Lukas 15
15
Yesus hapo pira-pira kesah ika gamaran asin Mohotara ma kawan dulun co naat dosa hintang hopompaluh ngonyorih songan Mohotara#15:1-32 Kawan dulun Parisi hintang kawan guru agama Yahudi ngolomumut tului Yesus mongasihi kawan dulun co tomangap doh ‘bodosa’. Tapi Yesus majar iroh sobulih eh jorih jerah amun kawan dulun isanioh naat dosa hintang hopompaluh ngonjorih songan Mohotara.
15:1-32
1Oko kawan tukang nakih pajak hintang kawan dulun bokon co tomangap aroko pio pian mosorakat. Biasaeh, iroh dombut ngoneh Yesus majar. 2Nyan intin oko ka kawan pomimpin agama ingkan kolompok Parisi hintang kawan guru agama Yahudi. Iroh ngolomumut, hien doh, “Ceh, dulun cotuh hojolahan ma kawan dulun co aroko pio. Malah Are kuman homboh iroh!”
3Maka, Yesus majar iroh ma kawan kesah cotuh.
Kesah Yesus tintun domba co niho
(Mat. 18:12-14)
4“Sompamaeh oko ico beti dulun co empun solatuh kontuluh domba. Amun ico kontuluh domba cioh niho tului dajat, mositi are angar naat co suoi pulu suoi kontuluh domba co bokon yoh nyan pulou uru, ika tulak nganyap co dajat yoh dapot popak. 5Kotika are popak domba cioh, korinah kojorih eh, paluh mangkat ngorimpoieh nyan pukot eh hintang mehen eh buli. 6Are naah kokon jolahai hintang totanggaeh, paluh mantun, ‘Haas boh ito jorih jerah. Domba kuh co niho yoh ocop kuh popak hopuli!’
7Nah, momporhati aang cotuh: samah ma onon, kokon co nyan sorga jorih jerah amun oko ico beti dulun naat dosa hintang hopompaluh ngonyorih songan Mohotara, hangki suoi pulu suoi beti dulun co aroko porulu naat dosa.”
Kesah Yesus tintun duit co niho
8Yesus ngoholuh kopomajar-Eh hapo kesah cotuh. “Sompamaeh oko bawe co empun sopuluh kodilat duit perak. Amun are niho ico kodilat, mositi are angar montin lampu paluh murah ngolauh ponah lopoeh ika nganyap duit cioh dapot haba. 9Kotika are popak eh, are korinah jorih, naah kokon jolahai hintang totanggaeh paluh mantun, ‘Haas boh ito jorih jerah. Duit kuh co niho yoh ocop popak kuh hopuli!’
10Nah, momporhati aang cotuh: samah ma onon, kawan molekat nyan sorga jorih jerah amun ico dulun naat dosa hintang hopompaluh ngonyorih songan Mohotara.”
Kesah Yesus tintun anak co niho
11Yesus ngoholuh kopomajar-Eh ma kesah cotuh. “Ico beti bakah oko duo anak eh uras bakah. 12Co pokotoranan mantun ma tamaieh, ‘Pa, mihi bat indangkuh makitu leh bagin takuh ingkan koponatou to.’ Maka tamaieh magi koponatoueh yoh indan doruo.
13Pira-pira ondo opahiyoh anak toranan eh yoh borakang kokon bagian warisan eh yoh holuh tulak hia negri co ocu. Nyan uwoidi are moruntus duit cioh ika bolum bopoya-poya. 14Hayak duit eh ocop punah kokoi, nyan negri cioh dahat tonampuh kodou onuh co ngecat eh lau. Jadi are molai soranta. 15Paluh are bogawi nyan ico dulun ponduduk nyan intin. Dulun cioh nyuhu are hia umo monjaga kawan buloeh. 16Are korinah kodou dapot nyau kuman kawan kanon bulo taiyoh. Oluco are korinah kodou, aroko ico beti dulun mahi co kolu mihi kanon indai.
17Kojekaieh are tohoku ma gawi co sala yoh. Are mantun, ‘Kawan dulun co bogawi indan tamangkuh holowi holea ongkun ponguman doh, tapi akuh nyan intoi jonyo matoi dou! 18Akuh angar buli hintang tulak hia tamangkuh, kawun mantun ma are: Pa, akuh ocop bodosa tohimo Mohotara hintang tohimo apa. 19Aroko patut bat akuh tonisi anak apa. Angap leh akuh tuh dulun co umba bogawi indan apa.’
20Maka tulak bat are buli hia tamaieh. Kotika are incah ocu ingkan lopo, tamaieh ocop kito are. Ma korinah komasi tamaieh tokoru nyopopak are holuh ngohapon hintang marok are.
21‘Apa,’ hien anak eh yoh, ‘akuh ocop bodosa tohimo Mohotara hintang tohimo apa. Aroko patut bat akuh tonisi anak mu, pa.’
22Tapi tamaieh naah kawan polayan eh hintang mantun, ‘Nyua! Monu bat lembon co poko pio, hintang paluh posungkop lembon cioh bat ma are pohapoeh ma tincim nyan bua siluieh, hintang sopatu nyan paaieh. 23Opah iyoh monu bat anak sapi co monyak hintang nyarak eh. Ito angar kuman bolum hintang samah-samah jorih jerah. 24Tului isaieh anak kuh tuh ocop matoi, tapi makitu bolum kole; are ocop niho, tapi makitu popak hopuli.’ Paluh molai bat iroh pesta.
25Pondehan iyoh, anak eh co poko ngongko incah nyan umo. Kotika are buli, dapot dokin lopo, are ngoneh uhing musik hintang kawan karang konyoi. 26Are naah ico beti ingkan kawan polayan eh, holuh ngisok, ‘Ome gawin dulun nyan lopo tuh?’
27Polayan cioh museh, ‘Tarim ocop buli! Tamam ocop nyuhu nyarak anak sapi co monyak, awi are ocop haba hopuli anak eh ponah koadaan solamat!’
28Anak co poko ngongko yoh sangit lau dapot are aroko kolu muntam hia ponah lopo. Paluh tamaieh pusit hintang ngonok are ika muntam. 29Tapi are mantun, ‘Botoun-toun kotahi akuh bogawi bahat moho indan apa. Akuh hopompaluh ngontumun porentah apa. Tapi apa arinai piji mihi ico kontuluh kambing mahi ika kuh bopesta ma kawan jolahangkuh! 30Anak apa non ocop ngompunah koponatou apa ma kawan bawen polacur, tapi hayak are buli, apa nyarak anak sapi co monyak indaieh!’
31‘Anak kuh,’ useh tamaieh, ‘iko hopompaluh nyan intoi umba akuh. Kokon co takuh iyoh co tiko ka. 32Tapi ito sobulih bopesta hintang jorih jerah, awi tarim mu non isaieh ocop matoi, tapi makitu bolum hopuli; are ocop niho, tapi makitu ocop popak hopuli.’ ”#15:11-32 Nyan ponah kesah cotuh tama molambang Mohotara, anak toranan molambang kawan dulun co tomangap aroko pio (ayat 10), anak poko ngongko molambang dulun Parisi hintang kawan guru agama Yahudi, hintang pesta molambang Korojaan Mohotara (isan nyan 13:29; 14:16-24) Yesus empun sikap Mohotara co mongasihi kawan dulun bodosa co tongondolee pian dulun Parisi hintang kawan guru agama Yahudi (ayat 2).
Currently Selected:
Lukas 15: TBSS
Highlight
Share
Copy
Want to have your highlights saved across all your devices? Sign up or sign in
