ମାଥିଉ 22
22
ବିବା ବଜିର୍ ଦ୍କାଇକ୍ରି କ୍ଉତା କ୍ତା
(ଲୁକ ୧୪:୧୫-୨୪)
1ଆର୍ ଗଟେତର୍ ଯୀଶୁ ସେମ୍ନ୍କେ ଦ୍କାଇକ୍ରି କ୍ଉତା କ୍ତାର୍ ସ୍ଙ୍ଗ୍ କଇଲା, 2“ସ୍ର୍ଗ୍ ରାଇଜ୍ ଅନ୍କାର୍ ଗଟେକ୍ ର୍ଜା ହର୍, ଯେ ନିଜାର୍ ହିଲାର୍ ବିବା ବଜି ଆୟଜନ୍ କ୍ଲା, 3ଆରେକ୍ ସେ ବିବା ବଜି କାମ୍କେ କ୍ବର୍ ଦେଇରିଲା ଲକ୍ମ୍ନ୍କେ କୁଦ୍ତାର୍ ଗିନେ ନିଜାର୍ ଚାକର୍ମ୍ନ୍କେ ହ୍ଟାଇଲା, ମ୍ତର୍ ସେମ୍ନ୍ ଆସୁକେ ମ୍ନ୍ ନ୍କେଲାଇ। 4ଆରେକ୍, ତରେକ୍ ସେ ବିନ୍ ଚେଲାମ୍ନ୍କେ ହ୍ଟାଇ କଇଲା, ‘କୁଦାଇଲା ଲକ୍ମ୍ନ୍କେ କ୍ଉଆ, “ଦ୍କା, ମୁଇ ମର୍ ବଜି ରାନ୍ଦି ଆଚି, ମର୍ ମେଣ୍ଢା ଆର୍ ଲିଙ୍ଗ୍ ଲିଙ୍ଗା ପଶୁମ୍ନ୍ ବଜି ରାନ୍ତାର୍ ଗିନେ ମାରି ଆତ୍ତି, ସେରି ସ୍ବୁ ହେଁ ତିୟାର୍ ଅଇଲିଆଚେ, ତୁମିମ୍ନ୍ ବିବା ବଜି କାମ୍କେ ଆଶା।”’ 5ମ୍ତର୍ ସେମ୍ନ୍ ସେରି କେ ଏଲା କ୍ରି ନିଜାର୍ ନିଜାର୍ ହ୍ଦାକେ, ଆର୍ କେ କେ ନିଜାର୍ ନିଜାର୍ ବେପାର୍ କ୍ରୁକେ ବାରିଗ୍ଲାଇ, 6ଆର୍ ବାକିଲକ୍ ତାର୍ ଚାକର୍ମ୍ନ୍କେ ଦ୍ରି ଟେଲା ହେଲା କ୍ଲାଇ ଆର୍ ମ୍ର୍ନେ ମାର୍ଲାଇ। 7ମ୍ତର୍ ଜ୍ଡେବ୍ଳ୍ ର୍ଜା ଇରି ଶୁଣ୍ଲା ଆର୍ ରିସାଅଇକ୍ରି ନିଜାର୍ ସ୍ଇନ୍ ଦ୍ଳ୍ମ୍ନ୍କେ ହ୍ଟାଇ, ସେ ମାର୍ତା ଲକ୍ମ୍ନ୍କେ ନାସ୍ କ୍ଲା ଆର୍ ସେମ୍ନ୍କାର୍ ସ୍ହର୍କେ ଚାର୍କାର୍ କ୍ରିଦିଲା। 8ସେଡେବ୍ଳ୍ ସେ ନିଜାର୍ ଚାକର୍ମ୍ନ୍କେ କଇଲା, ‘ବିବା ବଜି ତ ରାନ୍ଦା ଅଇଆଚେ, ମ୍ତର୍ କୁଦାଇଲା ଲକ୍ମ୍ନ୍ ଟିକ୍ନାଇ। 9ସେତାକ୍ ତୁମିମ୍ନ୍ ର୍ସ୍ତା ମ୍ନ୍କାର୍ ଚକେ ଚକେ ଜାଇ ଜ୍ତେକ୍ ଲକ୍କେ ଦ୍କାସ୍, ସେମ୍ନ୍କେ ବିବା ବଜିଲ୍ଗେ କୁଦିଆଣା।’ 10ସେଡେବ୍ଳ୍ ସେ ଚାକର୍ମ୍ନ୍ ର୍ସ୍ତା ମ୍ନ୍କେ ଜାଇ ମୁର୍କ ଆର୍ ସାଦୁ ଜ୍ତେକ୍ ଲକ୍ ଦ୍କାଇ ଅଇଲାଇ, ସେ ସ୍ବ୍କେ ରୁଣ୍ଡାଇ କ୍ରି କୁଦି ଆନ୍ଲାଇ, ଆରେକ୍ ଆଇଲା ଲକ୍ମ୍ନ୍ ବିବାଗ୍ର୍ ବ୍ର୍ତି ଅଇଲାଇ। 11ମ୍ତର୍ ର୍ଜା କୁଦ୍ଲା ଗତିଆ ମ୍ନ୍କେ ଦ୍କ୍ତାର୍ ଗିନେ ବିତ୍ରେ ଆସି ସେତି ବିବା ହ୍ଚିଆ ହିନ୍ଦି ନ୍ରିଲା ଏକ୍ଲାକେ ଦ୍କି ତାକେ କଇଲା, 12‘ଏ ବନ୍ଦୁ, ତୁଇ ବିବା ହ୍ଚିଆ ହିନ୍ଦି ନ୍କେରି କ୍ନ୍କ୍ରି ଇ ଜାଗାକେ ଆଇଲିସ୍?’ ମ୍ତର୍ ସେ ଚୁପ୍ ଅଇରିଲା। 13ସେତାକ୍ ର୍ଜା ତାର୍ ଚାକର୍ମ୍ନ୍କେ କଇଲା, ‘ଇତାକେ ଆତେ ଗଡେ ବାନ୍ଦି ହ୍ଦାଇ ଅନ୍ଦାରେ ହ୍କାଇ ଦିଆସ୍, ସେତି କାନ୍ଦ୍ଲା ଆର୍ ଦାତ୍ କିଡି ମିଡି ହର୍ କ୍ଷ୍ଟ୍ ଅଇଦ୍।’ 14କାଇତାକ୍ କୁଦାଇ ଅଇଲା ଲକ୍ ବେସି, ମ୍ତର୍ ବାଚା ଅଇଲା ଲକ୍ ଅଳକ୍।”
ସିସ୍ତୁ ଦେତା କ୍ତା
(ମାର୍କ ୧୨:୧୩-୧୭; ଲୁକ ୨୦:୨୦-୨୬)
15ସେଡେବ୍ଳ୍ ଫାରୂଶୀମ୍ନ୍ ଜାଇ ତାକେ କ୍ତାଲ୍ଗେ ହାନ୍ଦାଇ ହ୍କାମ୍କେ ମନ୍ତର୍ କ୍ଲାଇ। 16ଆର୍ ତାର୍ ହ୍ଚେ, ସେ ଫାରୂଶୀମ୍ନ୍ ହେରୋଦିୟ ଦ୍ଳାର୍ ଲକାର୍ ସ୍ଙ୍ଗ୍ ନିଜାର୍ ଚେଲାମ୍ନ୍କେ ଶିକାଇ କ୍ରି ଯୀଶୁର୍ ଲ୍ଗେ ହ୍ଟାଇଲାଇ, ଆର୍ ସେମ୍ନ୍ ଯୀଶୁର୍ ଲ୍ଗେ ଆସି କଇଲାଇ, “ଏଗୁରୁ, ଅମିମ୍ନ୍ ଜାଣୁ, ତୁଇ ସ୍ତ୍ ଆର୍ ସ୍ତ୍ ହର୍ ଇଶ୍ଵରାର୍ ବାଟ୍ ଶିକ୍ୟା ଦେମ୍ଲିସ୍, ଆର୍ କାକେ ନ୍ଡିରିସ୍। କାଇତାକ୍ ତୁଇ ସ୍ବ୍କେ ସ୍ମାନ୍ ଦ୍କୁଲିସ୍। 17ତ୍ବେ ଆମୁକ୍ ମ୍ନ୍ କ୍ଉ, ତର୍ ମ୍ତ୍ କାଇରି? କାଇସର୍ ର୍ଜାକେ ସିସ୍ତୁ ଦେତା ନିୟମ୍ କି ନାଇ?” 18ମ୍ତର୍ ଯୀଶୁ ସେମ୍ନ୍କାର୍ କ୍ରାପ୍ ବୁଦିକେ ଜାଣିକ୍ରି କଇଲା, “ରେ ଅକାରିଆମ୍ନ୍, କାଇତାକ୍ ମକେ ପରିକ୍ୟା କ୍ରୁଲାସ୍? 19ସେ ରୁହାଟ୍କା ମ୍କେ ଦ୍କାଉଆ।” ସେତାକ୍ ସେମ୍ନ୍ ତାକେ ଗଟେକ୍ ଅଣା ଆଣି ଦିଲାଇ। 20ଯୀଶୁ ସେମ୍ନ୍କେ ହ୍ଚାର୍ଲା, “ଇ ମୁର୍ତି ଆର୍ ଇତିରିଲା ନାଉଁ କାର୍?” 21ସେମ୍ନ୍ କଇଲାଇ, “କାଇସର୍ ର୍ଜାର୍।” ସେତିର୍ ଲାଗି ଯୀଶୁ ସେମ୍ନ୍କେ କଇଲା, “ଯାଇରି କାଇସରାର୍ ର୍ଜାର୍, ସେରି କାଇସର୍ ର୍ଜାକେ ଦିଆସ୍। ଆରେକ୍, ଯାଇରି ଇଶ୍ଵର୍ରାର୍, ସେରି ଇଶ୍ଵର୍କେ ଦିଆସ୍।।” 22ସେମ୍ନ୍ ଇରି ଶୁଣି କାବାଅଇ ତାକେ ଚାଡି ଉଟି ଗ୍ଲାଇ।
ସାଦ୍ଦୂକୀ ମ୍ନାର୍ ପ୍ରଶ୍ନ
(ମାର୍କ ୧୨:୧୮-୨୭; ଲୁକ ୨୦:୨୭-୪୦)
23ମ୍ରିକ୍ରି ଜିଇ ଉଟ୍ତା କ୍ତାକେ, ବିଶ୍ବାସ୍ ନ୍କେର୍ତା ସାଦ୍ଦୂକୀମ୍ନ୍ ସେ ଦିନ୍ ତାର୍ ଲ୍ଗେ ଆସି ହ୍ଚାର୍ଲାଇ, 24“ଏଗୁରୁ, ମୋଶା କଇଲା ଆଚେ ଯେ, ଯଦି କେ ହିଲା ନ୍ଉତେ ମ୍ରେଦ୍, ତ୍ବେ ତାର୍ ବାଇ ତାର୍ ରାଣ୍ଡି ମାଇଜିକେ ବିବା କ୍ରି ନିଜାର୍ ବାଇର୍ ବ୍ଉଁସ୍ ବାଡାଇଦ୍। 25ଦ୍କା, ଅମାର୍ମ୍ନ୍କାର୍ ବିତ୍ରେ ସାତ୍ ବାଇ ରିଲାଇ। ହର୍ତୁ ବାଇ ବିବା କ୍ରି ମ୍ରିଗ୍ଲା, ଆରେକ୍, ହିଲା ନ୍ରିଲାକ୍ ନିଜାର୍ ବାଇର୍ ଗିନେ ନିଜାର୍ ମାଇଜିକେ ଚାଡିଗ୍ଲା। 26ଦୁଇ ଲ୍ମ୍ବର୍ ବାଇ, ତିନି ଲ୍ମ୍ବର୍ ବାଇ ସ୍ବୁ ସାତ୍ ବାଇ ହ୍ତେକ୍ ହେଁ ସେନ୍କ୍ରି ମ୍ଲାଇ। 27ସ୍ବ୍କାର୍ ସ୍ରାସ୍ରି ସେ ମାଇଜି ହେଁ ମ୍ରିଗ୍ଲି। 28ତ୍ବେ ମ୍ରିକ୍ରି ଜିଇ ଉଟ୍ଲେକ୍, ସେ ସାତ୍ ଲକାର୍ ତ୍ଇହ୍ଣି ସେ କାର୍ ମାଇଜି ଅଇଦ୍? ସବୁଲକ୍ ତ ତାକେ ବିବା ଅଇରିଲାଇ।” 29ଯୀଶୁ ସେମ୍ନ୍କେ ଉତର୍ଦିଲା, “ତୁମିମ୍ନ୍ ଦ୍ର୍ମ୍ ଶାସ୍ତର୍ ଆର୍ ଇଶ୍ଵରାର୍ ଶ୍କ୍ତି ବିଷୟେ ନ୍ଜାଣି, ବୁଲ୍ ବୁଜୁଲାସ୍। 30କାଇତାକ୍ ମ୍ରିକ୍ରି ଜିଇ ଉଟ୍ଲା ଲକ୍ ଆରେକ୍ ବିବା ନ୍କେର୍ତି କି ବିବା ନ୍ଉତି, ମ୍ତର୍ ସ୍ର୍ଗାର୍ ଦୂତ୍ମ୍ନ୍ ହର୍ ରେତି। 31ମ୍ତର୍ ମ୍ରିକ୍ରି ଜିଇ ଉଟ୍ତାର୍ ବିଷୟ୍ ଇଶ୍ୱର୍ ତୁମୁକ୍ମ୍ନ୍ ଯାଇରି କଇଲା ଆଚେ, ସେରି ତୁମିମ୍ନ୍ କାଇରି ହଳି ନ୍କେରାସ୍? 32‘ଅମି ଅବ୍ରାହାମାର୍ ଇଶ୍ୱର୍, ଇସ୍ହାକାର୍ ଇଶ୍ୱର୍ ଆର୍ ଯାକୁବାର୍ ଇଶ୍ୱର୍।’ ସେ ମ୍ଲା ଲକାର୍ ଇଶ୍ୱର୍ ନଇ, ମ୍ତର୍ ଜୀବନ୍ ଲକାର୍।” 33ଲକ୍ମ୍ନ୍ ଇରି ଶୁଣି ତାର୍ ଶିକ୍ୟାଇ କାବାଅଇଲାଇ।
ବ୍ଡ୍ ଆଦେଶ୍
(ମାର୍କ ୧୨:୨୮-୩୪; ଲୁକ ୧୦:୨୫-୨୮)
34ସେ ସାଦ୍ଦୂକୀମ୍ନ୍କାର୍ ଟଣ୍ଡ୍କେ ଚୁପ୍ କ୍ଲା ଆଚେ, ଇରି ଶୁଣି ଫାରୂଶୀମ୍ନ୍ ଗଟେତ୍ଇ ରୁଣ୍ଡ୍ଲାଇ, 35ଆର୍ ସେମ୍ନ୍କାର୍ ବିତ୍ରେହ୍ଣି ଏକ୍ଲା ମୋଶାର୍ ନିଆଇ ଶିକାଉତା ଲକ୍ ଯୀଶୁର୍ ଦସ୍କେ ଦ୍ରିନ୍ଦ୍ ବ୍ଲି ତାକେ ହ୍ଚାର୍ଲା, 36“ଏଗୁରୁ, ମୋଶାର୍ ନିୟମ୍ ବିତ୍ରେ କୁଇ ଆଦେଶ୍ ସ୍ବ୍କେ ବ୍ଡ୍?” 37ସେ ତାକେ କଇଲା, “ତୁମି ନିଜାର୍ ସ୍ବୁ ହୁର୍ଦୟ୍, ସ୍ବୁ ଜୀବନ୍ ଆର୍ ସ୍ବୁ ବୁଦି ଦ୍ଇ ମାପ୍ରୁ, ନିଜାର୍ ଇଶ୍ଵର୍କେ ଲାଡ୍କ୍ରା। 38ଇରିହ୍କା ବେସିବ୍ଡ୍ ଆର୍ ହର୍ତୁ ଆଦେଶ୍। 39ଦୁଇ ଲ୍ମ୍ବର୍ ଆଦେଶ୍ ଅଇଲି, ତୁମି ନିଜାର୍ ହ୍ଡ୍ସା ଲକ୍କେ ନିଜାର୍ ହର୍ ଲାଡ୍କ୍ରା। 40ଇ ଜଳେକ୍ ଆଦେଶ୍ ଉହ୍ରେ ସ୍ବୁ ମୋଶାର୍ ନିୟମ୍ ଆର୍ ବବିଶତ୍ କ୍ତା କ୍ଉତା ଲକ୍ମ୍ନ୍କାର୍ ଦ୍ର୍ମ୍ ଶାସ୍ତର୍ ଅଇଆଚେ।”
ଖ୍ରୀଷ୍ଟ କାର୍ ହିଲା?
(ମାର୍କ ୧୨:୩୫-୩୭; ଲୁକ ୨୦:୪୧-୪୪)
41ଫାରୂଶୀମ୍ନ୍ ଗଟେତ୍ଇ ରୁଣ୍ଡି ରିଲାବ୍ଳ୍ ଯୀଶୁ ସେମ୍ନ୍କେ ହ୍ଚାର୍ଲା, 42“ଖ୍ରୀଷ୍ଟର୍ ବିଷୟେ ତୁମାର୍ମ୍ନ୍କାର୍ ମତ କାଇରି? ସେ କାର୍ ହିଲା?” ସେମ୍ନ୍ ତାକେ କଇଲାଇ, “ଦାଉଦ୍ ର୍ଜାର୍ ହିଲା।” 43ଯୀଶୁ ସେମ୍ନ୍କେ କଇଲା, “ତ୍ବେ ଦାଉଦ୍ ରଜା କ୍ନ୍କ୍ରି ଆତ୍ମାର୍ ସ୍ଙ୍ଗ୍ ଖ୍ରୀଷ୍ଟକେ ମାପ୍ରୁ ବ୍ଲି କ୍ଉତି? 44‘ଆରେକ୍, ମାପ୍ରୁ ମର୍ ଇଶ୍ଵର୍କେ କଇଲା, ଅମି ଜ୍ଡେବ୍ଳ୍ ହ୍ତେକ୍ ତୁମାର୍ ଶ୍ତ୍ରୁମ୍ନ୍କେ ତର୍ ହାଦ୍ତ୍ଳେ ନାଣ୍ତା ହ୍ତେକ୍, ତୁଇ ମର୍ କାତାଆତ୍ ହାକ୍ ସେ ବ୍ସିରେ।’ 45ଜ୍ନ୍କ୍ରି, ଦାଉଦ୍ ର୍ଜା ଯଦି ଖ୍ରୀଷ୍ଟକେ ମାପ୍ରୁ ବ୍ଲି କଇଦ୍। ତ୍ବେ ସେ କ୍ନ୍କ୍ରି ତାର୍ ହିଲା?” 46ସେତାକ୍ କେ ହେଁ ତାକେ ହ୍ଦେକ୍ ଉତର୍ ଦେମ୍ ନାହାର୍ଲାଇ, ଆରେକ୍, ସେଦିନ୍ ହ୍ଣି କେ ହେଁ ତାକେ ଆରେକ୍ ପର୍ସନ୍ ହ୍ଚାରୁକେ ସାହାସ୍ ନ୍କେଲାଇ।
Currently Selected:
ମାଥିଉ 22: BDVNT
Highlight
Share
Copy
Want to have your highlights saved across all your devices? Sign up or sign in
Bodo Parja Bible (ବ୍ଡ଼୍ ହ୍ର୍ଜା) by The Love Fellowship is licensed under Creative Commons Attribution-ShareAlike 4.0 License.
