MAKU 3

1YI akabwela mu kixingidilu kabidi ; yi momu mwakadi muntu udi yi kianca kienci kiamakwoma.

2Yi bakamudingila ndo uxemupandisa ku Sabado, bixemusanyabo. 3Yei lolo akatôyela muntu yi kianca kienci kiomu ene, Emana pakadkaci. 4Yi akabatôyela ene, Kwalelekyela yi bwadi ndo kwenca kunengela ku Sabado, ndo kwenca bubi ? ndo kupandisa môyo ndo kuxipa ? Mo bakapudikila. 5Yi akabatebela yi bituku, udi mu kwombwa buxitu bwalo bwa midma yabo kukola, yi akatôyela muntu you ene, Xombola kianca kiebe. Yi akakixombola, yi kianca kiend kiakapingaxibwa foko. 6Yi baFalixi bakabatuka mangwoso, bakamuyila nkuku yi bena Elodo muxemuxipabo.

7Yi Yisu akancuka yi beyi banci kuya ku mai ; yi kimbukuma kinene kia bantu ba mu Ngalili bakamulanda, yi ba mu Yudiya, 8yi ba ku Yelusaleme, yi ba mu Idumea, yi ba ku dixia dia Yôdana ; yi bobo ba ku mbata a Tile yi Xidono, kimbukuma kinene, pakakwombwabo dia bintu biakakwencayi, bakalwa kudiyi. 9Yi akatôyela beyi banci ene, kibusu kibende kixemusadila pepe bwalo bwa kimbukuma kia bantu, bitaxemufinabo. 10Bwalo bwakapandisayi bantu bangi, biakamunyakabo kudi bantu boso bakadi yi masama, bamubaki bianca. 11Yi bidimu bia mbindu, ku kikondo kioso kiakamumonabio, biakapona paxi ku buxi bwanci, yi biakakwamena ene, Owe udi Mwana a Ncembi. 12Yi akabalanga langa milangu mingi, kabamusakoledi.

13Yi akabanda ku lupongo, yi akababikila bakanangayi mikyenci kubabikila, yi bakaya kudiyi. 14Yi akasungula bantu disangi yi bantu babidi bixeakalabo yinand, bixebatumayi kuya ambila diembi, 15yi kwakala yi bumanya bwa kutenyeka bidimu bibi. 16Yi akapa Ximono lunga lukumbu ene, Pita. 17Yakobo lolo, mwana a Sebede, yi Yoano, Yakobo mwakunyenci ; yi akabapa lukumbu lwa Boanenge, kulexi yi kutôya ene, Bana ba dikongola ; 18yi Andelo yi Filipi, yi Batolomo, yi Mateyo, yi Tomasa, yi Yakobo mwana a Alifayo, yi Tadayo, yi Ximono a Kyenene, 19yi Yudaxi a Ixikalioto akamwenga kunyuma.

Bakalwa lolo ku ncibo. 20Yi kimbukuma kiakasangila kabidi bitalubukwabo isanga kudya bidya. 21Yi pakakwombwa bilungu bienci bakabatuka kuya mukwata, bwalo bwakatôyabo ene, Amakwancowa. 22Yi bafundi ba mikanda bakapweka ku Yelusaleme bakatôya ene, Udi yi Belesebubu ; yi ene, Kudi fumu a bidimu bibi ndo kwatenyekayi bidimu bibi. 23Yi akababikila kudiyi yi akabatôyela ku miele ene, Satana ubili kutenyeka Satana beci ? 24Akali bufumu bwamadisambukila, bufumu bobu kabusolubukwa kusala. 25Yi ndo ncibo amadisambukila, ncibo you kasolubukwa kusala. 26Satana lolo ndo amatomboka ku bwalo bwanci mikyenci yi amadisambukila, yei kabiyi kusala, kate udi yi kipwilu kia kupwa. 27Kakuna muntu ubili kubwela mu ncibo a muna ngulu yi kusanca bima bienci kutena amasuka muna ngulu buxi ; kunyuma lolo unasanca ncibo anci. 28Nwatôyela sôsôlwo ene, Mabi moso analekyelebwa bana ba bantu, yi mietangu mioso yatangolabo mietangu ; 29kaninga muntu mwoso unatangola Mwoxixi a Babala kanakala yi kulekyelebwa kwa bubi bobu kô kô ; kate amasala yi lopelo lwa kwona kwa kô kô. 30Bwalo bwakatôyabo ene, Udi yi kidimu kia mbindu.

31Yi mamanci yi bakunyi banci bakalwa ; yi bakakwemana kunci yi bakatuma kudiyi ndo kumubikila. 32Yi kimbukuma kiakamudinga xika xika xika. Yi bakamutôyela ene, Mona mabebe yi bakunyi bebe bakwapalala kunci. 33Yei akabăpingasa ene, Ñani udi mamami ndo bakunyi bamene ? 34Yi akabatebela, kidinga kiabo kia bantu bamamudinga xika xika xika, ene, Numoni mamami yi bakuny ibamene. 35Bwalo muntu mwoso unakwenca nyinga ya Ncembi, you udi mwakunyami yi ngasanami yi mamami.

Currently Selected:

MAKU 3: Luna_NT

Highlight

Copy