Yohanes 19
19
1Opah iyoh Pilatus muntam paluh nyuhu dulun moncambuk Yesus. 2Kawan tontara taiyoh nyalin somacam mahkota ingkan kawan pating hoduhi, paluh mandak nyan kuhung-Eh. Iroh posungkop jubah ungu nyan Are. 3Boulang kali iroh ngoroni Are, ngelat Are. Hien doh, “Ngolandah boh, Laca dulun Yahudi!” Paluh, iroh ngapek tampa-Eh.
4Pilatus pusit kole ingkan istanaeh holuh mantun ma dulun orong nyan intin. Hieeh, “Notoeh! Akuh mehen Dulun cotuh pusit hia ikan. Akuh nyau ika me monau bahawa akuh aroko haba ico mahi kosolaai-Eh.” 5Paluh, Yesus tomehen pusit incah hapo mahkota duhi hintang jubah ungu cioh. Hien Pilatus ma iroh, “Notoboh Dulun conon!”
6Kotika kawan imam kopala hintang kawan ponjaga Lopo Mohotara kito Yesus, iroh noriak, “Nyompolaki Are nyan sompolaki!”
Hien Pilatus ma iroh, “Ikan leh monu Are paluh mohukum matoi Are nyan sompolaki Awi, akuh aroko haba ico mahi kosolaai-Eh ika Are tomohukum matoi.”
7Useh kawan dulun Yahudi yoh maeh, “Kaih oko hukum agama. Monurut hukum cioh, Are sobulih tomohukum matoi. Tului, Are nisi arop-Eh Anak Mohotara!”
8Waktu Pilatus ngoneh antun cioh, are sasar takut momutus porokara cioh. 9Paluh, are muntam hopuli hia ponah istana. Yesus mahi tomehen muntam ka, Pilatus ngisok ma-Are, “Iko borasar ingkan omoh?”
Tapi Yesus aroko museh. 10Maka, Pilatus mantun ma-Eh, “Iko aroko kolu hopander ma akuh, pai!? Iko sobulih monau bahawa akuh bokuasa ika mombebas Iko. Akuh mahi bokuasa ika umpi ina Iko tomohukum matoi nyan sompolaki!”
11Hien Yesus, “Iko oko kuasa tohimo Akuh baya awi Mohotara co mihi iko kuasa cioh. Tului iyoh, dulun co nyarah Akuh hia iko, are ocop umpi dosa co meleh bahai hangki dosa co tongompiam mu.”
12Mulai ingkan iyoh, Pilatus nyau mombebas Yesus. Tapi, kawan dulun Yahudi noriak, “Dulun cotuh nisi arop-Eh laca. Sika dulun co mongaku arop eh laca, are iyohco ngolawan Kaisar. Jadi, amun iko mombebas Are, borati iko mahi ngolawan Kaisar.”
13Kotika Pilatus ngoneh iyoh, are nyuhu ika Yesus tomehen hia luar. Pilatus tuot nyan korusi pongadilan co nyan ika co araieh ‘Saoh Batu’. (Aran ika cioh ponah bohasa Ibrani iyohco Gabata.) 14Kotika cioh jonyo jam duo balas maondo ondo jomahat, iyohco ondo dulun Yahudi mondakan posiapan ina ondo raya paskah. Pilatus mantun ma kawan dulun Yahudi taiyoh, “notoehboh! Tuhboh Laca me!”
15Iroh noriak, “Ngompatoi Are! Ngompatoi Are! Nyompolaki Are nyan sompolaki!”
Hien Pilatus ma iroh, “Mainboh ikan nyau akuh mohukum matoi laca me nyan sompolaki?”
Kawan imam kopala museh, “Kaih aroko empun laca bokon ma Kaisar!” 16aKojekaieh Pilatus nyarah Yesus ma iroh ina tonyompolaki.
Yesus tonyompolaki nyan sompolaki
19:16b-27
(Mat. 27:32-38; Mrk. 15:21-27; Luk. 23:26,33-43)
16bPaluh, iroh mehen Yesus hia luar kota Yerusalem. 17Yesus nyanon tarop sompolaki-Eh hia ika co tonisi ‘Ika Ongang’. (Ponah bohasa Ibrani ika cioh tonisi ‘Golgota’.) 18Nyan intin kawan tontara Roma nyompolaki Are nyan sompolaki yoh. Nyan ika cioh ka, homboh-homboh duo dulun bokon mahi tonyompolaki nyan sompolaki hopomasing-ico nyan topit kontoui hintang icoeh kole nyan topit komuloi Yesus. Yesus nyan owang tohu. 19Pilatus nyuhu ika matop tulisan cotuh nyan topit hunyung sompolaki cioh. Naiieh, ‘Tuhboh Yesus, dulun Nasaret, Laca dulun Yahudi.’ 20Orong dulun Yahudi mombaca tulisan cioh awi ika Yesus tonyompolaki aroko ocu ingkan kota. Bokon ma iyoh, kawan antun cioh tonulih ponah bohasa Ibrani, bohasa Latin hintang bohasa Yunani.
21Kawan imam kopala mantun ma Pilatus, “Aroh nulih ‘Laca dulun Yahudi’. Tapi nulih leh santuh: ‘Dulun cotuh mantun Are iyohco Laca dulun Yahudi.’ ”
22Tapi Pilatus museh, “co ocop tonulih kuh, olueh tenden totulih!”
23Opah kawan tontara nyompolaki Yesus nyan sompolaki yoh, iroh monu lembon-Eh. Lembon cioh tomagi opat, hopomasing tontara haba ico bagian. Iroh mahi monu jubah-Eh. Jubah cioh arelu oko sambungan tusuk, tapi baya ponah ico bagian leh ingkan hunyung dapot pinda. 24Kawan tontara taiyoh mantun ico ma co bokon, “Aroh ito hotirat-tirat jubah cotuh. Haas ito moundi ika nantu ome co habaeh.” Iyoh tojadi ina antun co tonulih nyan Surat Borasih jarin nyata. Tuh tulisan eh:
“Iroh hobagi lembon-Kuh.
Iroh moundi indan jubah-Kuh.”#19:24 Ingkan buku Masmur 22:19.
Aang cioh tongompian kawan tontara taiyoh.
25Tinan Yesus tonjok nyan dokin sompolaki Yesus. Nyan intin mahi tonjok konduang tinan Yesus, Maria (iyohonon oruh Klopas), hintang ka Maria Makdalena. 26Nyan topit tinan Yesus iyohco murid co poko tongasihi Yesus. Kotika Yesus noto iroh ruo, Are mantun ma tinai-Eh, “Ine, are jarin isan anakmu makitu!” 27Are mahi mantun ma murid-Eh yoh, “Angapboh are isan tinammu makitu!” Kotika iyoh, murid cioh norima tinan Yesus nukui nyan lopoeh.
Yesus matoi
19:28-37
(Mat. 27:45-50; Mrk. 15:33-37; Luk. 23:44-46)
28Yesus monau bahawa kokon gawi-Eh ocop umbot. Awi iyoh, Are mantun, “Akuh haus!” Are mantun iyoh ina antun co tonulih nyan Surat Borasih jarin nyata.#19:28 Noto buku Masmur 22:16 hintang 69:22.
29Nyan intin oko mangkuk danum angur mosom. Paluh iroh monculup somacam sabut hia ponah angur co mosom cioh hintang molilit eh nyan ico doroh komulan co araieh hisop kawun tonyoro hia baun Yesus. 30Opah Yesus nongkomo danum angur cioh, Are mantun, “Ocop umbot!” Paluh, Are potukup kuhung-Eh, hintang nyarah tambung songai.
31 Kondai cioh ondo Jomahat, iyohonon ondo ika mondakan posiap sorinai ondo Sabat. Kawan pomimpin dulun Yahudi aroko kolu kawan ontun doh yoh tenden oko nyan sompolaki hiah ondo Sabat, husus ondo raya Paskah. Jadi, iroh dombut hia gubernur Pilatus nyawot ina paan kawan dulun taiyoh tomolok, ina kawan dulun taiyoh jion matoi. Paluh, kawan ontuieh lian tomotoka sorinai ondo Sabat molai nyan momi cioh. 32Paluh, kawan tontara taiyoh tulak hia ika dulun co tomohukum matoi nyan sompolaki yoh hintang iroh molok paan dulun co portama kawun molok paan dulun co bokon eh co ocop tonyompolaki homboh ma Yesus yoh.
33Tapi, kotika iroh dapot Yesus, iroh kito bahawa Are ocop matoi. Jadi, iroh aroko molok paai-Eh. 34Tapi ico ingkan tontara taiyoh nowok bolikat Yesus ma lunju. Daha hintang ojo holuh leleh pusit. 35(Dulun co bosaksi tintun iyoh ocop kitoeh ma mataieh leh. Are monau poristiwa cioh bujur-bujur tojadi. Kosaksian eh bujur ina ikan mahi lian porocaya.) 36Iyoh tojadi ika ome co tonulih ponah Surat Borasih jarin nyata: “Arelu oko tulang-Eh co angar tomolok.”#19:36 Ingkan buku Klu. 12:46; Bil. 9:12; Msm. 34:21. 37Oko ka tonulih nyan Surat Borasih: “Iroh angar nolangon Are co ocop tonowok doh.”#19:37 Ingkan buku Jakaria 12:20. Noto ka buku Wahyu 1:7.
Yesus tongolowong ponah guha
19:38-42
(Mat. 27:57-61; Mrk. 15:42-47; Luk. 23:50-56)
38Opah iyoh, Yusup dombut hia gubernur Pilatus nyawot ijin ika potoka ontun Yesus ina tongolowong. (Yusup yoh borasar ingkan kota Arimatea. Are iyohco murid Yesus, tapi aroko socara nontoluha, awi are takut ma kawan pomimpin Yahudi.) Pilatus mihi ijin indaieh. Jadi, are tulak potoka ontun Yesus. 39Nikodemus mahi dombut hia intin. (Are co batuh dombut nyopopak Yesus hiah ondo mamalom.)#19:39 Noto Yohanes 3:1-2. Nikodemus mehen ramuan indan ontun Yesus, campuran mur hintang garu, sokitar tolum pulu kilo. 40Iroh monu ontun Yesus, paluh mungkuh eh ma benang kaci homboh ma ramuan cioh. Iyoh sosuai ma cara dulun Yahudi nyiap ontu ika tongolowong. 41Dokin ika Yesus tonyompolaki oko kabun. Nyan ponah kabun cioh oko guha ika kolowong co arinai piji tohapan ika ngolowong dulun. 42Iroh sobulih gasak-gasak ngolowong Yesus awi ondo Sabat jonyo molai. Awi kolowong cioh dokin, maka iroh ngolowong Yesus nyan intin.
Currently Selected:
Yohanes 19: TBSS
Highlight
Share
Copy
Want to have your highlights saved across all your devices? Sign up or sign in
