Matius 24

Lopo Mohotara angar tomohancur

24:1-2

(Mrk. 13:1-2; Luk. 21:5-6)

1Umbot iyoh, Yesus pusit ingkan polontaran Lopo Mohotara. Kawan murid-Eh dombut hia-Eh jere ina Yesus nolangon kobungah kawan bangunan Lopo Mohotara cioh. 2Yesus mantun ma iroh, “Porhati uras eh yoh! Ngoneh eh, nyan kotika daai, kokon co kitam me non angar tomohancur. Kokon kawan bangunan tanon angar tonohop.”

Kawan murid Yesus angar tonganiaya

24:3-14

(Mrk. 13:3-13; Luk. 21:7-19)

3Opaiyoh Yesus tulak hia lungkuh Jaitun. Kawan murid-Eh dombut hia-Eh ika hopander tontarop ma Are. Hien doh, “Dohop maraeh ma kaih, ngantoarai kokoieh yoh angar tojadi. Ome kawan ciri co potinjun waktu Iko dombut hopuli hia dunia tuh? Kawan ciri ome co potinjun ondo kiamat?”#24:3 Useh Yesus monjelas orong aang sindogus tapi mungkin aroko ponah waktu co borurutan: kawan ciri ahir dunia tuh (ayat 4-8), kawan murid Yesus angar tonganiaya (ayat 9-13), kawan nabi palsu (ayat 15-28), korombut Yesus hopuli hia dunia tuh (ayat 29-31).

4Yesus museh iroh, “Botawatboh! Aroh dapot ikan ngumba dulun co sala. 5Awi orong dulun angar dombut co mongaku solah-olah arop eh iyohco Laca Ponyolamat. Iroh angar mantun, ‘Akuhboh Laca Co Tomonjanji Mohotara!’ Iroh angar nyasat orong dulun. 6Ikan angar ngoneh kolotup kohojat atawa kawan borita tintun kohojat. Tapi aroh takut. Kokoieh yoh sobulih tojadi. Tapi iyoh aroko borati dunia angar borahir ponah waktu co dokin. 7Bangsa angar hokohojat ngolawan bangsa co bokon. Nogara ngolawan nogara co bokon. Nyan omo-omoh angar oko douonuh hintang gempa bumi. 8Tapi uras aang cioh baya kotuhin ingkan kokon boncana co angar tojadi. Ibarat eh bawe co botohi nongkomo poroh hiton nyan waktu nyau nganak.

9Opaiyoh pira-pira dulun nyan halo ikan angar tonawan hintang topokuntam ponah seper kawun co bokon eh angar tongompatoi. Ikan angar tongodolee kokon bangsa, awi ikan iyohco murid-Kuh. 10Orong dulun angar aroko porocaya bat ma Tuhan. Iroh angar hokodolee hintang hokohianat. 11Orong nabi palsu angar dombut hintang nyasat orong dulun. 12Awi kojahat sasar botambah, maka orong dulun aroko angar hopasi bat. 13Tapi kawan dulun co tenden botahan, tenden tuhit ma-Akuh dapot ahir, iroh angar tonyolamat. 14Tarung Pio tintun Korojaan Mohotara angar tomomborita nyan ngolauh dunia ina kokon dulun ngoneh eh. Umbot iyoh, punai ahir dunia tuh.”

Masa dulun korinah mondorita

24:15-28

(Mrk. 13:14-23; Luk. 21:20-24)

15 “Hiah jaman sinan nabi Daniel mantun tintun ‘ico dulun jahat umpi kolumat’. Dulun cioh angar tonjok nyan ika co husus indan Mohotara.”#24:15 Ingkan buku Daniel 9:27; 11:31; 12:11. Mungkin otuh aang co tonisi nyan 2Tes. 2:1-12. (Cotatan indan dulun co dahat mombaca otuh: Porhatiboh ina ikan momaham artieh.) Yesus ngoholuh kopomander, “Amun ikan kito boncana cioh, 16maka kawan dulun nyan derah Yudea sobulih ngomuho arop hia kawan puruk. 17Dulun co dahat oko nyan sapo lopo, aroh toka ina monu harta-banda co oko nyan ponah lopoeh 18hintang dulun co dahat nyan umo arohboh are hopuli ika monu lembon eh. 19Sasi lau kawan bawe co dahat botohi atawa co anak eh arinai nulang nyan waktu cioh. 20Bodoaboh ina me aroko sobulih ngomuho arop nyan sorang sorongin atawa nyan Ondo Sabat. 21Awi hiah nyan kawan ondo taiyoh angar tojadi siksaan co poko bahat. Pondoritaan isan iyoh arinai piji tojadi ingkan kosulak dunia dapot makitu hintang aroko piji angar tojadi kole.#24:21 Noto buku Daniel 12:1 hintang Wahyu 7:14. 22Sompamaeh, waktu cioh aroko toumpi meleh honyulu, maka arelu oko ico dulun mahi co botahan bolum. Tapi demi kawan dulun co tomili Mohotara, waktu cioh toumpi meleh honyulu.

23Nyan waktu iyoh, amun oko dulun co mantun ma ikan, ‘Noto, Laca Co Tomonjanji Mohotara oko nyan intoi.’ Atawa ‘Are oko nyan idi,’ mositi aroko tuu. Maka aroh ikan porocaya. 24Awi angar oko kawan dulun dombut co mongaku arop eh iyohco Laca Co Tomonjanji Mohotara. Tapi sobujur eh bokon, hintang dulun co mongaku arop eh nabi, mahi bokon. Kawan Laca palsu hintang kawan nabi palsu taiyoh angar umpi bobagai macam aang co mosotahir ika nyasat kokon dulun, amun bodai ma cara cioh ka ina iroh nyasat kawan dulun co tomili Mohotara. 25Ngoneh eh! Akuh ocop maraeh ma ikan tintun kawan aang tatuh sorinai tojadi.

26Jadi, amun dulun mantun ma ikan, ‘Noto, Laca Co Tomonjanji Mohotara oko nyan padang gurun,’ aroh ikan tulak hiaeh. Atawa amun iroh mantun, ‘Noto, Are bocuhuk ponah bukung nyan intoi,’ aroh porocaya. 27Awi hiah kotika Anak Kolunon hopuli hia dunia tuh, uras dulun jelas lau hegah kito korombut-Eh yoh. Awi isan jilap co mancar ingkan tosok ondo hintang bocahaya dapot icop ondo, saniohboh korombut Anak Kolunon daai. 28Kotika iyoh tojadi, mositi kokon dulun angar monau.”

Kawan ciri co potinjun Yesus angar hopuli hia dunia tuh

24:29-36

(Mrk. 13:24-32; Luk. 21:25-33)

29“Aroko tahi opah masa pondoritaan cioh, matanondo angar jarin pindong. Bulan aroko angar bocohaya bat. Kawan potondu angar nokah ingkan langit. Hintang kawan ponguasa nyan langit angar hokunyot. 30Nyan waktu cioh, kawan dulun angar kito ciri Anak Kolunon nyan langit. Kokon bangsa angar jorung lau kotika iroh kito Anak Kolunon dombut nyan tungkui hawun, ma kuasa hintang kopandau co bocahaya.#24:30 Daniel 7:13-14. Yesus angar hopuli ma kuasai ika pokalah Lacan Setan hintang kokon kawan roh jahat. Dulun co aroko porocaya angar jorung awi iroh angar jarin tohoku bahawa Yesus mula bujur-bujur oko kuasai ika mohukum iroh ka. 31Are angar nyoruhan kawan molekat-Eh ma uhing torompet co korinah muhat. Kawan molekat taiyoh angar ngumpur kawan dulun co tomili Mohotara ingkan kokon ika nyan dunia.

32Bolajarboh ingkan cuntu tintun puun ara. Amun pating daai eh jarin bunang hintang molai ngolunjung, ikan monau bahawa sorang panai ocop jonyo. 33Sanioh ka, amun ikan kito kawan aang taiyoh tojadi, maka ikan angar monau bahawa waktueh indan korombut Anak Kolunon hopuli ocop jonyo. 34Porhatiboh! Aroko kokon kawan dulun ingkan jaman cotuh angar matoi sorinai kokoieh tuh tojadi. 35Porocayaboh antun-Kuh, awi oluco langit hintang bumi angar lanyap, antun-Kuh mositi sokotahi-tahieh.

36Tapi arelu oko co monau ondo atawa jam eh Anak Kolunon dombut hopuli. Kawan molekat nyan sorga aroko monau hintang Anak Mohotara, mahi aroko monau ka. Baya Tama leh co monaueh.”

Kawan murid Yesus sobulih horoholuh siap ma korombut-Eh hopuli

24:37-44

(Luk. 17:26-30,34-36)

37“Santuhboh koadaan dunia hiah waktu korombut Anak Kolunon. Koadaan eh angar samah isan hiah jaman Nuh.#24:37 Noto Koj. 6-7. 38Sorinai banjir bahai dombut, kawan dulun kuman, ngorih, nganak ngoruh isan koliin. Iroh nguan isan iyoh dapot nyan ondoeh Nuh muntam hia ponah bonamaeh co bahai yoh. 39Iroh aroko piji bopikir bahawa oko ome-ome co angar tojadi. Iroh aroko sadar dapot banjir bahai cioh dombut holuh ngolumat iroh. Sanioh ka koadaan dunia hiah waktu Anak Kolunon dombut hopuli hia dunia tuh. 40Nyan kotika cioh, duo dulun dahat bogawi nyan umo: ico beti angar tomehen, hintang ico beti kole angar tonaat. 41Amun oko duo bawe rahat ngoleet gandum sama-samah, icoeh angar tongatang, tapi icoeh angar tonaat. 42Jadi, botawatboh, awi ikan aroko monau nganto omoh Tuhanme angar dombut.

43Porhati otuh: dulun ponako dombut nyan waktu homalom co aroko toduga. Amun empun lopo ocop monau ngantoarai dulun nako yoh dombut, mositi are bojagaeh ina dulun ponako aroko muntam. 44Samah isan dulun ponako cioh, Anak Kolunon angar dombut nyan waktu co aroko tomonduga me. Jadi, ikan sobulih horoholuh siap ma korombut-Eh.”

Tindung tintun polayan co sotia hintang polayan co aroko sotia

24:45-51

(Luk. 12:41-48)

45“Dulun co sotia botindak isan ome? Are samah isan polayan co sotia hintang boakar pikir. Tuan eh mangkat are jarin kopala kawan polayan co bokon. Tuan eh mihi tanggung-jawab indaieh ika mihi bagin kanon ma kawan polayan bokon nyan waktueh. 46Amun are nguan tugas eh yoh ma kosotia, nyan kotika tuan eh hopuli, polayan cioh angar Sanang. 47Mositi, tuan eh angar mangkat are kole dapot are jarin pongurus kokon co tioh tuan eh.

48Tapi, sompamaeh polayan cioh niin jahat, are mantun ponah atoieh: 49‘Tuankuh incah arinai oso dombut.’ Paluh are molai molantu kawan polayan co bokon. Are mahi kuman-ngorih halo tukang pongorih. 50Nah, tuan eh angar hopuli nyan ondo co aroko eh monduga, nyan kotika co aroko tomonaueh. 51Mositi tuan eh yoh angar korinah lau mohukum polayan cioh, holuh nyakah eh hia ika hukuman indan kokon dulun co pura-pura pio tapi atoieh jahat. Nyan intin iroh angar nangih hintang ngoritet kosing.

Currently Selected:

Matius 24: TBSS

Highlight

Copy