Matius 25
25
Tindung tintun kawan bawe lehoi co boakar pikir hintang co uong
25:1-13
1Nyan waktu Anak Kolunon dombut hopuli, Korojaan Sorga sompama kesah cotuh: Oko sopuluh bawe lehoi co tulak hia ika pesta kopongawin ina nyambut ponganten bakah. Iroh hopomasing mehen lampu. 2Limo lehoi cioh uong, hintang co limo eh boakar pikir. 3-4Limo lehoi co boakar pikir mehen lampu hintang ka bohati minyak ponah polonyakan. Tapi limo lehoi co uong baya mehen lampu. Iroh aroko mehen bohatin minyak. 5Awi ponganten bakah cioh tahi aroko dombut-dombut, kokon bawe lehoi taiyoh nundu holuh potontirui.
6Nyan bontung malom, nongkocok oko dulun co noriak, ‘Ponganten bakah dombut. Haasboh nyambutbat are!’ 7Kawan bawe lehoi taiyoh monyun paluh morisa lampu doh hopomasing. 8Kawan lehoi co uong mantun ma kawan lehoi co boakar pikir. Hien doh, ‘Mihi kaih isut ingkan minyak me, awi lampu kaih ocop jere picop.’ 9Tapi kawan lehoi co boakar pikir taiyoh museh, ‘Aroko boraoi! Daai aroko cukup indan kaih hintang ikan ka. Keleh ikan tulak moli ingkan dulun co borakang minyak di.’ 10Maka kawan lehoi co uong yoh tulak moli minyak. Tapi, lambak iroh tulak, ponganten bakah yoh dombut. Limo lehoi co ocop siap lian muntam hia ika kopongawin cioh homboh-homboh ma ponganten bakah. Paluh, tungkang eh tomantop.
11Opaiyoh, kawan lehoi co bokon yoh dombut. Hien doh, ‘Tuan, Tuan, mukap antop indan kaih!’ 12Tapi ponganten bakah yoh museh, ‘Aroh! Akuh aroko nyono ikan.’
13 Sanioh ka angar tojadi ma kawan dulun co aroko siap nyan waktu Anak Kolunon dombut hopuli. Tului iyoh, bojaga-jagaboh, awi ikan aroko monau ondoeh atawa jam eh.”
Tindung tintun kawan polayan co tomorocaya ma duit
25:14-30
(Luk. 19:12-27)
14Korojaan Sorga sompama kesah cotuh: Oko ico tuan co nyau tulak hia ika co ocu. Are naah kawan polayan eh paluh momporocaya orong duit ma iroh. 15Are momporocaya duit taiyoh sosuai ma komampuan doh ika bousaha indaieh. Are momporocaya limo ribu duit logam ingkan bulou hia ico polayan. Are momporocaya duo ribu duit logam bulou hia ico polayan co bokon. Are momporocaya soribu duit logam bulou hia polayan co tonga eh kole. Paluh are tulak.
16Polayan co norima limo ribu duit logam bulou, jion tulak bousaha. Are haba untung limo ribu duit logam bulou kole. 17Isanioh ka polayan co norima duo ribu duit logam bulou. Are haba untung duo ribu duit logam bulou kole. 18Tapi, polayan co norima soribu duit logam bulou yoh, are tulak ngali luwang nyan tana. Nyan intin, are nyuhuk duit tuan eh.
19Tahi lau opah iyoh, tuan kawan polayan taiyoh buli. Are nyau ngoneh laporan tintun kountungan co hopomasing haba doh indaieh. 20Polayan co norima limo ribu duit logam bulou dombut mehen limo ribu duit logam bulou kole. Hie-eh, ‘Tuan, Iko momporocaya limo ribu duit logam bulou ma akuh. Noto, akuh hapo duit cioh ika haba untung limo ribu duit logam bulou kole.’ 21Maka, tuan cioh mantun maeh, ‘Anar lau! Iko polayan co pio hintang sotia. Awi tului iko hegah tomorocaya ma urusan co kolik, maka akuh angar mihi kuasa indam mu ma urusan co bahai. Haasboh muntam. Jorih jerahbat umba akuh!’
22Opaiyoh, polayan co norima duo ribu duit logam bulou dombut. Hie-eh, ‘Tuan, Iko momporocaya duo ribu duit logam bulou ma akuh. Noto, akuh hapo duit cioh ika haba untung duo ribu duit logam bulou bat.’ 23Maka, tuan cioh mantun ka maeh, ‘Anar lau! Iko polayan co pio hintang sotia. Awi tului iko hegah tomorocaya ma urusan co kolik, maka akuh angar mihi kuasa indammu ma urusan co bahai. Haasboh muntam. Jorih jerahbat umba akuh!’
24Opaiyoh, polayan co norima soribu duit logam bulou dombut. Hie-eh, ‘Tuan, akuh monau iko iyohco dulun co purun. Iko haba untung ingkan alogawin dongam ibarat potani co monu hasir ingkan kabun co aroko are mimbun eh. 25Awi iyoh, akuh takut. Akuh tulak nyuhuk duit Tuan yoh nyan ponah tana. Noto, tuhboh duit Tuan.’ 26Maka tuan cioh mantun, ‘iko polayan co jahat hintang mongkan! Jadi iko ocop monau akuh haba untung ingkan alogawin dongang kuh ibarat potani co monu hasir ingkan kabun co aroko ku mimbun eh. 27Amun iko bopikir sanioh, soharus eh iko paling aroh mihi duit cioh ma dulun co potindah duit, ina hayak akuh buli, akuh haba duitkuh kawun bungaeh ka.’
28 Opaiyoh are mantun ma kawan dulun co tonjok nyan intin, ‘Monu duit conon ingkaieh. Mihi duit conon hia polayan co empun sopuluh ribu duit logam bulou. 29Awi, dulun co ocop empun aranaang, angar tomihi meleh orong kole dapot holowiholea. Tapi dulun co aroko empun aranaang, ome co oko nyan are angar tomonu ingkaieh. 30Nah, makitu, mende bat polayan co aroko boguna cioh hia luar nyan ika co poko pindong. Nyan intin kawan dulun angar nangih hintang ngoritet kosing.’#25:14-30 Ma kesah cotuh, Yesus majar bahawa ito sobulih botanggung jawab ma kokon co tomihi-Eh indan to, tomasuk duit, komampuan, koboraoi, momborita Tarung Pio, hintang co bokon-bokon.
Yesus angar hopuli ika mongadili kokon dulun
25:31-46
31“Anak Kolunon, angar dombut hopuli sobagai Laca ma kokon aranaang. Kokon molekat angar dombut hontong-hontong ma Are. Are angar tuot nyan korusi-Eh co poko tohormat. 32-33Paluh, kokon bangsa angar tongumpur nyan tohimo-Eh. Are angar ngomokon kawan dulun co bolum bujur nyan tohimo Mohotara nyan topit kontou hintang kawan dulun co bokon nyan topit komuloi. Samah isan dulun co tukang nunuh komolum ngomokon domba nyan topit kontoui ingkan kambing nyan topit komuloi.
34Paluh, Laca cioh angar mantun ma kawan dulun nyan hila kontou, ‘Yuboh, ikan co tomihi aang co pio hinut pian Tamang-Kuh! Muntamleh hia ponah Korojaan co tonyodia indam me ingkan dunia tomoncipta. 35Ikan lian muntam awi kotika Akuh dou, ihim me Akuh kanon. Kotika Akuh haus, ihim me Akuh korih. Kotika Akuh dulun tomuoi nyan negri me, tonorima me Akuh nyan ponah lopo. 36Kotika Akuh arelu oko lembon, tomihi me lembon indang-Kuh. Kotika Akuh hotoro, tonyorunuh me Akuh. Kotika Akuh nyan seper, tonyari me Akuh.’ 37Paluh kawan dulun co bujur taiyoh angar ngisok ma-Are, ‘Tuhan, hiaharai boh kaih piji kito Iko dou hintang mihi-Iko kanon? Hiaharai kaih kito Iko haus hintang mihi-Iko korih? 38Hiaharai kaih kito Iko dulun tomuoi nyan negri kaih, hintang norima Iko nyan ponah lopo? Hiaharai kaih kito Iko arelu oko holembon hintang mihi-Iko lembon? 39Hiaharai kaih kito Iko hotoro atawa ponah seper hintang kaih nyari Iko?’ 40Laca cioh angar museh iroh, ‘Ngoneh ehyoh! Kotika ikan nguan kawan aang isan iyoh indan ico beti ingkan konduang-Kuh co poko hina tuh, iyoh samah isan ikan nguan kawan aang cioh indang-Kuh.’
41Opaiyoh, Laca cioh angar mantun ma kawan dulun nyan hila komuloi, “Buhobat ingkan tohimo-Kuh, ikan co tonulut! Muntambat hia ponah apui co aroko piji picop iyohonon ika co ocop tonyiap indan Lacan Setan hintang kawan molekat-Eh 42Ikan tomende nyan idi, awi kotika Akuh dou, aroko me mihi Akuh kanon. Kotika Akuh haus, aroko me mihi Akuh korih. 43Kotika Akuh dulun tomuoi nyan negri me, aroko me norima Akuh nyan ponah lopo. Kotika Akuh arelu oko holembon, aroko me mihi Akuh lembon. Kotika Akuh hotoro atawa nyan seper, aroko me nyari Akuh.’ 44Paluh kawan dulun taiyoh angar ngisok ma-Eh, ‘Tuhan, hiaharai boh kaih piji kito Iko dou, atawa haus, atawa dulun tomuoi, atawa arelu oko holembon, atawa hotoro, atawa ponah seper, hintang kaih aroko dohop Iko?’ 45Laca cioh angar museh iroh, ‘Ngoneh ehyoh! Kotika ikan aroko nguan kawan aang isan iyoh ma ico ingkan konduang-Kuh co poko hina tuh, iyoh samah isan ikan aroko nguan kawan aang taiyoh indang-Kuh ka.’ 46Maka kawan dulun taiyoh angar tomohukum ma hukuman sokototahi-tahieh nyan noraka. Tapi kawan dulun co bolum bujur nyan tohimo Mohotara angar haba bolum kototahi-tahieh nyan sorga.”
Currently Selected:
Matius 25: TBSS
Highlight
Share
Copy
Want to have your highlights saved across all your devices? Sign up or sign in
