प्रेरित 14

पोलुस ए बरनबास ओ इकुनियुम शहरंङ विरोध

1झांह ठ्रोह इकुनियुम शहरा रिंङ ला शुई कि पोलुस ए बरनबास यहुदी सभो घरबारंङ इलिर, दोतु गप्पा लहज़िमी तरीका धोंण रूठे तोहई कि महस यहुदी ए ऊईजाति मीहच़ी बिशवास लहरिर। 2पर विशवास माह लहज़ा यहुदी मीहज़ी ऊईजाति ऊ मीहतु सेहम बिशवासी तु खिलाप भड़काएतिर, दंङ कड़वाहट पैदा लेह च़रति। 3पर पोलुस ए बरनबास महस ध्याड़ा तचेक दोर्तिंङ बंङज़िरी, दंङ प्रभु मोह्ड़े दाह ओ पाहठी याहब रंङ साते प्रचार लहज़ी लेहतिर; प्रभु यीशु ज़ि दि झुह्ट मीहतिंङ चिन्ह ए चमत्कार लहज़िमी सामर्थ रें च़रति दि साबित लहज़िमी थल्जी कि दोतु खबर दोऊ दोरच़ी अंज़े शुह। 4पर शहरो ओ मीहतु बिचंङ फूट अच़ा इलजी तोहई; दिरंङ रेह मीहरे यहुदी मीहतु हखा दंङ रेह मीहरे प्रेरितातु हखा शुहचे इलिर। 5दोहपल यहुदी मीहरे ए ऊईजाति दंङ मीहतु अगुवा रे सहमत शुचि इलिर दोतिंङ सताएच़िमी थल्जी दंङ दोतिंङ रघतु द्रले केट्रिमी थल्जी ताकि दोरे सिए इबि जूंस। 6अपेहल प्रेरिता तिंङ दि पता लेहती, दंङ दोरे लुस्त्रा दंङ दिरबे शहरो हखा पोक्शे इलिर, दंङ लुकाऊनिया प्रदेशो देखी-न्वेखी शहरो हखा, 7दंङ दोर्तिंङ रूठे खबरो प्रचार लहज़ी लेहतिर।

लुस्त्रा शहरंङ इच्च़ा लट्टे मीहू आईन शुहबी

8लुस्त्रा शहरंङ इच्च़ा मीह तोहई, अंऊ जेह्पीमि बे लट्टे तोहई। दोऊ झांह ठ्रोह हालात ज़ेक्पिमी मुक्का बे तोहई दिऊ थल्जी दुह अपेहल ला जोहसी माह तोहई। 9दुह बंङज़ा तोहई दंङ पोलुस ओ गप्पा रेड्री लेहकी तोहई। दंङ पोलुस ए दोऊ हखा ध्यान रंङ साते खंणी कि दोबि बिशवास तोह, कि दुह अईन शुहचे योतो। 10दंङ जोरे सग रें कुंई, केहनो कोन्ज़ो भारे सीधा खड़े शुह। दंङ दुह छाऊ रंड्रा जोज़ि लेहती। 11मीहच़ी पोलुस ओ दिह कम खंड्रा लुकाऊनिया भाषारिंङ जोरे हाऊष रें कुई, “सद्द् मीहतु रूपंङ हेंदु कछंङ अच्च़ा अंजा।” 12दंङ दोच़ी बरनबास बि यूनानी सग ज्यूस ओ मिन रेंईर दंङ पोलुस बि हिर्मेस#14:12 युनानी सद्द् ज्यूस रज्ज़ा शुह दंङ हिर्मेस अंऊ युनानी सद्द् तोहई ज्यूस सद्द् ए ऊई सद्द् तु दोरच़ी उजाब हपिमी कम लहज़ाते। ओ मिन रेंईर, छना कुचे दुह मोह्ड़े प्रचारक तोई। 13अंऊ मंदिरंङ दोरे मीहरे ज्यूस सद्द् तु अराधना लहज़ातेर दुह शहरो शुरूआता रिंङ ए तोई। झांह लेह दोतु पुरोहिता ज़ि शहरो शुरूआत रिंङ पेतंङो कछंङ बंङशिली अंऊ दोतु मुथु रिंङ ऊड्रो हार तोई, छना कुचे दोरे भत्तेर प्रेरिता तु थल्जी बलिदान चढ़ाएसी ज़ुंज़ातेर। 14पर प्रेरित बरनबास ए पोलुस ज़ि अंऊ मुक्का दिह रेड्रिर, ता दोरे महसे परेशान शुचे इलिर दिऊ थल्जी दोच़ी ऐनो एनो खमज़ेर ट्रवल्ज़े च़रतिर, दंङ दोच़ी भीड़ो बिचंङ छ्वाह रें च़रतिर, दंङ हाऊष रेह कुट्री लेहतिर, 15“हे मीहरे, केहरे छि लहज़ी लेहकी तोतोन? ञेंहरे ला केहतु ठ्रोह दुख सुख सहन लहज़ा मीहरे शुई, दंङ केतिंङ रूठे खबर सुनाचातोनि, कि केहरे दिह फालतु चीज़ा तु दोरच़ी शत्‌ह शुहचे श्रींङी परमेश्वरो हखा अतंई, अंऊ दोई स्वर्ग, धरती, समुन्द्र दंङ छिला धिर दोर्तिंङ तोह दुह बणाएती। 16दोई तुईकी टेमा रिंङ, भत्ते जातितिंङ एनोह-एनोह हिसाबे जोज़ी रेंई। 17तांला दोई एनोह रूठे कमो दोरच़ी एनोह पाहठी गवाही रंड्रा लहरी: दुह केहतु थल्जी सर्गंङ च़ि संदा दंङ मौसमो हिसाबे फसल रंड्रा; केहतु थल्जी बगत रंड्रा दंङ केहतु सेहम खुश लहज़ा।” 18दिह कुचे थल ला दोच़ी मीहरे बड़ा मुशकिले चेहतिर कि दोतु थल्जी बलि था चढ़ाएतुंई।

19पर रे यहुदी मीहज़ी अन्ताकिया ए इकुनियुम शहरंङ च़ि अंज़े मीहतिंङ याकिन रेंईर कि पोलुस ए बरनबासो टोईच़ी विशवास थालंही। दंङ दोतिंङ मज़बूर लहरिर कि पोलुसा बि रघ द्रले बहाके च़रतिन। दोच़ी झांह लेह दि चेहके च़रतिर कि दुह सिए चेहकी नगरो धकते शोकिह रेंज़ा हतिर। 20पर अपेहल विशवासी दोऊ पिला हासी खड़े शुहचे इलिर, ता दुह खड़े शुहचे शहरो हखा अच्च़ा इलि दंङ ऊई ध्याड़ा लुस्त्रा शहर केट्रा दिरबे शहरो हखा इबिमी थल्जी बरनबासा रंङ साते अच्च़ा इलिर।

सीरिया प्रदेशो अन्ताकिया शहरो हखा वापसी

21दोऊ थल पोलुस ए बरनबास दिरबे शहरो मीहतिंङ रूठे खबर सुनाएच़ा, महस तिंङ याकिन दिलाएतिर कि दोच़ी यीशु टोईच़ी विशवास लोहर, दोऊ थल, दोरे एनोह अमरिंङ वापिस इबि लेहकी तोईरे। दंङ दोरे दोरच़ी इकुनियुम शहरो हखा इलिरे, दंङ तांला दोरे पिसिदिया प्रदेशो अन्ताकिया शहरो हखा इलिरे। 22दंङ हर इच्च़ा शहरो चेला तु सेहम पक्‍का लोहवा लहरिर दंङ दिह शिक्षा रंड्रातेर कि विशवास रिंङ बणेंके तोंई; दंङ दिह कुट्रातेर, ञेंतिंङ महस कष्ट उठाके परमेश्वरो राज रिंङ इबि लेह्पोतो। 23दंङ दोच़ी हर इच्च़ा कलीसियाओ मीहतु थल्जी सेंहणारे ठेहराएतिर, दंङ ब्रत ए प्रार्थना लहच़ी दोतिंङ प्रभुऊ गुहड़िंङ रेह च़रति अतु टोईच़ी दोच़ी बिशवास लहरीर ताकि प्रभु दोतु ख्याल लोहतो।

24दोरे अन्ताकिया शहरंङ ज़ि जोज़ा पिसिदिया प्रदेशंङ च़ि शुहचे दोरे पिरगा शहरंङ अतिर अंऊ पंफूलिया ज़िला रिंङ तोहई। 25दोच़ी पिरगा नगरंङ परमेश्वरो बचनो प्रचार लहज़िमी थल दोरे अत्तालिया मिन्दु बंदरगाह शहरो हखा अच़ा इलिर। 26दंङ दोरच़ी समुन्द्री जहाज़ंङ च़ि अन्ताकिया शहरंङ वापिस अच़ा अतिर। अंऊर दोतु सफर शुरू शुह्ते। दोरकी विशवासी ज़ि दोतिंङ परमेश्वरो मोह्ड़े दाह रिंङ सौंपेगी च़रतिर, दुह कम लहज़िमी थल्जी अंऊ दोबी दोच़ी हेंतेग पूरा लाहतेर। 27अन्ताकिया शहरंङ पिचे, दोच़ी कलीसिया ओ मीहरे ठ्रोहका लहरिर दंङ कुईर, कि परमेश्वरे ञेंतंङ साते शुहचे छना मोह्ड़े-मोह्ड़े कम लहरी! दंङ छना परमेश्वरे ऊईजाति ऊ मीहतिंङ यीशु मसीहू टोहकठे बिशवास लहज़िमी जोगे लहरी। 28दोर्तिंङ पोलुस ए बरनबास चेला तंङ साते महस ध्याड़ा तचेक बंङज़िरी।

Currently Selected:

प्रेरित 14: LBFNT

Highlight

Copy