Марк 4
4
(Мт 13:1-9; Лк 8:4-8)
1Иисүүс Галилей далайн дэргэдэ хүн зониие дахин һургаба. Тойроод олон мянган зоной суглархада, Иисүүс онгосодо һууха болобо. Онгосонь далайн уһанда, харин хүн зон эрье дээрэ зогсожо байгаа һэн. 2Тиигээд Иисүүс һургаалта үгэнүүдые хэрэглэн, арад зондо ухаа зааба:
3– Шагнагты даа! Нэгэ таряашан таряа тарихаяа гараба. 4Үрэһэеэ сасахадань, зариманиинь харгын хажууда унаба, тэдэнииень шубууд ерэжэ тоншобо. 5Зарим үрэһэниинь хүрьһэ багатай, шулуутай газарта унаба, тиигээд нимгэн хүрьһэтэй газарһаа түргэн бултайба. 6Харин наранай гарахада, гүнзэгы үндэһэлөөгүй зүлгэ ногоон уршыгаад хатажа байгаа. 7Баһа зарим үрэһэнүүд үүргэнэ соо унажа, хөөгтэ даруулаад, ургаса үгэжэ шадабагүй. 8Зарим үрэһэниинь үрэжэлтэй газарта унажа, ехэ һайн ургаса үгэбэ: тариһанда орходоо гуша, жара, али зуу дахин ехэ ургаса абтагдаба.
9Тиигээд Иисүүс:
– Шэхэтэй юм һаа, анхарагты, – гэбэ.
Һургаалта үгэнүүдэй зорилго
10Зоной тарахада Иисүүсэй арбан хоёр элшэнэр, үшөө нэгэ хэды хүн Тэрээнтэй үлөөд, хөөрэһэн һургаалта үгэнүүдээ тайлбарилжа үгэхыень гуйба. 11Иисүүс тэдэндэ:
– Бурханай хаан түрэ тухай гүн нюусанууд таанадтал тайлбарилагдана, харин танһаа гадуур байһан зондо Би һургаалта үгэнүүдээр хөөрэнэ гээшэб. 12Тиимэһээ:
«Тэдэнэр хараба, шэртэбэшье,
юумэ обёорхогүй.
Тэдэнэр сонособо, шагнабашье,
юумэ ойлгохогүй.
Хэрбээ юумэ обёордог, ойлгодог һаа,
тэдэ Бурханда хандаха байгаа,
харин Бурхан тэдэниие хүлисэхэ һэн».
Таряашан тухай һургаалта үгэнүүдээ Иисүүс тайлбарилжа үгэнэ
13Удаань Иисүүс һураба:
– Эдэ һургаалта үгэнүүдые таанад ойлгоногүй аалта? Тиихэдээ бусад һургаалта үгэнүүдые яажа ойлгохотнай гээшэб? 14Тайлбарилан хэлэбэл, тарилгашан Бурханай үгэ тарина гээшэ. 15Бурханай үгэ дуулабашье, тэрээндэ гүйсэд һаналаа табяагүй хүндэ шолмос ерээд, сэдьхэл зүрхэндэнь һуурижаагүй үгэ абаад арилшадаг – харгын хажууда таригдаһан үрэһэн тон энээндэл адли юм. 16Шулуутай газарта таригдаһан үрэһэн тухай хэлэбэл, иимэ: али нэгэ хүн үгэ шагнаад, тэрээниие абаһаар лэ баяртайгаар сахина, 17зүгөөр тэрэ үгэ сэдьхэлдэнь гүнзэгыгөөр үндэһэлөөгүйдөө, удаан тогтоногүй. Үгэһөө боложо бэрхэшээлэй тудаа һаань, али мүрдэлгэ зоболонгуудай дайраа һаань, энэ хүн айһан һүрдэһэндөө Бурханай үгэһөө тэрэ дороо арсаха. 18Үүргэнэ соо унаһан үрэһэн тухай удхалбал, иимэ байна: хэн нэгэн Бурханай үгэ шагнабашье, 19энэ оршолонгой байдалда дашууран абтаһандаа, баялиг зөөридэ, тэрэ мэтын элдэб юумэнүүдтэ шунаһандаа үгын удха ойлгодоггүй, тиимэһээ тэрэ үгэ ямаршье үрэгүй байдаг. 20Үрэжэлтэй хүрьһэндэ ургаһан үрэһэн иимэ удхатай: Бурханай үгэ шагнаад, тэрэниие хэшээлтэйгээр сахижа байһан хүнүүд саашадаа аша туһатай юм. Нэгэ зариманиинь зуу дахин, нүгөөдүүлынь жара дахин, бусадынь гуша дахин үлүү үрэ дүн асардаг.
Зулын гэрэл
21Иисүүс үргэлжэлүүлбэ:
– Таанад зула аһаагаад, тэрэнээ ямар нэгэн амһартаар бүглэдэггүйт, али орон дороо табидаггүйт. Харин тэрэнээ үндэр табюур дээрэ табидаг ха юмта. 22Ямаршье нюуса заабол эли болодог, ямаршье далда юумэн заабол мэдэгдэдэг юм. 23Тиимэһээ шэхэтэй юм һаа, анхарагты.
24Дуулажа байһан юумэеэ анхаралтайгаар шагнагты! Ямар хэмжээгээр хэмжэнэбта, тэрэл хэмжээгээр, үшөө нэмээдшье Бурхан таанадта хэмжэжэ үгэхэ#4:24 Хоёр янзаар ойлгожо болохо: 1. Ямар хэмжээгээр үгэ дууланабта, тэрэл хэмжээгээр, үшөөшье нэмээд, Бурхан таанадта ойлгосо үгэхэ; 2. Ямар хэмжээгээр бусадые шүүбэрилнэбта, тэрэл хэмжээгээр, бүришье шэрүүнээр Бурхан таанадые шүүбэрилхэ.. 25Ушарынь юуб гэбэл, юумэтэй байһан хүндэ нэмэгдэжэ үгтэхэ. Юумэгүй байһан хүнһөө һүүлшын юумэниинь абтаха.
Ургажа байһан үрэһэн тухай һургаалта үгэнүүд
26Иисүүс үргэлжэлүүлэн хэлэбэ:
– Бурханай хаан түрэ ямархан бэ? Бодоод үзэгты, нэгэ хүн газарта үрэһэ тарина, 27тиигээд һүниндөө унтана, үдэртөө бодоод ябана, зүгөөр үрэһэниинь ургажал байна. Теэд хайшан гээд ургажа байһыень тэрэ хүн мэдэнэгүй. 28Газар өөрөө үрэһыень ургуулна бшуу. Түрүүшээр ногоониинь бултайна, тиигээд залаална, хожомынь залаагаар дүүрэн орооһо таряан бии боложо эдеэшэнэ. 29Тиин ургасын эдеэшэхэдэ хуряалгын саг боложо, үнөөхи хүн хадуураа баряад хадахаяа гарадаг юм.
Горчицын үрэһэн тухай һургаалта үгэнүүд
30Иисүүс иигээд үүргэлжэлүүлбэ:
– Зай, Бурханай хаан түрэ юунтэй адлиб? Ямар һургаалта үгэнүүдээр тэрэниие тайлбарилжа болохоб? 31Бурханай хаан түрэ болбол газарта һуулгагдаһан горчицын үрэһэнтэй адли юм. Тэрэ үрэһэн бусад хүрэнгэнүүдэй захада эгээн жэжэхэншье һаа, 32ургахадаа, ямаршье ургамалһаа ехэ модон боложо ургадаг, тэнгэриин шубуудай уурхайгаа заһажа боломоор һаглагар томо һалаануудые үгэдэг.
33Хүнүүдтэй хөөрэлдэхэдөө Иисүүс бусадшье олон һургаалта үгэнүүдые хэрэглэжэ байгаа, тиихэдэ тэдэнэй ойлгожо абаха аргаар һургадаг байгаа. 34Тэдэ зондо Иисүүс гансал һургаалта үгэнүүдээр хэлэдэг бэлэй. Харин шабинартайгаа үлэхэдөө Тэрэ бүхы юумэ тайлбарилжа үгэдэг һэн.
Иисүүс шуурга номгоруулна
35Тэрэл үдэшэлэн Иисүүс шабинартаа:
– Далайн нүгөө эрьедэ гараябди, – гэжэ дурадхаба. 36Тиигээд шабинартайгаа хүн зониие орхёод, онгосоороо далай гаталба. Баһа ондоошье онгосонууд хойноһоонь тамарба. 37Гэнтэ ехэ һалхин буужа, онгосонь далайн долгиндо сохюулаад, арайл шэнгээгүйхэн, уһаар дүүрэшэбэ. 38Энэ үедэ Иисүүс тархи дороо юумэ дэрлээд онгосын һүүл хабида унтажа байгаа. Шабинарынь багшаяа һэрюулэн:
– Багша! Бидэнэй үхэхэеэ байхада, Танда хамаагүй гээшэ гү? – гэлдэбэ.
39Иисүүс бодоод, һалхи саража, долгинуудта захирба:
– Аалин бологты, намдагты! – гэжэ захирба. Тэрэ дороо һалхин намдажа, далай долгилхоёо болижо, оршон тойрон огто аалин намдуу болошобо. 40Тиигээд Иисүүс шабинартаа хандажа:
– Таанад юундэ иигэтэрээ айбабта? Этигэл һүзэггүй байна гүт? – гэбэ.
41Тэдэнь ехээр айн һүрдэһэн хадаа өөһэд дундаа:
– Һалхииешье, далайешье мэдэлдээ оруулаад байдаг Энэ хүмнай хэн гээшэб? – гэжэ бодолгото болобо.
Currently Selected:
Марк 4: BurBBL2024
Highlight
Share
Copy
Want to have your highlights saved across all your devices? Sign up or sign in
© Институт перевода Библии, перевод, комментарии, 2024
© Российское Библейское Общество, перевод, комментарии, 2024
© Оформление. Институт перевода Библии, 2024
