UBWANDILO 41

Yosefu ikusanusya injosi sya Farao

1Bo fikindilepo ifyinja fibili Farao alinkugogwa injosi; mu njosi syake alinkwima pa lusoko lwa Nayelo. 2Alinkusibona ing'ombe imbate ihano na ibili sikufyuka ukufuma ndusoko lwa Nayelo sikulya indete, 3alinkusibona ni ng'ombe ihano na ibili isi syagandile, silinkufyuka ukufuma Ndusoko lwa Nayelo, silinkwisa kwima mu mbali ndusoko pabupipi ninine. 4Lelo popapo ing'ombe ihano na ibili isi syagandile silinkusimila ing'ombe ihano na ibili imbate sila. Popapo Farao alinkulembuka ntulo. 5Bo agonile kangi utulo, alinkugogwa injosi ulwa bubili, alinkufibona ifisasa fihano na fibili ifya ngano ifi fyafumile nkikolo kimokyene, fyalyelile fiyo kangi fyali finywamu naloli. 6Panyuma kangi nlinkusoka ifisasa fihano na fibili, ifisitaseke ifi fyalyonangike nu mbelo gwa ku busokelo ilisuba. 7Po lelo ifisasa fihano na fibili ifisitaseke fila filinkufimila ifisasa fihano na fibili ifinunu ifi fyali finywamu naloli. Lelo bo Farao alembwike ntulo alinkwaga njosi itolo. 8#Dan 2.2Nulubunju bo bukile Farao alinkusita nukutengana mu ndumbula yake. Alinkubabilikila abandu bake abamaganyi na ba mahala bosa aba nkisu kya Egiputi alinkubapangila injosi syake, loli akalipo nayumo ugwa kunsanukisya injosi syake.

9Popapo lelo unkulumba gwa batendekesyabwalwa alinkumbula Farao alinkuti, 10“Umusyugu po ngumbwike ubusobi bwangu. Akabalilo kamo bo utukalalile twe babombi bako, ulinkutwingisya nnyumba ya bannyololo une nu nkulumba gwa bapiyafindu bako, twali nnyumba ya nkulumba gwa aba balindililaga abapinyigwa. 11Ikilo kimo twesa twe babili twagogilwe injosi, uyu isyake uyu isyake, kangi kope nukusanusya kwa njosi kwa kindene. 12Undumyana yumo unHiburi, untumwa gwa nkulumba gwabo aba balindililaga abapinyigwa yo ali nanuswe mumo; lelo bo tumpangile injosi syitu, alinkwenda nukutusanukisya twesa uyu isyake uyu isyake ukufwana na mumo syayilile injosi syitu. 13Naloli silinkwenda nukutugwila bo mumo atusanukisye injosi syitu, une ndikugomokela pa mbombo yangu, yope nunkulumba gwa bapiyafindu balinkuntulika.”

14Popapo Farao alinkutuma ukuti bakamwege Yosefu, balinkunsosya nakalinga itolo nnyumba ya bapinyigwa. Lelo bo atendekisye inywili nukulwala imyenda igingi, alinkwakwingila nnyumba, alinkwisa kwima nkyeni mwa Farao. 15Popapo Farao alinkumbula Yosefu alinkuti, “Ngogilwe injosi, loli akayapo uyu amenye ukusanusya injosi isi; mbilike ukuti ugwe umenye ukusanusya linga umundu akubulile injosi syake.” 16Popapo Yosefu alinkumwamula Farao alinkuti, “Ngaya youne, loli Kyala mwene yo isakukwamula ugwe bununu pa njosi syako.” 17Popapo Farao alinkumpangila Yosefu alinkuti, “Mu njosi syangu nalyimile mu mbali ndusoko lwa Nayelo, 18po lelo silinkwisa ing'ombe imbate ihano na ibili, syalyaga mu ndete. 19Panyuma kangi silinkufyuka ing'ombe isingi ihano na ibili isi syagandile fiyo, syali mbibi, kangi syanyalile naloli, ngasibonamo siku nkisu kyosa ikya Egiputi. 20Bunobuno ing'ombe imbibi sila silinkusimila ing'ombe ihano na ibili imbate sila. 21Loli bo sisimilile pope silinkusita nukuboneka ukuti sisimilile inine. Silinkuboneka nubugande bwabo bo mumo syayilile mbwandilo. Po lelo ndinkulembuka ntulo. 22Ndinkugogwa kangi, mu njosi syangu ndikufibona ifisasa fya ngano fihano na fibili fimelile nkikolo kimokyene; fyalyelile fiyo kangi fyali finunu. 23Popapo filinkusoka ifisasa ifingi fihano na fibili ifisita seke nkati, 24ifi fyalyonangike nu mbelo gwa kubusokelo ilisuba, filinkufimila ifisasa fihano na fibili fila fyalyelile fiyo. Mbapangile abamaganyi injosi syangu, loli akabonekapo yumo uyu amenye ukusanusya injosi syangu sisisi.”

25Popapo Yosefu alinkumbula Farao alinkuti, “Injosi syosa ibili syo simosyene itolo; Kyala akufumbulile Farao isi ali pipi ukusibomba. 26Ing'ombe imbate ihano na ibili, fyo fyinja fihano na fibili; ifisasa fihano na fibili fila, ifi fyalyelile fiyo, fyo fyinja fihano na fibili; injosi syo simosyene. 27Ing'ombe ihano na ibili sila syagandile fiyo, isi syalisile panyuma, fyo fyinja fihano na fibili; kangi ifisasa fihano na fibili ifisita seke nkati fila, ifi fyalyonangike mu mbelo gwa kubusokelo ilisuba, fyope fyo fyinja fihano na fibili ifya njala. 28Sifwene itolo na muno ngubulile ukuti, Kyala ikukufumbulila ugwe Farao isi ali pipi ukusibomba. 29Fisakuyako ifyinja fihano na fibili ifya mboto nkisu kyosa ikya Egiputi; 30panyuma loli po fisakuyako ifyinja fihano na fibili ifya njala, 31po lelo abandu, bisakwibwa ifyinja fila ifya mboto panongwa yakuti injala iyi yisakwisa yisakuya nsisya fiyo. 32Inongwa iyi ugogilwe injosi syakuti, yo Kyala asyimike ukuti siyeko naloli, kangi yo yuyo isakusibombaga nkyeni. 33Bunobuno lelo gwe malafyale Farao, oko, undondege yumo umundu ugwa mahala, yo umwimikege pamwanya pali fyosa nkisu iki kya Egiputi. 34Kangi usalege abandu abakuketa imbombo iyi nkisu kyosa. Nkyinja kyosa ikya mboto gwegengeko ikiyabo kimo mfiyabo fihano (1/5) ukufuma mfyakulya fya mmigunda gya kisu kya Egiputi ukwakufika pa fyinja fyo fihano na fibili. 35Bafibunganiege ifya kulya fyosa ifi bikufyaga mfyinja ifinunu ifi fikwisaga ifya mboto. Ukufwana na maka aga ubapele, babunganiege ifyakulya nukufibika mosa ntwaya kangi bayeko abandu abakufiketelela. 36Ifyakulya fififi bafibikege bununu ukuti fise fibatulege abandu ba nkisu mfyinja fyo fihano na fibili ifi fikwisaga kunyuma.”

Yosefu ipelile ukuya ndindilili nkisu kya Egiputi

37Popapo Farao palikimo na babombi bake bosa balinkwaga ukuti amasyu aga manunu. 38Farao alinkubalalusya ababombi bake alinkuti, “Kali tubagile ukumwaga yumo umundu ugwa mahala bo gagaga uyu ali na Mbepo gwa Kyala?” 39Lelo popapo Farao alinkumbula Yosefu alinkuti, “Bo mumo Kyala asinangikisye mmyake syosa sisisi, akayapo yumo uyungi ugwakusyagania nugwa mahala bo mumo uyilile ugwe. 40#Imbo 7.10Lilino ngwimike ugwe ukuya ndindilila kisu kyangu, abandu bangu bosa bikuyaga pasi pabulagili bwako, loli ugwe kuyaga pene papasi pamyangu.” 41#Dan 5.29Popapo Farao alinkumbula Yosefu alinkuti, “Keta, ngwimike ugwe ukuya ndindilila kisu kya Egiputi.” 42Farao alinkusosya pa lobe lwake ulutandati ulu lwali nikimanyilo kyake, lo alinkumfwika Yosefu pa lobe lwake, kangi alinkumfwika nimyenda iminunu imitakanyifu, alinkuti nu nnyololo gwa golide alinkumfwika mmakosi. 43Farao alinkumfyusya Yosefu mwigeleta lyake ilya bubili, popapo abandu balinkukolela nkyeni mmyake balinkuti, “Amundambilege uyu!” Bunobuno Farao alinkumwimika Yosefu ukuya yo ndindililakisu mosa mwa Egiputi. 44Popapo Farao alinkumbula Yosefu, alinkuti, “Youne Farao, isi linga ukitikisya ugwe akayako yumo uyungi ugwakusumuka nukusibomba nkisu kyosa kya Egiputi.” 45Farao alinkumpa Yosefu ingamu ya Zafenati-paneya; kangi alinkunkwela Yosefu unkikulu uyu ali yo Asenati ingamu, umwana gwa Potifari umputi gwa nkaya ka Oni. Umwene Yosefu alinkwenda kosakosa nkisu kya Egiputi.

46Yosefu ali nifyinja amalongo matatu (30) lula andege ukumbombela Farao undagili gwa kisu kya Egiputi. 47Mfyinja fyosa ifya mboto fihano na fibili fila, ikisu kilinkubotola ifyakulya ifingi fiyo. 48Popapo Yosefu alinkufibungania nkisu kya Egiputi fyosa ifyakulya ifi bafyagile mfyinja fyosa ifya mboto fila fyo fihano na fibili. Alinkufibika mfituba ifi fyali ntwaya. Nkaya aka na aka alinkubikamo ifyakulya ifi fyafumaga mmigunda igi gikasyungutile akaya kala. 49Yosefu alinkubungania ifyakulya fingi naloli, filinkufwana bo gu nsanga gwa mu nyanja. Ifyakulya fila filinkuya fingi naloli, alinkuleka nukupima bubo, papo fikali fyakuti umundu apime.

50Yosefu alinkuya na bana babili aba apapile mwa Asenati umwana gwa Potifari umputi gwa nkaya ka Oni, bo fikali nukwisa ifyinja fya njala. 51Umwanake ugwakipanda yo Yosefu alinkumpa ingamu ya Manasi,#41.51 Manasi: ko kuti ikibwa. namanga inogonaga ukuti, “Kyala ambelile ukwibwa indamyo syangu syosa; kangi nukubibwa aba nnyumba ya tata.” 52Umwanake ugwa bubili alinkumpa ingamu ya Efraimu, alinkwinogona ukuti, “Kyala ambele une abana nkisu kya ndamyo syangu.”

53Ifyinja fila fihano na fibili ifi imboto yalimo nkisu kya Egiputi filinkumalika; 54#Imbo 7.11popapo filinkwanda ifyinja fihano na fibili ifya njala, ukufwana na mumo ayobile Yosefu. Injala yilinkugwa mfisu fyosa, mwene mu nkisu kya Egiputi mo yikalimo injala. 55#Yoh 2.5Bo ikisu kyosa ikya Egiputi kyandile ukuya ni njala, abandu balinkukuta kwa Farao ukuti abapepo ifyakulya. Popapo Farao alinkubabula bosa aba mw'Egiputi alinkuti, “Amubukege kwa Yosefu, syosa isi linga ikubabula syo mukabombege itolo.” 56Bunobuno bo injala yigwile nkisu kyosa, Yosefu alinkwigula indamba sya fyakulya, alinkulisya ifyakulya ku bandu ba nkisu kya Egiputi, namanga lilino po injala yali ngulumba fiyo nkisu kya Egiputi. 57Kangi abandu bafumaga mfisu fyosa balinkwisa kwa Yosefu kukula ifyakulya nkisu kila, papo injala yali ngulumba fiyo mfisu fyosa.

Currently Selected:

UBWANDILO 41: NNBII

Highlight

Copy