MAKU 13

1YI pakadi utanabatuka mu tempelo, munga mweyi anci akamwambila ene, Mweyexi, tebela ; kai mabwe aa kai ncibo yei 2Yi Yisu akamupingasa ene, Wamona ncibo yei minene ? Kunu kakunasala dibwe dimodimwe kulu kwa dinga ditasokwelebwa paxi.

3Yi pakadi utanaxikama kulu kwa lupongo lwa Olife ku mpala a tempelo bakamwapangusa ku busoko kudi Pita yi Yakobo yi Yoano yi Andelo, 4ene, Utwambilipo, ku kikondo kai kunakala bintu bebi ? Yi kilayixilu kinakala beci kia kikondo kidi bintu bebi bioso pepe yi kufikixibwa ? 5Yi Yisu akapingasa yi akabanga kubambila ene, Nudimuki ximbi muntu mwoso uxenuungisa. 6Bantu bangi banalwa mu dina diamene ene, Meme kayou ; yi banaungisa bantu bangi. 7Mo panunakwombwa dia mbita yi ngindu ya mbita, kanunyingixibwi, bwalo buxelwa bintu bebi, kate ku sula kakuna ku noku. 8Bwalo bunatombokyela bubila bubila, yi bufumu bufumu ; yi ku bidi binga kunakala matepa a loboko, yi nkombo ya ncala yinalwa, yi minyungu ; bintu bebi bidi bubangabanga bwa masama.

9Kaninga nudimuki bwalo bwenu mikyenu, bwalo bunanulongolabo ku bimu ; yi nunakumibwa mu bixingidilu ; yi nunacwadibwa ku mpala ya milopwe yi ya bafumu ku mucwe ămene, bwalo bwa ntôbô kubatôbôlela. 10Yi losangu lunengela luxekwambidibwa buxi kudi mabila moso. 11Oka lolo banwacwala yi banwalongola, kanwakadi yi mutete buxi, munuxetôya ; kate diyi dioso dinanupebwa ku ola you, nuditôyi dedi ; bwalo bunutasotôya nonu, kate Mwoxixi a Babala. 12Yi mwana a mama unalongola mwana a mama ku lufu, yi tete unalongola mwana ; yi bana banabatombokyela bamabalela yi banabaxipisa. 13Yi nunanyananibwa kudi bantu boso ku mucwe ă dina diamene. Mo you unakala amakwemana pôi ku sula, yei unapandixibwa.

14Oka lolo nwamona yangonye ya lusancu yamakwemana kutaxekwemanayi (you abala alembeteli), bobo lolo badi mu Yudiya bacini ku mpongo ; 15yi you udi kulu kwa ncibo kapweki munda, kabwedi momu ndo kuncula kintu kioso mu ncibo anci ; 16you lolo udi mu kibidi kapinani kuya angata kifunda kienci. 17Mo mpeya kudibo badi yi mafu, yi kudibo banusa bana ku matuku yia. 18Nulombi lolo ene, kakuxeakala noku ku ngondo ya maxika. 19Bwalo bunakala matuku yia buxitu bea bitakadi nako pôi bubangabanga bwa kipangu kiakapanga Ncembi pôi nkyekyu, yi kabunakala nako kabidi nyô. 20Yi kutena Fumu amaxikisa lwedi lwa matuku yia, kakuxepandixibwa munyu mwoso ; kaninga ku mucwe ă basungudibwi bakasungulayi ndo kwamaxikisayi matuku yia. 21Yi ku kikondo kieki, ndo muntu mwoso unanutôyela ene, Numoni, kunu kudi Kalistu ; ndo ene, Numoni, yikwa ; kanwetabuxi. 22Bwalo bunakwemana baKalistu ba mancanga yi badimuxi ba mancanga, banakwebesa bilayixilu yi bikamakama, bixeungisabo (ximbi bamalubukwa nako), isanga basungudibwi mikyeabo. 23Mo nonu nudimuki ; numoni, namanutôyela bintu bioso ku buxi.

24Kate ku matuku yia, kunyuma kwa buxitu bobu, kunapindixibwa diba, yi ngondo kanateka mwexi ănci paxi ; 25mitoto lolo ya diulu yinasomoka, yi bikupu bidi mu diulu binatepexebwa. 26Yi ku kikondo kieki kunamonabo Mwana a Muntu ulolwa mu mabaxi yi ngulu mingi yi dikai dingi. 27Yi ku kikondo kieki, kunatumayi bangele yi unakokyeya basungudibwi banci pôi mpepele inai, pôi ku sula kwa loboko pôi ku sula kwa diulu.

28Kaninga nweyi mwele ă muci ă kikuyi kia maxika ; panakala dibunca dienci dilolwa kulebela, ditanapandika malwa, nwalubukwa ene, ngondo ya minyinya itani pepe. 29Mo nako nonu kabidi, binwamona bintu bebi bitanapona, nulubukwi ene, kudi pepe, isanga ku mbelo. 30Nwatôyela sôsôlwo ene, Mwociya ou kaunadika pôi kikondo kinakala bintu bioso bebi noku biamafika. 31Diulu dinadika yi loboko, mo meyi amene kanadika pô. 32Mo ku bwalo bwa dituku dedi ndo bwa ola you, kakuna muntu umoumwe amalubukwa, kumoni isanga bangele mu diulu, kumoni Mwana, mo Tete. 33Nudimuki, nutebeli, yi nulombi ; bwalo bunutasolubukwa kikondo bidikio. 34Kulexi yi muntu amancuka ku mbata, amaxiya ncibo anci yi amapa basadi banci bumanya, yi amapa muntu mwoso mudimo ănci, yi amatôyela munami a mbelo, ene, adingili. 35Mbwôso nudingili, bwalo bunutasolubukwa palolwa fumu a ncibo ; ndo ku bwelu, ndo ku butuku pakacikaci, ndo ku ntala mubedi, ndo ku lubangu ; 36ximbi uxelwa kimpwaxa pwa, uxenusañana nudi mu kulala tulu. 37Mo diyi dinwatôyela nonu, ngwatôyela bantu boso ene, Nudingili.

Currently Selected:

MAKU 13: Luna_NT

Highlight

Copy