MAKU 1

1BUBANGABANGA bwa losangu lunengela lwa Yisu Kalistu, Mwana a Ncembi ; 2bea biakafundibwa kudi Esaya mudimuxi ene, Mona, meme ngwatuma mukyenci amene ku mpala ebe, unalungika ncila ebe. 3Diyi dia muntu amadila mu mbata a kisobe ene, Nulungiki ncila a Fumu, nuxembeyi bidikilu bienci swi.

4Yoano akalwa, akanumeya numeya bantu mu mbata a kisobe, akakwambila dia kunumeyebwa kwa kudibela bwalo bwa kulekyelebwa kwa mabi. 5Yi bungi bwa mbata a Yudiya bakabatuka kuya kudiyi, yi bungi bwa bena Yelusaleme ; yi bakanumeyebwa kudiyi mu ncedi a Yôdana, badi mu kusakola mabi abo. 6Yoano akalata nyonyi ya xamo, yi mwokaba ă dikoba ku makondu anci, yi akadya minkumbi yi buki bwa mutu. 7Yi akakwambila ene, Muntu ulolwa kunyuma kwamene amangudika ngulu, untasolelekyela yi kwenama yi kusula mixinga ya makaka anci. 8Meme namanunumeya mu mai, mo yei unanunumeya yi Mwoxixi a babala.

9Ku matuku yia kwakalwa Yisu ku Nasalete a Ngalili, yi akanumeyebwa kudi Yoano mu Yôdana. 10Yi pakasabukayi mangwoso mu mai, akamona diulu ditanasambudibwa, yi Mwoxixi utanapweka kulu kwanci bea kimbenga ; 11yi diyi diakalwa mu diulu ene, Owe udi Mwanami munangibwi ; kudi Owe ndo kunamaxekyelela.

12Yi Mwoxixi akamwendesa mangwoso ku mbata a kisobe. 13Yi akadi mu mbata a kisobe matuku masangi anai, amakwelekyexebwa kudi Satana ; yi akakala yi nyama ya makitu ; yi bangele bakamusadila.

14Yi pakadi Yoano amalongolebwa, Yisu akalwa mu Ngalili, udi mu kwambila ambila losangu lunengela lwa bufumu bwa Ncembi, 15ene, Kikondo kiamafika, yi bufumu bwa Ncembi bwamakokyela pepe ; nudibeli, nwetabuxili losangu lunengela. 16Yi pakadi udi mu kudika pepe yi Mai a Ngalili, akamona Ximono, yi Andelo Ximono mwakunyenci, badi mu kwela matei mu mai, bwalo bwakadibo yi mudimo ă yixi kukwata. 17Yisu akabatôyela ene, Nungulandudili yi nakunukulumuna ku bakwaci ba bantu. 18Yi bakaxiya matei abo mangwoso yi bakamulandudila. 19Yi pakadi amadika ku buxi kubende, akamona Yakobo, mwana a Sebede, yi mwakunyenci Yoano, bakadi mu kibusu kabidi badi mu kutombola matei abo. 20Yi akababikila mangwoso ; bobo lolo bakaxiya teteabo Sebede mu kibusu yi bena midimo, yi bakamulandudila.

21Yi bakaya munda mwa Kapenaumu. Akabwela mu kixingidilu mangwoso ku dituku dia Sabado yi akakweyesa. 22Yi bakakamina kweyesa kwanci, bwalo bwakabeyesayi bea muntu yi bumanya, kumoni bea bafundi ba mikanda. 23Mu kixingidilu kiabo mwakadi muntu lolo amakwacibwa kudi kidimu kia mbindu, yi akakwamena, 24ene, Tudi yinebe bwalo kai, Yisu a Nasalete ? Owe wamalwa kulwa tuncimisa ? Namakulubukwa ; udi muna babala a Ncembi. 25Yi Yisu akamukama dikamu ene, Pudikila ; pauka munda mwanci. 26Kidimu lolo kia mbindu, pakadi kiamamuponesa yi dicwi, kiakakwamena yi diyi dikola, yi kiakapauka munda mwanci. 27Yi bungi bwabo bakakama kama, biakakwelesañanabo mbata ene, Kifiani kieki ? Kai kweyesa kupyakupya! Ku bumanya ndo kwalangayi isanga bidimu bia mbindu, yi biamamwedeya. 28Yi lotumbu lwanci lwakacakana mangwoso ku bidi bioso ku bungi bwa mbata a Ngalili.

29Yi bakabatuka ku kixingidilu mangwoso, yi bakabwela yi Yakobo yi Yoano mu ncibo a Ximono yi Andelo. 30Yi Ximono mukwanci a babakaxi akalala yi kusama kwa mudilu. Yi bakamutôyela mangwoso ku bwalo bwanci. 31Yei lolo akalwa yi akakwata kianca kienci, akamubisa ; mudilu pako ăkamuncuka yi yei akabasadila.

32Pa bwelu, pakadi diba diamabwela, bakacwala kudiyi bungi bwa batati ba masama yi bobo bakakwacibwa kudi bidimu bibi. 33Yi bungi bwa bula bakasangilañana ku mbelo. 34Yi akapandisa bantu bangi bakatata masama a ntonga yi ntonga ; akatenyeka lolo bidimu bibi bingi, yi akadi kasotôyesa bidimu bibi, bwalo bwakamulembetelabio.

35Ku butwatuku pexe, buxi butasokya butuku kikondo kingi, akabika yi akabatuka, yi akancuka kuya ku kidi kitena bantu, yi akalomba koku. 36Ximono lolo yi bobo bakadi yinanci bakamulanda ; 37yi pakadi bamamusañana bakamutôyela, ene, Bantu boso bakwapalala. 38Akabambila ene, Cuyi kunga ku mala mabende adi pepe, binxekwambila diembi koku kabidi, bwalo bunamalwa ku mucwe ou. 39Yi akakwenda, udi mu kwambila ambila diembi mu bixingidilu biabo mu bungi bwa Ngalili, yi udi mu kutenyeka tenyeka bidimu bibi.

40Yi muna sudi akalwa kudiyi, akamulomba, akamukumina binu paxi ene, Ndo wananga, ubili kungususula babala. 41Yi Yisu akakwombwa mwengo, akaxombola kianca kienci yi akamubaka kianca ene, Ngwananga ; susuka. 42Yi pakatôyayi, kusama kwa sudi kwakamuncuka mangwoso yi akasusuka. 43Yi akamulanga, yi akamuncula mangwoso 44ene, Mona, kutôyedi muntu mwoso diyi, kate yaka ya diebesi mikyebe kudi bokanda, yi longa malongi bwalo bwa kususuka kwebe, akatôya Mosese, bwalo bwa ntôbô kubatôbôlela. 45Kaninga akabatuka, yi akabanga kusakola sakola kungi, yi kucakanisa diyi, bitalubukwa Yisu kubwela mu bula kabidi ku mpala ya bantu, mo akakala kunci mu bidi bitena bantu ; yi bakalwa kudiyi ku mwanca mwoso.

Currently Selected:

MAKU 1: Luna_NT

Highlight

Copy