प्रेरित 4

महासभाओ तुईज़ी पतरस ए यूहन्ना

1अपेहल पतरस ए यूहन्ना मीहतंङ साते दिह कुट्रीए लेहकी तोईरे, दोहपल रै यहुदी पुरोहित ए यहुदी मंदिरो पहरेदारो मुख्या दंङ सदूकी मीहरे दोतु कछंङ अच़ा अतिर। 2दोरे महसे रोषेक्च़ा इलिर कि पतरस ए यूहन्ना यीशु ऊ पाहठी सिखाएक्च़ातेर कि अंऊ मीहरे सीए इल्जी तोतोर परमेश्वर दोतिंङ यह्च़ा श्रींङमी लोहतो, छना दोई यीशु बि सिमी दोरच़ी श्रींङी लेह च़रतो। 3दंङ दोच़ी दोरे गिरफ्तार लेह ऊईरग तचेक जेलंङ तरिर छना कुचे ञोंकल शुहचे इलजी तोहई। 4पर शिक्षा रेड्रा दोतु बिचंङ च़ि महसे मीहज़ी यीशु ऊ टोहकठे बिशवास लहरिर, दंङ दोर्तिंङ भत्तेर ठ्रोहका लेह लगभग ङा हज़ार गंङमीहरे तोईरे अरी यीशु ऊ टोहकठे बिशवास लहज़ार शुहचे इलिर।

पतरस ए यूहन्ना यहुदी सभा ओ तुईज़ी

5दोहपल ऊईरग दोतु अगुवार, सेंहणारे ए यहुदी शास्त्री तु महासभा यरूशलेम शहरंङ इच्च़ा ठहरि रिंङ ठ्रोहका शुई। 6दोरे मीहरे अंऊ सभा रिंङ शामिल तोईरे दोतु बिचंङ तुहई कि यहुदी महापुरोहित हन्ना, दंङ हेंतेग कि महापुरोहित काईफा तोहई। यूहन्ना, सिकंदर दंङ ऊई गंङमी अंऊ तुहई कि महा पुरोहितो खानदानो तोईरे, भत्तेर यरूशलेम शहरंङ ठ्रोहका शुईरे। 7दोरे भत्तेरे बंङज़ा इलिर दंङ पतरस ए यूहन्ना बि बिचंङ खड़े लेह च़रतिर दंङ दोतंङ साते रुहक्च़ी लेहतिर, “कि दिह मीहबी अईन लहज़िमी थल्जी, अच़ि केतिंङ शाक्ति ए अधिकार रांहषी ततो?” 8दोहथर पतरस पवित्र आत्मा रंङ साते पिंङे दोतंङ साते कुई, 9“हे मीहतु, मुख्या रे, सेंहणा रे ञेंहच़ी इच्च़ा लट्टे मीहू भलाई लहतन दंङ तोग ञेंतंङ साते पुछताछ शुहबी लेहकी तोह कि दुह छना अईन शुई।” 10ता केहरे भत्ते दंङ भत्ते इस्राएली मीहरे ञेंए केंईनी कि दिह नासरत नगरो यीशु मसीह अधिकारो दोरच़ी लहसी शुह। दुह ए यीशु बि केहच़ी क्रूसो टोईच़ी चढ़ाएकी केहतन, पर परमेश्वरे दुह यच़ाह सिमी दोरच़ी श्रींङे लेह च़रति। तोग दोऊ ए मिन्दु दोरच़ी दिह मीह केहतु तुईज़ी सही सलामत खड़े तोह। 11यीशु दुह रह्घ ठ्रोह शुह अपि केहच़ी राजमिस्त्रीज़ि निक्कमा ञेंचिरे पर दुह ए मीह कुंणीऊ रह्घ शुहचे इलि#4:11 पतरस दि आयता बि भजन संहिता 118:22 कुट्राते कि दंङ कुट्राते भजन संहिता ओ लेखके दि कंड्रा कि दि आयत प्रभु यीशु मसीहू पाहठी कंड्रा। । 12छना कुचे परमेश्वरे संसारो मीहतिंङ यीशु अलावा ऊई छल्ले मिन रांहषी माह अतु दोरच़ी हेनरि उद्धार खोकच़े तरपोंई।

13अपेहल दोच़ी पतरस ए यूहन्ना ओ याहब खंईर, दंङ दिह ञेंरिर कि दिरे सीधा सधा मीहरे शुहर, दंङ पवित्र शास्त्रो खास शिक्षा खोकसी माह ताहरेर, दंङ दोरे हेरान शुईरे; दंङ दोतिंङ सेहषी च़रतिर, कि दिरे यीशु साथी तोईरे। 14पर दुह मीह बि अरी आईन शुहते, पतरस ए यूहन्ना रंङ साते खड़े खंड्राते, महासभा ओ मीहरेर दोतु खिलाप छिला कुट्री मरतिरे। 15पर दोतिंङ यहुदी सभा ओ धह्तेका इबिमी हुकुम रेह, दोरे ऐनातु बिचंङ बिचार लहज़ी लेहतिर। 16“हेनर दिकु मीहतंङ साते छि लोहन?” छना कुचे यरूशलेम शहरंङ बंङज़ा भत्तेतु टोईच़ी प्रगट तोह, कि दितु दोरच़ी इच्च़ा मोह्ड़े चमत्कार शुहचे तोह; दंङ हेनर दोऊ इन्कार लेह मरपोंई। 17पर मीहतु बिचंङ दिह खबर महसे फेलेके माह जूंस, हेनर दोतिंङ धमकाए पोंई कि दोरे दिह मिंदंङ यच़ाह अरिला मीहतंङ साते गप्पा थालंही। 18दोहथर पतरस ए यूहन्ना बि बुलाएतिर दंङ खबरदार लेह दिह कुईर, यीशु ऊ मिंदंङ छल्ले थाह कुंईनी माह सिखाएतुंई। 19पर पतरस ए यूहन्ना ज़ि दोतिंङ जुबाब रेंईर, “केहच़ी ए फेंसला लांही, कि छि दिह परमेश्वरो तुईज़ी रूठे तोह आ, कि ञेंहरे परमेश्वरो गप्पा बे मोह्ड़े केहतु गप्पा मनेक्पोंई।” 20छना कुचे दिह ता ञेंहतु दोरच़ी शुहबी मरपोतो, कि अंऊ ञेंहच़ी खांषी ए रेहशी तातन, दुह माह कोंहई। 21दंङ महासभा ओ अगुवा मीहज़ी दोतिंङ सख्ती रें धमकी रे छोड़ेके च़रतिर, छना कुचे दोच़ी माह ञेंहच़ातेर कि दोतिंङ लड़ाई-झगड़ा मेह छना सज़ा रमोर, दिऊ थल्जी कि अंऊ घटना शुहचे तोहई, दोऊ बजह च़ि भत्ते मीहरे परमेश्वरो तारीफ लहज़ातेर। 22छना कुचे अंऊ मीह चमत्कार रंङ साते अईन शुहते दुह निज़ह साल बे महस उम्रो तोहई।

विशवासी तु प्रार्थना

23पतरस ए यूहन्ना रिहा शुहचे थल एनातु साथीतु कछंङ अतिर, दंङ छिला धिर यहुदी मोह्ड़े पुरोहित ए यहुदी सेंहणा ज़ि दोतंङ साते कुहते, दोतिंङ सुनाएकी च़रतिर। 24दिह रेड्रीमी रंङ, दोच़ी इच्च़ा सेहम शुहचे जोरे हाऊष रेह परमेश्वर रंङ साते कुईर, “हे प्रभु, कांह दुह ए शुनाह अच़ि स्वर्ग ए धरती, समुंद्र दंङ छिला धिर दोर्तिंङ तोह बड़ाएतिन।” 25केई पवित्र आत्माओ दोरच़ी केनोह सेवक दाऊद ञेंहतु बाह-मेमे ओ आहच़ि कुंईन, “ऊईजाति ऊ मीहरे छिले रोषेक्सा इलिर? दंङ देश-देशो मीहज़ी छिल्ल फालतु गप्पारे सोचेक्तिर? 26प्रभु परमेश्वर ए दंङ अपि मसीह शुहबिमी थल्जी दोई अंङषी ततो दोऊ खिलाप धरतीऊ रज्ज़ा खड़े शुहचे इलिर; दंङ अधिकारीर इच्च़ा साते ठ्रोहका शुहचे इलिर। 27छना कुचे हेले कांह पवित्र सेवक यीशु ऊ खिलाप रिंङ, अतु चुनाव केई लहतेन, रज्ज़ा हेरोदेस ए पुन्तियुस पिलातुस राज्यपाल ऊईजाति ऊ मीहतंङ साते ए इस्राएल देशो मीहतंङ साते दिह नगरंङ ठ्रोहका शुईरे। 28दोच़ी दुहए लहरिर अंऊ कांह सामर्थ ए हिटी ज़ि तुहई ए तय लेह च़रते कि शुहबी जूंस। 29धह हे प्रभु, दोतु धमकी रेड्रा; दंङ केनोह सेवकातिंङ वरदान रोंऊ कि कांह बचन मोह्ड़े याहबा रंङ साते सुनाएपोर। 30आईन लहज़िमी थल्जी केनोह गुहड़ तुंखा लौऊ कि चमत्कार ए हेरानी ऊ कम कांह पवित्र सेवक यीशु ऊ मिंदंङ लेह जूंस।” 31अपेहल दोच़ी प्रार्थना लेह केहरिर, ता दुह ठहरि अंऊर दोरे ठ्रोहका तोईरे त्रुल्ज़ा इलि, दंङ दोरे भत्तेर पवित्र आत्मा रंङ साते पिंङे इलिर, दंङ परमेश्वरो बचन याहब रंङ साते सुनाएची लेहतिर।

बिशवासीतु ठ्रोहका शुहचे बंङज़ी

32दंङ बिशवास लहज़ातु मंडली इच्च़ा सेहम ए इच्च़ा प्राण तोहई, देहर तचेक कि अच़िला एनोह टंगा ढबाह एनोह माह कुट्रातेर, छना कुचे अंऊ दोतु कछंङ तोहई दुह भत्ते तंङ साते फज़ातेर। 33दंङ प्रेरित मोह्ड़े सामर्थ रंङ साते प्रभु यीशु ऊ यच़ाह श्रींङे अच़िमी गवाही रंड्रातेर, दंङ परमेश्वरे दोतिंङ महसे मोह्ड़े दाह रांहषी तोहई। 34दंङ दोतु बिचंङ अरिला गरीब माह तोहई, छना कुचे अपेहल इच्च़ा मीह अतु दोर्तिंङ ज़मीन या घरबार तोहई, दोतु बिचंङ इच्च़ा बि लंङे दुह चीज़ा तु लस प्रेरितातिंङ रेह चरच़ाते। 35दंङ छना अतिंङ ज़रूरत शवाते, दोऊ हिसाबे हर इच्च़ा बि फाए चरच़ातेर।

36यूसुफ मिंदंङ इच्च़ा मीह तोहई। दुह लेवी खानदानो तोहई दंङ साइप्रस टापू च़ि तोहई। प्रेरिता ज़ि दोबि बरनबास कुईर, अतु मतलब दिह शुह, इच्च़ा झांह ठ्रोह मीह, अच़ि ऊईतिंङ हिम्मत रंड्री। 37दोई इच्च़ा रिह लंङे च़रति अंऊ दोऊ एनोह तोहई। दंङ दोई दोऊ लस प्रेरिता तिंङ रें च़रति ताकि विशवासी तु बिचंङ फाए तरपोर।

Currently Selected:

प्रेरित 4: LBFNT

Highlight

Copy