UBWANDILO 11
11
Ingasya ya ku Babeli
1Pakabalilo kalakala ikisu kyosa kyali ni njobelo yimoyene na masyu gamogene itolo. 2Bo abandu bikusamila kubusokelo ilisuba balinkugwaga untebela nkisu kya Shinara, balinkuyenga mumo. 3Balinkwitikana balinkuti, “Oko, tubumbe amapamba, tugakosye nu moto gapye fiyo.” Balinkuyengela amapamba mbuyo bwa mabwe, kangi na matope ga tara#11.3 Tara: tara bamo bikuti ilami. mbuyo bwa kuyengela amatope ga mfu. 4Balinkuti, “Oko, twiyengelege akaya akakulumba ukuti ingasya yake yikafikege kumwanya, kyo kiyege kyakukumbukilamo ingamu syitu, ko kaya aka kisakutupinyania palikimo ukuti tungisakubalanilaga kosakosa.”
5Umwene Untwa alinkwikilila pasi ukuti akakete akaya akakulumba kala ni ngasya yila, ifi abandu ba nkisu bayengile. 6Umwene alinkuti, “Keta, isi abandu aba bandile ukubomba apa bali ndumbula yimoyene ni njobelo yimoyene! Kali bunobuno sise siyeko simo isya kubatola ukubomba isi linga basinogwine? 7Oko, tusuluke pa kisu tukayiloganie injobelo yabo ko kuti bangapilikanaga.” 8Bunobuno ukufuma nkabalilo kalakala Untwa alinkubabalania kosakosa pakisu kya pasi, balinkuleka nukuyenga akaya kala. 9Yo nongwa iyi akaya kala balinkukabilikila ingamu ya Babeli; namanga po palapala apa Untwa ayilogenie injobelo ya kisu kyosa.
Aba nduyungu lwa Shemu
(1 Syambu 1.24-27)
10Aba bo bandu ba nduyungu lwa Shemu. Bo Shemu ali nifyinja mia yumo (100), alinkumpapa Aripakishadi panyuma pa fyinja fibili bo gukindile umwelesyo. 11Umwene Shemu alinkugona ifyinja aba mia bahano (500), bo ampapile Aripakishadi; ali nabana abangi abanyambala na bakikulu.
12Bo Aripakishadi agonile ifyinja amalongo matatu nifyinja fihano (35), alinkumpapa Shela; 13umwene Aripakshadi alinkugona ifyinja aba mia bana nifyinja fitatu (403), bo ampapile Shela, ali nabana abangi abanyambala na bakikulu.
14Bo Shela agonile ifyinja amalongo matatu (30), alinkumpapa Eberi; 15umwene Shela alinkugona ifyinja aba mia bana, nifyinja fitatu (403), bo ampapile Eberi; ali nabana abangi abanyambala na bakikulu.
16Bo Eberi agonile ifyinja amalongo matatu nifyinja fina (34), alinkumpapa Pelegi; 17umwene Eberi alinkugona ifyinja aba mia bana, nifyinja amalongo matatu (430), bo ampapile Pelegi; ali nabana abangi abanyambala na bakikulu.
18Bo Pelegi agonile ifyinja amalongo matatu alinkumpapa Rebu; 19umwene Pelegi alinkugona ifyinja aba mia babili nifyinja fihano na fina (209), bo ampapile Reu; ali nabana abangi abanyambala na bakikulu.
20Bo Reu agonile ifyinja amalongo matatu nifyinja fibili (32), alinkumpapa Serugi; 21umwene Reu alinkugona ifyinja aba mia babili nifyinja fihano na fibili (207), bo ampapile Serugi; ali nabana abangi abanyambala na bakikulu.
22Bo Serugi agonile ifyinja amalongo matatu (30), alinkumpapa Nahori; 23umwene Serugi alinkugona ifyinja aba mia babili (200), bo ampapile Nahori; ali nabana abangi abanyambala na bakikulu.
24Bo Nahori agonile ifyinja amalongo mabili nifyinja fihano na fina (29), alinkumpapa Tera; 25umwene Nahori alinkugona ifyinja mia yumo, nifyinja kalongo pamwanya fihano na fina (119), bo ampapile Tera; ali nabana abangi abanyambala na bakikulu.
26Bo Tera agonile ifyinja amalongo mahano na mabili (70), alinkumpapa Abramu, Nahori na Harani.
Aba nduyungu lwa Tera
27Aba bo ba nduyungu lwa Tera. Umwene Tera yo alinkumpapa Abramu, Nahori na Harani. Harani yo alinkumpapa Loti. 28Umwene Harani yo alinkufwila nkisu iki apapiligwemo bo nu gwise Tera akali nukufwa nkaya ka Uri nkisu kya ba Kaladeya. 29Abramu na Nahori balinkwega abakikulu; unkasi gwa Abramu ali yo Sarayi ingamu, umwene unkasi gwa Nahori ali yo Milika umwana gwa Harani ugwise gwa Milika na Isika. 30Sarayi akali nu mwana nayumo papo ali ngumba.
31Popapo Tera alinkumwega umwanake Abramu kangi nu mwisukulu gwake Loti, umwana gwa Harani, palikimo na Sarayi unkamwana gwake, unkasi gwa Abramu, alinkusumuka nabo bosa ukufuma nkaya ka Uri nkisu kya ba Kaladeya, alinkubuka ku kisu kya Kanani; bo bafikile nkaya kala ka Harani, balinkwenda nukuyenga mumo. 32Popapo Tera alinkufwila mulamula nkisu kya Harani bo ali nifyinja aba mia babili nifyinja fihano (205).
Currently Selected:
UBWANDILO 11: NNBII
Highlight
Share
Copy
Want to have your highlights saved across all your devices? Sign up or sign in
BAIBULO INONGWA INUNU © Bible Society of Malawi, 2017.
