Римэйхиндэ 10
10
1Аха дүүнэр! Израилиин арад зоной абарагдахые би бүхы зүрхэ сэдьхэлээрээ хүсэнэб, тэрээн тухай Бурханда зальбарнаб. 2Тэдэнэр Бурханда һүгэдэдэг гэжэ гэршэлнэб, гэхэтэй сасуу тэдэнэй хайра дуран үнэн зүб мэдэрэл дээрэ оршоногүй. 3Тэдэнэр Бурханай урда яажа үнэн сэдьхэлтэй байхые мэдэнгүй, өөһэдынхеэрээ болоод, Бурханай мэдэлһээнь гаран, үнэн сэдьхэлтэй болгодог Бурханай замһаа хадуурна. 4Ушарынь хэлэбэл, һүзэглэһэн хүн бүхэнэй үнэн сэдьхэлтэй болохын тула Христоос Хуулиин зорилго бэелүүлнэ.
Һүзэглэгшэдэй абаралга
5Хуули сахин үнэн сэдьхэлтэй болохо тухай: «Хуулиин зүйл бүхэнииел сахижа ябаһан хүн амиды ябаха», – гэжэ Моисей бэшээ. 6Харин һүзэгэйнгөө ашаар үнэн сэдьхэлтэн гэжэ тоологдодог зондо хэлэгдэнэ: «Христоосые өөһэдтөө буулгахаяа тэнгэри өөдэ хэн гарахаб гэжэ өөрэһөөн һураһанай хэрэггүй». 7Али «Христоосые үхэлһөө бодхоохын тула үхэлэй доодо орондо бууһанай хэрэггүй».
8Юундэб гэбэл, «Бурханай үгэ шамтай хамта байна, хэлэ амандашни, зүрхэ сэдьхэлдэшни оршоно». Эгээл тэрэ мэдээсэлые бидэ таанадта номнонобди. 9Хэрбээ Иисүүсые Эзэн гэжэ айладхаад, Бурхан Тэрэниие амидыруулаа гэжэ зүрхэ сэдьхэлээрээ этигэжэ байбал, ши абарагдахаш. 10Зүрхэ сэдьхэлээрээ һүзэглэһэнэйнгөө ашаар бидэ үнэн сэдьхэлтэн болонобди, хэлэ амаараа айладхан, абарагданабди. 11«Тэрээндэ һүзэглэһэн хүн урмаа хухархагүй», – гэжэ Нангин Бэшэг соо хэлэгдэнэ. 12Еврей хүн гү, али ондоо яһанай хүн гү, ямаршье илгаагүй юм. Эзэн хүн бүхэндэ ори ганса юм, тиин Тэрээндэ хандаһан хүн бүхэниие Тэрэ элбэг дэлбэгээр үршөөлдөө хүртөөдэг. 13«Эзэнэй нэрэ дуудаһан хүн бүхэн абарагдаха», – гэжэ Нангин Бэшэг соо хэлээтэй байдаг.
14Тиигээд Тэрээндэ һүзэглөөгүй хүнүүд яажа Тэрэниие гуйн дуудахаб? Тиихэдэ Тэрээн тухай соносоогүй аад, яажа һүзэглэхэб? Тиихэдэ номногшо хүнэй үгы байбал, яажа мэдээсэлые соносохоб? 15Тиихэдэ номногшодые ябуулаагүй һаа, яажа мэдээсэлые номнолтойб? «Һайн Мэдээсэл дэлгэрүүлэгшын алхамууд хэды дэмбэрэлтэйб», – гэжэ Нангин Бэшэг соо хэлэгдэнэ. 16Гэхэтэй сасуу Һайн Мэдээсэлдэ булта этигээгүй. «Эзэн аа, бидэнэй хэлэһэн үгэнүүдтэ хэн этигээ юм?» – гэжэ Исай лүндэншэн хэлэнэ. 17Тиимэһээ һүзэгтэй болохын тула хүн мэдээсэл дуулаха ёһотой, тиин мэдээсэлэй үгтэхын тула Христоос тухай номногдохо ёһотой.
18Израилиин арад зон мэдээсэл соносоогүй аал гэжэ би асуунаб. Юундэ соносохогүйб,
«Тэдэнэй хэлээшэнь бүхы газар дэлхэйгээр тараа,
тэдэнэй үгэнүүдынь газар дэлхэйн заха хизаар хүрөө», – гэжэ Нангин Бэшэг соо хэлэгдэнэ.
19Израилиин арад ойлгоо гү, али үгы гү гэжэ би дахин асуунаб. Моисей өөрөө энээндэ Эзэнэй нэрэһээ харюу үгөө:
«Тиимэһээ Би арад боложо бүрилдөөдүй уладаар
тэдэниие атаархуулжа,
тэнэг зоноор тэдэнэй уур сухал хүргэхэб».
20«Намайе бэдэрээгүйшүүлдэ Өөрыгөө олуулааб.
Намайе гуйгаагүй зондо
Би Өөрыгөө элирхэйлээб», – гэжэ Исайшье Бурханай нэрэһээ зоригтой хатуугаар айладхана.
21«Үгэ дууладаггүй, үһэрхүү зүрюу арадта Эзэн бүхэли үдэрөө гараа һунган байгаа», – гэжэ Исай Израилиин арад тухай хэлэнэ.
Currently Selected:
Римэйхиндэ 10: BurBBL2024
Highlight
Share
Copy
Want to have your highlights saved across all your devices? Sign up or sign in
© Институт перевода Библии, перевод, комментарии, 2024
© Российское Библейское Общество, перевод, комментарии, 2024
© Оформление. Институт перевода Библии, 2024
