Римэйхиндэ 9

Бурхан болон тэрэнэй арад

1Христоосто һүзэглэдэг би үнэн зүбые хэлэнэб, худалаар хэлэнэгүйб. Тиин Арюун Һүлдэшье, һэшхэлнишье минии хэлэһые үнэн гэжэ гэршэлнэ. 2Би угаа ехээр гашууданаб, зүрхэ сэдьхэлни зогсонгүй үбдэнэ. 3Өөрынгөө арадые абархын түлөө Бурханай хараалда хүртөөд, Христоосһоо холодуулхадашье би бэлэнби. 4Тэдэ израильшууд Бурханай шэлэжэ абаһан хүнүүд юм. Бурхан тэдэндэ алдараа харуулаа, тэдэнтэй хэлсээ баталаа, тэдэндэ Хуули, тиигээд шүтэлгын Һүмэ ба найдуулгаа үгөө. 5Тэдэнэр агууехэ үбгэ эсэгэнэртэй, тиихэдэ Бурханай табисуурта бэеэрээ баһал тэдэнтэй нэгэ яһанай хүн юм. Бүхы юумые захиржа байһан Бурхан хэтын хэтэдэ магтаал солотой байһай гэжэ би зальбарнаб! Болтогой!

6Бурхан амалһан юумэеэ дүүргээгүй гэжэ хэлэхын аргагүй. Һүүлэй һүүлдэ Израилиин арад зон бултадаа Бурханай бодото хүнүүд бэшэ. 7Тиин Абраһаамай үри һадаһад бултадаа Бурханай үхибүүд бэшэ. «Исаагаар дамжан, ши Минии үгэхэб гэһэн үри хүүгэдтэй болохош», – гэжэ Бурхан Абраһаамда хэлээ. 8Ондоогоор хэлэбэл, юрын аргаар түрэһэн үхибүүд#9:8 Эндэ Абраһаам ба Һагаар гэдэг барлаг эхэнэр хоёрһоо түрэһэн Ишмаһээл хүбүүнэй үри һадаһад тухай хэлэгдэнэ. Эхин 18:10, 14 хара. Бурханай үхибүүд бэшэ. Бурханай найдуулһанай ёһоор лэ түрэһэн үхибүүд бодото үри һадаһад гэжэ тоологдодог. 9«Хойто жэл энэл сагтаа Би дахин ерэхэб, тиихэдэмни Сарра хүбүүтэй болоод байха», – гэжэ хэлэһэниинь Бурханай найдуулһан үгэ байгаа.

10Энээнһээ гадна Рэбээккаа ба манай үбгэ эсэгэ Исаагай хоёр хүбүүтэй болоходо, тиимэ юумэн баһа тохёолдоо һэн. 11-12Үшөө тэдэ хоёрой түрөөгүй, һайн гү, али муу юумэ хээгүй байхадань, «Ахань дүүгэйнгээ зараса болохо», – гээд Эзэн Рэбээккаада хэлээ. Тиигэжэ хэлэхэдээ, Эзэн хүнүүдэй хэрэгүүдээр бэшэ, харин Өөрынгөө эрхэ хүсэлөөр шэлэжэ байһанаа харуулаа. 13«Би Яковые һайшаанаб, харин Эсаавые үзэн яданаб», – гэжэ Нангин Бэшэг соо хэлээтэй байдаг.

14Зай, тиихэдээ Бурхан үнэн зүб бэшэ гэжэ хэлэхэмнай гү? Үгыл даа! 15Тэрэ Моисейдэ: «Хэниие үршөөлдэ хүртөөхэ гэбэл, хүртөөхэб, хэниие хайрлаха гэбэл, хайрлахаб», – гэжэ хэлээ. 16Тиимэһээ бүхы юумэн бидэ хүнэй хүсэһэнһөө гү, али хэһэнһээ бэшэ, харин Бурханайл үршөөһэнһөө дулдыдана. 17«Өөрын хүсэ шадал шамда харуулжа, Өөрын нэрэ соло бүхы дэлхэйгээр суурхуулхын тула Би шамайе хаанаар табяа хүм», – гэжэ Эзэн Египедэй фараондо Нангин Бэшэг соо хэлэнэ. 18Тиимэһээ Бурхан дуратайл хүнөө үршөөнэ, дуратайл хүнөө зүрюу болгоно.

19«Тиигэбэл Бурхан юундэ хүниие зэмэлнэб? Бурханай эрхэ хүсэлдэ хэн эсэргүүсэхэ аргатайб?» – гэжэ хэн нэгэн намһаа һураха. 20Ай, нүхэр, Бурханда үсэрхэжэ байхаар ши хэн гээшэбши? Бүтээлынь тэрэниие бүтээгшэдэ: «Юундэ намайе иигэжэ бүтээгээбта?» – гэжэ хэлэхэ аал? 21Домбонуудые бүтээдэг хүн нэгэл адли шабарһаа тусгай хэрэглэлэй домбо ба үдэр бүхэн хэрэглэгдэдэг юрын домбо бүтээхэ эрхэтэй бэшэ аал?

22Бурхан уур сухалаа харуулхаяа, һүр жабхалангаа элирүүлхэеэ һанаа, гэхэдэ, хосорхо заяатай хүнүүдтэ тэрэ ехэл тэсэбэритэйгээр хандана. 23Бурхан алдартаа хүртөөхэ гэжэ бэлдээд байһан үршөөлтэ хүнүүдтээ баһал элбэг дэлбэг алдараа элирүүлхэеэ хүсэнэ. 24Бидэ гансал еврейнүүдэй дундаһаа бэшэ, харин бусадшье арадуудай дундаһаа шэлэгдэжэ абтаһан хүнүүд гээшэбди. 25Тон тиигэжэл Эзэн Һошээгэй ном соо хэлэнэ: «Минии арад бэшэшье һаань,

Би тэдэниие Өөрын арад болгохоб.

Дурагүй байһан яһатандаа

Би хайра дуратай болохоб».

26«Таанад Минии арад бэшэт гэжэ хэлэгдэһэн

эгээл тэрэ һууринда тэдэнэр

Амиды Бурханай үхибүүд гэжэ нэрлүүлхэ».

27-28«Эзэн зарга шүүбэреэ газар дэлхэй дээрэ шуумгайгаар ябуулха. Тиимэһээ Израилиин арад зоной далайн элһэндэл адли тоогүй олон байгаашье һаань, тэдэнэй үсөөниинь абарагдаха», – гэжэ Израилиин арад тухай Исай лүндэншэн айладхаа. 29«Хэрбээ Һүр хүсэтэй Эзэн маанадта энэ жаахан үлэгдэл үлөөгөөгүй һаань, бидэ Содомдол адли һүнөөгдэхэ, Гоморродол адли усадхагдаха байгаабди», – гэжэ баһал Исай лүндэншэн уридшалан хэлэнэ.

Израиль болон Һайн Мэдээсэл

30Зай, юун гэжэ хэлэхэбибди? Бурханай урда үнэн сэдьхэлтэй байхые оролдоогүй бусад арадууд һүзэгэйнгөө ашаар үнэн сэдьхэлтэй болоо. 31Харин Хуули сахин үнэн сэдьхэлтэй болохые зориһон Израилиин арад зон үнэн сэдьхэлтэй болоогүй. 32Юундэ болоогүйб? Юуб гэбэл, тэдэнэр этигэл һүзэгтөө бэшэ, харин хэрэгүүдтээ найдаа. Тиимэһээ «бүдэрдэг шулуунда» тэдэнэр бүдэрөө. 33Бурхан Нангин Бэшэг соо тон тиигэжэ хэлэнэ: «Хара даа! Би Сион дээрэ хүнүүдэй бүдэрдэг шулуун, хүнүүдэй торожо унадаг шулуун табинаб. Харин Тэрээндэ һүзэглэһэн хүн хэзээдэшье урмаа хухархагүй».

Currently Selected:

Римэйхиндэ 9: BurBBL2024

Highlight

Copy