प्रेरित 13

बरनवासे ए शाऊल ओ चरच़ि

1अन्ताकिया शहरो कलीसिया रिंङ महसे भविष्यवक्ता ए शिक्षा रंड्रा तोईरे; मतलब बरनबास ए शमौन अतु अई मिन नीगर (रोह्की) कुट्रातेर; दंङ लूकियुस अंऊ कुरेनो शहरो शुह, शाऊल दंङ मनाहेम अंऊ दोतु पालन-पोषण राज्यपाल हेरोदेस#13:1 हेरोदेस, रज्ज़ा हेरोदेसो योह तोहई अच़ि कटु यीशु बि सच़िमी कोशिश लाहते (मत्ती 2:15-18) अपेहल दोऊ बाह सिए इलि दोहपल दि हेरोदेसा बि दोऊ बाह ऊ ठहरि रिंङ इच्च़ा चौथा हिस्सा रिंङ राज्यपाल बणाके च़रतिर। दोबि गलील ए परेए प्रदेशो राज्यपाल बणाके च़रतिर दंङ दि परेए प्रदेश गलील सागरो पूर्व दिशा रिंङ तोहई। रंङ साते शुहते। 2अंऊ मुक्का दोरे ब्रत लहज़ा प्रभु ऊ अराधना लहज़ी लेहकी तोईरे, ता पवित्र आत्माज़ि कुई, “बरनबास ए शाऊल बि दुह खास सेवा लहज़िमी थल्जी समर्पण लांही अंऊ कमो थल्जी गेह दोतिंङ बुलाएसी तातग।” 3दोथर दोच़ी ब्रत ए प्रार्थना लहज़ा दंङ दोतु टोईच़ी गुड़ केह्चे दोतिंङ परमेश्वरो कम लहज़िमी थल्जी च़रतिर।

पोलुस ओ मुण्डो प्रचार यात्रा

4झांह लेह शाऊल ए बरनबास पवित्र आत्माओ दोरच़ी च़रसी, अन्ताकिया शहरंङ च़ि सिलूकिया बंदरगाह तचेक इलिर; दंङ दोरच़ी जहाज़ंङ बंङज़ा सलमीसो हखा अच़ा इलिर अंऊ साइप्रस द्वीप बंदरगाह तोहई। 5दंङ सलमीस बंदरगाह रिंङ पिचे ठहरि-ठहरि इलजी परमेश्वरो बचन यहुदी सभो घरबारंङ सुनाएतिर; दंङ यूहन्ना अतु मिन मरकुस शुह, दोतु मदत लहज़िमी थल्जी दोतंङ साते तोहई। 6दिऊ थल दोच़ी भत्ते द्वीपा इच्च़ा इलाकंङ च़ि ऊई इलाकंङ तचेक यात्रा लहरिर दंङ दोथर दोरे पाफुस#13:6 पाफुस भत्ते टापू इच्च़ा सरकारी मुख्यालय तोहई दुह सलमीस बंदरगाह दोरच़ी 145 किलो मीटर दशिण पशिचमो दिशा रिंङ तोहई। शहरंङ पिचे इलिर। दोर्तिंङ दोतिंङ बार-यीशु मिंदंङ इच्च़ा यहुदी जादूगर दोईरी, अरि हप्सी भविष्यवक्ता तोहई। 7दुह अधिकारी सिरगियुस पोलुस रंङ साते तोहई, अंऊ बुद्धिमान गंङमी तोहई। दुह अधिकारी बरनबास ए शाऊल बि एनोह कछंङ बुलाके परमेश्वरो बचन रेड्री तते। 8पर बार-यीशु ज़ि अतु उपनाम एलीमास मतलब जादूगर तोहई, दोतु बिरोध लहरी, कि अधिकारी यीशु ऊ टोहकठे बिशवास लेह माह जूंस। 9दोथर शाऊले अतु मिन पोलुस ला शुह, पवित्र आत्मा रंङ परिपूर्ण शुहचे एलीमास जादूगर ओ हखा खंड्राते कुंई, 10“हे कपटी ए भत्ते चलाकी रंङ साते बिंङे शेतानो कपूता, भत्ते धर्मिकता ओ बेरी, छि केई प्रभु ऊ सीधा अम ढेहरे लेह ब्याड़ा माह लोहन आ? 11दंङ खंणु, प्रभु कनिंङ सज़ा रंड्रीमी तोह; दंङ कांह थोड़े टेम तचेक कोंङे बंङज़ोन दंङ ऐके खांई मरपोन।” दुए मुक्का दोऊ टिरो तुईज़ी भूधड़े दंङ हंयार अच़ा अति दंङ दुह देखा-नोखा मदत पेट्री लेहती कि अरिया दोऊ गुड़ च़ुमने ते दोबि रेंज़ा शोर। 12दंङ दुह अधिकारी ज़ि छिला धिर शुहते दुह खंड्राते, दंङ प्रभु ऊ पाहठी शिक्षा ओ दोरच़ी हेरान शुहचे प्रभु यीशु ऊ टोहकठे बिशवास लहरी।

अन्ताकिया शहरंङ पोलुस ओ शिक्षा

13पोलुस ए दोऊ साथीर पाफुस इलाकंङ च़ि समुंद्री यात्रा शुरू लहरिर दंङ दोरे पंफूलिया प्रदेशो पिरगा इलाकंङ पिचे इलिर। दंङ यूहन्ना अतु मिन मरकुस ला शुह, दोतिंङ व्याड़ा लहच़ी वापिस यरूशलेम शहरंङ अच़ा इलि। 14दंङ पिरगा शहरंङ च़ि तुंखा इलजे गलातिया प्रदेशो पंफूलिया प्रदेशो ओ कछंङ अन्ताकिया शहरंङ पिचे इलिर, दंङ अरामो ध्याड़ा रिंङ यहुदी सभो घरबारंङ इलजे बंङज़ा इलिर। 15अंऊ गंङमीतिंङ पढेक्पिमी ज़िम्मेवारी रांहषी तोहई मूसा ओ कानून ए भविष्यवक्तातु कताबो हिस्सा ओ दोरच़ी दोच़ी पढ़ेकपिमी थल, दोहथल यहुदी सभो घरबारो मुख्या ज़ि दोतु थल्जी उजाब च़रतिर, “हे बिशवासी न्वारे, अगर मीहतिंङ बड़ावा रंड्रीमी थल्जी केहतु सेहमा छा गप्पा तोह ता कुंईनि।”। 16दोथर पोलुस ए खड़े शुहचे दंङ गुह्ट्र रंङ इशारा लहचे दोतिंङ शांत शुहबिमी थल्जी कुई, “हे इस्राएल देशो मीहरे, दंङ परमेश्वर ओ बेह्द चेहच़ा ऊई जातिऊ मीहरे, रेड्रुंई” 17अंऊ परमेश्वरो ञेंरे इस्राएली अराधना लहज़ातंई दोई ञेंहतु बाह-मेमेर अंङे च़रतिर दोऊ मीहरे बणेक्पिमी थल्जी, दंङ अंऊ मुक्का दिहरे मिस्त्र देशंङ परदेशी शुहचे बंङज़ातेर, ता दोतु तरक्की लहरी; दंङ पराक्रमी सामर्थ रंङ साते हुंच़े हति। 18दंङ दोई निह्ज साल तचेक सुनसान ठहरि रिंङ दोतु मदम व्यवहार सहन लहरी। 19दंङ दोच़ी कनान देशंङ निह्ज जातितु नाश लेह दोतु ज़मीन एनोह मीहतिंङ विरासता रिंङ रें च़रति। 20दि भत्ते घटना पूरा शुहबिमी थल्जी लगभग साढ़े पि राह साल लेहकी इलि। दोऊ थल परमेश्वरे दोतिंङ न्याय तिंङ रें च़रति ताकि दोरे शमूएल भविष्यवक्तो टेम तचेक राज लोहर। इस्राएल देशो मीहतु न्याय लहज़िमी थल्जी सेंहणारे नियुक्त लहरिर। 21अंऊ मुक्का शमूएल भविष्यवक्ता हेंतेग तचेक इस्राएलो सेंहणा ए तोहई कि दोच़ी इच्च़ा रज्ज़ा ओ मांग लहरिर; दंङ परमेश्वरे कीश ओ योह शाऊल बि दोतु रज्ज़ा बणाएती अंऊ कि बिन्यामीन ओ गोत्रो बिचंङ च़ि तोहई। दोई इस्राएलो मीहतु टोहकठे निहज़ा साल तचेक राज लहरी। 22दोथर परमेश्वरे शाऊल बि राज पाठ ओ दोरच़ी थल्का लेह दाऊद बि दोतु रज्ज़ा बणाएती; अतु पाहठी परमेश्वरे गवाही रेंई, गिह्बी इच्च़ा मीह, यिशै ओ योह दाऊद, गिऊ सेहमो हिसाबे खोकसा इलज़ा तोह; दोई ए गिऊ भत्ते हिटी पूरा लोहतो। 23रज्ज़ा दाऊदो वंशो दोरच़ी परमेश्वरे एनोह वाईदा ओ हिसाबे इस्राएल मीहतु थल्जी इच्च़ा उद्धार कर्ता मतलब यीशु बि च़रति। 24अतु अपिमी बे तुहई यूहन्ना ज़ि प्रचार लहरी, कि इस्राएली देशो भत्ते मीहतिंङ एनातु पापो दोरच़ी सेहम किरच़िमी ए परमेश्वरो कछंङ अपिमी दंङ बपतिस्मा लेहप्च़िमी ज़रूरत तोह। 25दंङ अपेहल यूहन्ना एनोह सेवा ओ कम पुरा लहज़िमी तोहई, ता दोई कुहतो, केहरे गिह्बी छि चेहच़ातंई? गेह मसीह माह शुगाह! पर खंणुई, गिऊ थल इच्च़ा अपिमी तोह, दुह गेह बे महसे महान तोह, गेह ता दोऊ भूटो तस्मा युहप्च़िमी जोगे ला माह तोग। 26“हे बिशवासी न्वारे, केरे अंऊ अब्राहमो कटुरे शुई; दंङ केहरे अंऊ परमेश्वर ओ बेह्द चेहच़ातंई, परमेश्वरे हेंदु कछंङ उद्धारो खबर च़रसी ततो।” 27यरूशलेम शहरो ओ मीहज़ी ए दोतु सेंहणा ज़ि यीशु बि माह सेहतिर कि यीशु दुह ए मीह शुह अतु पाहठी भविष्यवक्ताज़ि च़ेहसी शुह। दिऊ थल्जी अपेहल दोच़ी दोष लगाएतिर कि दुह सिए केट्री जूंस दोच़ी भविष्यवक्तातु गप्पा पूरा लहरिर अंऊ हर अरामो ध्याड़ा रिंङ पढ़ेक्च़ातेर। 28दोच़ी सच़िमी जोगे छा दोष दोऊ अन्द्रेग माह तंङरिर, तांला दोच़ी राज्यपाल पिलातुस रंङ साते बिनती लहरिर, कि दोबि सच़ी च़रतुंई। 29दोच़ी यीशु रंङ साते दुह भत्ते धिर लहरिर अंऊ पवित्र शास्त्रा रिंङ दोऊ पाहठी च़ेहसी तोहई। दोच़ी दुह इच्च़ा क्रूसो टोईच़ी केह्चे सच़ी च़रतिर दंङ दोरच़ी तक्से कब्रो अन्द्रेग केह्चे केहरिर। 30पर परमेश्वरे दुह सिए दोतु बिचंङ च़ि श्रींङमी लहरी, 31दंङ दुह दोतिंङ अंऊ दोरंङ साते गलील प्रदेशंङ च़ि यरूशलेम शहर अंज़े तोईरे, दोतिंङ महसे ध्याड़ा तचेक तंङफा लहरी। दि दोरे मीहरे शुरे अंऊ दोच़ी यीशु तंङातेर, दंङ हेंतेग दिरे मीहरे ऊई मीहतु तुईज़ी यीशु गवाह तोतोर। 32दंङ हेंतेग ञेंहरे केतिंङ दि रूठे खबर सुनाएच़ातंई। ञेंहच़ी केतिंङ दि कंड्रातंई कि परमेश्वरे हेंदु बाह मेमे तंङ साते छि वाईदा लहसी तहरे दोबि पूरा लाहतो। 33यीशु मसीहू बि सिए दोतु बिचंङ ज़ि श्रींङमी दोरच़ी, दोई हेंतेग दि भत्ते धिर हेंदु थल्जी लहसी शुह अंऊ दोऊ कटुरे तोतोर। दिए यीशु मसीहू पाहठी भजन संहिता ओ दूसरा अध्याय रिंङ ला च़ेहसी तोह, कांह गिऊ योह शुनाह; तोग गेह कंङातग कि गेह कनु बाह शुगाह। 34दंङ दोऊ झांह ठ्रोह सिमी दोरच़ी श्रींङे लहज़िमी पाहठी ला, कि दुह अपेहल ला माह सूफी जूंस, परमेश्वर झांह कुट्रा, “गेह केतिंङ दुह पवित्र ए अटल आशीष रमोग अंऊ गेह रज्ज़ा दाऊदा रंङ साते वाईदा लहसी तातेग।” 35रज्ज़ा दाऊद दिह गप्पा ऊई भजन संहिता रिंङ ला कुट्रा, केई केनोह पवित्र मीहबी सूफी माह रमोंन।

36छना कुचे रज्ज़ा दाऊद परमेश्वरो हिटी ऊ हिसाबे एनोह टेम पूरा लहज़िमी थल सी इलि, दंङ दुह एनोह बाह-मेमे तंङ साते पथेक्की च़रतिर, दंङ सुहषी ला इलि। 37पर दुह यीशु ऊ पाहठी कुट्री लेहकी तोहई कि परमेश्वरे दुह सिमी दोरच़ी श्रींङे लहज़ा, सुहषी माह रांही। 38दिऊ थल्जी हे बिशवासी न्वारे, केहच़ी ञेंहई च़रतुंई कि यीशु ऊ दोरच़ी पापो माफिऊ रुठे खबर केतिंङ रंड्रातोर। 39अच़िला मीह दोऊ टोईच़ी विशवास लहज़ा परमेश्वरा रंङ साते निर्दोष ठहरेसोतो, झांह ठ्रोह अंऊ मूसा ओ कानूनो अपेहल ला लेह मरपोतो। 40दिऊ थल्जी खबरदार तोंई, झांह शुहबी मेस, कि अंऊ भविष्यवक्तातु कताबंङ च़ेहसी तोह, दोरे गप्पार केहतु टोईच़ी ला अच़ा अपोर:

41हे ठ्ठाठा लहज़ा मीहरे, खंणुई, दंङ हेरान शुई, दंङ योह्सा इलांई; छना कुचे गेह केहतु तुईज़ी झांह ठ्रोह कम लहज़िमी तोतग; कि अगर अच़िया केतंङ साते दोऊ पाहठी रूठे रंङ कम्बोतो, तांला केहच़ी अपेहला विशवास माह लोहनि।

अन्ताकिया शहरंङ पोलुस ए बरनबास

42अंऊ मुक्का पोलुस ए बरनबास यहुदी सभो घरबारंङ च़ि धह्तेका हुंच़ी लेहकी तोईरे, ता मीहरे दोतंङ साते बिनती लहज़ी लेहतिर, कि अई अरामो ध्याड़ा रिंङ ज़ि शबास दि गप्पातु पाहठी ऊई ला सिखाएतुंई। 43दंङ अंऊ मुक्का सभा इलि, दंङ रेह यहुदी ए यहुदी धर्म बि मनेक्च़ा ऊई जातिओ मीहरे पोलुस ए बरनबास रंङ साते जुड़ेकी इलिर; दंङ दोच़ी मीहतिंङ याहब रांई, कि परमेश्वरो मोह्ड़े दाह रिंङ बणेंके बंङज़ुंई।

44अई अरामो ध्याड़ारिंङ अन्ताकिया शहरो लगभग भत्ते मीहरे परमेश्वर ओ बचन रेड्रिमी थल्जी ठ्रोहका शुहचे इलिर। 45पर अपेहल यहुदी ज़ि भीड़ खंईरे दंङ दोरे महसे रोषेक्सा इलिर। दोरे दोऊ गप्पा ओ बुराई लहज़ी लेहतिर कि पोलुस छि कुट्री लेहकी तोह दंङ दोरंङ साते कुवाद लहज़ी लेहतिर। 46दोथर पोलुस ए बरनबास ए निडर शुहचे कुईर, “कि परमेश्वरो बचन मुण्डारिंङ केतिंङ यहुदी तिंङ सुनाएची ज़रूरी तोहई; पर केहच़ी दोबि ग्रहण माह लहज़ातन। झांह लेज़मी रिंङ साते केहच़ी दि साबित लाहतंई कि केरे अनंत जीवन खोकच़िमी जोगे माह तोहई, दिऊ थल्जी दा ञेंहरे योंई दंङ ऊईजाति मीहतु सुनाएपोंई।

47छना कुचे प्रभु ज़ि ञेंतिंङ दिह हुकुम रांहषी ततो, गेह कनिंङ ऊई जातितु थल्जी छंङी ठहरासी तातग, ताकि काह धरतिऊ कुणीङ तचेक उद्धारो पितङ शोन।”

48अपेहल ऊईजाति ज़ि दिह रेड्रीर ता दोरे महस खुश शुहचे इलिर, दंङ दोऊ दि खबरो थल्जी प्रभु बि धन्यवाद रंड्री लेहतिर, दंङ अंयों ला अनंत जीवनो थल्जी ठहराएसी तातेर दोच़ी बिशवास लहरिर। 49दोथर प्रभु यीशु ऊ बचन भत्ते प्रदेशंङ फेलेके इलि। 50तांला यहुदी मीहतु सेंहणा ज़ि भक्त ए रूठे मेच़िमीतिंङ दंङ शहरो अगुवा तिंङ भड़काएतिर, कि दोच़ी पोलुस ए बरनबासा बि सताएपोर। दोच़ी दोतिंङ दुह एनोह इलाका ओ दोरच़ी धह्तेका हुंच़े च़रतिर। 51दोथर पोलुस ए बरनबास दोतु तुईज़ी एनोह कोन्ज़ो धुह्‌ड़ ठुड़केगी, दोतिंङ दिह कंड्रिमी थल्जी कि परमेश्वर दोतिंङ ग्रहण माह लहतो दंङ दोतिंङ सज़ा रमतो, दंङ दोरे इकुनियुम शहरंङ अच़ा इलिर। 52दंङ अन्ताकिया शहरंङ विशवासी खुशी रंङ ए पवित्र आत्मा रंङ साते परिपूर्ण शुहवा लहरिर।

Currently Selected:

प्रेरित 13: LBFNT

Highlight

Copy