IMBOMBO SYA BATUMIGWA 18

Nkaya ka Korinti

1Panyuma pali sisisi, po Pauli alinkusokamo nkaya ka Ateni, alinkubuka nkaya ka Korinti. 2Mo alinkumwaga unJuda yumo uyu ali yo Akwila ingamu, uyu apapiligwe nkisu kya Ponti; yo afikaga itolo ukufuma nkisu kya Itali pamopene nunkasi gwake Prisila, papo Kaisari Klaudia alagile ukuti abaYuda bosa basokemo nkaya ka Roma. 3Umwene Pauli alinkufika kumyabo, lelo papo bali ba mbombo yimoyene, alinkugona pamyabo, balinkubomba pamopene; namanga imbombo yabo bali basonahema. 4Bwila pisiku lya Sabati alinkukanikana nabo nnyumba syakwiputilamo, alinkugela ukubatobesya abaYuda nabaGriki.

5Lelo bo Sila na Timoti bisile ukufuma nkaya ka Makedonia, popapo Pauli alinkwikolania fiyo nukulumbilila; alinkubasisimikisya abaYuda ukuti Yesu yo yu Kristi. 6Lelo bo bikupinga nukunhelula, popapo alinkukung'unda imyenda gyake alinkubabula alinkuti, “Ililopa lyinu liyege pamitu gyinu, une ndi mwelu itolo, ukwanda lilino nikulabilaga ku bapanja.” 7Popapo alinkusokapo papo, alinkwakwingila nnyumba ya mundu yumo uyu ali yo Titi Yusti, uyu antilaga Kyala, uyu inyumba yake yapalamene ninyumba yakwiputilamo. 8Loli Krispi, unkulumba gwa nnyumba yakwiputilamo alinkumwitika uNtwa ninyumba yake yosa; bope nabandu ba nkaya ka Korinti ba bingi bo bapilike, balinkwitika nukosigwa. 9Popapo uNtwa alinkumbula Pauli nkisetuka pakilo alinkuti, “Ungatilaga, loli yobaga itolo ungabatamaga; 10namanga une ndi nanugwe, nayumo atisakulwa nanugwe nukukufulasya, buno ndi nabo abandu ba bingi nkaya muno.” 11Umwene alinkugona mumo ikyinja kimo nimyesi mihano nagumo, alinkumanyisya ilisyu lya Kyala mmyabo.

Galio na Pauli

12Lelo bo Galio ndindililakisu kya Akaya, popapo abaYuda balinkummotokela Pauli, balinkuntwala pabulongelo, 13balinkuti, “Umundu uyu ikubasonga abandu ikuti biputege kwa Kyala ukukindana nululagilo.” 14Umwene Pauli bo ikuti njobe, popapo Galio alinkubabula abaYuda alinkuti, “Mwe baYuda umwe, linga umundu uyu abombile imbibi simo ingulumba, pamo ubukomu bumo ububibi, po nabagile ukupilikisya inongwa yinu. 15Loli papo nagile lukani itolo ulwa masyu, ningamu, nindagilo syinu, po amusiketege yuyumwe; une ngigana ukuya gwa kusilonga sisisi.” 16Bunobuno alinkubakagapo pabulongelo. 17Popapo bosa balinkunkola Sosteni, unkulumba gwa nnyumba yakwiputilamo, balinkunkomela pa pabulongelo, umwene Galio alinkusita nukusibikilako umoyo sisisi.

Pauli ikugomokela nkisu kya Siria

18 # Kuba 6.18 Pauli alinkugonapo amasiku ga mingi, popapo alinkulagana nabaKristi. Alinkuloboka ukubuka nkisu kya Siria, palikimo na Prisila na Akwila. Nkaya ka Kenkrea mo alinkumwa inywili syake, namanga syali sya luyiganiko. 19Balinkuti ka nkaya ka Efesi mo alinkubaleka abanine; umwene loli alinkwingila nnyumba yakwiputilamo, alinkukanikana nabaYuda. 20Abene bo bansumile ukuti agonepo akabalilo akatali, alinkukana; 21loli bo ikulagana nabo alinkubabula alinkuti, “Ngwakwisaga kangi kumyinu linga Kyala itike.” Popapo alinkwipaka mungalaba ukufuma nkisu kya Efesi, alinkubuka. 22Lelo bo afikile nkaya ka Kaisaria, alinkufyuka, alinkwakukiponia ikipanga; popapo alinkusuluka ukubuka nkaya ka Antiokia. 23Lelo bo agonilepo, alinkusumuka ukubuka, alinkwakukisania nkisu kya Galatia nikya Frigia, alinkubakasya abafundigwa bosa.

Apolo ali nkaya ka Efesi naka Korinti

24Popapo alinkwisa nkaya ka Efesi unJuda yumo uyu ali yo Apolo, uyu apapiligwe nkaya ka Aliksandria, umundu umwengo fiyo ukuyoba inongwa, kangi uyu agamenye fiyo amasimbo. 25Yo amanyisigwe injila ya Ntwa; kangi papo mbepo ampyaga fiyo munda, alinkugolosya itolo ukuyoba nukumanyisya isya Yesu; napapo alumenye lwene lu losyo lwa Yohani. 26Popapo alinkwanda ukusiyoba itolo nubukifu nnyumba yakwiputilamo. Lelo bo Prisila na Akwila bampilike balinkumwega, balinkukindapo balinkundingania bununu injila ya Kyala. 27Lelo bo ikulonda ukuloboka ukubuka nkisu kya Akaya, popapo abitiki balinkuntula, balinkubasimbila kalata abaKristi ukuti bamwambililege. Lelo bo afikile, alinkubatula fiyo aba mwipyana lya Kyala balipelile ukuya bitiki. 28Namanga abatobesyaga fiyo abaYuda pabwelu itolo, alinkubanangisya ukufuma mmasimbo ukuti Yesu yo Kristi.

Currently Selected:

IMBOMBO SYA BATUMIGWA 18: NNBII

Highlight

Copy