MAKU 14

1KUNYUMA kwa matuku abidi lolo kwakadi kitula kia Kidikixilu, yi kia mampa atena kiolubixilu. Yi makanda manene yi bafundi ba mikanda bakapalala muxemukwatabo yi buluba ndo kumuxipa. 2Bwalo bwakatôyabo ene, Kumoni ku kitula ximbi ambeci baxeteka muyengi kudi bantu.

3Yi pakadi utani ku Betani, mu ncibo a Ximono, muna sudi, pakaxikamayi ku mesa, pakalwa mwamukaxi udi yi mulondo ă alabasta, ă manyi a ncobo a diso dikola ; yi akaxipa mulondo ă alabasta, akapangulula manyi kulu kwa mucwe ănci. 4Mo banga bakasamwañana bituku ene, Manyi amakwecikixibwa nako ku bwalo kai ? 5Manyi aa axekwodixibwa ku diso dia denalio nkama isatu yi botolo, mpalata kupebwa bakombi. Yi bakamupangila mapangu. 6Mo Yisu akatôya ene, Numulekyeli ; numwanyingisa kukai ? Amangukixila bwalo bunengela. 7Bwalo bunwakala yi bakombi yinenu matuku moso, yi ku kikondo kioso kinwananga nubili kubalwangwasana ; mo kanusoakala yinami matuku moso. 8Amakwenca biamaponyañanayi. Amaxinga mumbidi ămene manyi buxi ku bwalo bwa kincikilu kiamene. 9Nwatôyela sôsôlwo ene, Kwoso kunakwambidibwa losangu lunengela ku bungi bwa loboko, kunakwambidibwa kabidi mwapwenca mwamukaxi you, kimonenu kia kumwela lukanyi.

10Yi Yudaxi a Ixikalioto, muna disangi yi babidi, akaya kudi makanda manene bixemulongolayi kudibo. 11Bobo lolo, pakakwombwabo, bakaxekyelela, yi bakamuxiyila kilaka dia mpalata kumupa. Yi akapalala kipoma kinengela kia kumulongola.

12Ku dituku dia buxi dia mampa atena kiolubixilu, pakaxipabo nyama ya Kidikixilu, beyi bakamwambila ene, Kwananga kudi kupai kutuxeya lungika kidi, bixedya owe Kidikixilu ? 13Yi akatuma beyi banci babidi ene, Nubweli mu bula ; momu munapomana yinenu muntu udi mu kucwala dibungu dia mai ; numulandudili. 14Kwoso kunabwelayi lolo, nutôyeli fumu a ncibo ene, Mweyexi ene, Kidi kiamene kia benyi kidi kupai ? kinadya Kidikixilu momu yi beyi bamene. 15Yei lolo mikyenci unanwebesa ngumbu munene a kulu mulungika loko ; nutulungikili momu noku. 16Yi beyi banci bakancuka, yi bakabwela mu bula, yi bakasañana bea biakabatôyelayi ; yi bakalungika Kidikixilu.

17Pakalwa bwelu, yei akalwa yi beyi disangi yi babidi. 18Yi pakaxikamabo ku mesa yi bakadi mu kudya, Yisu ene, Nwatôyela sôsôlwo ene, Munga udi yinenu unangwenga ; isanga muntu utanadya yinami. 19Yi bakabanga kwakala yi buxitu ku micima, yi kumutôyela ku muntu ku muntu, ene, Meme ? 20Yi akabapingasa ene, Munga a disangi yi babidi, you asopa yinami mu dilonga. 21Mwana a Muntu uyeya sôsôlwo bea biakafundibwa ku bwalo bwanci, kaninga mpeya kudi muntu you unakwengebwa Mwana a Muntu kudiyi ; ku bwalo bwa muntu you kuxeakala kunengela yei kumoni kulelebwa pô.

22Yi pakadi batanadya, Yisu akangata dimpa ; yi pakadi amaxingila, akadinyowa yi akabapa, yi akatôya ene, Nwangati ; dedi ndo mumbidi ămene. 23Yi akangata mpamba, yi pakadi amaxinga akabapa, yi bakanwa munda bungi bwabo. 24Yi akabatôyela ene, Aa ndo maxi amene a disambi dipyadipya, amancudibwa ku micwe ya bantu bangi. 25Nwatôyela sôsolwo ene, Kinanwa malufu a finyo kabidi nyô, pôi dituku dinanwa mapyamapya mu bufumu bwa Ncembi.

26Yi pakadi bamakwembikisa musambu pakabatukabo kuya ku lupongo lwa Olife.

27Yi Yisu akabatôyela ene, Nonu nu-a-bwoso nunaponexebwa ; bwalo bwakafundibwa ene, Nakukuma Kalama yi mikwakwa yinacakanixibwa. 28Kate panakala namabixibwa, nakuya ku buxi bwenu ku Ngalili. 29Mo Pita ăkamutôyela ene, Isanga bantu boso banaponexebwa, kate meme kumoni. 30Yisu akamwambila ene, Nkwatôyela sôsôlwo ene, Owe lelo, ku butuku bobu, buxi butakwela ntala meyi abidi, unangunyañana manyañana asatu. 31Mo yei akadika kutôya yi ngulu ene, Isanga nxefwa yinebe, kinakunyañana pô. Yi mo nako kwakatôyabo bungi bwabo kabidi.

32Bakalwa lolo ku kidi kiabikidibwa ene, Ngetesemane, yl akatôyela beyi banci ene, Nuxikami kunu bingwalomba. 33Yi akangata yinanci Pita yi Yakobo yi Yoano, yi akabanga kukama kama kungi, yi kwakala yi buxitu bungi. 34Akabatôyela ene, Mucima ămene udi yi kusama kungi, isanga kwa lufu ; nusali kunu, nudingili. 35Yi akaya ku buxi kubende, yi akapona paxi pa loboko ; yi akalomba, ene, ndo Ncembi amaponyañana, ola you uxemudikila. 36Yi akatôya ene, Aba Tete, bintu bioso biamalubukibwa kwencebwa kudi ; nculapo mpamba you kundi. Kate kumoni mwamene mungwananga, kate mwananga Owe. 37Akalwa lolo, yi akabasañana mu tulu. Akatôyela Pita ene, Ximono, wamalala tulu ? kusolelekyela yi kudingila ola umoumwe ? 38Nudingili, nulombi, binutaxebwela mu kielekyexelu. Mucima ămakwetabusa sosôlwo, mo munyu udi kulebela. 39Akancuka kabidi lolo yi akalomba bwalo bobu noku diamubidi. 40Yi akapinana, akabasañana mu tulu, bwalo bwakadi meso abo maxitu ; yi bakadi kabasolubukwa mwa kumupingasa diyi, 41Yi akalwa diamusatu yi akabatôyela ene, Nkyekyu nulali tulu, nwomowi bienu. Kwamalelekyela ; ola amafika ; numoni, Mwana a Muntu amakwengebwa ku makaci a boni. 42Nubiki, cuyi ; numoni, you ungwengenga amakokyela pepe.

43Yi pakadi ukiatôya, Yudaxi a disangi yi babidi akalwa mangwoso, yi kibumbu kinene kia bantu yinanci yi miele yi mici, bamalwa kudi makanda manene yi kudi bafundi ba mikanda yi kudi babakulu. 44Yei lolo akamwenga akabalayisa kilayixilu ene, You unamunyita, kayou ; numukwati, numunculi loko. 45Yi pakafikayi, akalwa kudiyi mangwoso ene, Labi ; yi akamunyita nyita. 46Yi bakamubaka makaci abo yi bakamukwata. 47Kaninga munga abo a bantu bakakwemana pepe akasomona mwele ănci, akakuma lolo musadi a bokanda bunene, yi akaxaka dicu dienci. 48Yi Yisu akabakulumuna ene, Nonu nwamabatuka bea kutanda yi mwefi, yi miele yi mici ndo kungukwata ? 49Nakadi yinenu mu tempelo ku dituku ku dituku, ndi mu kweyesa eyesa, yi nwakadi kanusongukwata. Kate kudi nako bixefikixibwa mukanda ă Ncembi. 50Yi bakamuxiya bungi bwabo ; yi bakacina.

51Kaninga dinga dipulwa diakamulanda, ulete mbuxa a susu ndo kuncibika butaka bwanci ; yi bakamukwata ; 52mo yei akaxiya mbuxa a susu, yi akacina yi butaka.

53Yi bakacwala Yisu kudi bokanda bunene. Yi bungi bwa makanda manene yi babakulu yi bafundi ba mikanda bakakokama kudiyi.

54Pita lolo akamulanda kulekule pôi munda mwa lumbu lwa ncibo a bokanda bunene ; yi akaxikama yi tupalai, udi mu kwota mudilu. 55Yi makanda manene yi kikokye kincimancima bakapalala ntôbô ya kubaxipisa Yisu ; mo bakadi kabasoyisañana. 56Bwalo bwakamudimbidila bantu bangi, yi ntôbô yabo yakadi kayisolelekyelañana. 57Banga lolo bakakwemana yi bakamudimbidila ene, 58Twakamwombwa udi mu kutôya ene, Nakuxipa tempelo you amapangibwa ku makaci, yi ku lwedi lwa matuku asatu ndo kunakwabaka munga utasopangibwa ku makaci. 59Yi isanga noku ntôbô yakadi kayisolelekyelañana. 60Yi bokanda bunene bwakakwemana pakacikaci pabo yi bwakakwapangusa Yisu ene, Kusopingasa diyi ? Ntôbô idi beci yatôbola bantu baba ku bwalo bwebe ? 61Mo yei akapudikila, akadi kasopingasa diyi dioso. Bokanda bunene lolo bwakamwapangusa kabidi ene, Owe ndo Kalistu, Mwana a You utwatumbisa ? 62Yisu akatôya ene, Meme kayou ; yi nunamona Mwana a Muntu uxikamini ku kidyo kia bumanya, utanalwa yi mabaxi a diulu. 63Yi bokanda bunene bwakasambula bilamba bienci, yi bwakatôya ene, Twakyeba bamo batôbôdi kukai ? 64Nonu nwamakwombwa mwotangu ou ; nwencenca beci ? Yi bakamubela bungi bwabo ene, Amalelekyela yi kufwa. 65Banga lolo bakabanga kumwela mati, yi kuncibika mpala anci, yi kumukuma bimbondu ene, Dimusa ; yi tupalai twakamwangata yi mapi.

66Yi pakadi Pita udi muxi mu lumbu lwa ncibo, munga musadi a bokanda bunene a babakaxi akalwa ; 67biakamonayi Pita udi mu kwota mudilu, akamuxixima yi akatôya ene, Owe kabidi wakadi yi muna Nasalete, Yisu. 68Mo yei akanyañana ene, Kisolubukwa, kisolembetela mwatôya. Yi akabatuka ku kibwelelu kia buxi ; yi ntala akakwela diyi. 69Musadi lolo a babakaxi akamumona yi akabanga kabidi kutôyela bantu bakakwemăna pepe ene, You ndo muna kwabo. 70Mo yei akanyafiana kabidi. Kabidi lolo, pakadika kakondo kabende, bobo bakakwemana pepe bakatôyela Pita ene, Owe ndo muna kwabo sôsôlwo, bwalo budi owe muna Ngalili. 71Mo yei akabanga kufinga yi kutangola ene, Kibiyi mwamulumi you unwatôya ku bwalo bwanci. 72Yi ntala akakwela diyi diamubidi mangwoso. Pita lolo akakwela diyi lukanyi diakamwambila Yisu, ene, Buxi butakwela ntala mela abidi, owe unangunyafiana manyafiana asatu. Yi pakakwelayi diyi lukanyi pakabangayi kudila masonci.

Currently Selected:

MAKU 14: Luna_NT

Highlight

Copy