IMBOMBO SYA BATUMIGWA 10

Peteri na Korineli

1Alimo umundu yumo nkaya ka Kaisaria, uyu ingamu yake ali yo Korineli, sarjenti gwa kilundilo kya basikali iki batigi kya baItali. 2Ali mundu ungolofu, kangi antilaga Kyala ninyumba yake yosa, abapaga abandu ba bingi ifyabupe, alinkwiputa kwa Kyala bwila. 3Ilisiku limo pakabalilo ka buhano na buna (3 koloko), Korineli alinkumbona pabwelu ugwandumi gwa Kyala bo ikunsetukila, ikwisa kumyake ikumbula ikuti, “Gwe Korineli!” 4Popapo Korineli alinkundulalila nulutende alinkwamula alinkuti, “Kuti fiki gwe Ntwa?” Umwene ugwandumi alinkumbula alinkuti, “Inyiputo syako nifyabupe fyako fifyukile kumwanya, fipelile ukuya fya kukukumbukilamo Kyala. 5Lilino lelo tumaga abandu nkaya ka Yope, bakamwege umundu yumo, uyu ingamu yake yo Simoni, uyu bikuti yo Peteri, 6ikugona pamundu yumo Simoni umfugutangubo, uyu inyumba yake yili pambali panyanja.” 7Lelo bo abukile ugwandumi uyu ayobaga nagwe, popapo Korineli alinkubakolela ababombi bake babili nunsikali yumo uyu antilaga Kyala, ukufuma muli aba bambombelaga; 8lelo bo abalingenie syosa isi syabonike, popapo alinkubatuma nkaya ka Yope.

9Ulwa kilabo, bo abandu bala bali munjila bikusegelela nkaya, popapo Peteri alinkufyuka pamwanya panyumba pakwiputa, paliti pali po pakabalilo ka buhano na kamo.#10.9 Buhano na kamo: akabalilo ka nntandatu yo 12 koloko. 10Popapo injala yilinkwenda nukunduma, alinkulonda ukulya; lelo bo bali pakuntendekekesya ifyakulya, Peteri alinkwenda nukukibona ikisetuka. 11Popapo kumwanya kulinkwiguka, alinkukabona akandu kamo kikusuluka kafwene bo ikilundo ikinywamu iki bikukisolokesya mfipeto fina; 12mo fyalimo fyosa ifinyamana ifya malundi mana, nifi fikwendela inyanda, ninjuni sya kumwanya. 13Popapo alinkwaga ilisyu likumbula likuti, “Peteri, Sumukaga, ubolege ulyege.” 14Loli Peteri alinkwamula alinkuti, “Nemma gwe Ntwa, buno ngalyamo siku ifi fili mwiko nifinyali.” 15Popapo ilisyu lilinkwandisya ukuyoba lilinkuti, “Ifi linga elwisye Kyala, komma ukuti umundu atigi fili mwiko.” 16Sisisi silinkwandisania ukuboneka katatu, nakalinga itolo akandu kala kalinkufyuka kangi kumwanya. 17Lelo bo Peteri ikwalangana munda mmyake ukuti, kali ikisetuka iki akibwene kyanangisyaga sya fiki, nakalinga abandu aba batumigwe na Korineli, bo balalusisye inyumba ya Simoni, balikwisa kwima pakifigo, 18balinkukolela, balinkulalusya linga alimo Simoni uyu batigi yo Peteri. 19Umwene Peteri bo akali ikwinogona isya kisetuka, Mbepo Mwikemo alinkumbula alinkuti, “Abandu batatu bikukulonda. 20Sumukaga lelo, gwikege ubukege nabo kisitakwilamwa, buno mbatumile yuyune.” 21Popapo Peteri alinkwika, alinkubuka apa abandu bala balipo, alinkubabula alinkuti, “Yo une ne mukundonda; mubingilile sya fiki?” 22Abene balinkumbula balinkuti, “Sarjenti Korineli, umundu ungolofu untilaKyala, uyu bikunjoba ubununu aba nkikolo kyosa kya baYuda, abuligwe nugwandumi umwikemo ukutuma indumi kumyako, ukuti gwisege nnyumba yake, nukuti asipilikege isi uli nasyo.” 23Popapo Peteri alinkubingisya nnyumba, balinkugona. Ulwa kilabo Peteri alinkusumuka, alinkubuka nabo, palikimo nabanine bamo aba nkaya ka Yope, balinkubuka nagwe. 24Ulwa kilabo, balinkwakufika nkaya ka Kaisaria. Umwene Korineli abagulilaga, ababungenie abakamu bake nabamanyani bake. 25Lelo bo Peteri ikwingila, Korineli alinkumwambilila, alinkungwila mmalundi, alinkumbungulukila. 26Umwene loli Peteri alinkunsumusya alinkuti, “Sumuka buno nanine ndi mundu itolo.” 27Bo Peteri akali ikuyoba na Korineli alinkwingila nnyumba, alinkwaga abandu ba bingi babungene. 28Popapo alinkubabula alinkuti, “Syo nanumwe musimenye ukuti mwiko unJuda ukongana pamo ukubuka kuli yumo ugwa kikolo ikingi; loli une Kyala anangisye ukuti ndeke ukunjoba yumo umundu ukuya mwiko, nukuya nnyali. 29Fyobene bo mbilikiligwe, nisile kisita kukana. Lilino lelo po nikulalusya isi mumbilikilile.” 30Popapo Korineli alinkuyoba alinkuti, “Amasiku mana aga gakindile, pakabalilo bo kakaka aka buhano na buna (3 koloko), niputaga nnyumba yangu; ndinkwaga imile nkyeni mmyangu umundu uyu afwele imyenda igi gikung'alika, 31ikuyoba ikuti, ‘Korineli, ulwiputo lwako lupilikigwe, palikimo nifyabupe fyako fikumbukigwe nkyeni mwa Kyala. 32Lilino lelo tumaga indumi nkaya ka Yope, umbilikilege Simoni uyu bikuti yo Peteri, uyu ikugona nnyumba ya Simoni umfugutangubo, pambali panyanja.’ 33Nakalinga itolo ndinkukutumila indumi, ubombile kanunu apa gwisile. Lilino lelo twesa tulipo apa nkyeni mwa Kyala, ukuti tupilikisyege syosa isi uNtwa akulagile ukutubula uswe.”

Amasyu ga Peteri

34 # Kukumbu 10.17 Umwene Peteri alinkwanda ukuyoba alinkuti, “Mbwanaloli ngusyagania ukuti Kyala atikunsalila umundu mbundu bwake; 35loli mfikolo fyosa, uyu ikuntila nukubomba ingolofu, yo uyu umwene ikumwambilila. 36Umwe mulimenye ilisyu ili abatumilaga abanyaIsraeli ilya kufumusya Inongwa Inunu isya lutengano mwa Yesu Kristi, umwene yo yu Ntwa gwa bosa. 37Ilisyu ili libalanile mosa nkisu kya Yudai, lyalyandile nkisu kya Galilai, bo Yohani afumile pakulufumusya ulosyo, 38na muno Kyala ampakaga Yesu ugwa nkaya ka Nazareti Mbepo Mwikemo namaka, uyu asyungutilaga nkubomba inunu, nukubabumbulusya bosa aba abalambike umohesi; namanga Kyala ali nagwe. 39Nanuswe tuli baketi ba syosa isi abombaga nkisu kya baYuda, na nkaya ka Yerusalemu; uyu balinkungoga bo bikunkomela pakipiki. 40Yo uyu Kyala alinkunsyusya mbafwe pisiku lya butatu, alinkumpelela ukuti abonekege itolo bwelu, 41komma kubandu bosa, loli baketi aba Kyala abasalile ngani yo yuyuswe, twe twalyaga nukunwa nagwe bo afumile pakusyuka mbafwe. 42Alinkutulagila ukufumusya kubandu nukusisimikisya ukuti, Uyu yo uyu imikigwe na Kyala ukuya yo ndongi gwa bumi nabafwe. 43Yo uyu bosa abasololi bikunsisimikisya, ukuti bosa abandu aba bikumwitika, bikwambilila ubuswe bwa nongwa mungamu yake.”

Abapanja bikwambilila Mbepo Mwikemo

44Lelo bo Peteri akali ikuyoba, popapo Mbepo Mwikemo alinkubasololokela bosa aba bapilikaga ilisyu lilili. 45Abene abitiki ababutigwako, aba balisile na Peteri, balinkuswiga papo ikya bupi kya Mbepo Mwikemo kyababonekelaga nabapanja; 46namanga babapilikaga bo ikuyobela munjobelo isingi nukuntufya Kyala. Popapo Peteri alinkwamula alinkuti, 47“Kali ywani abagile ukukanisya amisi ukuti abandu aba bangosigwaga, aba bope bambilile Mbepo Mwikemo bo yuyuswe?” 48Popapo alinkulagila ukuti bosigwege mungamu ya Yesu Kristi. Abene lelo balinkunsuma ukuti agonepo nabo amasiku manandi.

Currently Selected:

IMBOMBO SYA BATUMIGWA 10: NNBII

Highlight

Copy