UBWANDILO 34

Shekemu ikunkola Daina nukulogwa nagwe

1Ilisiku limo Daina umwana undindwana uyu Leya alimpapile Yakobu, alinkusumuka ukubuka kukwangala na bakikulu abenekisu. 2Popapo Shekemu ugwakikolo kya baHivi, umwana gwa Hamori, umalafyale gwa kisu kila, alinkumbona Daina, bunobuno Shekemu alinkwenda nukunkola itolo pa maka alinkulogwa nagwe nukunjwelula. 3Umwene Shekemu yo alinganile fiyo undindwana yula, po lelo alinkugela fiyo ukunsangalusya. 4Popapo Shekemu alinkumbula ugwise Hamori alinkuti, “Natigi munyegele undindwana uyu ayege nkasi gwangu.” 5Umwene Yakobu alinkupilika ukuti Shekemu amonenge umwanake Daina. Pakabalilo aka abana ba Yakobu abalumyana bakalipo, babukile nkutima imitimo gyake ndukubo, bunobuno Yakobu alinkuya myee itolo babuya abanake bagomoka. 6Popapo Hamori ugwise gwa Shekemu alinkubuka ukwakuyobesania na Yakobu; 7abene abana ba Yakobu bo bagomokaga itolo ukufuma ndukubo. Bo basipilike inongwa sisisi, balinkukalala fiyo, ilyoyo lilinkubakola, bo bagile ukuti Shekemu abombile isya bunyali isi sikabagile nukubombigwa nkikolo kya Israeli, ukunkola pa maka itolo umwana gwa Yakobu nukulogwa nagwe! 8Hamori alinkubabula alinkuti, “Umwanangu Shekemu ikundonda fiyo umwaninu, nabasumaga umwe ukuti mu mpepo amwege ayege nkasi gwake. 9Natigi tweganilanege nanumwe, twegege abaninu abalindwana, nanumwe mwegege abanitu abalindwana. 10Mwitugalege nanuswe, kangi muyege nu buyo nkisu iki. Mwitugalege nanuswe nukubomba munomuno isya kyusi, ko kuti mubwagilengemo ubukabi munomuno.” 11Yope na Shekemu umwanake alinkuyoba ku gwise gwa ndindwana Daina na ku balumbu bake alinkuti, “Ena, natigi munyitikisye ukuti ndyagege ilipyana nkyeni mmyinu. Une nikubapaga kosa aka linga mukulonda kumyangu. 12Mumbule ifi mukulonda nalinga fiye bule ifya kukwa, nisakubapaga ukufwana na mumo mupimile linga munyitikisye ukumwega ukuti ayege nkasi gwangu.”

13Popapo abana ba Yakobu balinkumwamulila mbukomu Shekemu palikimo nu gwise Hamori panongwa yakuti Shekemu amonenge ilumbu gwabo Daina, balinkuti, 14“Tukabagila ukumwitikisya ilumbu gwitu ukuti egane nu mundu unsita kubutigwako, buno sisisi sikuyaga sya soni kumyitu. 15Loli tubagile ukubitikisya pene papo linga mukwitika ukuya bo yuyuswe, ukuti unnyambala gwesa nkati mmyinu abutigwengeko. 16Po lelo tukubitikisyaga ukuti mwegege abanitu abakikulu, nukuti nanuswe twegege abaninu abakikulu, ukuti twitugalege nanumwe, twipelege ukuya kikolo kimokyene. 17Loli linga mutikwitika isi tukuyoba isya kuti mubutigwengeko, po tukumwegaga umwanitu, tukubukaga nagwe.” 18Amasyu gabo galinkunhobosya Hamori na yu mwanake Shekemu. 19Undumyana alinkusita nukuhabapo ukusibomba isi bayobile, papo alinganile naloli umwana gwa Yakobu. Kangi undumyana yuyuyu agindikigwe fiyo ukubakinda bosa aba nkikolo kyake. 20Bunobuno Hamori nu mwanake Shekemu balinkwisa apa babunganaga abandu nkaya kabo, balinkuyobesania na bandu ba nkaya balinkuti, 21“Abandu aba binitu, twatigi tubaleke bitugalege nkisu iki, bendesyege ikyusi munomuno, buno ikisu kyope kyelefu kimenye ukubafwana. Tubagile ukwega abanabo abalindwana ukuti bayege bakasi bitu, kangi nanuswe tubagile ukubapa abanitu abalindwana ukuti begege. 22Loli kalipo akandu kamokene itolo aka kabagile ukubapelela ukwitugala nanuswe, ukuti tuyege kikolo kimokyene, ko kakuti. Unnyambala gwesa nkati mmyitu abutigwengeko, bo mumo bope bayilile. 23Bule kali ing'ombe syabo, ni fyuma fyabo, kangi ni fitimigwa fyabo fyosa fitisakuyaga fyitu? Oko, twitikane nabo po bisakwitika ukwitugala nanuswe.” 24Bunobuno bosa abandu ba kaya kala balinkwitika isi ayobile Hamori nu mwanake Shekemu. Bunobuno abanyambala bosa aba babungene balinkubutigwako.

25Pisiku lya butatu, bo ifilonda fikali fikubababa abandu, abana ba Yakobu babili, Simeoni na Levi aba bali balumbu ba Daina, balinkwega inyubo syabo balinkubanyomokesya itolo abandu bankaya kala, balinkwingila nkaya kala, balinkubagoga abanyambala bosa. 26Balinkungoga na Hamori palikimo numwanake Shekemu, balinkwenda nukunsosya Daina nnyumba ya Shekemu, popapo balinkubuka. 27Popapo abana ba Yakobu abangi balinkwisa pa mifimba, balinkupupa fyosa ifi fyalimo nkaya kala, papo balinnyasisye ilumbu gwabo. 28Popapo balinkupupa nimitimo gyabo igya ngosi, ni gya ng'ombe kangi ni gya mbunda, na fyosa ifi fyalimo nkaya kala na mmigunda bubo. 29Balinkupupa ifyuma fyabo fyosa, balinkubakola abakikulu na bana bosa kangi na fyosa ifi fyalimo nnyumba sya bandu. 30Popapo Yakobu alinkubabula abanake, Simeoni na Levi, alinkuti, “Mundwalile ulutamyo, papo mumbelile ukubengigwa na benekisu, aba kikolo kya baKanani na baPerizi; bope na bandu aba ndi nabo banandi fiyo, lelo abene linga bongene palikimo bikulwa nanine, keta bisakumbyutaga itolo une palikimo na ba nnyumba yangu.” 31Loli abene abanake balinkumwamula balinkuti, “Ngimba syabagile naloli ukuti bampelege ilumbu gwitu ukuya nkikulu undogwe.”

Currently Selected:

UBWANDILO 34: NNBII

Highlight

Copy