UBWANDILO 45

Yosefu ikwinangisya ku bamyabo

1 # Imbo 7.13 Bunobuno Yosefu alinkutoligwa nukwikasya nkyeni mbabombi bake, alinkukolela alinkuti, “Amubasosyemo abandu bosa muno.” Alinkusita nukusyalamo nayumo umundu uyungi bo umwene ikwinangisya ku bamyabo. 2Alinkukuta nisyu ilikulumba Syo, bunobuno na baEgiputi balinkupilika, bope na ba nnyumba ya Farao balinkupilika. 3Popapo Yosefu alinkubabula abamyabo alinkuti, “Youne Yosefu ngimba tata akali mumi naloli?” Loli abamyabo balinkutoligwa nukumwamula, papo ulutende lwabagwilile.

4Bunobuno Yosefu alinkubabula alinkuti, “Nikubasuma ukuti musegelele kuno;” abene balinkusegelela. Popapo alinkubabula alinkuti, “Youne Yosefu uyu mwalimulisye nkisu kya Egiputi. 5Loli lilino mungatamigwaga mundumbula syinu, nalinga ko kwikalalila mwibene panongwa yakuti mwalinyulisye une kuno. Yo yu Kyala uyu alindumile une nkyeni mmyinu ukuti nise mbupoke ubumi bwinu. 6Namanga iki kyo kyinja kya bubili ukufuma mumo injala yigwilile nkisu; kangi fisyele ifyinja fihano apa kutisakuyako nukulima, nalinga ko kutondola. 7Kyala alindumile une nkyeni mmyinu ko kuti ikikolo kyinu kyendelelege pa kisu, nukuti mbupakisye ubumi bwa bandu aba baliko ku bumi lilino. 8Bunobuno mukaya yo umwe mwe mwalindumile une kuno mma, loli yo yu Kyala uyu ambelile une ukuti mfwanege ndi gwise gwa Farao, nukuti njege nkulumba gwa pa nyumba ya Farao, nukuya ndagili gwa kisu kyosa kya mw'Egiputi. 9#Imbo 7.14Oko, mubukege mbibimbibi kwa tata, mukambule ukuti, ‘Umwanako Yosefu ikuti, Kyala anyimike une ukuya gwakukilagila ikisu kyosa kya mw'Egiputi; gwikililege gwisege kuno kumyangu, ungakabilaga. 10Mwisakwitugalaga nkisu kya Gosheni, mwisakuyaga pabupipi nanine, umwe na baninu, kangi na bisukulu binu, ing'osi syinu ni mbene syinu, kangi ning'ombe syinu, pamopene na fyosa ifi muli nafyo. 11Kulakula ko nisakubaswilaga ifindu une, namanga fisyele ifyinja fihano ifya njala, bunobuno mwisakupona, mutisakwingila mbutolwe umwe na ba nnyumba syinu kangi na fyosa ifi muli nafyo.’ 12Lilino lelo mwiketile mwibene, yope na yu gwamyinu Benjamini asiketile ukuti youne ne nikuyoba nanumwe. 13Mukampangile tata nisya lwimiko losa ulu ndwagile nkisu kya mw'Egiputi, kangi na fyosa ifi mufibwene. Mwendelelege mukisege nagwe tata.” 14Popapo alinkwenda nukuntambila mmakosi unnuguna gwake Benjamini, alinkulila; yope na Benjamini alinkulila bo bakali bikutambilana mmakosi. 15Alinkubaponia ulwa bunyamundu bosa abamyabo kangi nukulila. Panyuma pali sisisi, po abamyabo balinkwanda ukuyobesania nagwe.

16Bo inongwa sisisi sipilikigwe na ku nnyumba ya Farao isya kuti, “Abamyabo ba Yosefu bisile,” Farao undagili gwa kisu palikimo na babombi bake balinkwikyela fiyo. 17Farao alinkumbula Yosefu alinkuti, “Ubabule abamyinu uti, Mufyusye imifuko gyinu pa mbunda, mubukege ku kisu kya Kanani. 18Mukamwege ugwisemwe na bannyumba syinu, mukisege kuno kumyangu, nisakubapaga ikisu iki kikindile ubununu muno mw'Egiputi, mwisakulyaga ifindu ifinyafu fiyo ifya nkisu iki.” 19Alinkubabula kangi alinkuti, “Mwege amageleti nkisu iki kya Egiputi, go mukabapimbilemo abakasi binu nabaninu, mukisege nagwe ugwisemwe. 20Munginogonelangako nisya fyuma fyinu, buno mbapele umwe ikisu iki kikindile ubununu muno mw'Egiputi.”

21Abana ba Israeli balinkubomba bo bunobuno. Yosefu alinkubapa amageleti, bo mumo Farao alindagilile, kangi alinkubapa ni mbayo ya pa njila. 22Alinkubapa bosa imyenda gyakufwala ntubalilo utwimikigwa, loli Benjamini yo alinkumpa indalama sya siliva aba mia batatu (300) nimyenda gyakufwala ntubalilo utwimikigwa fya fikolo fihano. 23Alinkuntumila ugwise imbunda kalongo isi syapimbile ifindu ifinunu ifya nkisu kya mw'Egiputi, ni mbunda ingikulu kalongo isi syapimbile ingano ni fisyesye kangi ni fyakulya ifingi, ukuti fyo fikayege mbayo ya gwise ya pa njila. 24Popapo Yosefu alinkubasumusya abamyabo, alinkwakubasindikila, lelo bo ikulagana nabo alinkubabula alinkuti, “Komma ukumana mu njila.” 25Popapo balinkufyuka ukufuma nkisu kya Egiputi, balinkwakufika ku gwisabo nkisu kya Kanani. 26Balinkwisa kumbula ugwisabo balinkuti, “Yosefu aliko mumi, yo uyu ikulagila nkisu kyosa ikya Egiputi.” Bunobuno Yakobu alinkuyeta itolo alinkusita nukusisubila isi bambulaga. 27Lelo bo abanake bampangile Yakobu syosa, namasyu gosa aga Yosefu ababulile; kangi bo agabwene amageleti aga Yosefu atumile ukuti gakamwege, popapo Yakobu ugwisabo alinkukaba amaka. 28Alinkuyoba alinkuti, “Po singolile naloli isya kuti umwanangu Yosefu aliko, mumi. Nsumwike ngubuka, ukuti ngaketane nagwe bo ngali nukufwa.”

Currently Selected:

UBWANDILO 45: NNBII

Highlight

Copy