Lukas 16

Yesus majar kawan murid-Eh ika hapo koponatou doh ma cara co ngonyorih Mohotara

16:1-13

1Yesus majar kawan murid-Eh ma kesah cotuh, “Oko ico beti dulun co tomorocaya mongurus koponatou ico beti dulun tatou. Ponjaga cioh tonondah dulun bokon. Iroh mantun ma dulun tatou cioh bahawa ponjagaeh yoh moruntus koponatoueh. 2Maka dulun tatou cioh naah ponjagaeh yoh. Hieeh, ‘Akuh ocop ngoneh tarung co ceet tintun gawim mu! Iko angar tongumbot hintang iko sobulih mihi laporan torahir tintun koponatou kuh co tomongurus mu.’ 3Paluh, ponjaga cioh pusit bopikir ponah songai, ‘Aduh! Akuh angar tongumbot. Ome co sobulih piang kuh makitu? Jarin tukang nyangkur, aroko baraoi awi akuh aroko bangkah. Jarin pongemis, akuh mohaan.

4Akuh oko akar! Akuh angar nompi aang cotuh, ina kawan dulun angar norima akuh nyan ponah lopo doh hintang dohop akuh kotika akuh tongumbot dai.’

5Maka are naah kokon dulun co bohutang ma tuan eh. Are ngisok ma ico beti, ‘Pira kuhat utangmu?’

6Dulun cioh museh, ‘Solatuh buong minyak jaitun.’ Ponjaga cioh mantun, ‘Tuh surat utang mu. Nyua tuot, morubah eh. Nyurat eh jarin liman pulu buong leh.’

7Opah iyoh are ngisok ma dulun co bokon, ‘Pira kuhat utangmu?’ Dulun cioh museh eh, ‘Solatuh pikur gandum.’ Ponjaga cioh mantun, ‘Tuh surat utangmu. Nyurat eh jarin jalun pulu pikur leh.’

8Opah iyoh tuan cioh nara ponjaga co aroko jujur yoh awi are orong akar ika are haba cara bolum opah tongumbot.”

Paluh Yesus monyimpul eh. Hie-Eh, “Kawan dulun co jahat orong akar ma samah arop doh. Iroh meleh orong akar hangki dulun co porocaya. 9Mompohatieh bat aang co tuh: Sobulih eh ikan hapo koponatou nyan dunia tuh ika dohop dongam, ina kotika koponatou taiyoh aroko boguna bat, ikan tonorima ponah sorga.#16:1-9 Oluco ponjaga cioh jahat, are bopikir tintun kobolum eh pongaan ondo. Are mongurus koponatou tuan eh ika boraoi jarin kobolum eh daai. Kawan dulun co umba Yesus aroko jahat. Ito dulun pio. Maka ito sobulih eh labih pintar hangki dulun jahat. Ito sobulih eh hapo koponatou nyan dunia tuh ika ngonjorih Mohotara, dohop dulun mala, kawan balu, kawan dajan nulo, hintang co bokon-bokon eh.

10Amun dulun lian tomorocaya ma urusan co ngorinah kongolik eh, dulun cioh boraoi lian tomorocaya ma urusan co korinah kahai. Tapi amun dulun aroko lian tomorocaya ma urusan co ngorinah kongolik eh, dulun cioh mahi aroko lian tomorocaya ma urusan co ngorinah kahai.

11Maka, amun ikan arinai lian tomorocaya ma koponatou nyan dunia tuh, mositi ikan aroko angar tomorocaya ma koponatou co sokotahi-tahieh nyan sorga. 12Amun ikan aroko lian tomorocaya ma harta banda dulun bokon, mositi ikan aroko angar tomihi harta banda co jarin ikan empui.#16:12 Kokon aang co tito, tomasuk waktu, komampuan, kosempatan, koluarga hintang koponatou sobujur eh tioh Mohotara, bokon tito (1 Tawarik 29:14). Kokoieh iyohco ihin ingkai-Eh co tomorocaya-Eh ma ito indan somontara leh. Ito sobulih sotia mongguna kokoieh ma cara co ngonyorih Mohotara aroko indan arop to tarop.

13Aroko tonai ico polayan molayani indan duo tuan. Amun are nompi aang cioh, are baya angar mongasihi ico tuan eh leh tapi ngodolee co bokon eh yoh. Are baya angar sotia ma ico tuan, tapi aroko sotia ma co bokon eh. Isanioh ka ma ikan. Aroko tonai ikan jarin hamba Mohotara nyan waktu co samah ikan jarin hamba koponatou.”

Yesus nopoh kawan dulun Parisi

16:14-18

14Nah, oko pira-pira dulun Parisi ngoneh kokon aang co tomantun Yesus yoh. Iroh korinah herak duit. Maka, iroh mohulut Yesus. 15Tapi Yesus mantun ma iroh, “Ikan bousaha ika nyan tampa dongam ikan tokitan pio hintang hopampaluh bujur. Tapi Mohotara monau ponah songam me co sobujur eh jahat. Orong muder aang co tongoherak kolunon, tapi tongodelee pian Mohotara.

16Sinan dulun bolajar kojere Mohotara ingkan kawan buku Hukum Torat hintang buku kawan nabi. Tapi, ingkan jaman Yohanes Pombaptis, Tarung Pio tintun Korojaan Mohotara tomomborita, iyohonon Laca Co Tomonjanji Mohotara Ocop Dombut. Sika dulun bohimat bousaha ika jarin anggota koluarga Korojaan-Eh. 17Tapi kawan hukum Mohotara tenden borlaku. Oluco langit hintang bumi angar lanyap, tapi aroko ico mahi ingkan hukum Mohotara co poko ngoling angar balang.

18Amun oko bakah co misah oruh eh paluh kawin ma bawe bokon, bakah cioh samah ma hokoruh ma bawe co bokon oruh eh. Isanioh ka amun oko bakah co kawin ma bawe co tomisah banaieh. Bakah cioh samah ma hokoruh ma bawe co bokon oruh eh ka.”

Kesah tintun ico dulun tatou hintang ico dulun mala co araieh Lasarus

16:19-31

19Paluh, Yesus bokesah, “Oko ico dulun tatou. Kobolum eh mewah sika ondo. Lembon pokajan co hapaieh darang-darang. Sanang-sanang bopesta. 20Nyan tungkang pagar lopoeh, oko dulun mala co kaling nyan intin. Araieh Lasarus. Orong lau kawan bawak nyan ngolauh beti. 21Dapot kawan asu co hesoh heloh nyan intin dombut ngonyelap kawan bawak eh. Lasarus jere lau kuman ingkan kawan tisan kanon co tomende opah dulun tatou cioh umbot kuman.

22Opah iyoh Lasarus matoi. Kawan molekat mehen are hia sorga nyan topit sila uot Abraham, ika co tohormat. Dulun tatou cioh niin mahi matoi ka paluh tongolowong. 23Dulun tatou cioh muntam hia noraka. Are korinah kosorantaeh nyan idi. Are nolangon hia hunyung, noto Abraham nyan uwoidi. Lasarus mahi kitai ka nyan topit sila ika uot Abraham. 24Are naah muhat, ‘Oo pa Abraham! Korinah kosoranta kuh nyan ponah apui cotuh. Masi akuh boh Pa! Nyuhu Lasarus nucom bua siluieh hia ponah danum holuh dombut ika nyorongin cola kuh ma danum cioh.’

25Tapi Abraham mantun, ‘Anak kuh, mingkat waktu nyan dunia, iko norima kobolum co mewah tapi Lasarus norima kobolum co mala. Makitu, are haba co pio hinut tapi iko haba kosoranta. 26Nohani Mohotara ocop monatap ico jurang nyan oang to. Jurang co korinah kahai dapot aroko bodai tomitah. Dulun ingkan intoi aroko boraoi hantin. Dulun co nyan intin mahi aroko boraoi ka hantoi.’

27Dulun tatou cioh mantun, ‘Amun isanioh, akuh nyawot asi ma iko, dohop nyuhu Lasarus hia lopo tamangkuh. 28Akuh oko limo beti konduang co incah bolum nyan dunia. Nyuhu Lasarus momporingat iroh ika doh naat dosa hintang hopompaluh ngonyorih songan Mohotara ika daai hayak matoi, iroh aroko muntam ika kosoranta cotuh bat.’

29Tapi Abraham mantun, ‘Iroh boraoi ngoneh sangan kawan buku co tonulih Musa hintang kawan nabi. Iroh sobulih momporhati hintang nontumun kokon co tonulih nyan kawan buku taiyoh.’

30Dulun tatou cioh mantun, ‘Aroko cukup aang conon, Pa Abraham. Tapi amun ico dulun ingkan intin bolum hopuli ingkan pompatoi, paluh tulak hia iroh mositi iroh angar naat dosa hintang hopompaluh ngonyorih songan Mohotara.’

31Tapi hien Abraham, ‘Amun kawan buku Musa hintang kawan nabi aroko cukup nompi iroh naat dosa hintang hopompaluh ngonyorih songan Mohotara, mositi iroh mahi aroko angar porocaya oluco ico beti dulun bolum hopuli ingkan pompatoi.’ ”#16:31 Dulun tatou cioh molambang kawan pomimpin Yahudi co derek nyawot ciri co mombukti Yesus yoh asal-Eh ingkan Mohotara. Tapi tului iroh aroko kolu porocaya Surat Borasih tintun Laca Co Tomonjanji Mohotara, iroh aroko angar porocaya tanda, oluco ico beti dulun bolum hopuli ingkan pompatoi. Malah nyua opah otuh, Yesus tuu-tuu umpi dulun co arai Lasarus bolum hopuli ingkan pompatoi. Iroh tenden aroko porocaya. Seen iroh ngewak ika ngompatoi Yesus. (Yohanes 11:38-53; 12:9-11).

Currently Selected:

Lukas 16: TBSS

Highlight

Copy