ଲୁକ 18
18
ଯୀଶୁ ରାଣ୍ତି ମାଇଜି ଆର୍ ବିଚାର୍ କ୍ର୍ତା ଲକାର୍ କ୍ତା
1ଯୀଶୁ ତାର୍ ଚେଲାମ୍ନ୍କେ ଗଟେକ୍ ଦ୍କାଇକ୍ରି କ୍ଉତା କ୍ତା କ୍ଇ ଶିକ୍ୟା ଦେମ୍କେ ଲାଗ୍ଲା, “ହାଲିଆ ଅଉଆନାଇ ସ୍ବୁବ୍ଳ୍ ଦ୍ର୍କାର୍ ବିଷୟେ ପାର୍ତେନା କ୍ରା, 2ଗଟେକ୍ ସ୍ହରେ ଗଟେକ୍ ବିଚାର୍ କ୍ର୍ତା ଲକ୍ରିଲା, ସେ ଇଶ୍ଵର୍କେ ନ୍ଡିର୍ତି ରିଲା କି ନ୍ର୍ ମ୍ନ୍କେ ହେଁ ମାନି ନ୍କେର୍ତିରିଲାଇ। 3ସେ ସ୍ହରେ ଗଟେକ୍ ରାଣ୍ତି ଟକି ରିଲି ସେ ବାର୍ ବାର୍ ଆସିକ୍ରି ତାର୍ ଉହ୍ରେ ଅନ୍ୟାୟ୍ କ୍ରିରିଲା ଲକାର୍ ବିଚାର୍ କ୍ରି ତାକେ ଡ୍ଣ୍ତ୍ ଦେସ୍ ବ୍ଲି କ୍ଉତିରିଲି। 4ଆର୍ ସେ ବିଚାର୍ କ୍ର୍ତା ଲକ୍ ସେ ରାଣ୍ଡି ମାଇଜିର୍ କ୍ତାକେ ଶୁଣ୍ତି ନ୍ରିଲା, ମ୍ତର୍ ସେ ସ୍ରାସ୍ରି ବ୍ଳ୍ ତାର୍ ମ୍ନେ ଚିନ୍ତା କ୍ଲା, ‘ମୁଇ ଇଶ୍ଵର୍କେ ହେଁ ନ୍ଡିରୁଲେ କି ନ୍ର୍ ମ୍ନ୍କେ ହେଁ ନ୍ମାନୁଲେ, 5ଅଇଲେକ୍ ହେଁ ଇ ରାଣ୍ତି ଟକି ମକେ ଗିଜ୍ରି କ୍ରୁଲି ଲାଗି ମୁଇ ସେ ଟକିକେ ଅନ୍ୟାୟ୍ କ୍ରିରିଲା ଲକାର୍ ବିଚାର୍ କ୍ରି ଡ୍ଣ୍ତ୍ ଦେଇନ୍ଦ୍, ନ୍ଇଲେକ୍ ସେ ମ୍କ୍ ସ୍ବୁବ୍ଳ୍ ଆସିକ୍ରି କ୍ଷ୍ଟ ଦେଇଦ୍।’ 6ସେଡେବଳ୍ ବିଚାର୍ କ୍ର୍ତା କଇଲା, ‘ସେ ଦୁଷ୍ଟ ବିଚାର୍ କ୍ର୍ତା କାଇରି କ୍ମ୍ଲା ସେ ବିଷୟେ ମ୍ନ୍ ଦିଆନ୍ କ୍ରି ବୁଜା।’ 7ଇଶ୍ଵରାର୍ ଜୁଇ ବାଚ୍ଲା ଲକ୍ମ୍ନ୍ ତାର୍ ଲ୍ଗେ ଦିନ୍ରାତି ସାଇଜ ହାଉତାର୍ ଗିନେ ପାର୍ତେନା କ୍ର୍ତି, ସେ କାଇରି ସେମ୍ନାର୍ ଉହ୍ରେ ଅଇଲା ଅନ୍ଯାୟର୍ ବିଚାର୍ ନ୍କେରେ, ଜ୍ଡେବ୍ଳ୍ କି ସେ ସେମ୍ନ୍କାର୍ ଶ୍ତ୍ରୁ ମ୍ନ୍କାର୍ ଗିନେ ହେଁ ଦ୍ର୍ମ୍ ଦ୍କାଇଲାନି? 8ମୁଇ ତୁମୁକେ କ୍ମ୍ଲେ ଇଶ୍ୱର୍ ସେମ୍ନ୍କାର୍ ଉହ୍ରେ କ୍ରା ଅଇରିଲା ଅନ୍ଯାୟର୍ ବିଚାର୍ କ୍ରେଦ୍, ମ୍ତର୍ ମୁଇ ମାନାଇ ହିଲା ଜ୍ଡେବ୍ଳ୍ ଆସିନ୍ଦ୍, ମୁଇ କାଇରି ହୁର୍ତିବିର୍ ଲକ୍ମ୍ନ୍କାର୍ ତ୍ଇ ବିଶ୍ବାସ୍ ରିଲାର୍ ଦ୍କିନ୍ଦ୍?”
ଫାରୂଶୀ ଆର୍ ସିସ୍ତୁ ମାଗ୍ତା ଲକାର୍ କ୍ତା
9ଜୁଇସ୍ବୁ ଲକ୍ମ୍ନ୍ ନିଜ୍କେ ନିଜ୍ ଦ୍ର୍ମ୍ ଲକ୍ବ୍ଲି ଦ୍କାଇ ଅଉତିରିଲା ଆର୍ ବିନ୍ ଲକ୍ମ୍ନ୍କେ ଗିଣ୍କ୍ରି ଲିନ୍ଦା କ୍ର୍ତିରିଲା, ସେସବୁ ନିଜାର୍ ନିଜାର୍ ଉହ୍ରେ ବ୍ର୍ସା କ୍ର୍ତା ଲକ୍ମ୍ନ୍କେ ଯୀଶୁ ଇ ଦ୍କାଇକ୍ରି କ୍ଉତା କ୍ତା କଇଲା, 10“ଗଟେତର୍ ଦୁଇ ଲକ୍ ମନ୍ଦିରେ ପାର୍ତେନା କ୍ରୁକେ ଗ୍ଲାଇ ଗଟେକ୍ ଫାରୂଶୀ ଆର୍ ଗଟେକ୍ ସିସ୍ତୁ ମାଗ୍ତା ଲକ୍ ହର୍ ନଇ।
11ଫାରୂଶୀ ଟିଆଅଇ ନିଜାର୍ ଲ୍ଗେ ଇଶ୍ଵରାର୍ ତ୍ଇ ଅନ୍କାର୍ ପାର୍ତେନା କ୍ରୁକେ ଲାଗ୍ଲା, ‘ହେ ପରମେଶ୍ପ୍ର୍, ମୁଇ ତକେ ଦନ୍ୟବାଦ୍ ଦେମ୍ଲେ ଯେ, ମୁଇ ବିନ୍ଲକାର୍ ହର୍ ଲବ୍ରା ଅନ୍ୟାୟ୍ କ୍ର୍ତା ଲକ୍ନଇ, ଅଦ୍ର୍ମ୍ ଲକ୍ କି ଦାରିକାମ୍ କ୍ର୍ତା ଲକ୍ନଇ ଆର୍ ମୁଇ ଇ ସିସ୍ତୁ ମାଗ୍ତା ଲକ୍ ହର୍ ନଇ। 12ମୁଇ ଗଟେକ୍ ଆଟ୍ ବିତ୍ରେ ଦୁଇତର୍ ଉପାସ୍ କ୍ରୁଲେ ଆର୍ ମୁଇ ସ୍ବୁ କାମାଉଣି ଟ୍କାର୍ ଦ୍ଶମାଂସ ସ୍ବୁବ୍ଳ୍ ଦେମ୍ଲେ।’
13ମ୍ତର୍ ସିସ୍ତୁ ମାଗ୍ତା ଅଳକ୍ ଦୁରିକେ ଟିଆଅଇ ସ୍ର୍ଗ୍ ହାକ୍ ମୁଣ୍ତ୍ ଟେକିକ୍ରି ଦ୍କୁକ୍ ସାସ୍ ନ୍କେଲା, ତାର୍ ବୁକେ ମାରି ଅଇକ୍ରି କଇଲା, ‘ହେ ଇଶ୍ୱର୍ ମୁଇ ପାପି ମକେ ଦ୍ର୍ମ୍ କ୍ର୍।’ 14ମୁଇ ତୁମୁକ୍ କ୍ମ୍ଲେ, ଫାରୂଶୀ ନାଇ ମ୍ତର୍ ସେ ସିସ୍ତୁ ମାଗ୍ତା ଲକ୍ ଇଶ୍ଵରାର୍ ମୁଏ ଦ୍ର୍ମ୍ ଲକ୍ବ୍ଲି ଗଣ୍ତି ଅଇ ତାର୍ ଗ୍ରେ ଲେଉଟି ଗ୍ଲା। କାଇତାକ୍ ଜୁଇଲକ୍ ନିଜ୍କେ ବ୍ଡ୍ବ୍ଲି ଦ୍କାଇଦ୍ ତାକେ ଇଶ୍ୱର୍ ସାନ୍ କ୍ରେଦ୍, ଜୁଇଲକ୍ ନିଜ୍କେ ସାନ୍ବ୍ଲି ଦ୍କାଇଦ୍ ତାକେ ଇଶ୍ୱର୍ ବ୍ଡ୍ କ୍ରେଦ୍।”
ଯୀଶୁ ସାନ୍ ହିଲାମ୍ନ୍କେ ଆଶିର୍ବାଦ୍ କ୍ଲା
(ମାଥି. ୧୯:୧୩-୧୫; ମାର୍କ ୧୦:୧୩-୧୬)
15ଗଟେଦିନ୍ ଯୀଶୁ ଜ୍ନ୍କ୍ରି ସାନ୍ ହିଲାମ୍ନ୍କେ ମୁଣ୍ତେ ଚୁଇକ୍ରି ଆଶିର୍ବାଦ୍ କ୍ରେଦ୍ ସେତାର୍ଗିନେ କ୍ତେକ୍ ଲକ୍ମ୍ନ୍ ତାକାର୍ ହିଲାମ୍ନ୍କେ ଯୀଶୁର୍ ଲ୍ଗେ ଆଣ୍ତି ରିଲାଇ, ମ୍ତର୍ ତାର୍ ଚେଲାମ୍ନ୍ ଇ ସ୍ବୁ ଦ୍କିକ୍ରି ହିଲାମ୍ନ୍କେ ଆନ୍ଲାଇ ବ୍ଲି ଦ୍ମ୍କାମ୍କେ ଲାଗ୍ଲାଇ। 16ମ୍ତର୍ ଯୀଶୁ ହିଲାମ୍ନ୍କେ ତାର୍ ଲ୍ଗେ କୁଦ୍ଲା ଆର୍ କଇଲା, “ହିଲାମ୍ନ୍କେ ମର୍ଲ୍ଗେ ଆସୁକେ ଦିଆସ୍, ସେମ୍ନ୍କେ ମ୍ନା କ୍ରାନାଇ, କାଇତାକ୍ ଇଶ୍ଵରାର୍ ରାଇଜ୍ ଅନ୍କାର୍ ହିଲାମ୍ନ୍କାର୍। 17ମୁଇ ତୁମୁକ୍ମ୍ନ୍ ସ୍ତ୍ କ୍ମ୍ଲେ, ଯେ ହେଁ ସାନ୍ ହିଲାହର୍ ଇଶ୍ଵରାର୍ ରାଇଜ୍ ନ୍ମାନ୍ତି, ତ୍ବେ ସେ ହେଁ ସ୍ର୍ଗେ ହୁରି ନ୍କେରେ।”
ଦନୀଲକ୍ କ୍ଷ୍ଟେ ଇଶ୍ଵରାର୍ ରାଇଜେ ହୁରେଦ୍
(ମାଥି. ୧୯:୧୬-୩୦; ମାର୍କ ୧୦:୧୭-୩୧)
18ଯିହୁଦିମ୍ନ୍କାର୍ ଗଟେକ୍ ନେତା ଯୀଶୁକେ ହ୍ଚାର୍ଲା, “ଏ ସ୍ତ୍ ଗୁରୁ, ନ୍ସେର୍ତା ଜୀବନ୍ ହାଉତାର୍ ଗିନେ ମୁଇ କାଇ କାମ୍ କ୍ରିନ୍ଦ୍?” 19ସେଡେବ୍ଳ୍ ଯୀଶୁ ତାକେ ଉତର୍ଦିଲା, “ମକେ ବ୍ଲ୍ ବ୍ଲି କାଇତାକ୍ କ୍ମ୍ଲିସ୍? ଇଶ୍ଵର୍କେ ଚାଡି ଦିଲେକ୍ ଆରେକ୍ କେ ବ୍ଲ୍ନାଇ। 20ଇଶ୍ଵରାର୍ ଆଦେଶ୍ମ୍ନ୍ ତ ତୁମିମ୍ନ୍ ଜାଣାସ୍, ମାନାଇକେ ମାରାନାଇ, ଦାରିକାମ୍ କ୍ରାନାଇ, ଚରି କ୍ରାନାଇ, ମିଚ୍ ସାକ୍ଷି କ୍ଉଆନାଇ, କାକେ ଟକାନାଇ, ନିଜାର୍ ଉବା ଆର୍ ଆୟାକେ କ୍ତା ମାନିକ୍ରି ସ୍ମାନ୍ ଲାଡ୍କ୍ରା।” 21ଯିହୁଦିମ୍ନ୍କାର୍ ଗଟେକ୍ ନେତା କଇଲା, “ଇ ସ୍ବୁ ଆଦେଶ୍ମ୍ନ୍ ମୁଇ ଦ୍ଙ୍ଗ୍ଳା ବ୍ଳ୍ହ୍ଣି ମାନିକ୍ରି ଆସୁଲେ।”
22ଯୀଶୁ ଇକ୍ତା ଶୁଣି ତାକେ କଇଲା, “ତର୍ ଆର୍ ଗଟେକ୍ ବିଷୟ୍ ଉଣାଆଚେ, ତୁଇ ଯାଇ ନିଜାର୍ ସ୍ବୁକିଚି ବିକିକ୍ରି ଗ୍ରିବ୍ ମ୍ନ୍କେ ବାଟାକ୍ରି ଦେସ୍, ଆରେକ୍ ତୁଇ ସ୍ର୍ଗ୍ ଲ୍ଗେ ଦନ୍ ହାଉସି। ଆର୍ ମର୍ହ୍ଚେ ଆଉ।” 23ମ୍ତର୍ ସେ ଦନୀଲକ୍ ରିଲା ଯୀଶୁର୍ କଇଲା କ୍ତା ଶୁଣ୍ଲା ସେ ବେସି ମ୍ନ୍ଦୁକ୍ ଅଇଲା, କାଇତାକ୍ ତାର୍ ଲ୍ଗେ ବେସି ଦ୍ନ୍ ରିଲି। 24ସେଡେବ୍ଳ୍ ଯୀଶୁ ତାକେ ମ୍ନ୍ଦୁକ୍ ଅଇଲାର୍ ଦ୍କ୍ଲା ଆର୍ କଇଲା, “ଜୁଇ ଲକ୍ମ୍ନ୍କାର୍ ବେସି ଦ୍ନ୍ ଆଚେ, ସେମ୍ନ୍ କ୍ଡେକ୍ କ୍ଷ୍ଟେ ଇଶ୍ଵରାର୍ ରାଇଜେ ହୁର୍ତି! 25କାଇତାକ୍ ଇଶ୍ଵରାର୍ ରାଇଜେ ଦନୀ ଲକାର୍ ଗିନେ ଜ୍ମ୍କେ ବେସି କ୍ଷ୍ଟ, ମ୍ତର୍ ସୁତ୍ଲି କାଣାକେ ଦେଇ ଉଟ୍ ଜାତାର୍ ସ୍ହଜ୍।” 26ଜୁଇ ଲକ୍ମ୍ନ୍ ଇ ସ୍ବୁକ୍ତା ଶୁଣ୍ଲାଇ, ସେମ୍ନ୍ ତାକେ ହ୍ଚାର୍ଲାଇ, “ତ୍ବେ ଇଶ୍ଵରାର୍ ରାଇଜେ କେ ଉଦାର୍ ହାମ୍ହାରେ?” 27ମ୍ତର୍ ଯୀଶୁ କଇଲା, “ଅନ୍କାର୍ କାମ୍ ଜାଇରି କି ମାନାଇ କ୍ରୁନାହାରେ, ସେରି ଇଶ୍ୱର୍ କ୍ରୁହାରେ।”
28ସେଡେବ୍ଳ୍ ପିତର୍ ଯୀଶୁକେ କଇଲା, “ଦ୍କା ଅମିମ୍ନ୍ ଅମାର୍ ଗ୍ର୍ ଦୁଆର୍ ଆର୍ ଦ୍ନ୍ ସ୍ମ୍ପତି ସ୍ବୁ ଚାଡିକ୍ରି ତର୍ସ୍ଙ୍ଗ୍ ଜ୍ମ୍କେ ଆର୍ ତର୍ ଚେଲା ଅମ୍କେ ଆଇଲୁ ଆଚୁ।” 29ଯୀଶୁ ସେମ୍ନ୍କେ କଇଲା, “ମୁଇ ତୁମୁକ୍ମ୍ନ୍ ସ୍ତ୍ କ୍ମ୍ଲେ, ଜୁଇଲକ୍ ଇଶ୍ଵରାର୍ ରାଇଜର୍ ହାଇକ୍ରି ଗ୍ର୍ କି ଡକୁର୍ସି କି ବାଇସି କି ବେଣ୍ସି ମ୍ନ୍କେ କି ନିଜାର୍ ଉବାସି କି ଆଇସି କି ହିଲା ଟକିମ୍ନ୍କେ ଚାଡେଦ୍, 30ତ୍ବେ ସେଲକ୍ ଇଯୁଗେ ବେସି ଆଶିର୍ବାଦ୍ ହାଇଦ୍ ଆର୍ ଆସ୍ତା ଯୁଗେ ନ୍ସେର୍ତା ଜୀବନ୍ ହାଇ ନ୍କେରାସ୍, ଅନ୍କା ଲକ୍ କେ ନାଇ।”
ଯୀଶୁ ଆରେକ୍ ତାର୍ ମ୍ର୍ତା ବିଷୟ୍ କଇଲା
(ମାଥି. ୨୦:୧୭-୧୯; ମାର୍କ ୧୦:୩୨-୩୪)
31ଯୀଶୁ ତାର୍ ବାରଗଟ୍ ଚେଲାମ୍ନ୍କେ ବିନେ କୁଦିନ୍ଇ କ୍ରି କଇଲା, “ଦ୍କା, ଅମିମ୍ନ୍ ଯିରୁଶାଲମ୍କେ ଜ୍ମ୍ଲୁ, ଆର୍ ବବିଶତ୍ କ୍ତା କ୍ଉତା ଲକ୍ମ୍ନ୍ ଜୁଇସ୍ବୁ ବିଷୟେ ଲେକାଆଚେ ସେରି ସ୍ବୁ ମୁଇ ମାନାଇ ହିଲାର୍ ସ୍ଙ୍ଗ୍ ସେତି ହୁରାଅଇଦ୍। 32କାଇତାକ୍ ମୁଇ ଯିହୁଦି ଚାଡି ବିନ୍ଜାତିର୍ ଲକାର୍ ଆତେ ସ୍ହ୍ରି ଅଇନ୍ଦ୍। ଆରେକ୍ ମକେ ଇନସ୍ତା କ୍ର୍ତି, ମର୍ ଉହ୍ରେ ଲାଳ୍ ତୁକ୍ତି, ଆର୍ ମକେ ଇନସ୍ତା କ୍ର୍ତି। 33ସେମ୍ନ୍ ମକେ ଚାବୁକ୍ ସ୍ଙ୍ଗ୍ ମ୍ର୍ନେ ମାର୍ତି, ଆର୍ ମୁଇ ତିନ୍ଦିନ୍ ହ୍ଚେ ଜୀବନ୍ ଅଇ ଉଟିନ୍।”
34ମ୍ତର୍ ଚେଲାମ୍ନ୍ ଯୀଶୁ କଇଲା ଇକ୍ତାର୍ ଅର୍ତ ବୁଜୁ ନ୍ହାର୍ଲାଇ, ଇକ୍ତା ସେମ୍ନ୍କାର୍ ତ୍ଇହ୍ଣି ଲୁକ୍ଲା ହର୍ ଅଇରିଲି, ଆର୍, ଜୁଇ ଜୁଇରି ଯୀଶୁ କ୍ଉତିରିଲା, ସେସ୍ବୁ ସେମ୍ନ୍ ବୁଜୁ ନାହାର୍ତି ରିଲାଇ।
ଯୀଶୁ ଗଟେକ୍ କାଣା ବିକାରିକେ ବ୍ଲ୍କ୍ଲା
(ମାଥି. ୨୦:୨୯-୩୪; ମାର୍କ ୧୦:୪୬-୫୨)
35ଯୀଶୁ ଆର୍ ତାର୍ ଚେଲାମ୍ନ୍ ଯୀରିହୋ ସ୍ହର୍ ଲ୍ଗେ ଆସ୍ତି ରିଲାବ୍ଳ୍ ଗଟେକ୍ କାଣା ବିକାରିକେ ବାଟ୍ଲ୍ଗେ ବ୍ସି ବିକ୍ ମାଗ୍ତି ରିଲା। 36ଜ୍ଡେବ୍ଳ୍ ସେ ବେସି ଲକ୍ମ୍ନ୍ଦା ଜାତାର୍ ଶବ୍ଦ ଶୁଣ୍ଲା ସେଡେବ୍ଳ୍ ସେ ଲକ୍ମ୍ନ୍କେ କଇଲା, “ଆଜି କାଇରି ଅମ୍ଲି ବ୍ଲି ହ୍ଚାର୍ଲା।” 37ନାଜରିତ ସ୍ହରାର୍ ଯୀଶୁ ଇବାଟ୍ ଦ୍ଇ ଜ୍ମ୍ଲା ବ୍ଲି ଲକ୍ମ୍ନ୍ କାଣାକେ କଇଲାଇ।
38ତ୍ବେ ସେ କାଣା ବେସି ବେଲ୍କି ଅଇକ୍ରି କଇଲା, “ଏ ଦାଉଦ୍ ର୍ଜାର୍ ବ୍ଉଁଶାର୍ ଯୀଶୁ ମକେ ଦ୍ର୍ମ୍ କ୍ର୍।” 39ମ୍ତର୍ ଆଗ୍ତୁ ଇଣ୍ଡ୍ତିରିଲା ଲକ୍ମ୍ନ୍ ତାକେ ଚୁପ୍ ଅଉତାର୍ ଗିନେ ଡିରାମ୍କେ ଲାଗ୍ଲାଇ, ମ୍ତର୍ କାଣା ବିକାରି ଆରେକ୍ ବେସି ବେଲ୍କି ଅଇକ୍ରି କ୍ମ୍କେ ଲାଗ୍ଲା, “ଦାଉଦ୍ ର୍ଜାର୍ ବ୍ଉଁଶାର୍ ହିଲା, ମକେ ଦ୍ର୍ମ୍ କ୍ର୍।”
40ତ୍ବେ ଯୀଶୁ ଟିଆଅଇଲା ଆର୍ କଇଲା, “କାଣାକେ ମର୍ଲ୍ଗେ ଆଣା ବ୍ଲି ଆଦେଶ୍ ଦିଲା, ଜ୍ଡେବ୍ଳ୍ ସେଲ୍ଗେ ଆଇଲା ଯୀଶୁ ତାକେ ହ୍ଚାର୍ଲା,” 41ମୁଇ ତର୍ଗିନେ କାଇରି କ୍ରିନ୍ଦ୍ ବ୍ଲି ତୁଇ ମ୍ନ୍ କ୍ରୁଲିସ୍? ସେ କାଣା ଯୀଶୁକେ କଇଲା, “ଏଗୁରୁ, ମୁଇ ଜ୍ନ୍କ୍ରି ଆକିଦ୍କୁ ହାରି।”
42ଯୀଶୁ କାଣାକେ କଇଲା, “ଆକି ଦ୍କ୍, ତୁଇମକେ ବିଶ୍ବାସ୍ କ୍ଲାକେ ଇଶ୍ୱର୍ ତକେ ଉଦାର୍ କ୍ରିଆଚେ।” 43ସେମାଡେ ଆକି ଦ୍କ୍ଲା ଆର୍ ଇଶ୍ଵରାର୍ ଦନ୍ୟବାଦ୍ କ୍ରି ଯୀଶୁର୍ ହ୍ଚ୍ ହ୍ଚ୍ ଗ୍ଲା, ଇ ସ୍ବୁ ଦ୍କିକ୍ରି ଲକ୍ମ୍ନ୍ ହେଁ ଇଶ୍ଵରାର୍ ଦନ୍ୟବାଦ୍ କ୍ଲାଇ।
Currently Selected:
ଲୁକ 18: BDVNT
Highlight
Share
Copy
Want to have your highlights saved across all your devices? Sign up or sign in
Bodo Parja Bible (ବ୍ଡ଼୍ ହ୍ର୍ଜା) by The Love Fellowship is licensed under Creative Commons Attribution-ShareAlike 4.0 License.
