ଲୁକ 17
17
ବାଦା କ୍ର୍ତା ପାପ୍ ଆର୍ କେମା ଦିଲା
(ମାଥି. ୧୮:୬,୭,୨୧,୨୨; ମାର୍କ ୯:୪୨)
1ଯୀଶୁ ନିଜାର୍ ଚେଲାମ୍ନ୍କେ କଇଲା, “ପାପ୍କାମ୍ କ୍ର୍ତାର୍ ଗିନେ ସ୍ବୁବ୍ଳ୍ ପରିକ୍ୟା ଆସେଦ୍ ମ୍ତର୍ ଜୁଇ ଲକ୍ମ୍ନ୍କାର୍ ତ୍ଇହ୍ଣି ପାପ୍ ଆସେଦ୍ ସେମ୍ନ୍ ବେସି ଡ୍ଣ୍ତ୍ ହାଉତି। 2ଜୁଇଲକ୍ ମର୍ ଇ ସାନ୍ ଲକ୍ମ୍ନ୍କାର୍ ବିତ୍ରେହ୍ଣି ଦ୍ର୍ମ୍ ଲକ୍ ଆର୍ ବିଶ୍ବାସ୍ କ୍ର୍ତା ଲକ୍କେ ବାଦା ଦେଇଦ୍, ତ୍ବେ ତାର୍ ଟଟିଏ ବ୍ଡ୍ ଜ୍ତା ଟେଡା ଅଳାଇ କ୍ରି ତାକେ ସମ୍ଦୁରେ ହ୍କାଇଲେକ୍ ତାର୍ ଗିନେ ବ୍ଲ୍ ଅଇଲିହ୍ଣି।
3ତୁମିମ୍ନ୍ ନିଜାର୍ ନିଜାର୍ ବିଷୟେ ଜାଗ୍ରତ୍ ଅଇରିଆ, ଯଦି ତୁମାର୍ ବାଇଦି ଆର୍ ବେଣ୍ଦି ପାପ୍କ୍ର୍ତି ତ୍ବେ ସେମ୍ନ୍କେ ଆଦେଶ୍ ଦିଆସ୍, ଯଦି ସେମ୍ନ୍ ମ୍ନ୍ ବାଦ୍ଲାଇ କ୍ରି କେମା ମାଗେଦ୍ ତ୍ବେ ତାକେ କେମା ଦିଆସ୍। 4ଯଦି ତୁମାର୍ ବାଇଦି ଗଟେଦିନ୍ ବିତ୍ରେ ତୁମାର୍ ବିରୁଦେ ସାତ୍ ତର୍ ପାପ୍ କ୍ରେଦ୍ ଆର୍ ସାତ୍ ତର୍ ତୁମାର୍ ଲ୍ଗେ ଆସି ମୁଇ ମ୍ନ୍ ବାଦ୍ଲାମ୍ଲେ ବ୍ଲି କେମା ମାଗେଦ୍ ତ୍ବେ ତାକେ କେମା ଦିଆସ୍।”
ବିଶ୍ବାସାର୍ ସ୍ଙ୍ଗ୍ ଇଶ୍ଵରାର୍ ଶ୍କ୍ତି
5ହ୍ଟାଇଲା ଚେଲାମ୍ନ୍ ଯୀଶୁ ମାପ୍ରୁକେ କଇଲାଇ, “ତକେ ଅଦିକ୍ ବିଶ୍ବାସ୍ କ୍ର୍ତାର୍ ଗିନେ ଅମୁକେ ସାଇଜ କ୍ର୍।” 6ମାପ୍ରୁ ଚେଲାମ୍ନ୍କେ କଇଲା, “ସ୍ର୍ସୁ ମ୍ଞ୍ଜି ହର୍ ଯଦି ତୁମାର୍ ବିଶ୍ବାସ୍ ରେଇଦ୍ ତ୍ବେ ଇ ଶିତ୍କଳି ଗ୍ଚ୍କେ ବୁନ୍ଦେ ହ୍ଣି ଉଟ୍କି ଅଇ ସ୍ମ୍ନ୍ଦୁରେ ଜାଇକ୍ରି ତହି ଅଉ ବ୍ଲି କଇଲେକ୍ ସେ ଗ୍ଚ୍ ତୁମାର୍ କ୍ତା ମାନେଦ୍।”
ଗଟେକ୍ ଦାସାର୍ କାମ୍
7ଯୀଶୁ ଆର୍ ଗଟେତର୍ ଦ୍କାଇକ୍ରି କ୍ଉତା କ୍ତା କଇଲା, “ତୁମାର୍ ବିତ୍ରେ ଅନ୍କା ଲକ୍କେ ଆଚେ, ଯେ କି ତାର୍ ଦାସ୍ ବେଡାଇ ହ୍ଣି କ୍ସି କ୍ରି ଆଇଲା ଦାହ୍ରେ କି ତାକେ ଗାଇ ଚେଳି ଚ୍ରାଇ କ୍ରି ଆଇଲା ଦାହ୍ରେ ତାକେ ବେଗି ଆସିକ୍ରି ହେଜ୍ ସାଗ୍ କାଆ ବ୍ଲି କଇଦ୍? 8ସେ କାଇରି ତାକେ ଅନ୍କ୍ରି କଇଦ୍ କି, ତୁଇ ଆଗ୍ତୁ ମକେ ହେଜ୍ ସାଗ୍ ତିଆର୍ କ୍ରି କାଳାଉ ଆର୍ ମୁଇ କାଇ ନ୍ସେର୍ତା ହ୍ତେକ୍ ମର୍ ସେବାକ୍ର୍ ତାର୍ ହ୍ଚେ ତୁଇ କାଦି କାଆ?
9ଯଦି ସେ ଦାସ୍ ତାର୍ କ୍ତାହର୍ କାମ୍ କ୍ରେଦ୍ ତ୍ବେ ସେ କାଇରି ତାକ୍ ଦନ୍ୟବାଦ୍ ଦେଇଦ୍? 10ସେନ୍କ୍ରି ତୁମିମ୍ନ୍ ଆଦେଶ୍ ଦେଇରିଲା ହର୍ ସ୍ବୁକାମ୍ କ୍ଲାହ୍ଚେ କ୍ଉଆ, ‘ଅମି ତ ହଳିଆ ଲକ୍ ଅମାର୍ କାମ୍ ଅମି କ୍ରୁଲୁ।’”
ଯୀଶୁ ଦସ୍ ଗଟ୍ କୁଷ୍ଟରଗିକେ ବ୍ଲ୍କ୍ଲା
11ଯୀଶୁ ଆର୍ ତାର୍ ଚେଲାମ୍ନ୍ ଯିରୁଶାଲମ୍ ସ୍ହରେ ଜାତାବ୍ଳ୍ ସେ ଶମିରୋଣ ଆର୍ ଗାଲିଲୀ ଜିଲା ବାଟ୍ ଅଇ ଜାତିରିଲା, 12ସେ ଗଟେକ୍ ଗାମେ ହୁର୍ତା ବ୍ଳ୍ ଦସ୍ ଗଟ୍ କୁଷ୍ଟରଗ୍ ଅଇରିଲା ଲକ୍ମ୍ନ୍ ଯୀଶୁକେ ବେଟ୍ ହାଇଲାଇ। 13ସେମ୍ନ୍ ଅଳକ୍ ଦୁରିକେ ଟିଆଅଇ କଇଲାଇ, “ହେ ଯୀଶୁ, ହେ ଗୁରୁ, ଅମୁକ୍ ଦ୍ର୍ମ୍ କ୍ର୍ବ୍ଲି ବେଲ୍କି ଅଇ କଇଲାଇ।” 14ତ୍ବେ ଯୀଶୁ ସେମ୍ନ୍କେ ଦ୍କ୍ଲା ଆର୍ କଇଲା, “ତୁମିମ୍ନ୍ ଯାହା, ଆର୍ ତୁମାର୍ ମୁକିଆ ଜାଜକ୍ ମ୍ନ୍କେ ଦ୍କାଉଆ।” ଆର୍ ସେମ୍ନ୍ ଜ୍ମ୍ ଜ୍ମ୍ ବାଟେ ବ୍ଲ୍ ଅଇଲାଇ। 15ମ୍ତର୍ ସେମ୍ନ୍କାର୍ ବିତ୍ରେ ଗଟେକ୍ ଲକ୍ ମୁଇ ବ୍ଲ୍ ଅଇଲେ ବ୍ଲି ଜାଣିକ୍ରି ବ୍ଡ୍ ଟଣ୍ତ୍ ଅଇ ଇଶ୍ଵରାର୍ ଦନ୍ୟବାଦ୍ କ୍ରୁ କ୍ରୁ ଯୀଶୁର୍ ଲ୍ଗେ ଲେଉଟି ଆଇଲା, 16ଯୀଶୁର୍ ଗଡ୍ତ୍ଳେ ହ୍ଳି ମୁଣ୍ତିଆ ମାର୍ଲା ଆର୍ ତାର୍ ଦନ୍ୟବାଦ୍ କ୍ଲା। ଇ ମାନାଇ ଗଟେକ୍ ଶମିରୋଣୀଆ ରାଜିର୍ ଯିହୁଦି ଚାଡି ବିନ୍ଜାତିର୍ ଲକ୍ରିଲା।
17ତ୍ବେ ଯୀଶୁ ତାକେ ଉତର୍ଦିଲା, “ଦ୍ଶ୍ ଲକ୍ କାଇରି ବ୍ଲ୍ ନଇଲାଇ, ତ୍ବେ ବାକି ନଅ ଲକ୍ କେଣେ ଗ୍ଲାଇ? 18ଇଶ୍ଵରାର୍ ଦନ୍ୟବାଦ୍ କ୍ରୁକେ ଇ ଏକ୍ଲା ଯିହୁଦି ଚାଡି ବିନ୍ଜାତିର୍ ଲକ୍କେ ଚାଡି ଆର୍ କେ କାଇରି ଲେଉଟି ନାଇଲାଇ?” 19ଯୀଶୁ ତାକେ କଇଲା, “ଉଟି ଯାହା ମର୍ତ୍ଇ ବିଶ୍ବାସ୍ କ୍ଲାକେ ଇଶ୍ୱର୍ ତକେ ବ୍ଲ୍ କ୍ରିଆଚେ।”
ଯୀଶୁ ଇଶ୍ଵରାର୍ ରାଇଜ୍ ଆସ୍ତା ବିଷୟ୍ ଶିକ୍ୟା ଦିଲା
(ମାଥି. ୨୪:୨୩-୨୮,୩୭-୪୧)
20କ୍ତେକ୍ ଫାରୂଶୀମ୍ନ୍ ଯୀଶୁକେ ହ୍ଚାର୍ଲାଇ, “କ୍ବେ ଇଶ୍ଵରାର୍ ରାଇଜ୍ ଆସେଦ୍?” ତ୍ବେ ସେ ସେମ୍ନ୍କେ କଇଲା, “ଇଶ୍ଵରାର୍ ରାଇଜ୍ ଦ୍କ୍ତା ଚିନ୍ ହ୍ର୍ ଅଇ ଆସିନ୍କେରେ। 21ଦ୍କା, ଲକ୍ମ୍ନ୍ ଇଶ୍ଵରାର୍ ରାଇଜ୍ ଇତି ଆଚେ କି ସେତି ଆଚେ ବ୍ଲି ନ୍କ୍ଉତି। କାଇତାକ୍ ଦ୍କା, ଇଶ୍ଵରାର୍ ରାଇଜ୍ ତୁମାର୍ ବିତ୍ରେ ଆଚେ।” 22ମ୍ତର୍ ସେ ଚେଲାମ୍ନ୍କେ କଇଲା, “ଅନ୍କା ଦିନ୍ ଆସେଦ୍, ଜ୍ଡେବ୍ଳ୍ ତୁମିମ୍ନ୍ ମାନାଇ ହିଲାର୍ ଗଟେକ୍ ଦିନ୍ ଦ୍କୁକ୍ ମ୍ନ୍ କ୍ରାସ୍ ମ୍ତର୍ ଦ୍କୁ ନାହାରାସ୍। 23ଦ୍କା, ଉଦାର୍କ୍ର୍ତା ମାନାଇ ହିଲା ଇତି ଆଚେ ଆର୍ ସେତି ଆଚେ ବ୍ଲି ଲକ୍ମ୍ନ୍ କ୍ଉତି, ମ୍ତର୍ ତୁମିମ୍ନ୍ ତାକାର୍ କ୍ତା ଶୁଣାନାଇ କି ତାକାର୍ ହ୍ଚେ ହ୍ଚେ ଯାହା ନାଇ। 24କାଇତାକ୍ ଆକାଶେ ବିଜ୍ଲି ଜ୍ନ୍କ୍ରି ମାରେଦ୍ ଆର୍ ଗଟେକ୍ ଦିଗେହ୍ଣି ଆରେକ୍ ଗଟ୍ ଦିଗେ ହ୍ତେକ୍ ଉଜାଳ୍ ଅଇଦ୍ ସେନ୍କ୍ରି ମୁଇ ମାନାଇ ହିଲା ଯୁଗ୍ ଶେସ୍ଦିନ୍ ସେନ୍କାର୍ ଅଇଦ୍।
25ମ୍ତର୍ ହ୍ର୍ତୁ ତାକେ ଅଦିକ୍ ଦୁକ୍କ୍ଷ୍ଟ ବଗୁକେ ହ୍ଳେଦ୍ ଆର୍ ଇ ଜୁଗାର୍ ଲକ୍ମ୍ନ୍ ତାକେ ଗୁର୍ଣା କ୍ର୍ତି। 26ଆରେକ୍ ନୋହ ବବିଶତ୍ କ୍ତା କ୍ଉତା ଲକାର୍ ସ୍ମୟେ ଜ୍ନ୍କ୍ରି ଗଟିରିଲି, ମୁଇ ମାନାଇ ହିଲାମ୍ନ୍କାର୍ ସ୍ମୟେ ହେଁ ସେନ୍କ୍ରି ଗଟେଦ୍। 27ନୋହ ବବିଶତ୍ କ୍ତା କ୍ଉତାଲକ୍ ଜାଜେ ହୁର୍ତା ଦିନ୍ ହ୍ତେକ୍ ଲକ୍ମ୍ନ୍ କାଦି ହିଦି ଆର୍ ବିବା କ୍ର୍ତାର୍ ଆର୍ ବିବା ଦେତାର୍ କାମେ ମାତି ରିଲାଇ, ଆର୍ ସେଡେବ୍ଳ୍ ବେସି ହାଣି ହ୍ବନ୍ ଆସି ସେ ସ୍ବୁ ଲକ୍କେ ନ୍ଷ୍ଟ କ୍ଲି।
28ଲୋଟ ବ୍ଲି ଗଟେକ୍ ଲକ୍ରିଲା, ତାର୍ ସମୟେ ହେଁ ଅନ୍କ୍ରି ଗ୍ଟିରିଲି, ଲକ୍ମ୍ନ୍ କାମ୍କେ ହିମ୍କେ, ଗେନା ବିକା କ୍ର୍ତାର୍, ଗ୍ଚ୍ ମ୍ନ୍ ଲାଗାଉତାର୍, ଆର୍ ଗ୍ର୍ ବାନ୍ଦ୍ତାର୍ କାମେ ମାତି ରିଲାଇ, 29ମ୍ତର୍ ଲୋଟ ସଦୋମ୍ ସ୍ହର୍ ତ୍ଇହ୍ଣି ବାରାଇ ଜାତା ଦିନ୍ ଆକାଶେ ହ୍ଣି ଜୟ୍ ଆର୍ ଗନ୍ଧକ୍ ଅଦ୍ରି କ୍ରି ସ୍ବୁ ଲକ୍କେ ନ୍ଷ୍ଟ କ୍ଲି।
30ସ୍ର୍ଗେ ହ୍ଣି ମୁଇ ମାନାଇ ହିଲା ଆସ୍ତା ଦିନ୍ ସେନ୍କ୍ରି ଗଟେଦ୍। 31ସେ ଦିନ୍ ଯେ ଚାତ୍ ଉହ୍ରେ ରେଇଦ୍, ସେ ଗ୍ର୍ ବିତ୍ରେ ରେତାର୍ ନିଜାର୍ ଜିନିଷ୍ ହ୍ତାର୍ ଆଣୁକେ ଗ୍ର୍ ବିତ୍ରେ ଜାହାନାଇ, ଆରେକ୍, ଯେ ହ୍ଦାଇ ରେଇଦ୍, ସେ ତାର୍ ଜିନିଷ୍ ଆଣୁକ୍ ଗ୍ରେ ବାଉଳି ନ୍ଜାଅ। 32ଲୋଟର୍ ମାଇଜି କ୍ନାଇ ରିଲି ତାର୍କ୍ତା ମନେ ହ୍କାଆ। 33ଜୁଇଲକ୍ ତାର୍ ନିଜାର୍ ଜୀବନ୍କେ ବାଚାମ୍କେ ଚେଷ୍ଟା କ୍ରେଦ୍, ସେ ତାର୍ ନିଜାର୍ ଜୀବନ୍କେ ଆରାଇଦ୍, ଆର୍ ଜୁଇଲକ୍ ତାର୍ ନିଜାର୍ ଜୀବନ୍କେ ମର୍ ନାଉଆର୍ ଗିନେ ଆରାଇଦ୍ ତ୍ବେ ସେ ତାର୍ ନିଜାର୍ ଜୀବନ୍କେ ଉଦାର୍ କ୍ରେଦ୍।
34ମୁଇ ତୁମୁକ୍ କ୍ମ୍ଲେ, ସେ ରାତି ଦୁଇ ଲକ୍ ଗଟେକ୍ କ୍ଟେ ସଇ ରେତି, ସେତିହ୍ଣି ଗଟେକ୍ ଲକ୍କେ ସ୍ର୍ଗେ ନିଆ ଅଇଦ୍ ଆର୍ ଗଟେଲକ୍କେ ଚାଡିଦେଇଦ୍। 35ଜ୍ଡେକ୍ ମାଇଜି ଟକି ଗଟେତ୍ଇ ଗୁଣ୍ତ୍ ରୁଚ୍ତି ରେତି, ଗଟେକ୍ ଲକ୍କେ ସ୍ର୍ଗେ ନିଆ ଅଇଦ୍ ଆର୍ ଗଟେକ୍ ଲକ୍କେ ଚାଡିଦେଇଦ୍। 36ଦୁଇ ଲକ୍ ବେଡାଇ କାମ୍ କ୍ର୍ତି ରେତି ସେତିହ୍ଣି ଗଟେଲକ୍କେ ସ୍ର୍ଗେ ନିଆ ଅଇଦ୍ ଆର୍ ଗଟେକ୍ ଲକ୍କେ ଚାଡିଦେଇଦ୍।” 37ସେଡେବ୍ଳ୍ ଚେଲାମ୍ନ୍ ତାକେ ହ୍ଚାର୍ଲାଇ, “ମାପ୍ରୁ କୁଇତି ଇ ସ୍ବୁ ଗଟେଦ୍?” ଯୀଶୁ ଉତର୍ଦିଲା, “ଜୁଇ ଟାଣେ ମ୍ଲା ମ୍ଳ୍ ରେଇଦ୍ ସେ ଟାଣେ ହ୍କା ରାବଣ୍ ମ୍ନ୍ ରୁଣ୍ତ୍ତି।”
Currently Selected:
ଲୁକ 17: BDVNT
Highlight
Share
Copy
Want to have your highlights saved across all your devices? Sign up or sign in
Bodo Parja Bible (ବ୍ଡ଼୍ ହ୍ର୍ଜା) by The Love Fellowship is licensed under Creative Commons Attribution-ShareAlike 4.0 License.
