UBWANDILO 40
40
Yosefu ikusanusya injosi sya bapinyigwa
1Bo amasiku gakindilepo, unkulumba gwa batendekesyabwalwa bwa ndagili gwa kisu kya Egiputi, nunkulumba gwa bapiyafindu bamonangile umalafyale gwabo Farao, undagili gwa kisu kya Egiputi. 2Popapo alinkubakalalila ababombi bake babili bala, unkulumba gwa batendekesyabwalwa nunkulumba gwa bapiyafindu. 3Alinkubabika nnyumba ya bannyololo nkipinda kya nkulumba gwa aba babalindililaga abapinyigwa muno Yosefu abikigwe. 4Unkulumba gwa aba babalindililaga abapinyigwa yula alinkubabika abandu bala mmaboko ga Yosefu ukuti abaketege; balinkugona fiyo nnyumba ya bannyololo. 5Ilisiku limo pakilo abandu bala bosa bo babili balinkugogwa injosi uyu isyake uyu isyake kangi na mumo sikusanukisya, Unkulumba gwa batendekesyabwalwa bwa ndagili gwa kisu kya Egiputi kangi nunkulumba gwa bapiyafindu bake. 6Nulubunju bo Yosefu ingile nkipinda kyabo, alinkubaketa, alinkwaga basulumenie fiyo. 7Popapo alinkubalalusya ababombi ba Farao bala, aba ali nabo nnyumba ya bapinyigwa iya malafyale gwake, alinkuti, “Ngimba musulumenie fiki umusyugu?” 8Abene balinkumbula balinkuti, “Tugogilwe injosi, lelo akayapo nayumo ugwa kutulingania muno sikusanukisya.” Umwene Yosefu alinkubabula alinkuti, “Yo yu Kyala uyu ikunangisya muno injosi sikusanukisya.” Yosefu alinkubabula alinkuti, “Amumbule lelo injosi syinu.”
9Bunobuno unkulumba gwa batendekesyabwalwa alinkumpangila Yosefu injosi syake alinkuti, 10“Mu njosi syangu ndinkugubona umpiki gwa mafilu ugu gwali nkyeni mmyangu, gwali nisamba itatu, lelo bo gutulwile amani ndinkwaga ubulenge bukuboneka nakalinga itolo, ndikukibona ikikose kya mafilu, aga gatonile. 11Une nakolile nkiboko kyangu ikinwelo kya Farao. Popapo ndikwega iseke sya mafilu ndinkukamila nkinwelo kila ndinkwenda nukunninga Farao ikinwelo kila.” 12Popapo Yosefu alinkumbula alinkuti, “Ukusanusya kwa njosi syako ko uku: Isamba itatu go masiku matatu. 13Bo gakindapo amasiku matatu, Farao ikuya pakukusosyamo nnyumba ya bannyololo nukukugomokesya kangi pa mbombo yako; gwisakuntwalilaga kangi Farao ubwalwa bwa mafilu mumo gwambombelaga pabwandilo. 14Lelo nikukusuma ukuti gwise ukangumbukege bo usokile, ukayobege ingamu yangu kwa Farao ko kuti undule ukunsosya une mu nnyololo muno. 15Namanga nakoligwe itolo ukufuma nkisu kya baHiburi; kope kuno ngatulile ninongwa nayimo iyi banyingikisye nnyumba ya banyololo iyi.”
16Unkulumba gwa bapiyafindu bo aketile ukuti ukusanusya kwa njosi sila kununu itolo, alinkumbula Yosefu alinkuti, “Nine ngogilwe injosi: mu njosi syangu ndinkwaga nitwikile ifibo fitatu pantu, muno fyalimo ifisyesye. 17Nkibo ikya pamwanya fiyo fyalimo ifyakulya ifya luko nu luko ifi bampiyile Farao, lelo ndikwaga injuni sikulya ifi fyali nkibo pantu gwangu.” 18Lelo popapo Yosefu alinkumbula alinkuti, “Ukusanusya kwake ko uku: Ifibo fitatu go masiku matatu. 19Bo gakindapo amasiku matatu, Farao ikuya pa kukusosya nnyumba ya bannyololo kangi ikuya pakutumula untu nukukutulika pa mpiki; po lelo injuni sisakulyaga umbili gwako.”
20Bo gakindilepo amasiku matatu gala, Farao alinkubapiyila ifindu ababombi bake bosa aba pamwanya pisiku lyakukumbuka ukupapigwa kwake. Popapo alinkubasosya ababombi bake bala, unkulumba gwa batendekesyabwalwa, nunkulumba gwa bapiyafindu, alinkwisa nabo nkyeni nkilundilo kya bandu. 21Alinkungomolela pa mbombo yake unkulumba gwa batendekesyabwalwa, 22loli alinkuntulika unkulumba gwa bapiyafindu. Silinkwendela itolo muno Yosefu asiyobile na muno syasanukisyaga injosi. 23Loli unkulumba gwa batendekesyabwalwa alinkusita nukunkumbuka Yosefu, alinkumwibwa itolo.
Currently Selected:
UBWANDILO 40: NNBII
Highlight
Share
Copy
Want to have your highlights saved across all your devices? Sign up or sign in
BAIBULO INONGWA INUNU © Bible Society of Malawi, 2017.
