Yohanes 18
18
Yesus tonawan
18:1-11
(Mat. 26:47-56; Mrk. 14:43-50; Luk. 22:47-53)
1Opah Yesus mantun kokoieh yoh, Are tulak hia pohoi sungoi Kidron homboh ma kawan murid-Eh. Nyan intin oko kabun. Are hintang kawan murid-Eh muntam hia kabun cioh. 2Yudas, iyohco dulun co nyarah Yesus ma kawan musuh-Eh yoh, tomonaueh ka ika cioh. Awi, Yesus hintang kawan murid-Eh derek hokumpur nyan intin. 3Yudas dombut hia intin mehen pira-pira dulun ika nawan Yesus. Oko pira-pira ponjaga Lopo Mohotara co tonyuhu pian kawan imam kopala hintang kawan pomimpin agama Yahudi ingkan pira-pira dulun Parisi. Oko ka pasukan tontara Romawi. Iroh dombut mehen lampu, culuk hintang capa. 4Tapi, Yesus ocop monau kokon aranaang co angar tojadi ma Arop-Eh. Jadi, Are ngoroni iroh, paluh ngisok, “Omeboh co tonganyap me?”
5Useh doh, “Kaih nganyap Yesus ingkan desa Nasaret.”
Hien Yesus, “Akuhboh Are.”
(Yudas co mohianat Yesus, are mahi tonjok halo iroh.) 6Waktu Yesus mantun ‘Akuhboh Are’, maka kokon doh surut, paluh kolungkang potokangah nyan tana.#18:6 Oko bopira ahli Alkitab co bopikir Yesus hapo aran Mohotara nyan intoi (AKUH IYOH CO AKUH), husus eh awi iroh ‘kolungkang’ opah ngoneh iyoh.
7Sindo kole Yesus ngisok ma iroh, “Ome co tonganyap me?”
Hien doh, “Kaih nganyap Yesus ingkan desa Nasaret.”
8Useh Yesus, “Akuh ocop mantun ma ikan bahawa Akuhboh Are. Jadi, amun ikan nganyap Akuh, olueh boh kawan murid-Kuh tuh tulak.” 9(Iyoh tojadi ina antun Yesus niin jarin nyata, iyohonon antun Yesus hiah waktu Are bodoa hia Mohotara Tama. Hie-Eh, “Ingkan kawan dulun co ihim Mu ma-Akuh, arelu oko co lumat.”)
10Simon Petrus co oko mehen padang, nyopet padang eh, lansung nyarang ico polayan Imam Kopala co poko bokuasa. Aran polayan cioh Malkus. Petrus nelas tolingan kontouieh dapot telas. 11Tapi Yesus mantun ma are, “Ngumpang padang conon hopuli. Mambu akuh aroko sobulih ngorih ingkan cangkir co ihin Tama indang-Kuh?”
Yesus nyan tohimo Imam Kopala co poko bokuasa hintang rasul Petrus mantun arop aroko nyono Yesus
18:12-27
(Mat. 26:57-75; Mrk. 14:53-72; Luk. 22:54-71)
12Opaiyoh, kopala pasukan homboh ma pasukan eh hintang kawan ponjaga Lopo Mohotara co tonyuhu pian kawan pomimpin agama Yahudi yoh nawan Yesus paluh mowot silui-Eh. 13Portama-tama iroh mehen Are hia Hanas, awi Hanas iyohco umpu Kayapas, co nyan toun cioh jarin imam co poko bokuasa. 14Nohani Kayapas co piji mantun ma kawan pomimpin dulun Yahudi, santuh: “Meleh pio amun ico dulun leh matoi indan bangsa to.”#18:14 Noto Yohanes 11:49-50.
15Simon Petrus hintang ico murid bokon ngonulu Yesus. Murid bokon cioh nyono Imam Kopala co poko bokuasa. Jadi, are muntam hia polontaran lopo Imam Kopala cioh homboh ma Yesus hintang rombongan taiyoh. 16Tapi Petrus nukui nyan luar, dokin tungkang pagar lopo cioh. Jadi, murid co bokon cioh hopuli hia luar, paluh hopander ma polayan co bawe co monjaga tungkang cioh. Paluh, murid co bokon cioh boraoi mehen Petrus muntam hia polontaran lopo cioh ka. 17Polayan bawe cioh kojuan ngisok ma Petrus, “Iko mahi murid Dulun co tonawan codi mikeh eh?”
Useh Petrus, “Akuh bokon murid-Eh!”
18Hiah momi cioh hawa sorongin. Jadi, kawan polayan Imam Kopala homboh ponjaga Lopo Mohotara ocop pokori apui ingkan arang. Iroh tonjok dokin apui cioh ika ngompanai beti. Petrus tonjok halo iroh, ngompanai beti ka.
19Paluh, molai bat Imam Kopala co poko bokuasa ngisok Yesus tintun kawan murid-Eh hintang tintun ajaran-Eh. 20-21Tapi Yesus mantun maeh, “Kura iko ngisok Akuh? Akuh horoholuh hopander sak rak nyan tohimo dulun ngarun. Akuh horoholuh majar nyan kawan lopo ika sombayang, hintang nyan Lopo Mohotara ka, ika kokon dulun Yahudi hokumpur. Akuh aroko piji hopander cuhuk-cuhuk. Ngisok leh iroh co ocop ngoneh kawan ajaran-Kuh. Mositi tomonau doh ome co tomantun-Kuh.”
22Oko ponjaga co tonjok nyan intin. Kotika Yesus mantun sanioh, are ngapek tampa Yesus. Hieeh, “Nain onon jah Iko mantun ma Imam Kopala co poko bokuasa!”
23Useh Yesus, “Sompamaeh, Akuh mantun aranaang co sala, porahan kosalaeh. Tapi, amun Akuh mantun co buah, kura iko nampar Akuh?”
24Opaiyoh, Hanas nyuhu ina Yesus tomehen hia Kayapas, Imam kopala co poko bokuasa. Kotika cioh, silun Yesus incah bopowot.
25Simon Petrus incah tonjok dokin apui cioh, ngompanai betieh. Oko pira-pira dulun co oko nyan intin mantun maeh, “Iko mahi murid Dulun co tonawan codi mikeh eh?”
Tapi Petrus aroko mongaku. Hieeh, “Akuh bokon murid-Eh!”
26Paluh, oko polayan Imam Kopala co poko bokuasa nyan intin. Are hobobuhan ma polayan co tolingaieh tonelas Petrus. Are mantun, “Niin kitang kuh iko nyan kabun cioh homboh-homboh ma Are. Bujur, mikeh eh?”
27Tapi Petrus mantun kole bahawa are aroko nyono Yesus. Nyan waktu cioh ka, manuk nondu.
Yesus nyan tohimo Gubernur Pilatus
18:28-38a
(Mat. 27:1-2,11-14; Mrk. 15:1-5; Luk. 23:1-5)
28Ngonyua-nyua lau, iroh mehen Yesus ingkan lopo Kayapas hia istana gubernur, pomorintahan Romawi. Iroh aroko muntam hia ponah istana cioh, awi are bokon dulun Yahudi. Iroh aroko kolu jarin luse monurut agama doh tului iroh nyau umba kuman indan Ondo Raya Paskah. 29Tului iroh aroko muntam, gubernur Pilatus pusit nyopopak iroh. Are ngisok, “Ome tondah me tohimo Dulun cotuh?”
30Hien doh, “Dulun cotuh ponjahat. Amun aroh, kaih aroko mehen-Eh hia iko.”
31Hien Pilatus ma iroh, “Ikan leh mehen Are paluh momutus Are sosuai ma hukum me.”
Tapi kawan dulun Yahudi yoh mantun, “Pomorintah Romawi aroko kuhan bangsa kaih mohukum matoi dulun.” 32(Iyoh tojadi ina antun Yesus jarin nyata, iyohonon antun Yesus tintun caraeh Are angar matoi.)#18:32 Yesus mantun Are angar matoi nyan sompolaki (Noto Yohanes 3:14 hintang 12:32). Onon caraeh dulun Romawi mohukum matoi dulun, bokon cara dulun Yahudi. Dulun Yahudi mohukum matoi ma cara medak hapo batu.
33Pilatus muntam kole hia ponah istanaeh holuh nyuhu ika Yesus tomehen muntam. Pilatus ngisok ma-Are, “Mainboh Iko laca dulun Yahudi?”
34Hien Yesus, “Mainboh kisok mu non ingkan iko leh, atawa oko dulun bokon co ocop mantun ma iko tintun Akuh?”
35Hien Pilatus, “Akuh bokon dulun Yahudi! Bangsa-Mu leh hintang kawan imam kopala co nyarah Iko hia akuh. Kosolaan ome co ocop Iko umpieh?”
36Useh Yesus, “Korojaan-Kuh aroko borasar ingkan dunia tuh. Sompamaeh Korojaan-Kuh ingkan dunia tuh, maka kawan dulun co molayani Akuh ocop ngolawan ina Akuh aroko tonyarah hia kawan pomimpin Yahudi. Tapi mula Korojaan-Kuh aroko ingkan dunia tuh!”
37Maka Pilatus ngisok ma-Eh, “Amun sanioh Iko mula laca, jah?”
Hien Yesus, “Iko co mantun bahawa Akuh iyohco laca. Otuhboh alasan Akuh tonganak, Akuh dombut hia dunia tuh. Iyohonon, ina Kuh bosaksi tintun ome co buah. Kokon dulun co nyau bolum ponah ome co buah, iroh ngoneh antun-Kuh.”
38aHien Pilatus ma-Eh: “Omeboh co buah yoh?”
Koputusan ika Yesus tomohukum matoi
18:38b–19:16a
(Mat. 27:15-31; Mrk. 15:6-20; Luk. 23:13-25)
38bOpah Pilatus mantun iyoh, are pusit kole, nyopopak kawan dulun Yahudi taiyoh. Hieeh ma iroh, “Akuh ocop morisa Dulun conon. Akuh aroko haba ico kosolaai mahi ma-Are. 39Tapi, biasaeh, hiah sika Ondo Raya Paskah, akuh pokusit ico dulun ingkan seper indam me, dulun Yahudi. Kolu pai ikan ina kuh mombebas Dulun conon, Laca dulun Yahudi?”
40Tapi, iroh noriak hopompaluh, “Aroh! Aroh mombebas Are. Mombebas leh Barabas!” (Nah, Barabas iyohco porampuk co ngolawan pomorintah Romawi.).
Currently Selected:
Yohanes 18: TBSS
Highlight
Share
Copy
Want to have your highlights saved across all your devices? Sign up or sign in
