MAKU 8

1KU matuku yia, pakadi kimbukuma kidiko kinene kabidi, yi bakadi kabena yi kintu kia kudya, akabikila beyi banci kudiyi ene, 2Ngwombwela bantu baba mwengo bwalo bwamasalabo yinami nkyekyu matuku asatu, yi kabena yi kintu kia kudya ; 3ndo nxebatuma kunci yi ncala, banapwangwa mu ncila bwalo bwamalwa banga kulekule. 4Yi beyi banci bakamupingasa ene, Ku kidi kai kunalubukwa muntu kwangata bidya bia kwokutisa bantu baba kunu ku mbata a kanana ? 5Yi akabapangusa ene, Nudi yi mampa anga ? Bakatôya ene, Sambwali. 6Yi akatôyela kimbukuma ene, baxikami paxi. Akangata lolo mampa sambwali, yi pakadi amaxinga akanyowa, yi akapa beyi banci bateki ku mpala yabo ; yi bakateka ku mpala ya bantu. 7Yi bakadi yi tunga tuyixi tubende ; yi pakadi amaxinga akatôya ene, bateki totu ku mpala yabo. 8Yi bakadya yi bakakwokuta ; yi bakakwongula bicini binyoki biakasala bisakwa sambwali tô. 9Yi bakadi bea nkone inai ya bantu ; yi akabatuma kunci. 10Yi akakondela mu kibusu mangwoso yi beyi banci, yi akalwa ku mbata a Dalamanuta.

11Yi baFalixi bakalwa yi bakabanga kwelesa yinanci mbata, badi mu kukyeba kilayixilu kudiyi kia mu diulu, badi mu kumwelekyesa. 12Yi akakabana mu mucima ănci, yi akatôya ene, Mwociya ou ămapalala kilayixilu ku bwalo kai ? Nwatôyela sôsôlwo ene, Kilayixilu kakinapebwa mwociya ou pô. 13Yi akabaxiya, akakondela kabidi yi akasabuka kuya ku dinga dixia.

14Yi bakakwelwa kucwala bidya, kabakadi yi bidya bioso mu kibusu bitena dimpa dimodimwe. 15Yi akabambila ene, Numoni ; nudimuki bwalo bwa kiolubixilu kia baFalixi yi kiolubixilu kia Elodo. 16Yi bakakwelesañana mbata ene, Bwalo bututena yi bidya. 17Yisu, biakalembetelayi, akabatôyela ene, Kukai nwelesa mbata bwalo bunutena yi bidya ? Nonu nukidi kanusolembetela ? Kanusolubukwa isanga nkyekyu ? Nonu nudi yi micima yenu kukola ? 18Nudi yi meso ; kanusomona ? Nudi yi macu ; kanusokwombwa ? Yi kanusokwela nkanyi ? 19Panakanyowela bantu nkone itano mampa atano, nonu nwakakwongula bibata binga bia bicini binyoki ? Bobo ene, Disangi yi bibata bibidi. 20Yi panakanyowela bantu nkone inai mampa sambwali, nwakakwongula bisakwa binga bia bicini binyoki ? Bobo ene, Sambwali. 21Yei akabatôyela ene, Nonu nukidi kanusolubukwa ?

22Bakalwa lolo ku Betesaida ; yi bakacwala mufofo kudiyi, bakamulomba ene, amubaki bianca. 23Yi akakwata mufofo ku kianca, akamufikisa kunci kwa bula ; yi pakadi amakwela meso anci mati, akabaka bianca bienci kulu kwanci ; yi akamwapangusa ene, Wamona kintu ? 24Yi akasangola meso anci yi akatôya ene, Ngwamona bantu, bwalo bumbamona bea luna mici, badi mu kwenda. 25Kunyuma akabaka bianca bienci kabidi ku meso anci, yi yei akamona sosonyi, akapingaxibwa meso, yi akamona bintu bioso loko loko. 26Yi akamutuma ku ncibo anci ene, Kubwedi mu bula pô.

27Yi Yisu akabatuka yi beyi banci kuya ku mala a Kyesalia-Filipi. Yi akakwapangusa beyi banci mu ncila ene, Bantu batôya beci ku bwalo bwamene, ndi ñani ? 28Bobo bakapingasa ene, Yoano Munumeyi ; yi banga ene, Eliya ; mo banga ene, Munga mudimuxi. 29Yei akabapangusa ene, Mo nonu nwatôya beci ku bwalo bwamene, ndi ñani ? Pita akamupingasa ene, Owe udi Kalistu. 30Yi akabalanga kabambidi muntu mwoso mwoximo ănci.

31Yi akabanga kubeyesa ene, Mwana a muntu uxetata bintu bingi, yi uxenyananibwa kudi babakulu yi kudi makanda manene, yi kudi bafundi ba mikanda ; uxexipibwa, yi kunyuma kwa matuku asatu kuxebikayi kabidi. 32Yi akatôya diyi dedi ku mpala ya bantu. Pita lolo akamwangata yi akabanga kumukama dikamu. 33Mo yei akakulumuka, yi pakamonayi beyi banci, akakama Pita dikamu ene, Ncuka kunyuma kwamene, Satana ; bwalo butasokwela bintu bia Ncembi lukanyi, kate bintu bia bantu. 34Yi akabikila kimbukuma yi beyi banci, yi akabatôyela ene, Muntu mwoso ndo akyeba kulwa kunyuma kwamene, adinyafiani mikyenci, aonguli nkulusu anci, angulandudili. 35Muntu mwoso uxekyeba kubumba môyo anci unauncimisa, mo muntu mwoso unancimisa môyo ănci ku bwalo bwamene yi bwa losangu lunengela, unaupandisa. 36Muntu unatetowa kinani ndo amangata loboko luncimancima yi amancimisa môyo ănci ? 37Muntu uxesumbanya môyo ănci ku kintu kai ? 38Muntu mwoso unangwombwela meme bundu yi meyi amene ku mwociya ou ă budibi yi ă bubi, Mwana a muntu unamwombwela bundu yei kabidi, palolwayi mu dikai dia Tetenci yi bangele ba babala.

Currently Selected:

MAKU 8: Luna_NT

Highlight

Copy