UBWANDILO 33

Ukusayana kwa Yakobu na Esau

1Popapo Yakobu alinkuketa alinkumbona Esau ikwisa, ali na bandu abamia bana (400). Yakobu alinkubatapulania abanake, bamo balinkuya na Leya, bamo balinkuya na Rakeli, alinkuya bububo itolo naku babombi bake abakikulu babili bala. 2Alinkubalongosya nkyeni ababombi bake abakikulu pamopene na banabo, alinkukongapo Leya na banake, umwene Rakeli na Yosefu balinkuya ku bumalikisyo. 3Popapo Yakobu alinkuya nkyeni muli bosa, alinkufugama pasi nukundambila Esau kahano na kabili abuya afika pabupipi nunkulu gwake. 4Loli Esau alinkubopa itolo ukubuka nukwakwaganila nagwe, alinkungwila mmakosi, alinkumponia, popapo balinkulila bosa bo babili. 5Panyuma pali sisisi Esau alinkubabona abakikulu na banabo, alinkulalusya alinkuti, “Bo bani aba bali nanugwe?” Yakobu alinkwamula alinkuti, “Bo bana aba mwipyana lyake Kyala ambele une ne mbombi gwako.” 6Popapo abakikulu abatumwa bala balinkusegelela pamopene na ba banabo balinkufugama pasi balinkundambila Esau. 7Alinkwisa yope Leya pamopene na banake, balinkufugama nukundambila; lelo pa bumalilo po alinkwisa Yosefu na Rakeli, balinkufugama nukundambila. 8Esau alinkundalusya unnuguna gwake alinkuti, “Gikusanusya fiki imitimo igi naganile nagyo?” Umwene Yakobu alinkwamula aunkuti, “Natigi pamo ndyagilemo ilipyana nkyeni mmyako gwe malafyale gwangu.” 9Loli Esau alinkumbula alinkuti, “Gwe gwamyitu, une ndinafyo fingi kangi fimfwene une, timaga itolo yuyugwe.” 10Yakobu alinkwamula alinkuti, “Mma, nikukusuma ukuti, linga ndyagile naloli ilipyana nkyeni mmyako, po gwambililege ikyabupe kyangu iki kifumile nkiboko kyangu. Syanaloli isyakuti, bo nikwisa nkyeni mmyako, ngufwana nisile itolo nkyeni mwa Kyala pakuketa muno unyambilile nipyana bo lilili. 11Nikukusuma ukuti gwambilile ikyabupe kyangu iki ngutwalile, buno Kyala angetile nikisa kangi ndi nafyo ili fimfwene.” Bunobuno Yakobu alinkumfimbilisya fiyo Esau, popapo Esau alinkwambilila ikyabupe kila.

12Esau alinkumbula Yakobu alinkuti, “Oko, tusumukege lelo tubukege, une ngulongolelangapo nkyeni.” 13Loli Yakobu alinkwamula alinkuti, “Gwe malafyale gwangu, umenye itolo ukuti une ndi na bana abakeke kangi nikugipakisya imitimo igi gili nutwana, namanga linga mfikuyisye fiyo mwisiku limolyene, po imitimo gyosa gisakufwa. 14Loli ugwe gwe malafyale gwangu, utalengepo, une ne mbombi gwako nikukongaga munyuma panandipanandi, ukufwana na mumo gikwendelaga imitimo, kangi na mumo bikwendela abana, ukufika apa ngwakukwagilaga ugwe mfyamba fya Seyiri.”

15Bunobuno lelo Esau alinkumbula Yakobu alinkuti, “Oko, ngulekelepo bamo abandu aba ndi nabo.” Loli Yakobu alinkwamula Gwe malafyale gwangu, “Loli ungatigi yilipo yimo imbombo ingulumba iyakuti basyalile kuno? Lilipyana lyako lyene lyo nikusuma kumyako.” 16Popapo lelo Esau alinkusumuka mwisiku lilyo alinkugomokela ku fyamba fya Seyiri. 17Umwene Yakobu yo alinkubuka ku kaya ka Sukoti#33.17 Sukoti: ko kuti, amatembe. ko alinkwakuyenga inyumba yake na matembe ga ng'ombe syake; yo nongwa iyi ubuyo bula bukubilikiligwa ni ngamu ya Sukoti.

18Yakobu alinkwakufika bununu itolo nkaya ka Shekemu, nkisu kya Kanani, bo afumile ku Padani-aramu. Alinkuyenga imisasa gyake pabupipi na kaya kala. 19#Yos 24.32; Yoh 4.5Ikisu kila ayengilepo imisasa gyake alyulile ku bana ba Hamori, ugwise gwa Shekemu, pa ntengo gwa ndalama sya siliva mia yumo (100). 20Pa buyo bulabula alinkuyenga ikigemo kya kwikemekesyapo, kangi alinkubupa ubuyo bula ingamu ya Eli-Eloche-Israeli#33.20 Eli-Eloche-Israeli: ko kuti Kyala yo Kyala gwa Israeli..

Currently Selected:

UBWANDILO 33: NNBII

Highlight

Copy