MAKU 4

1YI akabanga kabidi kweyesa pepe yi mai. Yi kimbukuma kinene kiakakokama kudiyi, biakakondelayi mu kibusu yi akaxikama ku mai ; yi kimbukuma kincimancima kiakadi ku mbata pepe yi mai. 2Yi akabeyesa malo mangi ku miele yi akabatôyela ku kweyesa kwanci ene, 3Nwombwi ; mona, mukuni akabatuka kuya kuna. 4Yi pakakunayi, mutongu umoumwe ăkapona ku dituku dia ncila, yi nyonyi yakalwa udya. 5Yi munga ăkapona ku kidi kia mabwe kwakasakau loboko lungi, ăkamena mangwoso lolo bwalo bwakasakau yi loboko lungi ; 6yi pakancuka diba ăkanyungula ; yi bwalo bwakasakau yi dicina ndo bwakakwomau. 7Munga lolo ăkapona pakacikaci pa mieba, yi mieba yakalunda, yakaufina, yi ăkadi kausolelañana miebele. 8Yi munga ăkapona ku loboko lunengela, ăkalelañana miebele ; ăkalunda yi ăkalekola bungi ; ăkalela umoumwe mitongu masangi asatu, umoumwe masangi asambomo, yi umoumwe nkama tô. 9Yi akatôya ene, You udi yi macu a kwombwa, aombwi.

10Yi pakadi utani mikyenci mutupu, bobo bakadi yinanci yi beyi disangi yi babidi bakamwapangusa dia miele yenci. 11Yi akabatôyela ene, Kwamanupebwa kulubukwa bwalo bwa bwisa bwa bufumu bwa Ncembi ; mo bwalo bwabo badi kunci, bintu bioso biamakwencebwa ku miele ; 12mbwôso pa kudingila baxedingila kutena kumona, yi pa kwombwa, baxekwombwa kutena kulembetela, ximbi ambeci baxekulumuka yi baxelekyelebwa. 13Yi akabambila ene, Nonu kanusolubukwa mwele ou ? Ape nunalubukwa bungi bwa miele beci ? 14Mukuni ndo akuna diyi. 15Yi bantu ba ku dituku dia ncila kwamakunibwa diyi kababa ; panakala bamakwombwa diyi, palolwa Satana mangwoso yi amancula diyi diamakunibwa munda mwabo. 16Mo nako bobo bamakunibwa ku bidi bia mabwe, panakala bamakwomba diyi, bamadiangata mangwoso yi kiango ; 17yi kabena yi dicina munda mwabo ; kaninga badi bena kakondo kabende ; kunyuma, palolwa mpeya ndo kukolomonebwa bwalo bwa diyi, bamaponexebwa mangwoso. 18Yi banga badi bantu bamakunibwa pakacikaci pa mieba ; baba ndo bantu bamakwombwa diyi ; 19yi maxitu a mwociya ou yi lodimbu lwa bodidi yi xindilu ya binga bintu, biamabwela munda, biamafina diyi, yi kadisolelañana. 20Baba lolo bamakunibwa ku loboko lunengela badi bantu bombombwa diyi yi bamadiangata, yi balelañana ; umoumwe masangi asatu, umoumwe masangi asambomo, yi umoumwe nkama tô.

21Yi akabatôyela ene, Mwinda ulolwa bixetekyebwau muxi mwa dikumbu ndo muxi mwa ntangi ? Ki bixetekyebwau kulu kwa muci ă mwinda ? 22Bwalo butena bwalo bwoso bubucika butasokwebexebwa ; yi kakusosokoma bwalo bwoso butasomoneka kunyuma. 23Ndo muntu mwoso udi yi macu a kwombwa, aombwi. 24Yi akabatôyela ene, Nutebeli binwombombwa ; lwedi lwoso lunwamakwelekyesa nonu yinalu, lunanwelekyexebwa, yi binga bintu binanubodeyebwa. 25Bwalo muntu mwoso apwangata, yei unapebwa bintu ; yi you utasoangata, kudiyi kunancudibwa isanga bintu bidi yinanci.

26Yi akatôya ene, Bufumu bwa Ncembi budi nako, bea ndo muntu uxekwela mitongu ku loboko, 27uxelala tulu ku butuku, uxebika ku munyinya, yi yei kasolubukwa mwamena mitongu ndo mwalundayo. 28Loboko lwamalelenana masangu mikyelu ; ku buxi buxi malwa, kunyuma lolo difu dia masangu, kunyuma mitongu minene ku difu dia masangu. 29Mo panakala masangu amapya, yei ndo atuma mwele mangwoso, bwalo bwamafika kikondo kia kibukilu.

30Yi akatôya ene, Tunafwanisa bufumu bwa Ncembi yi luna kinani ? ndo tuxebwelekyesa ku mwele kai ? 31Budi luna mutongu ă mutadi. Pakunibwau ku loboko, isanga ămafwila mitongu mioso bunya idi pa loboko, 32kaninga pakunibwau, ămalunda lunda yi ămadika bidibwa bioso bunene, yi ămancula matamba manene bialubukwa nyonyi ya kulu kulwa xikama muxi mwa mudingidingi ănci.

33Yi ku miele mingi ya noku kwakabatôyelayi diyi, bea biakalubukwabo kwombwa ; 34yi kutena mwele ndo kutabatôyelayi ; mo ku busoko kwakasakolelayi beyi banci bintu bioso.

35Yi ku dituku dedi, pakalwa bwelu, akabatôyela ene, Tusabuki ku dixia dia yikwa. 36Yi pakadi bamancula kimbukuma bakamwangata yinabo bea biakadiyi mu kibusu. Yi binga bibusu biakadi yinanci. 37Yi ngiembi ya bubi yakalwa, yi diele diakakuma kibusu, biakadi kibusu kidi mu kwolubila mai. 38Yei lolo akadi ku ntôi a nyuma, udi mu kulala tulu ku kikidi. Yi bakamubisa yi bakamwambila ene, Mweyexi, kusodinyingisa, bwalo bututanafwa ? 39Akabika lolo, yi akalanga lupepele, yi akatôyela mai ene, Lekyela, ikala polo. Yi lupepele Iwakalekyela, yi kwakadi polo nya. 40Yi akabatôyela ene, Nuai yi bowa kukai ? Nukidi kanusoakala yi kwetabusa ? 41Yi bakacina bowa bungi, yi bakatôyelañana ene, Ñani lolo muntu you, biamamwedeya isanga lupepele yi mai ?

Currently Selected:

MAKU 4: Luna_NT

Highlight

Copy