमु घंटाऊ थल दोर्तिंङ अति, 8दोहथर पतरसे दोरंङ साते रूहक्ति, “छि केहच़ी दुह ज़मीन धोंण आ रिंङ ए लङातेंई आ?” दोई कुई, “वोई, धोंणा ए रिंङ।” 9पतरसे दोरंङ साते रूहक्ति, “दिह छि गप्पा शुई, कि केरे झुल्ला प्रभु ऊ आत्माओ परख ओ थल्जी इच्च़ा साते सहमत शुचे इलिन? खंणु, कांह गगसा बि पथेक्च़ा दोरे पेतंङो कछंङ पिपि लेहकी तोतोर, दंङ कनिंङ ला धह्तेका रेंज़ा शोर।” 10दंङ दुह दोहथर पतरसो कोन्ज़ो टोईच़ी षोड़िंङ दह्चे इलि, दंङ दुह सिए इलि; अपेहल छ़ोकरा तोंखा अतिर ता खंणीर कि दुह सिए इलज़ा। दिऊ थल्जी दोच़ी दुह रेंज़ा शिलिर दंङ दोऊ गगसो कछंङ पथेकी च़रतिर। 11भत्ते कलीसिया अंऊ यरूशलेम शहरंङ तोहई दंङ दिह गप्पार रेड्रा दोरे भत्ते मीहरे बेवा इलिर।

प्रेरितातु दोरच़ी चिन्ह ए चमत्कार

12प्रेरिता तु दोरच़ी महसे चिन्ह ए चमत्कारो कम मीहतु बिचंङ शुहबी लेहकी तोहई। दंङ मसीहू टोहकठे बिशवास लहज़ार भत्तेरे इच्च़ा सेहम शुहचे रज्ज़ा सुलेमान ओ ल्वाड़िङ ठ्रोहका शुवा लाहतेर। 13पर अंऊ दोच़ी हेंतेग तचेक यीशु ऊ टोहकठे बिशवास लहसी माह तोईरे, दोतु दिह याहू माह तोहई कि दोरे दोतंङ साते ठ्रोहका शुहचे योर; तांला मीहरे दोतु तारीफ लहज़ातेर। 14दंङ मेच़िमी ए गंङमी तु इच्च़ा मोह्ड़े भीड़ प्रभु टोहकठे विशवास लेह प्रभु हखा अपि लेहतिर। 15अंऊ ला धिर प्रेरिता रे लहज़ी लेहकी तोईरे दोऊ बजह च़ि मीहरे नतपा तिंङ सड़का रिंङ हंजे ते चारपाई ए दरी ऊ टोहकठे केट्रातेर, कि अपेहल पतरस अपतो ता दोऊ सिलमोग दोतु टोहकठे अपतो। 16दंङ यरूशलेम शहरो देसी-न्वेसी इलाकंङ च़ि ला महसे मीहरे, बीमार ए मांजी आत्माओ दोरच़ी दुखी दोतिंङ हंजे, प्रेरितातु कछंङ ठ्रोहका शवातेर, दंङ दोरे भत्ते आईन शुचि य्वातेर।

प्रेरितातु गिरफ्तारी

17दोहथर यहुदी महापुरोहित ए दोऊ भत्ते साथिरे अंऊ सदूकी दलो तोईरे, दोरे प्रेरिता रङ साते हट्री लेहतिर। झांह लेह दोच़ी छा कम लहज़िमी फेंसला लहरिर। 18दिऊ थल्जी दोच़ी प्रेरिता तिंङ च़ुमने जेलंङ बन्द लेह केहरिर। 19पर रात रिंङ प्रभुऊ इच्च़ा स्वर्गदूते जेलो पेतंङ अल्ज़े ते दोतिंङ धह्कते हंजे ते कुंई, 20“ईलांई, यहुदी मंदिरो ल्वाड़िंङ खड़े शुहचे मीहतिंङ दिह खरकोई जीवनो पाहठी कंड्रुंई।” 21प्रेरितार दि रेड्रिमी रंङ साते मुंजे सरके यहुदी मंदिरो ल्वाड़िंङ इलजे शिक्षा रंड्री लेहतिर। दुह ए मुक्का यहुदी महापुरोहित ए दोऊ साथी एनोह ठ्रोहका शुहबिमी ठहरि ठ्रोहका शुईरे दंङ यहुदी सभा ओ भत्ते मीहरे दंङ इस्राएली भत्ते सेंहणारे बुलाएति। अपेहल दिरे भत्तेर ठ्रोहका शुईरे दोहपल दोच़ी सैनिका बि च़रतिर कि प्रेरिता तिंङ जेलो दोरच़ी बुलाएतेंई।

22पर मंदिरो पहरेदार दोर्तिंङ पिचे इलिर ता खंईर, कि प्रेरितार जेलो अन्द्रेग माह तोईर, दंङ वापिस अंज़े महासभा बि दि उजाब रंड्री लेहतिर, 23ञेंरे जेलारिंङ इलिन दंङ ञेंहच़ी खंईनि कि पहरेदार धह्कते पेतंङ तु टोईच़ी खड़े तोईरे। दंङ पेतंङ रिंङ रूठे कुलिक रांहषी तोहई पर अपेहल पहरेदारा ज़ि पेतंङ अल्ज़ा ते तोंङ खंइरे दंङ दोर्तिंङ अरिला माह तोहई। 24अपेहल यहुदी मंदिरो पेहरेदारातु मुख्या ए यहुदी मोह्ड़े पुरोहिता ज़ि दिह खबर रेड्रिर, ता दोरे दिह पाहठी सोचेक्च़ी लेहती दोतु छि शोतो! 25धोंणरिंङ मन्दिरो ल्वाड़िंङ ज़ि अच़िया यहुदी महासभा मीहतिंङ कुई, “खंणुई अतिंङ केहच़ी जेलो अन्द्रेग बंद लहसी तातेन, दोरे मीहरे यहुदी मंदिरो ल्वाड़िंङ खड़े शुचे मीहतिंङ शिक्षा रंड्री लेह्की तोतोर।” 26छना ए दोच़ी दिह रेड्रिर, ध्वांए यहुदी मंदिरो पेहरेदारातु मुख्या, पेहरेदार तंङ साते मंदिरो हखा इलि, दोर्तिंङ इलजे दुह प्रेरिता तिंङ यहुदी महासभा ओ तुईज़ी रेंज़ा हति। पर ज़बरदस्ती माह, छना कुचे दोरे मीहतंङ साते बेवातेर कि मीहरेर रघ द्रले केचे दोतिंङ सचे च़रपोर।

27दोच़ी प्रेरितातिंङ दुह ठहरि हतिर अंऊर महासभा ठ्रोहका तोहई। दोच़ी दोतिंङ यहुदी सभाओ तुईज़ी खड़े लहरिर दंङ यहुदी महापुरोहिते दोतिंङ रुहक्ती, 28“छि ञेंहच़ी केहरे खबरदार माह लाहनी आ, कि केरे दिह मिंदंङ प्रचार था लांही?” तांला केहच़ी केनातु शिक्षा ओ प्रचार भत्ते यरूशलेम शहरंङ लेह केहतन दंङ केहरे दिह मीहू हत्या ऊ दोष ज़बरदस्ती ञेंहतु टोहकठे लगाएच़ातंई। 29दंङ पतरस ए ऊई प्रेरिततिङ जुबाब रेंई, “मीहतु हुकुम बे मोह्ड़े, परमेश्वरो हुकुमो पालन लहच़ी ए ञेंहतु ज़िम्मेवारी शुह। 30ञेंहतु बाह-मेमेतु परमेश्वरे यीशु बि सिए दोरच़ी श्रींङे लेह च़रति, अतिंङ केहच़ी क्रूसो टोईच़ी केह्चे सच़ी चरच़ातेंई। 31परमेश्वरे दोबि स्वर्गो हखा रेंज़ा शिलि दंङ दोऊ महसे आदर लहरी। दंङ दोबि प्रभु ए उद्धार लहज़ा ठहराएति, ताकि इस्राएल ओ मीहरे एनातु मदम सोच बिचार ए अमतु दोरच़ी परमेश्वरो हखा किर्ज़ोर दंङ दोऊ दोरच़ी एनातु पापो थल्जी माफी खोक्पोर। 32दंङ ञेंहरे दिह गप्पातु गवाह तोतोन, दंङ पवित्र आत्मा ला, अतिंङ परमेश्वरे एनोह हुकुम मनेक्च़ा दोतिंङ रांहषी ततो।”

33अपेहल सभा ओ मीहज़ी दिह रेड्रिर दोरे हट्रा इलिर, दंङ दोरे प्रेरितातिंङ सच़ी तरेर। 34पर गमलीएल मिंदंङ इच्च़ा फरीसी मीहे अंऊ कानून सिखाएच़ा ए भत्ते मीहतु बिचंङ जाना माना तोहई, यहुदी सभा रिंङ खड़े शुहचे प्रेरितातिंङ थोड़े अरे टेमो थल्जी धह्तेका शिल्ज़िमी हुकुम रेंई। 35दंङ दोई महासभा ओ मीहतु हखा कुंई, “हे इस्राएलो मीहरे, केहरे छिला धिर दिहरे मीहतंङ साते लेह तातन, सोचेके समझेके लांही। 36छना कुचे थोड़े अरे टेमो तुहई थियूदास मिंदंङ इच्च़ा मीह ज़ि दिह दावा लेह कुहते, कि गेह ला छा शुगाह; कुट्रा ते अच़ा इलि, कि गेह ला छा शुगाह। लगभग पी राह मीहरे दोऊ थले जोज़ातेर, पर दुह सच़ी च़रतिर ता दोऊ थल जोज़ा दोरे देखा-नोखा शुचे इलिर दंङ दोच़ी छिल्ला सोचेक्सी ताहरेर ध्वांए शुहबी माहरति। 37दोऊ थल मिन दर्ज लहज़िमी टेमारिंङ गलील प्रदेशो बंङज़ा यहूदा#5:37 दि यहुदा दुह मशत अच़ि यीशु मसीह बि च़ुमज़ि लाहते दुह निहज़ा साल तुहई श्रींङे तोहई दंङ अच़ि मीहतिंङ रोमी राजो खिलाप खड़े लहरी। दोई दि सिखाएति कि रोमी सरकारा बि कर रंड्री ठीक माह छना कुचे परमेश्वर ए यहुदी तु रज्ज़ा शुह। खड़े शुई, दंङ रेह मीहतिंङ बहकाएति कि रोमी सरकारो खिलाप लोहर। दुह रोमी सरकारो दोरच़ी सिए इलि, दंङ अंयों ला मीहरे दोबि मनेक्च़ातेर भत्तेर तितर-बितर शुचि इलिर। 38दिऊ थल्जी दा गेह केतंङ साते कुट्रातग, दिहरे मीहतंङ साते शत्‌ह ए बंङज़ुंई दंङ दोतंङ साते छिला कम था तांई; छना कुचे अगर दिह योजना या कम मीहतु दोरच़ी शोतो, दंङ ता योह्सा योतो;

39पर अगर परमेश्वरो दोरच़ी शुह, ता केहरे दोतिंङ अपेहल ला खत्म लेह मरपोन; झांह शुहबी मेस कि केहरे परमेश्वरो बिरोधी साबित शोंई।” 40दंङ दोच़ी दोऊ गप्पा मनेकी केहरिर, दंङ प्रेरितातिंङ बुलाके कोड़ार लगाएतिर; दंङ दोतिंङ दिह हुकुम रेंईर कि हेंतेग बे यीशु ऊ मिंदंङ छले थाकुंई दंङ दोतिंङ छोड़ेके च़रतिर। 41दंङ दोरे यहुदी सभा ओ तुईज़ी हुंच़ा इलिर। दंङ छना दोरे वापिस यवातेर दोरे दि गप्पा रंङ खुश शुचे तोईरे कि ञेंरे यीशु थल्जी निरादर शुहबिमी जोगे शुईरे। 42दि घटना शुहबिमी थल प्रेरितार हर रोज, यहुदी मंदिरो ल्वाड़िंङ ए दंङ चुंङ-चुंङ इलज़ा दि सिखाएच़ि ए प्रचार लहज़ी लेहतिर कि यीशु ए मसीह शुह।

Currently Selected:

प्रेरित 5: LBFNT

Highlight

Copy