ମାଥିଉ 21
21
ଯୀଶୁ ଯିରୁଶାଲମ୍ ସ୍ହ୍ର୍କେ ର୍ଜାର୍ ହର୍ ହୁର୍ଲା
(ମାର୍କ ୧୧:୧-୧୧; ଲୁକ ୧୯:୨୮-୪୦; ଯୋହ. ୧୨:୧୨-୧୯)
1ଜ୍ଡେବ୍ଳ୍ ଯୀଶୁ ଆର୍ ତାର୍ ଚେଲାମ୍ନ୍ ଯିରୁଶାଲମ୍ ସ୍ହର୍ ଜାତାବାଟେ ବେଥ୍ଫାଗୀ ଗାମାର୍ ଆର୍ ଜିତ୍ ଗ୍ଚାର୍ ଡଙ୍ଗୁର୍ ଲ୍ଗେ ଆଇଲା, ସେଡେବ୍ଳ୍ ଯୀଶୁ ଜଳେକ୍ ଚେଲାକେ ଇକ୍ତା କଇ ହ୍ଟାଇଲା। 2“ତୁମାର୍ ସାମ୍ନା ଲ୍ଗାର୍ ଗାମ୍କେ ଜ୍ହା, ଆର୍ ଗ୍ଲା ମାଡେ ବାନ୍ଦାଅଇରିଲା ଗଟେକ୍ ଗ୍ଦ ଆର୍ ତାର୍ସ୍ଙ୍ଗ୍ ଗଟେକ୍ ଗ୍ଦକେ ଦ୍କାସ୍। ସେମ୍ନ୍କେ ଇଟାଇକ୍ରି ମର୍ଲ୍ଗେ ଆଣା। 3ଆରେକ୍, ଯବେ କେ ଯଦି ତୁମୁକ୍ମ୍ନ୍ କାଇରି କଇଦ୍ ତ୍ବେ ତାକେ କ୍ଉଆ, ‘ଅମାର୍ ମାପ୍ରୁକେ ଇରି ଦ୍ର୍କାର୍ ଆଚେ।’ ସେମାଡେ ସେ ସେମ୍ନ୍କେ ହ୍ଟାଇ ଦ୍ଇଦ୍।” 4ବବିଶତ୍ କ୍ତା କ୍ଉତା ଲକାର୍ କଇରିଲା ଇକ୍ତା ଜ୍ନ୍କ୍ରି ହୁରାଅଇଦ୍, ସେତାର୍ଗିନେ ଇରି ଗ୍ଟ୍ଲି, 5“ସିୟୋନାର୍ ଡକୁର୍ସିକେ କ୍ଉଆ, ଦ୍କ୍, ତର୍ ର୍ଜା ତର୍ଲ୍ଗେ ଆସୁଲା। ସେ ଦ୍ର୍ମ୍, ଆର୍ ଗ୍ଦ ହିଲାର୍ ଉହ୍ରେ ଚ୍ଗ୍ତା ଲକ୍।” 6ସେତାକ୍ ଚେଲାମ୍ନ୍ ଜାଇ ଯୀଶୁ କଇରିଲା ଆଦେଶାର୍ ହର୍ କାମ୍ କ୍ଲାଇ, 7ଆରେକ୍, ଗ୍ଦ ଆର୍ ଗ୍ଦହିଲାକେ ଆଣି ସେମ୍ନ୍କାର୍ ହିଟି ଉହ୍ରେ ତାକାର୍ ହ୍ଚିଆ ଡାହି ଦିଲାଇ, ଆରେକ୍ ଯୀଶୁ ତାର୍ ଉହ୍ରେ ବ୍ସ୍ଲା। 8ଆରେକ୍, ଲକ୍ମ୍ନ୍କାର୍ ବିତ୍ରେ ବେସିଲକ୍ ନିଜାର୍ ନିଜାର୍ ହ୍ଚିଆକେ ବାଟେ ଅଚାଇଲାଇ, ଆର୍ କେତେକ୍ ଲକ୍ମ୍ନ୍ ବାଟ୍ ଲ୍ଗାର୍ ଗ୍ଚେ ହ୍ଣି ଡାଳ୍ କାଟି ଆଣି ବାଟେ ଅଚାଇ ଦେମ୍କେ ଲାଗ୍ଲାଇ। 9ଆରେକ୍ ଯୀଶୁର୍ ଆଗେ ଆର୍ ହ୍ଚେ ଇଣ୍ଡ୍ତିରିଲା ଲକ୍ମ୍ନ୍ ବେଲେକି ଅଇକ୍ରି କ୍ମ୍କେ ଲାଗ୍ଲାଇ, “ହସାନା ଦାଉଦ୍ ର୍ଜାର୍ ବ୍ଉଶାର୍ ହିଲା! ମାପ୍ରୁର୍ ନାଉଁଏ ଯେ ଆସୁଲା, ସେ ଦନ୍ୟ! ସ୍ର୍ଗ୍ ଉହୁରେ ହସାନା।” 10ଆର୍ ଯୀଶୁ ଯିରୁଶାଲମ୍ ହୁର୍ଲାକେ ସ୍ହର୍ ସାରା ଏ କେ ବ୍ଲି ହାଲା ଅଇଗ୍ଲି। 11ସେତାକ୍ ଲକ୍ମ୍ନ୍ କଇଲାଇ, “ଏ ଗାଲିଲୀ ଜିଲାର୍ ନାଜରିତ ସ୍ହରାର୍ ବବିଶତ୍ କ୍ତା କ୍ଉତାଲକ୍ ଯୀଶୁ।”
ଯୀଶୁ ମନ୍ଦିରେ ହ୍ଣି ବେପାରିମ୍ନ୍କେ ବାର୍କ୍ଲା
(ମାର୍କ ୧୧:୧୫-୧୯; ଲୁକ ୧୯:୪୫-୪୮; ଯୋହ. ୨:୧୩-୨୨)
12ହ୍ଚେ ଯୀଶୁ ଇଶ୍ଵରାର୍ ମନ୍ଦିର୍ ବିତ୍ରେ ହୁରିକ୍ରି, ସେ ଜାଗାଇ କିଣାବିକା କ୍ରତି ରିଲାର୍ ସ୍ବୁ ଲକ୍କେ ବାର୍ କିରିଦିଲା। ଆରେକ୍, ଡାବୁ ବେପାରି ମ୍ନ୍କାର୍ ଟେବୁଲ୍ ଆର୍ ହାରୁଆ ବେପାରି ମ୍ନ୍କାର୍ ଜାଗା ଉଲ୍ଟାଇ ହ୍କାଇଲା, 13ଆର୍ ଯୀଶୁ ସେମ୍ନ୍କେ କଇଲା, ଲେକାଆଚେ, ଅମାର୍ ମନ୍ଦିର୍ ସ୍ବୁ ଜାତିର୍ ଲକାର୍ ପାର୍ତେନା ଗ୍ର୍ ବ୍ଲି ଜାଣା ଅଇଦ୍, ମ୍ତର୍ ତୁମିମ୍ନ୍ ଇ ଗ୍ର୍କେ ଚର୍ ମ୍ନ୍କାର୍ ଲୁକ୍ତା ଜାଗା କ୍ରୁଲାସ୍। 14ଆରେକ୍, ମନ୍ଦିରେ କାଣା ଆର୍ ଚଟାଲକ୍ ଯୀଶୁର୍ ଲ୍ଗେ ଆଇଲାଇ, ଆର୍ ଯୀଶୁ ସେମ୍ନ୍କେ ବ୍ଲ୍କ୍ଲା। 15ମ୍ତର୍ ମୁକିଆ ଜାଜକ୍ ଆର୍ ନିଆଇ ଶିକାଉତା ଲକ୍ମ୍ନ୍ ଯୀଶୁ କ୍ରିରିଲା ଚମ୍ତ୍କାର୍ କାମ୍ ସ୍ବୁ, ଆର୍ ମନ୍ଦିର୍ ବିତ୍ରେ ହସାନା ଦାଉଦ୍ ର୍ଜା ବ୍ଉଁଶାର୍ ହିଲା ବ୍ଲି ବେଲ୍କି ଅଉତିରିଲା ହିଲାମ୍ନ୍କେ ଦ୍କି ରିସା ଅଇଲାଇ, 16ଆରେକ୍, ତାକେ ହ୍ଚାର୍ଲାଇ, “ଏମ୍ନ୍ କାଇରି କ୍ମ୍ଲାଇ, ସେରି କି ତୁମି ଶୁଣୁଲାସ୍?” ଯୀଶୁ ସେମ୍ନ୍କେ କଇଲା, “ହେଁ, ‘ତୁମି ହିଲା ଆର୍ ଦୁଦ୍ କାଳାଉତାର୍ ଟଣ୍ତେହ୍ଣି ନିଜାର୍ ଗିନେ ମଇମା ସିଦ୍ କ୍ରିଆଚାସ୍’ ଇକ୍ତା କି ତୁମିମ୍ନ୍ କ୍ବେହେଁ ଶାସ୍ତର୍ ଲ୍ଗେ ହଡି ନ୍କେରାସ୍?” 17ଆର୍, ସେ ସେମ୍ନ୍କେ ଚାଡିଦେଇ ଯିରୁଶାଲମ୍ ସ୍ହରେ ହ୍ଣି ବାରି ବେଥନିଆ ସ୍ହର୍କେ ଜାଇ ସେତି ରାତି କ୍ଟାଇଲା।
ଯୀଶୁ ଡୁମ୍ବୁର୍ ଗ୍ଚ୍କେ ଅବିଶାପ୍ ଦିଲା
(ମାର୍କ ୧୧:୧୨-୧୪,୨୦-୨୪)
18ତାର୍ ସ୍କାଳ୍ ସେ ଯିରୁଶାଲମ୍ ସ୍ହର୍କେ ଲେଉଟି ଆସ୍ତାବ୍ଳ୍ ବୁକ୍ ହାଇଲା, 19ଆର୍ ବାଟ୍ଲ୍ଗେ ଗଟେକ୍ ଡୁମ୍ବୁର୍ ଗ୍ଚ୍ ଦ୍କି ଗ୍ଚ୍ ଲ୍ଗେ ଗ୍ଲା, ଆରେକ୍, ଚୁଚାଇ ହ୍ତାର୍ ସେ ସେତିରିଲି ଆର୍ କାଇରି ନ୍ରିଲାର୍ ଦ୍କି ଡୁମ୍ବୁର୍ ଗ୍ଚ୍କେ କଇଲା, “ଆର୍ କ୍ବେହେଁ ତର୍ତ୍ଇ ହ୍ଳ୍ ନାସ।” ସେତି ସେମାଡେ ସେ ଡୁମ୍ବୁର୍ ଗ୍ଚ୍ ସୁକିଗ୍ଲି। 20ଚେଲାମ୍ନ୍ ଡୁମ୍ବୁର୍ ଗ୍ଚ୍କେ ସୁକାଇଲାର୍ ଦ୍କି କାବାଅଇ କଇଲାଇ, “ଡୁମ୍ବୁର୍ ଗ୍ଚ୍ କ୍ନ୍କ୍ରି ସେମାଡେ ସୁକିଗ୍ଲି?” 21ଯୀଶୁ ସେମ୍ନ୍କେ ଉତର୍ଦିଲା, “ମୁଇ ତୁମୁକ୍ମ୍ନ୍ ସ୍ତ୍ କ୍ମ୍ଲେ, ଯଦି ତୁମାର୍ମ୍ନ୍କାର୍ ବିଶ୍ବାସ୍ ର୍ଇଦ୍, ଆର୍ ତୁମିମ୍ନ୍ ଡାଉଟ୍ ନ୍କେରାସ୍, ତ୍ବେ ଇ ଡୁମ୍ବୁର୍ ଗ୍ଚ୍କେ ଜ୍ନ୍କ୍ରି ମୁଇ କଇଲେ, ଚୁଚାଇ ଯେ ସେନ୍କ୍ରି ତୁମି କ୍ରୁହାରାସ୍, ସେରି ନଇ, ମ୍ତର୍ ଯଦି ଇ ଡଙ୍ଗୁର୍କେ ହେଁ ତୁଇ ଉଟିକ୍ରି ସ୍ମ୍ଦୁରେ ଜାଇ ଅଦୁର୍ ବ୍ଲି କଇଲେକ୍, ସେରି ଗଟେଦ୍। 22ଆରେକ୍, ବିଶ୍ବାସ୍ କ୍ରି ପାର୍ତେନା କ୍ରା ଯାଇରି ହେଁ ମାଗାସ୍, ସେ ସ୍ବୁ ହାଉଆସ୍।”
ଯୀଶୁର୍ ଅଦିକାର୍ ବିଷୟେ ହ୍ଚାର୍ଲାଇ
(ମାର୍କ ୧୧:୨୭-୩୩; ଲୁକ ୨୦:୧-୮)
23ହ୍ଚେ ସେ ଯିରୁଶାଲମ୍ ମନ୍ଦିରାର୍ ସ୍କ୍ଳାଇ ହୁରିକ୍ରି ଶିକ୍ୟା ଦେତାବ୍ଳ୍ ମୁକିଆ ଜାଜକ୍ମ୍ନ୍ ଆର୍ ପାରାଚିନ୍ମ୍ନ୍ ତାର୍ ଲ୍ଗେ ଆସି ହ୍ଚାର୍ଲାଇ, “ତୁମି କୁଇ ଅଦିକାରେ ଇସ୍ବୁକାମ୍ କ୍ରୁଲାସ୍? ଆର୍ ତକେ କେ ଇ ଅଦିକାର୍ ଦିଲା?” 24ଯୀଶୁ ସେମ୍ନ୍କେ ଉତର୍ଦିଲା, “ମୁଇ ହେଁ ତୁମୁକ୍ମ୍ନ୍ ଗଟେକ୍ କ୍ତା ହ୍ଚାରିନ୍ଦ୍, ଯଦି ତୁମିମ୍ନ୍ ମକେ ସେରି କ୍ମ୍ହାରାସ୍, ତ୍ବେ ମୁଇ କାଇ ଅଦିକାର୍ ସ୍ଙ୍ଗ୍ ଇସ୍ବୁ କାମ୍ କ୍ରୁଲେ, ସେରି ତୁମୁକେ କଇନ୍ଦ୍। 25ଯୋହନ୍ ଡୁବେନ୍ ଦେତା ଅଦିକାର୍ କ୍ଇହ୍ଣି ହାଇରିଲା? ସ୍ର୍ଗେ ହ୍ଣି କି ମାନାଇମ୍ନାର୍ ତ୍ଇହ୍ଣି?” ସେଡେବ୍ଳ୍ ସେମ୍ନ୍ ନିଜାର୍ ନିଜାର୍ ବିତ୍ରେ ଚିଡ୍ହଡ୍ ଅଇ କ୍ମ୍କେ ଲାଗ୍ଲାଇ, “ଯଦି ଅମି ସ୍ର୍ଗେ ହ୍ଣି ବ୍ଲି କ୍ମ୍ନ୍ଦେ, ସେରି ଅଇଲେକ୍ ସେ ଅମୁକ୍ମ୍ନ୍ କଇଦ୍, ‘ତ୍ବେ ତୁମିମ୍ନ୍ କାଇତାକ୍ ତାକେ ବିଶ୍ବାସ୍ ନ୍କେଲାସ୍?’ 26ଆର୍ ଯଦି ମାନାଇ ତ୍ଇହ୍ଣି ବ୍ଲି କ୍ମ୍ନ୍ଦେ, ‘ତ୍ବେ ଲକ୍ମ୍ନ୍କାର୍ ଡିର୍!’ କାଇତାକ୍ ସ୍ବୁ ଲକ୍ମ୍ନ୍ ଯୋହନ୍କେ ଗଟେକ୍ ଇଶ୍ଵରାର୍ ସ୍ତ୍ ବବିଶତ୍ କ୍ତା କ୍ଉତାଲକ୍ ବ୍ଲି ମାନ୍ତି।” 27ସେତାର୍ଗିନେ ସେମ୍ନ୍ ଯୀଶୁକେ ଉତର୍ ଦିଲାଇ, “ଅମିମ୍ନ୍ ନ୍ଜାଣୁ।” ଆର୍ ଯୀଶୁ ହେଁ ସେମ୍ନ୍କେ କଇଲା, “ତ୍ବେ ମୁଇ କୁଇ ଅଦିକାରେ ଇସ୍ବୁକାମ୍ କ୍ରୁଲେ, ସେରି ହେଁ ତୁମୁକ୍ମ୍ନ୍ ନ୍କଇ।”
ଜଳେକ୍ ହିଲାକେ ଦ୍କାଇକ୍ରି କ୍ଉତା କ୍ତା
28ଆର୍ ଯୀଶୁ ସେମ୍ନ୍କେ କଇଲା, “ତ୍ବେ ତୁମି ଇକ୍ତା ବିଷୟେ ତୁମି କାଇରି ବାବୁଲାସ୍, ସେରି କ୍ମ୍ହାରାସ୍? ଗଟେକ୍ ଲକାର୍ ଜଳେକ୍ ହିଲା ରିଲାଇ। ସେ ହ୍ର୍ତୁ ହିଲା ଲ୍ଗେ ଆସି କଇଲା, ‘ହିଲା, ଯା, ଆଜି ଅଙ୍ଗୁର୍ ହ୍ଦାଇ କାମ୍କ୍ର୍।’ 29ସେ ଉତର୍ଦିଲା, ‘ମର୍ଇଚା ନାଇ’ ମ୍ତର୍ ହ୍ଚେ ସେ ମ୍ନେ ମ୍ନ୍ ବାଦ୍ଲାଇ କ୍ରି ହ୍ଦାୟ୍ ଗ୍ଲା। 30ଆରେକ୍, ସେ ଆର୍ଗଟ୍ ହିଲା ଲ୍ଗେ ଆସି ସେନ୍କ୍ରି କଇଲା। ସେ ହିଲା ଉତର୍ଦିଲା, ‘ଆଙ୍ଗ୍ଯା, ମୁଇ ଜ୍ମ୍ଲେ’ ମ୍ତର୍ ସେ ନ୍ଗେଲା। 31ଇ ଦୁଇଲକାର୍ ବିତ୍ରେ କେ ଉବାର୍ ଇଚା ହୁରାକ୍ଲା?” ସେମ୍ନ୍ କଇଲାଇ, “ହ୍ର୍ତୁର୍ ହିଲା।” ଯୀଶୁ ସେମ୍ନ୍କେ କଇଲା, “ମୁଇ ତୁମୁକ୍ମ୍ନ୍ ସ୍ତ୍ କ୍ମ୍ଲେ, ସିସ୍ତୁ ମାଗ୍ତାର୍ ଆର୍ ଦାରିକାମ୍ କ୍ର୍ତାର୍ ଲକ୍ମ୍ନ୍ ତୁମାର୍ ଆଗେ ଇଶ୍ଵରାର୍ ରାଇଜେ ହୁରୁଲାଇ। 32କାଇତାକ୍ ମୁଇ ଇରି ତୁମୁକେ କ୍ମ୍ଲେ, ତୁମିମ୍ନ୍ କ୍ନ୍କ୍ରି ଦ୍ର୍ମ୍ ଜୀବନ୍ ଜିଉଆସ୍, ସେରି ସିକାଉତାର୍ ଗିନେ ଡୁବେନ୍ ଯୋହନ୍ ଆସିରିଲା, ଆର୍ ତୁମିମ୍ନ୍ ତାକେ ବିଶ୍ବାସ୍ ନ୍କେଲାସ୍, ମ୍ତର୍ ସିସ୍ତୁ ମାଗ୍ତାର୍ ଆର୍ ଦାରିକାମ୍ କ୍ର୍ତାର୍ ଲକ୍ମ୍ନ୍ ତାକେ ବିଶ୍ବାସ୍ କ୍ରି ପାପ୍କାମ୍ କ୍ରୁକେ ଚାଡ୍ଲାଇ, ମ୍ତର୍ ତୁମିମ୍ନ୍ ସେରି ଦ୍କି ହେଁ ତାକେ ବିଶ୍ବାସ୍ ନ୍କେଲାସ୍ ଆର୍ ତୁମାର୍ ମ୍ନ୍ ନ୍ବାଦ୍ଲାଇଲାସ୍।”
ଅଙ୍ଗୁର୍ ହ୍ଦାର୍ କ୍ରାପ୍ ବାଗ୍ ଚାଷିମ୍ନ୍କେ ଦ୍କାଇକ୍ରି କ୍ଉତା କ୍ତା
(ମାର୍କ ୧୨:୧-୧୨; ଲୁକ ୨୦:୯-୧୯)
33ଯୀଶୁ ଆରେକ୍ କଇଲା, “ଆର୍ ଗଟେକ୍ ଦ୍କାଇକ୍ରି କ୍ଉତା କ୍ତା ଶୁଣା। ଗଟେକ୍ ଜମି ମାଲିକ୍ ରିଲା, ସେ ଗଟେକ୍ ଅଙ୍ଗୁର୍ ବାଳ୍ କ୍ରି ତାର୍ ଚାରିବାଟ୍ ବାଳ୍ ବୁଣ୍ଲା, ଆର୍ ସେ ବିତ୍ରେ ଅଙ୍ଗୁର୍ ହିଳୁକେ କୁଣ୍ଡ୍ କ୍ଣ୍ଲା, ବାଳ୍ ଜାଗୁକେ କୁଡିଆ ବ୍ନାଇଲା, ଆରେକ୍ ସେ ଲକ୍ ବାଗ୍ ଚାଷିମ୍ନ୍କେ ସେ ଅଙ୍ଗୁର୍ ବାଳ୍ ବାଗେ ଦ୍ଇ, ବିଦେସ୍କେ ବାରିଗ୍ଲା। 34ହ୍ଚେ ହ୍ଳ୍ ହ୍ଳ୍ତା ସ୍ମୟ୍ ଲ୍ଗେ ଆଇଲି ଲାଗି, ସେ ନିଜାର୍ ବାଗର୍ ଲାବ୍ ହାମ୍କେ, ଚାଷିମ୍ନ୍କାର୍ ଲ୍ଗେ ନିଜାର୍ ଚାକର୍ମ୍ନ୍କେ ହ୍ଟାଇଲା। 35ମ୍ତର୍ ବାଗ୍ ଚାଷିମ୍ନ୍ ତାର୍ ଚାକର୍ମ୍ନ୍କେ ଦ୍ରି। ଏକ୍ଲାକେ ମାଡ୍ ମାର୍ଲାଇ, ଆର୍ ଏକ୍ଲାକେ ମ୍ର୍ନେ ମାର୍ଲାଇ, ଆର୍ ଏକ୍ଲାକେ ଟେଡା ସ୍ଙ୍ଗ୍ ମାରି ହ୍କାଇଲାଇ। 36ଆର୍ ଗଟେତର୍ ସେ ଜମି ମାଲିକ୍ ହ୍ର୍ତୁ ଚାକର୍ ତ୍ଇହ୍ଣି ଆର୍ ଅଦିକ୍ ଚାକର୍ମ୍ନ୍କେ ହ୍ଟାଇଲା, ଆରେକ୍ ସେମ୍ନ୍ ସେମ୍ନ୍କାର୍ ସ୍ଙ୍ଗ୍ ହେଁ ସେନ୍କାର୍ କ୍ଲାଇ। 37ମ୍ତର୍ ମର୍ ହିଲାକେ ସେମ୍ନ୍ ମାନ୍ତି, ଇରି କ୍ଇ ସେ ହ୍ଚେ ନିଜାର୍ ହିଲାକେ ସେମ୍ନ୍କାର୍ ଲ୍ଗେ ହ୍ଟାଇଲା। 38ମ୍ତର୍ ବାଗ୍ ଚାଷିମ୍ନ୍ ମାଲିକାର୍ ହିଲାକେ ଆସ୍ତାର୍ ଦ୍କି, ନିଜାର୍ ନିଜାର୍ ବିତ୍ରେ କ୍ଉଆ କ୍ଉଇ ଅଇଲାଇ, ‘ଏତ ଅଙ୍ଗୁର୍ ହ୍ଦାର୍ ମାଲିକାର୍ ହଇସି, ଆଶା, ଇତାକ୍ ମ୍ର୍ନେ ମାରି ଅମିମ୍ନ୍ ଆର୍ ଅଦିକାର୍ ଦ୍କଲ୍ କ୍ରୁମା।’ 39ଆରେକ୍ ସେମ୍ନ୍ ତାକେ ଅଙ୍ଗୁର୍ ବାଡେ ହ୍ଣି ହ୍ଦାଇ ହିଙ୍ଗି ମ୍ର୍ନେ ମାର୍ଲାଇ। 40ତ୍ବେ ଜ୍ଡେବ୍ଳ୍ ସେ ଅଙ୍ଗୁର୍ ହ୍ଦାର୍ ମାଲିକ୍ ଆସେଦ୍, ସେଡେବ୍ଳ୍ ସେ ବାଗ୍ ଚାଷିମ୍ନ୍କାର୍ ଗିନେ ସେ କାଇ କ୍ରେଦ୍?” 41ସେଡେବ୍ଳ୍ ମୁକିଆ ଜାଜକ୍ମ୍ନ୍ ଆର୍ ଲକାର୍ ପାରାଚିନ୍ମ୍ନ୍ ତାକେ କଇଲାଇ, “ସେ ମାଲିକ୍ ସେ ଦୁଷ୍ଟ ଲକ୍ମ୍ନ୍କେ ଦୟା ନ୍ଦେକାଇ ନାସ୍ କ୍ର୍ତି, ଆର୍ ଜୁଇ ବିନ୍ ଚାଷିମ୍ନ୍ ତାକେ ଟିକ୍ ସ୍ମୟେ ହ୍ଳ୍ ଜାଗାଇ ଦେତି, ସେମ୍ନ୍କେ ଅଙ୍ଗୁର୍ ହ୍ଦାକେ ବାଗେ ଦେତି।” 42ଯୀଶୁ ସେମ୍ନ୍କେ କଇଲା, “ତୁମିମ୍ନ୍ କାଇରି କ୍ବେ ଦ୍ର୍ମ୍ ଶାସ୍ତର୍ ଲ୍ଗେ ଇରି ହଳି ନ୍କେରାସ୍? ‘ଗ୍ର୍ ତିଆର୍ କ୍ର୍ତା ଲକ୍ମ୍ନ୍ ଜୁଇ ଟେଳାକେ ଚାଡିଦିଲାଇ, ସେରି କନାର୍ ମୁଳ୍ ଟେଡା ଅଇଲି। ମାପ୍ରୁର୍ ତ୍ଇହ୍ଣି ଇରି ଅଇଲି, ଆର୍ ସେରି ଅମାର୍ମ୍ନ୍କାର୍ ଆକି ଲ୍ଗେ ଗଟେକ୍ ଚମ୍ତ୍କାର୍ କ୍ତା?’ 43ତ୍ବେ ମୁଇ ତୁମୁକ୍ମ୍ନ୍କେ କ୍ମ୍ଲେ, ଇଶ୍ୱର୍ ରାଇଜ୍ ତୁମାର୍ମ୍ନ୍କାର୍ ତ୍ଇହ୍ଣି ବେଟି ନିଆ ଅଇଦ୍, ଆରେକ୍, ଜୁଇ ଜାତିର୍ ଲକ୍ମ୍ନ୍ ସେତି ହ୍ଳ୍ ହ୍ଳ୍ତି, ସେମ୍ନ୍କେ ସେରି ଦିଆଅଇଦ୍। 44ଆର୍ ଯେ ଇ ଟେଡା ଉହ୍ରେ ଅଦ୍ରେଦ୍, ସେ କ୍ଣ୍ଡ୍-କ୍ଣ୍ଡ୍ ଅଇଦ୍, ଆରେକ୍ ଇ ଟେଡା ଯାର୍ ଉହ୍ରେ ଅଦ୍ରେଦ୍, ତାକେ ସେରି ଗୁଣ୍ଡ୍-ଗୁଣ୍ତା କ୍ରେଦ୍।” 45ମୁକିଆ ଜାଜକ୍ ଆର୍ ଫାରୂଶୀମ୍ନ୍ ତାକାର୍ ଇ ସ୍ବୁ ଦ୍କାଇକ୍ରି କ୍ଉତା କ୍ତାଶୁଣି, ସେ ଯେ ସେମ୍ନାର୍ ବିଷୟେ କ୍ମ୍ଲା, ଇରି ବୁଜ୍ଲାଇ। 46ଆର୍ ସେମ୍ନ୍ ତାକେ ଦ୍ରୁକେ ଚେଷ୍ଟା କ୍ଲାଇ, ମ୍ତର୍ ଲକ୍ମ୍ନ୍କେ ଦ୍କି ଡିର୍ଲାଇ, କାଇତାକ୍ ସେମ୍ନ୍ ତାକେ ବବିଶତ୍ କ୍ତା କ୍ଉତାଲକ୍ ବ୍ଲି ମାନ୍ତି ରିଲାୟ୍।
Currently Selected:
ମାଥିଉ 21: BDVNT
Highlight
Share
Copy
Want to have your highlights saved across all your devices? Sign up or sign in
Bodo Parja Bible (ବ୍ଡ଼୍ ହ୍ର୍ଜା) by The Love Fellowship is licensed under Creative Commons Attribution-ShareAlike 4.0 License.
