LUKA 11

Yesu ikumanyisya isya lwiputo

(Mat 6.9-13; 7.7-11)

1Isiku limo alinkwiputa pabuyo bumo, lelo bo amalile, popapo umfundigwa gwake yumo alinkumbula alinkuti, “Gwe Ntwa, ulitumanyisyaga ukwiputa, bo apa Yohani abamanyisye abafundigwa bake.” 2Umwene alinkubabula alinkuti, “Linga mukwiputa po mutigi,

Tata,

ingamu yako yikemesigwege;

ubutwa bwako bwisege.

3Utupege ifyakulya bwila tufwanege nafyo.

4Utuswege imbibi syitu,

buno nanuswe tukubaswa bosa aba nongwa syitu;

ungatubikaga ndugelo.”

5Popapo Yesu alinkubabula abafundigwa bake alinkuti, “Kali ywani mmyinu uyu linga ali nummanyani, abukege kumyake pakilo pakati ayobege atigi, ‘Gwe mmanyani gwangu, ulingopesyaga ifisyesye fitatu, 6papo ummanyani gwangu yumo afikile, nhesya gwangu, lelo ngaya nafyo fimo ifya kuntegelekesya.’ 7Umwene ugwa nnyumba amwamulege atigi, ‘Ungangatasyaga, buno ikifigo kigaligwe litasi, kangi une nabanangu tulambalele; po ngabagila ukusumuka pakukupako.’ 8Nikubabula une nikuti, napa linga atikusumuka pakumpa papo mmanyani gwake, loli panongwa ya lumilisyo lwake, isakusumukaga nukumpa fifyo ikulonda. 9Syo nikubabula lelo une nikuti, amusumege, po mwisakupegigwaga; amulondege, po mwisakufyagaga; amukung'undege kulwigi, po mwisakwiguliligwaga. 10Buno gwesa uyu ikusuma yo ikwambililaga, uyu ikulonda yo ikufyagaga, na uyu ikukung'unda kulwigi yo isakwiguliligwaga. 11Ywani umpapi nkati mmyinu uyu umwanake bo asumile ikisyesye ikumpa ilibwe, bo asumile iswi, mbuyo bwa nswi ikumpa injoka? 12Pamo bo asumile ilifumbi, ikumpa akapilili? 13Lelo linga umwe mwe babibi itolo, mumenye ukubapa abaninu ifyabupi ifinunu, po atisakukindililaga uGwisemwe uyu ali kumwanya ukubapa Mbepo Mwikemo aba bikunsuma?”

Yesu na Belezebuli (Mat 12.2230; Mar 3.2027)

14Isiku limo Yesu alinkuyisosya imbepo inyali iya kinunu. Bo yisokile imbepo inyali, ugwa kinunu alinkuyoba; ifyene ifilundilo filinkuswiga. 15#Mat 9.34; 10.25Loli bamo muli babo balinkuti, “Mwa Belezebuli, unkulu gwa mbepo inyali, mo mumo ikusikagila imbepo inyali.”

16 # Mat 12.38; 16.1; Mar 8.11 Loli abangi balinkungela, balinkulonda kumyake ikika ikifuma kumwanya. 17Umwene Yesu bo asyagenie inyinogono syabo, alinkubabula alinkuti, “Ubunyafyale ubu linga bwilundulenie bubo butupu, bukwipela kisame; lelo syope ninyumba syende nukugwilanila. 18Lelo linga Setano ilundulenie yuyo mwene, po ubunyafyale bwake bwati bwimege bulebule? Papo umwe mukuti, imbepo inyali ngusisokesya mwa Belezebuli. 19Lelo linga une nikusisokesya imbepo inyali mwa Belezebuli, po abaninu bikusisokesya mwani? Bunobuno bisakuyaga ba kubalonga umwe. 20Loli linga une nikusisokesya imbepo inyali mmaka ga Kyala, po ngimba ubutwa bwa Kyala bubisile umwe.

21“Linga ugwa maka igelike ifilwilo fyake pakuyilindilila inyumba yake, po ikyuma kyake kyosa kikuya kanunu itolo. 22Loli linga ugwa maka ukunkinda ikumwisila nukuntola, po ikupoka ifilwilo fyake ifi afisubilaga nukuyabania ifi apupile. 23#Mar 9.40Uyu akaya pamopene nanine, yo akindene nanine; kangi uyu atikubungania nanine, yo ikubululusya.

Ukugomokela kwa mbepo inyali

(Mat 12.43-45)

24“Apa linga imbepo inyali yikusokamo mmundu, yikukisania mbuyo ubusitamisi ukulonda ubutusyo; loli bo yikabwaga, po yikuti, ‘Nikugomokelaga kunyumba yangu kuno nafumile;’ 25lelo bo yisile, yikwaga mupyagiligwe nukunosigwa. 26Po yikubuka nukwakusyega imbepo isingi ihano na ibili imbibi ukuyikinda iyene, lelo bo singile sikutugala mumo, popapo akayilo ka mundu yula aka kunyuma, kikuya kabibi ukukakinda aka kwanda.”

Ubusangalufu bwa naloli

27Lelo bo Yesu ali pakuyoba sisisi, unkikulu yumo ugwa nkilundilo alinkukolela, alinkumbula alinkuti, “Lusayigwa ulwanda ulu gwalimo ugwe, namabele aga gongaga!”

28Umwene Yesu alinkwamula alinkuti, “Loli basayigwa ukukinda, aba bikulipilika ilisyu lya Kyala nukulisunga.”

Ukulonda ikika

(Mat 12.38-42)

29 # Mat 16.4; Mar 8.12 Lelo bo ifilundilo fya bandu fimbunganile, popapo Yesu alinkwanda ukuyoba alinkuti, “Ingulilo iyi, yo ngulilo imbibi; yikukilonda ikika, loli yitisakupegigwaga kimo ikika, kyene ki kika kya Yona. 30#Yona 3.4Namanga bo apa Yona ali kika kuba nkaya ka Ninive, bunobuno Nnyamundu isakuyaga kika kungulilo iyi. 31#1 Banyaf 10.1-10; 2 Syambu 9.1-12Umalafyale unkikulu umfuma kwitongo, isakusumukaga mbulongi nabandu ba ngulilo iyi nukubatobesya; buno afumile kubumalikilo ikisu ukwisa kukupilikisya amahala ga Solomoni; keta lelo unkulumba ukunkinda Solomoni alipo papapa. 32#Yona 3.5Abandu ba nkaya ka Ninive bisakusumukaga mbulongi ningulilo iyi nukuyitobesya, namanga abene bapindwike mbulumbilili bwa Yona; keta lelo, unkulumba ukunkinda Yona alipo papapa.

Ulumuli lwa mbili

(Mat 5.1-5; 6.22-23)

33 # Mat 5.15; Mar 4.21; Luk 8.16 “Akayapo yumo uyu bo akolisye inyale ikuyibika pabutitu, pamo kusi kukitundu, loli ikuyibika pamwanya pakikolelanyale, ukuti aba linga bikwingila balubonege ulumuli. 34Inyale ya mbili kyo kisige kyako. Lelo linga ikisige kyako kinunu itolo, umbili gwako gosa gukuya lumuli; loli linga kibibi, po umbili gwako gosa gukuya ngisi. 35Gwa ndege lelo, ukuti ulumuli ulu luli mmyako lungipelaga ukuya ngisi. 36Lelo linga umbili gwako gosa lumuli itolo, gukaya nikiyabo nakimo ikya ngisi, po gosa gukuyaga lumuli lutupu, bo apa inyale yikumulika nulumuli lwake.”

Yesu ikubakemela abaFarisai nabamanyandagilo

(Mat 23.1-36; Mar 12.38-40; Luk 20.45-47)

37Lelo bo Yesu amalile ukuyoba, popapo yumo umFarisai alinkusuma ukuti akalyege nagwe ifyakulya fya lubunju; popapo Yesu alinkwingila, alinkwitugasya pakulya. 38Umwene umFarisai, bo ambwene ukuti atikusugusula tasi bo asumwike pakulya alinkuswiga. 39Popapo Untwa alinkumbula umFarisai alinkuti, “Umwe mwe baFarisai mukusuka ikinwelo nulwangabya munyuma itolo; loli munda mmyinu mwiswile ubunyambuta nububibi. 40Mwe bakonyofu umwe, uyu atendekisye munyuma, akaya yo uyu atendekisye na nkati? 41Loli ifi muli nafyo fyo mupege ukuya fyabususilwa, keta, po fyosa fikuyaga fyelu kumyinu.

42 # Levi 27.30 “Loli sya butolwe kuli umwe mwe baFarisai, papo mukupagula ifya kiyabo kimo, mfiyabo kalongo (1/10) ifya nyungu, imbwiga, niseke lyosa; loli mukubuleka ubulongi ubugolofu, nulugano lwa Kyala; isi syo mwabagile ukusibomba, bo mutikusileka nisingi sila.

43“Sya butolwe kuli umwe mwe baFarisai, namanga mwiganile ukutugasya pafikota ifya bwimikigwa nnyumba syakwiputilamo, kangi ukuti babaponiege nulwimiko musokoni. 44Sya butolwe kuli umwe, namanga muli bo amapumba aga gatikuboneka, aga bikugakanya pamwanya kisita kumanya.”

45Popapo yumo ummanyandagilo alinkumwamula alinkuti, “Mmanyisi, isi kuyoba kututuka na yuyuswe.” 46Umwene Yesu alinkuti, “Nanumwe mwe bamanyandagilo sya butolwe, mwe mukubatwika abandu imitwalo imisito, loli umwe yuyumwe mutikugipalamasyapo imitwalo nulobe lwinu lumolwene. 47Sya butolwe kuli umwe, namanga mukugayengelela amapumba ga basololi aba abisemwe babagogile. 48Po ngimba muli baketi, mukusisisimikisya imbombo sya bisemwe; buno abene babagogile, loli umwe mukugayengelela amapumba gabo. 49Fyobene Amahala ga Kyala gatile, ‘Nisakubatumilaga abasololi nabatumigwa; bamo bisakubagogaga nukubafwima,’ 50ukuti ingulilo iyi yimeleligwege pilopa lya basololi bosa, ili lyalyonike ukufuma mu mbwandilo bwa kisu; 51#Bwa 4.8; 2 Syambu 24.20-21ukufuma pilopa lya Abeli, ukwisakufika pilopa lya Zekaria, uyu agogeligwe pakati pakigemo ninyumba inyikemo. Ena nikubabula une nikuti, yisakumeleligwaga ingulilo yiyiyi. 52Sya butolwe kuli umwe mwe bamanyandagilo, buno mukukisosyapo ikigulilo kya kwingilila ku bumanyi; umwe mwibene mutikwingilamo, kangi naba bikuti twingilege, mukubakanisya.”

53Umwene Yesu bo asokilemo, popapo abamanyandagilo nabaFarisai balinkwanda ukunjoba ububibi mbukalale, 54balinkuntegeka namalalusyo ga mingi, balinkuntegelela ukuti basyage simo isi sikufuma nkanwa mmyake.

Currently Selected:

LUKA 11: NNBII

Highlight

Copy