مارقُس 16

تانكرا لّماسيح زغ‑لموت

1لّيغ ءيزري‑واسّ ن‑وسونفو، تنكر ماريام ءولّت‑ماگدالا د‑ماريام ءينّاس ن‑ياعقوب نتنتي د‑سالوما، سغنت ءيسافارن ن‑توجّوت باش اد‑دّونت اد‑ژغورنت دّات ن‑ياسوع. 2زيكّ صباح ن‑واسّ لّحدّ، بحرا‑دي‑تغلي تافوكت، فتونت س‑ومضّال. 3ار‑تّينينت ءي‑نگراتسنت: «ما‑راد‑اغ‑يسّكنوكي ءيفير زغ‑يمي ن‑يفري؟» اشكو ءيمقّور باهرا. 4الّنت الّن‑نسنت س‑ن‑ژرانت ءيفير ييتّي زغ‑يمي. 5كشمنت س‑ومضّال افنت‑ن يان‑وعيّال ءيسكيوس ف‑وفاسي، ءيلسا اسلهام ءيملّولن. لّيغ‑ت‑ژرانت گُّدنت باهرا. 6ءيمّا نتّا ءيساول ييني‑اسنت: «اد‑ور‑تيكساضمت. ار‑تسيگّيلمت ياسوع گو‑ناصيرا لّي‑يمّوتن ف‑وگّجدي. ءور‑سول‑يلّي غيد، هاتي ءينكر‑ن. ژرامت، ها‑يلّيغ‑ت‑يد‑سرسن. 7ءيمّا غيلاد، دّوامت تسّلكمّت اوال‑اد ءي‑يمحضارن‑نس نتني د‑بطرُس، تينيمت‑اسن: ‹ياسوع را‑كُن‑يزوور س‑تمازيرت ن‑جاليل. غين ا‑غ‑را‑تي‑تژرم غمكلّي‑س‑اون‑ينّا.› » 8فّوغند‑د‑تمغارين زغ‑ومضّال ار‑سرسنتي‑تكّات تاودا ار‑ترگيگيينت. روولنت ءور‑نّينت يات ءي‑يان اشكو كسوضنت باهرا.

ءيبان لماسيح ءي‑ماريام ءولّت‑ماگدالا

9لّيغ‑د‑ينكر ياسوع زيكّ صباح ن‑واسّ لّحدّ، ءيبان‑د زوار ءي‑ماريام ءولّت‑ماگدالا لّي‑زغ‑يسّوفغ سّا لّجنون، 10تدّو تيني‑ت ءي‑يمحضارن‑نس. نتني تاغ‑تن‑تگوضي باهرا ار‑الّان. 11تيني‑اسن: «يوورّي ءيدّر، ژريغ‑ت نكّي.» ءيمّا نتني ءور‑تّ‑ومينّ.

ءيبان لماسيح ءي‑سين زغ‑يمحضارن‑نس

12تيغوردين ن‑مايان ءيبان‑د ياسوع س‑مامنك ياضني ءي‑سين زغ‑گيسن لّيغ فتان غ‑وغاراس س‑يدوران غ‑برّا ن‑تمدينت. 13وورّين‑د ءينين‑ت ءي‑وييّاض، والاينّي ءور‑تن‑ومينّ ءولا نتني.

ءيبان لماسيح ءي‑يمحضارن‑نس س‑يان د‑مراو

14غ‑يسيگُّرا ءيبان‑د ياسوع ءي‑يان د‑مراو ن‑ومحضار لّيغ سكيوسن ار‑شتّان. ءيژي‑تن اشكو قّورن ءيخفاون‑نسن ءور‑ومينّ، ءولا سفلدن س‑ويلّي‑ت‑ژرانين لّيغ‑د‑ينكر زغ‑لموت. 15ييني‑اسن غاكودان: «فّوغات ار‑تّيدوم س‑دّونيت كولّوتّ، ار‑تّبرّاحم س‑لخبار‑اد ءيفولكين ءي‑كولّو مدّن. 16وانّا يومنّ ءيدّم غ‑وامان، هاتي را‑ينجم. وانّا ءور‑يومينّ، را‑فلّاس‑ييلي لحوكم ن‑ربّي. 17را‑يفك ربّي تيميتار‑اد ءي‑ويلّي ءومنّين، راد‑سّوفوغن لجنون س‑يسم‑ينو، راد‑ساوالن س‑يواليون لّجديد. 18ءيغ‑وسين ءيلگمّاضن ءولا ءيغ‑سوان كرا ءينقّان ءور‑را‑تن‑يضرّو. راد‑سراسن ءيفاسّن‑نسن ف‑يموضان جّين.»

ءيتيالال لماسيح س‑يگنّا

19سيديتنّغ ياسوع، تيغوردين ن‑ما‑سرسن‑يساول، ءيتيالال س‑يگنّا ءيسكيوس ف‑وفاسي ن‑ربّي. 20ءيمّا نتني فّوغن ار‑تبرّاحن غ‑كرايگاتّ ماني، ار‑تن‑يتعاوان سيديتنّغ ار‑يزّگا ءيواليون‑نسن س‑تميتار لّي‑يسكار ف‑وفوس‑نسن.

Currently Selected:

مارقُس 16: SHINT10

Highlight

Copy