प्रेरित 1

परिचय

1आदरणीय थियुफिलुस, गिऊ मुण्डो कताबंङ गेह केतिंङ दुह भत्ते गप्पो पाहठी कंड्रातग अंऊ यीशु ज़ि लहज़ी ए सिखाएच़ी शुरू लहरी, 2दिबे तुहई कि यीशु स्वर्गो हखा मेहली। परमेश्वरो दोरच़ी स्वर्गो हखा शिल्ज़िमी बे तुहई यीशु ज़ि दोरे अंङषी प्रेरिता तिंङ पवित्र आत्माओ मदत रंङ साते दोतिंङ हुकुम रेंई। 3यीशु ज़ि दुख उठाएच़िमी ए सिमी थल, पक्‍का सबूत रंङ साते कंड्रातो कि दुह श्रींङे तोह। दंङ प्रेरिता ज़ि झुह्ट निज़ा ध्याड़ा तचेक दुह श्रींङे तंङरिर दंङ यीशु ज़ि दोहपल तचेक परमेश्वरो राज्यो पाहठी गप्पार दोतिंङ सुनाएती। 4इच्च़ा ध्याड़ा अपेहल भत्ते चेलारे ठ्रोहका तोईरे ता यीशु ज़ि दोतिंङ हुकुम रेंई कि, “यरूशलेम शहर बि केट्रा था इलांई, पर दुह दान ओ इंतज़ार लांही अंऊ पिता परमेश्वरे केतिंङ रंड्रीमी वाईदा लहसी तते, दंङ अतु पाहठी केहच़ी गिऊ दोरच़ी तुह्ई ए थक्शातेन। 5छना कुचे यूहन्ना ज़ि ता केतिंङ ती रंङ साते बपतिस्मा रंदे पर थोड़े ध्याड़ो थल परमेश्वरे केतंङ साते बंङज़िमी थल्जी पवित्र आत्माबि च़रपोतो।”

यीशु ऊ स्वर्गो हखा इबी

6दिऊ थल्जी अपेहल भत्ते प्रेरितर यच़ाह यीशु रंङ दोईरे ता दोच़ी दोऊ हखा रुहक्तिर, “हे प्रभु, छि काह हेंतेग रोमी तिंङ यहरच़े ञेंरे इस्राएल मीहतु राज दोबारा बणाएपोन आ?” 7यीशु ज़ि दोतंङ साते कुंई, सिर्फ गिऊ बाह परमेश्वरो कछंङ अधिकार तोह दुह टेम फेंसला लहज़िमी तोह। “केतिंङ दि पता लगाच़िमी ज़रूरत माह कि दुह टेम अपेहल अपतो।” 8पर अपेहल पवित्र आत्मा केहतु टोहकठे अपतो दोहपल केतिंङ सामर्थ खोकसोतो; दंङ यरूशलेम शहर ए भत्ते यहुदिया ए सामरिया प्रदेशारिंङ, दंङ संसारो भत्ते ठाहरीरिंङ मीहतिंङ गिऊ पाहठी कंड्रिमी थल्जी गिऊ गवाह शोंई। 9यीशु दि गप्पा कुट्रीमी थल परमेश्वरे दोबि चेला तु तुइज़ी स्वर्गंङ रेंज़ा शिलिरे, दंङ दोरे दोबि तुंखा खंड्री मरतिर छना कुचे दुह इच्च़ा डुह बिचंङ अच़ा इलि। 10छना यीशु खेका-खेका सर्गंङ यवाते दोहथर दोऊ चेलार ध्यान रंङ साते दोबी खंड्रातेर। अचानक झुह्ट गंङ मीहरे दोतु कछंङ अतिर। अंऊ छंङसे खमज़ेर लेहके तोईरे दोतु कछंङ अंज़े खड़े शुहचे इलिरे। 11दंङ कुट्री लेहतिर, “हे गलील प्रदेशो गंङ मीहरे, केहरे छिले खड़े शुहचे सर्गो हखा खंड्री लेहकी तोतोंई? दिह ए यीशु, अतिंङ परमेश्वरे केहतु कछंङ च़ि स्वर्गो हखा रेंज़ा शिली, ठीक ध्यांए ठ्रोह दुह यच़ाह अपतो छना ठ्रोह केहच़ी दुह सर्गो हखा इबी तंङातेन।”

मत्तियाह बि यहूदाऊ ठहरि खोकसी

12अपेहल स्वर्गदूतार अच़ा इलिर दोऊ थल प्रेरितार जैतून#1:12 जैतूनो बुटो यहुदी मीहतु थल्जी महस खास तोह दिऊ तेल बगत बणाशी थल्जी इस्तेमाल लहज़ी। मिंदंङ गोह टोहकठे च़ि यरूशलेम शहरो हखा अतिर, अंऊ यरूशलेम शहरो कछंङ लगभग इच्च़ा किलो मीटर ऊई तार तोह। 13अपेहल दोरे पिचे इलिर ता दोरे इच्च़ा चुंङो तोरिंङ खी कमरारंङ इलिर अंऊर दोरे बंङज़ातेर। दि दोतु मिन शुह अंऊर दोर्तिंङ हाज़िर तोईरे पतरस, यूहन्ना, याकूब, अन्द्रियास ए फिलिप्पुस, थोमा, बरतुल्मै, मत्ती, हलफई ऊ योह याकूब, शमौन, जेलोतेस दंङ याकूबो योह यहूदा। 14दिरे चेलारे इच्च़ा सेहमारंङ रोज ठ्रोहका शुचे लगातार प्रार्थना लोहवा लहज़ातेर। दोतंङ साते रेह मेच़िमी रे ला ठ्रोहका शुचि इलिर अंऊ दोतु बिचंङ यीशु याह मरियम ला तोहई दंङ यीशु न्वारे ला ठ्रोहका शुचि इलिर।

15इच्च़ा ध्याड़ारिंङ पतरस दुह लगभग राह निंज़ो मीहतु बिचंङ खड़े शुहचे कुट्री लेहती, 16हे बिशवासी न्वा रे, दिह ज़रूरी तोहई कि पवित्रशास्त्रा रिंङ च़ेहसी बचन पूरे शुबी जूंस अंऊ पवित्र आत्माज़ि रज्ज़ा दाऊद ओ आहच़ि यहूदो पाहठी तुह्ई ए कुहषी तारेह, अरि यीशु बि च़ुमज़ि लहज़ातु मुख्या तोहई। 17छना कुचे दुह ता ञेंहतु बिचंङ च़ि इच्च़ा तोहई, दंङ दिह सेवा ओ कमो टेमा रिंङ ञेंतंङ साते तोहई। 18छना कि केहच़ी ञेंहच़ातंई कि यहूदा रंङ साते छि शुह्ते। दोई यीशु बि च़ुमज़िमी थल्जी अंऊ धोखा ओ ढबाह यहुदी अगुवा तिंङ वापिस लहरी। दंङ दोई एनाबि फांसी लगाके च़रति दंङ पुन्ज़ो भारे धरतीऊ टोईच़ी दह्चे इलि दंङ दोऊ खोक ग्वाशे इलि, दंङ दोऊ भत्ते च़िरी हुंच़ा इलि। दोहथल यहुदी अगुवा ज़ि दुह धोखा ओ ढबाह इस्तेमाल लहरिर दंङ इच्च़ा रीह च़ुमरिर। 19दंङ यरूशलेम शहरो मीहतिंङ दिह गप्पो पाहठी पता लेहकी इलि, दंङ दिऊ थल्जी दोरे कि मीहरे दू ठहरि बि एनोह भाषा रिंङ, हकलदमा मतलब शुहई ऊ रीह कुट्री लेहतिर। 20#1:20 दि अंऊ गप्पा भजन संहिता 109:8 रिंङ च़ेहसी तोह अंऊर रज्ज़ा दाऊदे प्रार्थना लहसी तोह कि परमेश्वर दोऊ बैरी ओ बदला रिंङ ऊई अरिआ मीहबी दोऊ ठाहरिरिंङ अगुवा बणाएपोतो।दोहथल पतरस एनोह गप्पा तुंखा कुट्री लेहती, भजन संहिता ओ कताबंङ महसे तुहई रज्ज़ा दाऊदे यहूदा ओ पाहठी दि च़ेहसी तते, दोऊ घरबारो उजाड़ शुहबी जूंस दंङ दोर्तिंङ अरिला बसेफी मेस दाऊद ऊई ठहरि दिह ला कुट्रा, “ऊई मीहच़ी दोऊ ठहरि लेहपच़ी जूंस।”

21-22दिऊ थल्जी दिह ज़रूरी तोह कि इच्च़ा झांह ठ्रोह मीहबी अंङषी जूंस, अंऊ हेंदु ए संगति रिंङ पुरा टेमो थल्जी तोहई अपेहल ञेंरे प्रभु यीशु रंङ साते भत्ते ठहरि सफर लहज़ातेंई। प्रभु यीशु बि यूहन्ना ओ दोरच़ी बपतिस्मा रंड्रीमी बेहच़ी यीशु ऊ स्वर्गंङ इबिमी तचेक दिह मीह ञेंतंङ साते प्रभु यीशु ऊ यच़ाह श्रींङे शुहबिमी गवाह शोतो। 23झांह लेह प्रेरित एरे विशवासी ज़ि झुह्ट कमो जोगे गंङमी ज़ि मिन्दु सलाह रेंईर। इच्च़ा तोहई यूसुफ अतु मिन चुंङी मिन बरसब्बा ला कुट्रातेर। दंङ दोऊ रोमी मिन यूस्तुस तोहई, दंङ अई मीह मत्तियाह तोहई। 24दोऊ थल दुह भत्ते ज़ि प्रार्थना लहरिरे। दंङ दोतु बिचंङ ज़ि इदि झांह प्रार्थना लहरी, हे प्रभु, कह अच़ि भत्ते तु सेहमो पाहठी ञेंहच़ातन दि कंड्रु कि दिकुतु बिचंङ च़ि केई अंऊसंङ अंङषी तातन 25ताकि दि सेवा ओ कमारिंङ कम ए प्रेरित ओ ठहरि लेह्पोतो, अंऊ सेवकाई केट्रा यहूदा हेंदु दोरच़ी ऊईतार अच्च़ा इलि। अंऊर दोबि शुहबी जुंशी तोहई। 26दंङ दोच़ी दोतु थल्जी चिट्ठ केहरिर, दंङ दुह चिट्ठ मत्तियाह ओ मिंदिंङ हुंच़िरी दिऊ थल्जी दुह सेईदि चेला तु बिचंङ ज़ि इच्च़ा शुई।

Currently Selected:

प्रेरित 1: LBFNT

Highlight

Copy