UBWANDILO 46

Yakobu ikubuka ku kisu kya Egiputi pamopene naba nnyumba yake

1Popapo Israeli alinkusumuka injila yake, alinkwega fyosa ifi ali nafyo, alinkufika nkaya ka Berisheba, mulamula mo alinkwikemesya ilikemo kwa Kyala gwa gwise Isaka. 2Popapo Kyala alinkunsetukila Israeli ikilo kilakila, alinkukolela alinkuti, “Yakobu, Yakobu!” Umwene alinkuti, “Al'une, gwe Kyala gwangu.” 3Umwene Untwa alinkumbula alinkuti, “Youne Kyala gwa baguso; ungatilaga ukwikilila nkisu kya Egiputi, namanga mulamula mo nisakukupelaga ugwe ukuya kikolo ikikulumba. 4Nikwikililaga nanugwe nkisu kila kya mw'Egiputi, nisakukugomokesyaga kunokuno kangi; bo uli nkisu kila Yosefu yo isakukwigala amaso bo ufwile.” 5Bunobuno Yakobu alinkusumuka ukufuma nkaya kala ka Berisheba. Abene abanake bo balinkumwega ugwisabo Yakobu palikimo na banabo kangi na bakasi babo balinkubapimbila pa mageleti aga Farao atumile ukuti mo bakamwegele Yakobu. 6#Imbo 7.15Balinkwega nimitimo gyabo, nifyuma fyosa ifi bakabile nkisu kya Kanani, balinkwisa nkisu kya Egiputi. 7Yakobu alinkwisa nkisu kya Egiputi pamopene na banake abalumyana na balindwana, na bisukulu bake abalumyana na balindwana na bosa aba nkikolo kyake.

8Isi syo ngamu sya bandu aba bafumile nduyungu lwa Israeli, aba babukile nkisu kya Egiputi: Yakobu na banake. Rubeni, ugwakipanda gwa Yakobu. 9Abana ba Rubeni bali bo aba: Hanoki, Palu, Hezironi na Karami. 10Abana ba Simeoni bali bo aba: Yemueli, Yamini, Ohada, Yakini, Zohara na Shaulu, umwene Shaulu yo mwanake ugwa mu nkasi gwake ugwa kikolo kya baKanani. 11Abana ba Levi bali bo aba: 12Gereshoni, Kohati na Merari. Abana ba Yuda bali bo aba Eri, Onani, Shela, Perezi na Zera (loli Eri na Onani bafwilile nkisu kya Kanani); abana ba Perezi bo aba; Hezironi na Hamulu. 13Abana ba Isakara bali bo aba Tola, Pua, Yobu na Shimuroni. 14Abana ba Zebuloni bali bo aba: Seredi, Eloni, na Yeleeli. 15Bababa bo bana aba Leya alimpapile Yakobu nkisu kya Padani-aramu, palikimo na Daina umwanake undindwana. Abana bosa abanyambala na bakikulu bali amalongo matatu na bandu batatu (33). 16Abana ba Gadi bali bo aba: Zifioni, Hagai, Shuni, Eziboni, Eri, Arodi na Areli. 17Abana ba Asheri bali bo aba: Imuna, Ishiva, Ishivi, Beriya pamopene nu ilumbu gwabo Sera. Abana ba Beriya bali bo aba: Heberi na Malikiyeli. 18Bababa bo bana ba Zilipa, unkikulu untumwa uyu Labani alimpele umwanake Leya; bo aba Zilipa alimpapile Yakobu, abandu kalongo na bahano nayumo (16).

19Abana ba Rakeli unkasi gwa Yakobu bali bo aba: Yosefu na Benjamini. 20#Bwa 41.50-52Nkisu kya Egiputi Yosefu apapilemo Manasi na Efraimu mu nkasi gwake Asenati, umwana gwa Potifari, umputi gwa nkaya ka Oni. 21Abana ba Benjamini bali bo aba: Bela, Bekeri, Ashibeli, Gera, Namani, Ehi, Roshi, Mupimi, Hupimi na Aradi. 22Bababa bo bali bana ba nduyungu lwa Yakobu, aba bafumile mwa Rakeli, bosa palikimo bali kalongo na bana (14). 23Umwana gwa Dani ali yo Hushimu. 24Abana ba Nafutali bali bo aba: Yazeyeli, Guni, Yezeri, na Shilemu. 25Bababa bo bali bana ba Biliha untumwa uyu Labani alimpele umwanake Rakeli, bo aba Biliha alimpapile Yakobu, palikimo bosa bali bahano na babili. 26Abandu bosa aba Yakobu ali nabo aba nduyungu lwake aba balisile nkisu kya Egiputi, bali amalongo mahano nalimo na bandu bahano nayumo (66) bosa palikimo, kisita ku balilako abakasi ba banake. 27#Imbo 7.14ABene abana ba Yosefu aba apapile nkisu kya Egiputi bo bali babili itolo. Bosa palikimo aba nduyungu lwa Yakobu aba balisile nkisu kya Egiputi bali amalongo mahano na mabili (70).

Yakobu ikufika nkisu kya Egiputi pamopene na ba nnyumba yake

28Yakobu alinkuntuma Yuda nkyeni ukwakumbula Yosefu ukuti akaganilege na Yakobu ugwise nkisu kya Gosheni; 29lelo bo afikile, popapo Yosefu alinkutendekesya igeleti lyake alinkubuka pakwakwaganila nu gwise Israeli nkisu kya Gosheni; alinkwakufika apa ugwise alipo, alinkwakungwila mmakosi, alinkulila bo batambilene. 30Israeli alinkumbula Yosefu, alinkuti, “Nalinga nikufwa lilino mfwege, ndikupasya mma; namanga ngubwene ugwe, gwe mwanangu, kangi menye ukuti naloli uliko ku bumi.” 31Umwene Yosefu alinkubabula abamyabo na ba nnyumba ya gwise alinkuti, “Natigi mbuke tasi ngambule Farao ukuti abamyitu na bosa aba nnyumba ya tata aba bayengile nkisu kya Kanani, lilino bisile kumyangu, 32namanga abandu bababa bwila itolo batimi ba ng'ombe; lelo lilino bisile nimitimo gyabo, igya ng'osi, nigya ng'ombe, na fyosa itolo ifi bakabile. 33Lelo linga Farao ikubabilikila umwe ikubalalusya ikuti, ‘Ngimba yo mbombo yiliku iyi mukubomba?’ 34Umwe mukatigi, ‘Twe bandu bako tuli batimi ba ng'ombe ukwanda mu mbukeke bwitu ukwisakufika na ku lilino kuno, uswe twesa na ba batata bubo,’ ko kuti mwise mwitugalege nkisu kya Gosheni. Namanga untimi gwesa kinyanyasi ku baEgiputi.”

Currently Selected:

UBWANDILO 46: NNBII

Highlight

Copy