IMBOMBO SYA BATUMIGWA 17
17
Nkaya ka Tesalonike
1Popapo Pauli na Sila balinkukisania nkaya ka Amfipoli na ka Apolonia, balinkwakufika nkaya ka Tesalonike, muno yalimo inyumba yakwiputilamo ya baYuda. 2Umwene Pauli alinkwakwingila muno balimo, bo mumo abombelaga bwila; alinkukanikana nabo isya mmasimbo baSabati batatu. 3Alinkubigulila nukubanangisya isya kuti, Kristi fikuti akubilwege nukusyuka mbafwe; nukuti, “Yesu yuyuyu, uyu nikubafumukisya umwe, yo yu Kristi.” 4Popapo bamo silinkubakola, balinkuya pamopene na Pauli na Sila, palikimo nabaGriki aba bantilaga Kyala ba bingi fiyo, nabakikulu abalongosi ba bingi. 5Loli abaYuda kalinkubaga akabini, balinkubega bamo abandu aba mwalwe itolo aba musokoni, balinkubabungania ukuya kilundilo, balinkukasambulania akaya, balinkuyisiganila inyumba ya Yasoni, balinkulonda ukubatwala ba Pauli na Sila nkyeni mbandu. 6Lelo bo bakabaga, popapo balinkunkwaba Yasoni nabaKristi bamo, balinkubatwala nkyeni mbakulumba ba kaya, balinkukolela balinkuti, “Abandu aba bakisambulenie ikisu kyosa, bisile kope na kuno, bo aba Yasoni abambilile; 7bosa bababa bikubomba isi sikindene nindagilo sya Kaisari, bikuti aliko umalafyale uyungi, uyu bikuti yo Yesu.” 8Popapo abandu bosa pamopene nabakulumba ba nkaya, bo bapilike sisisi, balinkunyomoka fiyo. 9Abene bo begile ifyakukolelela ukufuma kwa Yasoni nabanine, popapo balinkubalekesya.
Nkaya ka Berea
10Popapo nakalinga itolo abaKristi balinkubasumusya ba Pauli na Sila pakilo ukubuka nkaya ka Berea, abene bo bafikile balinkukisania ukubuka nnyumba yakwiputilamo ya baYuda. 11Abene abandu ba nkaya ka Berea bo bali namahala ukubakinda aba nkaya ka Tesalonike; namanga balyambililaga ilisyu nindumbula yosa, balinkugenesya amasimbo bwila itolo, ukuti basimanye linga bo sili naloli. 12Lelo ba bingi balinkwitika, nabakikulu abaGriki abimikigwa, nabanyambala ba bingi. 13Loli abaYuda ba nkaya ka Tesalonike, bo bapilike ukuti Pauli ikulumbilila ilisyu lya Kyala mope na nkaya ka Berea, popapo balinkubuka, mope na nkaya ka Berea balinkwakubonanga inyinogono nukufisambulania ifilundilo. 14Popapo abaKristi balinkunsumusya Pauli nakalinga ukubuka kunyanja; loli Sila na Timoti balinkusyala mumo. 15Abene aba bansindikilaga Pauli balinkwakumbika nkaya ka Ateni; bo Pauli ababulile ukuti Sila na Timoti bankongege nakalinga, popapo balinkugomoka.
Nkaya ka Ateni
16Umwene Pauli bo akali ikubagulila nkaya ka Ateni, umoyo gwake gulinkukalala fiyo bo agile akaya kiswile nififwani. 17Popapo alinkukanikana nabaYuda naba bantilaga Kyala nnyumba yakwiputilamo, naba aganilaga nabo bwila musokoni. 18Popapo balinkwaganila nagwe bope na baganamahala abaEpikuri nabaStoiki, bamo balinkuti, “Ikulonda ukuyoba isya fiki undweti uyu?” Abangi balinkuti, “Aliti mfumusya bakyala abahesya.” Namanga alumbililaga isya Yesu nisya kusyuka. 19Popapo balinkumwega, balinkubuka nagwe apa babunganaga pa Areopagi balinkuti, “Kali ubagile ukutulingania ulumanyisyo ulupya ulu kulufumusya? 20Buno isi utwele hesya itolo mumbulukutu syitu; fyobene tukulonda ukusimanya muno siyilile.” 21Namanga bosa aba nkaya ka Ateni nabahesya aba bayaga mumo, bakalondaga simo isingi isya kwiyangakisyamo, loli syene isya kuyoba nukupilikisya isya tundu utupya.
22Popapo Pauli alinkwima pakati pabuyo bwa kubunganapo ubwa Areopagi alinkuti, “Mwe bandu nkaya ka Ateni, muli syosa isi ngetile, nagile ukuti mukindilile ukubatila bakyala; 23papo bo ngusyungutila nukufiketa ifi mukwiputako, nkyagile kyope nikigemo iki sisimbigwepo isya kuti, ‘KWA KYALA UNSITA KUMANYIGWA.’ Lelo uyu mukwiputako kisita kummanya, yo uyu nikubafumukisya. 24#1 Banyaf 8.27; Yes 42.5; Imbo 7.48Kyala uyu apelile ikisu na ifi filimo mumo, namanga umwene papo yo Ntwa kumwanya na pasi, atikugonamo nnyumba isi siyengigwe namaboko; 25kangi atikubombeligwa namaboko ga bandu, ukuti afwanege agilwe fimo; buno umwene yo uyu ikubapa ubumi bosa, numuyi, na fyosa itolo. 26Ifyene ifikolo fyosa fya bandu yo uyu afipelile ukufuma mmundu yumoywene, ukuti fiyengege posa pamwanya pakisu, alinkubabikila ngani utubalilo twabo, nimipaka gya buyengo bwabo, 27ukuti bandondege Kyala, nukuti pamo bapusanikege nukumwaga, napapo umwene akaya pabutali pali yumoyumo mmyitu. 28Namanga,
‘Mu mmyake yuyo tuli bumi, tukwenda, kangi tuliko.’
Bo apa bope nabagulanyimbo binu bamo bayobile batile, ‘Buno nanuswe tuli banduyungu lwake.’
29“Lelo papo nanuswe tuli ba nduyungu lwa Kyala, tunginogonaga ukuti ubwa Kyala bufwene na golide pamo na siliva pamo nibwe, ifi fisongoligwe nubumaganyi pamo ninyinogono sya bandu. 30Utwene utubalilo twa busitakumanya, to Kyala atulekile itolo, loli lilino ikubalagila abandu bosa, mosamosa ukuti bapindukege, 31papo alyimikile ngani ilisiku ilya kwisakukilongelapo ikisu mbugolofu, mmundu uyu alimwimikile ngani. Sisisi syo asisisimikisye kubandu bosa apa ansyususyaga mbafwe!”
32Abene lelo bo bapilike isya kusyuka mbafwe, bamo balinkumobela, loli abangi balinkuti, “Syo twisakukupilikisyaga sisisi kangi pabungi.” 33Popapo Pauli alinkusokamo nkilundilo kyabo, alinkubuka. 34Loli abandu bamo balinkuya pamopene nagwe, balinkwitika; muli babo alimo yope na Dionisi ugwa pabuyo bwa Areopagi, nunkikulu uyu ali yo Damarisi ingamu, kangi nabangi aba bali nabo.
Currently Selected:
IMBOMBO SYA BATUMIGWA 17: NNBII
Highlight
Share
Copy
Want to have your highlights saved across all your devices? Sign up or sign in
BAIBULO INONGWA INUNU © Bible Society of Malawi, 2017.
