प्रेरित 2
2
पवित्र आत्माओ तक्सी
1अंऊ ध्याड़ा यहुदी मीहरे पिन्तेकुस्त त्यार#2:1 पिन्तेकुस्त, अतु मतलब शुह निन्ज़ो सा। दि पिन्तेकुस्त त्यार फसहो त्याहरो निन्ज़ो सा ध्याड़ो थल अपि (अपेहल यीशु बि कूस्रो टोईच़ी चढ़ाएकातेर) मानाएच़ी लेहकी तोईरे ता दोरे भत्तेर विशवासी यरूशलेम शहरा रिंङ इच्च़ा ठाहरीरिंङ ठ्रोहका शुईरे। 2दंङ अचानक सर्गंङ च़ि इच्च़ा भम्बुटो चाला हुन्ज़िरी, दंङ अंऊ घरबारंङ दोरे बंङज़ा तोईरे दुह सगे दुह घरबार पिंङे च़रति। 3दंङ दोतु तुईज़ी मेहऊ गिहठा लेह ऊ ठ्रोह तोहई तंङफी लेहती, अंऊ इदि-अईदि ओ दोरच़ी शताह शुहचे हर इच्च़ा विशवासी ओ पुंज़ा नहच़ा इलि। 4दंङ दोरे भत्ते पवित्र आत्मा रंङ साते पिंङषा इलिर, दंङ छना पवित्र आत्माज़ि दोतिंङ कुट्रिमी वरदान रेंई, दोऊ दोरच़ी दोरे ऊहई-ऊहई भाषा कुट्री लेहतिर।
5दुह मुक्का रिंङ, परमेश्वरो बेह्द चेहच़ार महसे यहुदी मीहरे तोईरे अरि संसारो हर इच्च़ा देशंङ च़ि त्यार मनाएच़िमी थल्जी अंज़े तोईरे दंङ यरूशलेम शहरंङ बंङज़ा तोईरे। 6अपेहल दुह भमबुट ओ चाला शुई ता भीड़ ठ्रोहका शुहचे इलि दंङ ठट् शुचि इलिर, छना कुचे हर इच्च़ा एनोह-एनोह भाषा रिंङ चेला तिंङ कुट्री रेड्री लेहकी तोईरे। 7दंङ दोरे भत्ते महसे ठट् शुहचे इदि-अई दिरंङ साते कुट्री लेहतिर, “खांई, दिरे अंऊ कुट्री लेहकी तोतोर भत्तेर गलील प्रदेशो माह शुरेआ? 8दंङ दिह छि शुहबी लेहकी तोह, अंऊ ञेंहतु बिचंङ च़ि हर इच्च़ा मीह अम्मो-अम्मो भाषा रिंङ गप्पा लेह रेड्री लेहकी तोतोंई? 9ञेंहतु बिचंङ रैह मीहरे पारथी, मेदी, एलाम प्रदेशो दोरच़ी शुई, दंङ ञेंहतु बिचंङ रैह मीहरे मेसोपोटामिया, यहुदिया, कपुदूकिया, पुन्तुस ए आसिया प्रदेशो शुरे। 10ञेंहतु बिचंङ रैह फ्रुगिया, ए पंफूलिया प्रदेश शुई। रै मीहरे मिस्त्र ए लीबिया देशो कुरेन शहरो कछंङ ज़ि तोतोर। दंङ रैह यहुदी मीहरे रोम शहरंङ ज़ि यरूशलेम शहरा रिंङ थोड़े ध्याड़ो थल्जी अंज़े तोतोर। 11यहुदी ए, यहुदी धर्म मनेकच़ार ऊई जातिओ मीहरे, क्रेते टापू ऊ मीहरे ए अरब देशो मीहरे ला तोतोर, पर अम्मो-अम्मो भाषारिंङ दोतु दोरच़ी परमेश्वरो मोह्ड़े-मोह्ड़े कमो गप्पारे रेड्रातेर।” 12दंङ दोरे ठट् शुहचे इलिर, दंङ समझेक्सी माह लेहतिर कि, “दिह छि शुहबी लेहकी तोह?” दंङ दोरे इदि-अई दिरंङ साते रूहक्च़ी लेहतिर कि दिऊ मतलब छि शुह। 13पर रेह मीहरे मज़ाक लहज़ा कुट्री लेहतिर, “दिरे ता खरकोई सरा ओ क्योहशी शुहरे।”
पतरसो भाषण
14दोथर पतरस दुह सेईदि प्रेरितातु#2:14 दिऊ इब्रानी भाषा रिंङ मतलब शुह च़रसी मीह। साते तुईज़ी अंज़े जोरे सग रें कुट्री लेहती, “हे केरे अंऊ गिऊ बराबर यहुदी शुई दंङ ए यरूशलेम शहरंङ बंङज़ा मीहरे, दिह ञेंए केई। दंङ गिऊ गप्पारे ध्याना रंङ साते रेड्रुंई। 15केहतु बिचंङ ज़ि रै मीहच़ी चेहच़ातोर कि ञेंरे क्योहशी तोतोंई पर ञेंरे माह तोंई। छना कुचे अईता ता मुंजेकी नौ बजेके तोह। दंङ धोंण मुंजे अरिला क्योहशी माह शुहबी! 16पर दिह अंऊ ञेंतंङ साते शुहचा, दिह दुह गप्पा बि पुरा लहज़ा, अंऊ परमेश्वरे योएल भविष्यवक्ता ओ दोरच़ी पवित्र शास्त्रा रिंङ कुहषी तोहई;
17‘परमेश्वरे कुट्रा अन्तो ध्याड़ारिंङ झांह शोतो, कि गेह घेंङौ आत्मा भत्ते मीहतङ रमोग दंङ केहतु योहरे ए मियोर भविष्यवाणी लोहर, दंङ केहतु छ़ोकरार दर्शन खमोर, दंङ केहतु सेंहणा च़ि मंहङ खमोर।’ 18दुह ध्याड़ा रिंङ, गेह घेंङौ परगरा तिंङ (दास ए दासी) घेंङौ आत्मा रमोग, दंङ दोरे भविष्यवाणी लोहर। 19दंङ गेह खेका सर्गंङ हेरानी ऊ कम ए योंङ धरती रिंङ चिन्ह चमत्कार, मतलब शुहई, मेह ए टुहऊ बदड़ कमोग। 20प्रभु ऊ मोह्ड़े ए महिमामय#2:20 महिमामय ओ मतलब शुह परमेश्वरो अद्धभुत षटणा। ध्याड़ा अपिमी बे तुहई ऐके हंयार शुहचे योतो दंङ लचंङ शुहई ऊ ठ्रोह शुहचे योतो। 21दंङ अच़िला प्रभु ऊ मिन लेह्पोतो दोई ए उद्धार खोक्पोतो।”
22“हे इस्राएल देशो मीहरे दिह गप्पारे रेड्रुंई: कि नासरत नगरो यीशु इच्च़ा झांह ठ्रोह मीह तोहई अतिंङ परमेश्वरो दोरच़ी केहतु तुईज़ी साबित लहसी, झांह ठ्रोह चिन्ह चमत्कार ए हेरानी ऊ कमो दोरच़ी, अंऊ परमेश्वरे दोऊ दोरच़ी लहते। केहरे केनारे ञेंहच़ातोनि कि दिह गप्पा हेले शुह।” 23दुह ए यीशु, परमेश्वर ओ हिटी ऊ हिसाबे ए पुरा समझो हिसाबे, केहतु हवाले लेह केहरिर। दंङ केहच़ी दुह मांजी मीहतु मदत ए मेख्खा लगाके क्रूसंङ चहढा के सचे च़रतिन। 24पर परमेश्वरे दोबि मौतो टोईच़ि यच़ाह श्रींङमी लहरी; छना कुचे झांह शुहबी माह तोहई कि दुह सिमी वशारिंङ बंङज़ोतो। 25छना कुचे रज्ज़ा दाऊद यीशु पाहठी कुट्रा, गेह प्रभु बि हमेशा घेंङौ तुईज़ी तंङफातग छना कुचे दुह गिऊ सुचंङ हासी तोहई गेह दोतंङ साते माह बेओग अरी गिऊ नुकसान लहज़ातोर। 26दिऊ थल्जी गिऊ सेहम खुश शुहचे इलज़ा, दंङ गेह खुशी रंङ साते कांह अराधना लहज़ातग; बल्कि गिऊ फुक ला उम्मीदारंङ साते बंङज़ोतो। 27छना कुचे केई गिह्बी सिए बंङज़ी माह रमोंन! दंङ माह केनोह पवित्र मीहू फुका बि अधोलोकंङ सुहफी रमोंन! 28केई गिह्बी जीवनो अम कंड्रातन; कांह हािज़री गिह्बी खुशी रंड्रा।
29“हे बिशवासी न्वारे, गेह दुह सेंहणा रज्ज़ा दाऊदो पाहठी केतंङ साते याहू रंङ साते कुट्रातग कि दुह ता सिए इलि दंङ पथेके ला केहरिर दंङ दोऊ कब्र ञेंहतु बिचंङ तोग तचेक तोह।” 30दुह भविष्यवक्ता#2:30 परमेश्वरो दोरच़ी कुहषी गप्पा मीहतिंङ कंड्रा। दोबि भविष्यवक्ता कुट्री। तोहई, दोई ञेंहच़ाते कि परमेश्वरे कसम लेह दोरंङ साते वाईदा लह्सी तोह कि, “गेह कांह वंशो दोरच़ी इच्च़ा मीह बि कांह सिहासन रामोग।” 31दोई शुहचा गप्पो तुईज़ी ए खंई मसीह श्रींङमी पाहठी भविष्यवाणी लेह च़रति, कि दुह माह ए दोबि सिए बंङज़ी रमतो! दंङ माह दोऊ फुका बि सुहफी रमतो! 32दिए यीशु बि परमेश्वरे श्रींङे लहरी, दंङ हेनर भत्तेर दि सच्चाई ओ गवाह शुई। 33परमेश्वरे यीशु बि भत्ते बे उथड़े ठहरि तचेक खेका लहरी। हेंतेग दुह भत्ते बे उथड़े ठहरि बंङज़ा तोह स्वर्गंङ परमेश्वरो सुचंङ गुहडो हासी। दोबि पवित्र आत्मा रांहषी ततो, दंङ दोई पवित्र आत्मा ञेंतिंङ रांहषी ततो छना कि केहरे तोग रेड्रातंई ए खंड्रातंई। 34छना कुचे रज्ज़ा दाऊद ता स्वर्गंङ मेहली; पर दोई ऐनाह ए कुट्रा, प्रभु परमेश्वरे गिऊ प्रभु रंङ साते कुहतो; गिऊ सुचंङ हासी बंङज़ु।
35गेह कांह बैरी तिंङ कांह अधीन लोहग। 36दिऊ थल्जी इस्राएल देशो भत्ते मीहतिंङ दि ञेंई च़रतुंई कि परमेश्वरे दिह ए यीशु बि अतिंङ केहच़ी क्रूसो टोईच़ी चढ़ाएकातेंई, “प्रभु ला ठहराएति दंङ मसीह ला ठहराएति।”
37अपेहल मीहज़ी दिह रेड्रिर ता दोरे एनाह बि दोषी महसूस लहज़ी लेहतिर, दंङ दोरे पतरस ए ऊई प्रेरिता तंङ साते रुहक्च़ी लेहतिर, “हे बिशवासी न्वारे हेनर छि लोहनी?” 38पतरसे दोतंङ साते कुतोह, “केनातु मदम कमो दोरच़ी सेहम किर्ज़ुंई, दंङ केहतु बिचंङ ज़ि हर इच्च़ा एनोह-एनोह पापो माफी ऊ थल्जी यीशु मसीहू मिंदंङ बपतिस्मा लेहप्तुंई; दंङ केतिंङ पवित्र आत्माओ दान खोकसोतो।” 39छना कुचे दिह वाईदा केतिंङ ए केहतु कटुतु थल्जी, दंङ दोरे भत्ते ऊई तारो मीहतु थल्जी ला शुह अतिंङ हेंदु परमेश्वर एनोह कछंङ बुलाएक्पोतो। 40पतरसे ऊई ला महसे गप्पा तंङ साते घड़ी-घड़ी खबरदार लहरी, “परमेश्वरा रंङ साते विनती लंहि ताकि दोई केतिंङ बचाएपोतो दंङ सज़ा रंड्री माह जूंस अपेहल दुह दि मांजी मीहतिंङ सज़ा रमतो अंऊ दोच़ी यीशु बि ठुकराएतिर!” 41छिला धिर परतसे कुंई, अच़िला दोऊ टोहकठे बिशवास लहरिर दोच़ी बपतिस्मा लेहप्तिर; दंङ दुह ए ध्याड़ा रिंङ दुह (बिशवासी मीहतु) झुंडो बिचंङ लगभग षुमु हज़ार मीहरे दोतंङ साते शुहचे इलि। 42दंङ दोरे प्रेरितातु दोरच़ी शिक्षा लेहप्च़िमी थल्जी, ए संगति लहज़िमी थल्जी, दंङ दोरे प्रभु भोजंङ शामिल शवातेर दंङ बिशवासी मीहरे इच्च़ा साते शुहचे बगत ज़ोआतेर, दंङ प्रार्थना रिंङ मगन बंङज़ातेर।
विशवासी तु संगति
43यरूशलेम शहरो भत्ते मीहतु टोईच़ी बेह्द अच़ा अति, दंङ महस हेरानी ऊ कम ए चिन्ह चमत्कार प्रेरितातु दोरच़ी प्रगट शवाते। 44दंङ भत्ते बिशवासीर इच्च़ा ठाहरि ठ्रोहका शवातेर, दंङ छिला धिर दोतु कछंङ शवाते दुह भत्ते धिर एनातु बिचंङ फज़ातेर। 45दंङ दोरे एनातु-एनातु सम्पति ए सामान लंह्ङे-लंह्ङे अतिंङ छना ठ्रोह ज़रूरत शवाते दोतिंङ फाए चरच़ातेर। 46दंङ दोरे हर इच्च़ा ध्याड़ारिंङ इच्च़ा सेहम शुहचे यहुदी मंदिरो लवाड़ी ठ्रोहका शवातेर, दंङ दोरे इदिऊ-अईदिऊ चुंङ इलज़ा प्रभु भोज लहज़ातेर, दंङ खुशी ए सेहमो सिधाई रंङ साते बगत ज़ोआतेर। 47दंङ परमेश्वरो अराधना लहज़ातेर, दंङ भत्ते मीहरे दोतंङ साते खुश तोईरे; दंङ अंऊ दोरे उद्धार खोक्शतेर, दोतिंङ प्रभु दोतंङ साते शामिल लेह चरच़ाते।
Currently Selected:
प्रेरित 2: LBFNT
Highlight
Share
Copy
Want to have your highlights saved across all your devices? Sign up or sign in
Lahuali Bible (लाहौली) by The Love Fellowship is licensed under Creative Commons Attribution-ShareAlike 4.0 License.
