IMBOMBO SYA BATUMIGWA 11

Peteri ikukibula ikipanga kya mu Yerusalemu

1Popapo abatumigwa pamopene nabamyabo, aba bali nkisu kya Yudai, balinkupilika ukuti abapanja balyambilile ilisyu lya Kyala. 2Lelo bo Peteri afyukile nkaya ka Yerusalemu, popapo ababutigwako balinkukanikana nagwe 3balinkuti, “Gwalingile mbandu abasitakubutigwa, ulinkulya nabo.” 4Popapo Peteri alinkwanda ukubalingania muno syakonganile, alinkuti, 5“Une nali nkaya ka Yope niputaga, popapo ndinkukomwa ndinkukibona ikisetuka, ndinkwaga akandu kamo kikusuluka kafwene bo ikilundo ikinywamu bikukasololosya mfipeto fina ukufuma kumwanya, kalinkwisa apa nalipo. 6Popapo ndinkukenesya fiyo, ndinkufibona ifya malundi mana ifya nkisu, ifya ndisu, nifi fikwendela inyanda, ninjuni sya kumwanya. 7Kangi ndinkupilika ilisyu likumbula likuti, ‘Peteri, sumuka, bolaga ulyege!’ 8Loli ndinkwamula ndinkuti, ‘Nemma gwe Ntwa, buno ifi fili mwiko nifinyali fikingilamo siku nkanwa mmyangu.’ 9Popapo ilisyu lilinkuyoba ulwa bubili ukufuma kumwanya lilinkuti, ‘Ifi linga elwisye Kyala, komma ukuti fili mwiko.’ 10Sisisi silinkwandisania ukuboneka katatu, popapo fyosa filinkukwabigwa kangi ukubuka ku kumwanya. 11Popapo pakabalilo kako, balinkufika abandu batatu panyumba iyi twalimo, aba batumigwe kumyangu ukufuma nkaya ka Kaisaria. 12Popapo Mbepo alinkumbula une alinkuti, ‘Bukaga nabo kisitakwilamwa.’ Abamyitu bahano nayumo aba, balinkwenda pamopene nanine, tulinkwakwingila nnyumba ya mundu yula. 13Umwene alinkutupangila muno alimbonile ugwandumi imile nnyumba yake, ikumbula ikuti, ‘Tumaga indumi nkaya ka Yope, ukamwege Simoni uyu bikuti yo Peteri; 14yo isakukubulaga amasyu aga kukupoka ugwe naba nnyumba yako.’ 15Lelo bo nikwanda ukuyoba, popapo Mbepo Mwikemo alinkubasololokela, bo apa atusololokile nanuswe kubwandilo. 16#Imbo 1.5Popapo ndinkulikumbuka ilisyu ili aliyobile uNtwa ili atigi, ‘Umwene Yohani yo okesyaga namisi, umwe loli mwisakokesigwaga na Mbepo Mwikemo.’ 17Lelo linga Kyala abapele bope ikyabupi bo mumo atupelile nanuswe, twe tumwitike uNtwa Yesu Kristi, nali ne ani ne nabagile ukumpinga Kyala?” 18Lelo bo bapinke sisisi, popapo balinkuya mye itolo, balinkuntufya Kyala balinkuti, “Po ngimba Kyala abapele nabapanja ulupinduko, ulu lukutwala ubumi.”

Ikipanga kya nkaya ka Antiokia

19 # Imbo 8.1-4 Abene loli aba babalanile panongwa ya butolwe ubu bwabonekile pa Stefani, balinkwenda balinkwakufika nkisu kya Fenike nikya Saiprasi, na nkaya ka Antiokia, balinkusita nukumbula yumo ilisyu, loli bene ba baYuda. 20Lelo balimo bamo mmyabo aba bafumile nkisu kya Saiprasi nikya Kireni, aba bo bafikile nkaya ka Antiokia, balinkuyoba na baGriki, balinkubafumukisya Inongwa Inunu isya Ntwa Yesu. 21Gope namaka ga Ntwa galinkuya nabo; ba bingi balinkwitika, balinkugomokela kuNtwa. 22Inongwa syabo sisisi, silinkufika na mumbulukutu sya ba nkipanga kya kaya ka Yerusalemu, popapo balinkuntuma Barnaba ukubuka nkaya ka Antiokia. 23Bo afikile nukulibona ilipyana lya Kyala, alinkusekela, alinkubakasya bosa ukuti bamumililege uNtwa nindumbula isya lwifimbilisyo. 24Namanga Barnaba ali mundu nnunu, aliswile Mbepo Mwikemo nulwitiko; bunobuno abandu abingi balinkupindukila ku Ntwa. 25Popapo Barnaba alinkubuka nkaya ka Tarisi kukundonda Sauli; 26lelo bo amwagile, alinkuntwala nkaya ka Antiokia. Popapo balinkuya pamopene nikipanga ikyinja kyosa, balinkukimanyisya ikilundilo ikikulumba. Mo mu nkaya ka Antiokia muno abafundigwa balyandile ukubilikiligwa iya kuti, baKristi.

27Loli mmasiku gago, po abasololi bamo balinkufuma nkaya ka Yerusalemu, balinkusuluka ukubuka nkaya ka Antiokia. 28#Imbo 21.10Popapo umwinabo yumo, uyu ali yo Agabu ingamu, alinkwima, alinkuyobela ngani mwa Mbepo, ukuti yikuya pakugwa injala ingulumba pakisu kyosa; yo yi njala iyi yagwile pakabalilo ka Klaudia. 29Popapo abafundigwa balinkwitikana ukubatumila ubutuli abamyabo aba bali nkisu mu Yudai, balinkutuma umundu gwesa bo mumo bwayilile ubukabi bwake. 30Balinkubomba bo bunobuno, indalama sisisi balinkubatumila abakulu ba kipanga mmaboko ga Barnaba na Sauli.

Currently Selected:

IMBOMBO SYA BATUMIGWA 11: NNBII

Highlight

Copy