MAKU 5

1YI bakalwa ku dixia dia mai, ku mbata a baNgadala. 2Yi pakasabukayi mu kibusu, mwamuiumi akapomana yinanci mangwoso amalwa mu kidi kia nkita, amakwacibwa kudi kidimu kia mbindu ; 3akadi yi kidi kienci mu kidi kia nkita, yi kakwakadi muntu ubili kumusuka nyô, kumoni isanga yi lukanu ; 4bwalo bwakamasukibwayi masuka mangi yi bipiko ku makasa, yi nkanu ; yi nkanu yakatudibwa yi bipiko bia makasa biakatetebwa bicini bicini, yi kakwakadi muntu udi yi ngulu ya kumuncincidisa. 5Yi matuku moso ku butuku yi ku munyinya akadi mu kwamena amena diyi yi mu kuditapa ku mabwe, ku kidi kia nk ta yi ku mpongo. 6Kaninga pakamonayi Yisu kulekule, akaya lubilu yi akamuxingila ; 7yi akakwamena yi diyi dikola ene, Ndi yinebe bwalo kai, Yisu, Mwana a Ncembi a kulu ? Nkwalanga ku dina dia Ncembi, kungutatixi. 8Bwalo bwakamutôyelayi ene, Owe kidimu kia mbindu, batuka mundu mwa muntu you. 9Yi akamwapangusa ene, Dina diebe didi nani ? Yei akapingasa ene, Kibumbu ndo dina diamene, bwalo bututani bungi bungi. 10Yi akamulomba kungi bitaxebinculayi kunci kwa mbata you. 11Koku lolo kwakadi kibumbu kinene kia ngulubi ya mbuxi idi mu kudya ku kipulumukilu kia lupongo ; 12yi bidimu biakamulomba ene, Ututumi munda mwa ngulubi ya mbuxi, tubweli munda mwayo. 13Yi Yisu akabetabuxila. Yi bidimu bia mbindu biakabatuka yi biakabwela mu ngulubi ya mbuxi ; yi kibumbu kiakatuka mbilu ku lupongo tule, munda mwa mai, lwedi lwa nkone ibidi, yi yakafwa mu mai. 14Yi bobo bakayidisa bakacina yi bakacwala losangu ku bula yi ku mbata. Yi bakaya mona kipoma kiakapona. 15Yi bakalwa kudi Yisu, yi bakamona you akakwacibwa yi bidimu bibi amaxikama, amalata kilamba, udi yi lukanyi lwa nkwami, isanga you akadi amakwacibwa kudi kibumbu ; yi bakacina bowa. 16Yi bobo bakamona bakabambila mwakaponena you akakwacibwa kudi bidimu bibi, yi bwalo bwa ngulubi ya mbuxi. 17Yi bakabanga kumulomba ancuki ku mbata abo. 18Yi pakadi utanakondela ku kibusu, you akakwacibwa kudi bidimu bibi akamulomba dia kwakala yinanci. 19Yi akadi kasomwetabuxila, kate akamutôyela ene, Yaka ku ncibo ebe kudi bena kwebe, ubambili lolo dia bintu binene biamakwencela Fumu, yi mwakakwombwelayi mwengo. 20Yi akancuka, yi akabanga kwammbila mu Dekapolo dia bintu binene biakamwencela Yisu ; yi bungi bwabo bakakama kama.

21Yi pakasabuka Yisu kabidi mu kibusu ku dixia, kimbukuma kinene kiakakokama kudiyi ; yi yei akadi pepe yi mai. 22Yi munga fumu a bafumu ba kixingidilu akalwa kudiyi, dina dienci ene, Yailusu ; 23yi pakamumonayi akapona ku makasa anci ; yi akamulomba kungi ene, Mwanami mubende a babakaxi udi pepe yi kufwa ; nkwalomba unalwapo mubaka bianca biebe kulu kwanci apandi ; yi unakala yi môyo. 24Akaya lolo yinanci, yi kimbukuma kinene kia bantu bakamulanda yi bakamufina.

25Yi mwamukaxi, akatata kusama kutanancuka ncuka maxi mbula disangi yi ibidi, 26yi akatata bintu bingi kudi bananga bangi, akadi amamana lolo bintu bioso biakadi yinanci, kutena kuncincila pô, kate kusama kwanci kwakadika kulunda ; 27pakadi amakwombwa dia Yisu, akalwa mu kimbukuma kia bantu kunyuma kwanci, yi akabaka kifunda kienci kianca. 28Bwalo bwakatôyayi ene, Ndo nakubaka isa bilamba bienci kianca, nakupandixibwa. 29Yi mpokolo a maxi anci akakwoma mangwoso, yi akalembetela mu mumbidi ănci ene, amapandixibwa kusama koku kubi. 30Yi Yisu akalubukwa munda mwanci mangwoso dia ngulu yamancuka kudiyi, akakulumuka mu kimbukuma ene, Ñani apubaka bilamba biamene kianca ? 31Beyi banci bakamwambila ene, Wamona kimbukuma kia bantu bakwafina fina, yi Owe watôya ene, Ñani apungubaka kianca ? 32Yi akakwela meso ndo kumumona yei akakwenca nako. 33Mo mwamukaxi, akacina yi akalukuta lukomba, akalubukwa mwakamuponena, akalwa yi akapona paxi ku mpala anci yi akamusakolela sôsôlwo bundma bwanci. 34Yei lolo akamwambila ene, Mwana, kwetabusa kwebe kwamakupandisa ; yaka polo, ikala loko ku bwalo bwa kusama kwebe kubi.

35Pakadi ukiatôya, pakalwa bantu kwa fumu a kixingidilu ene, Mwanebe amafwa ; kukai wanyingisa Mweyexi kabidi ? 36Mo Yisu akakwombwa diyi diakatôyebwa akakwambila fumu a kixingidilu ene, Kucini, mo etabusa. 37Yi akadi kasosangisa muntu mwoso yinanci kutena Pita yi Yakobo yi Yoano, Yakobo mwakunyenci. 38Yi bakalwa ku ncibo a fumu a kixingidilu ; yi akamona muyengi, yi bantu badi mu kuncula masonci yi badi mu kudila kungi. 39Pakabwelayi, akabatôyela ene, Nwateka muyengi yi nwadila ku bwalo kai ? Mwana kafwili, kate amalala tulu. 40Yi bakamuxeka. Mo yei, pakadi amababatusa bungi bwabo, akangata tete a mwana, yi mamanci, yi bobo bakadi yinanci, yi akabwela munda mwakalala mwana. 41Yi pakadi amakwata kianca kia mwana, akamwambila ene, Talita kumi, (pa kusakolebwa ene, Muxika nkwatôyela ene, Bika). 42Yi muxika akabika mangwoso yi akakwenda ; bwalo bwakadiyi muna mbula disangi yi ibidi. Yi bakakama kama mangwoso kukama kungi. 43Yi akabalanga kungi ene, Muntu kalubukwi bwalo bobu ; yi akatôya ene, bamupi kintu kia kudya.

Currently Selected:

MAKU 5: Luna_NT

Highlight

Copy